Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 BIKYE NYAMENLE

“Bɛbiza, Na Bɛ Sa Kɛha Ye”

“Bɛbiza, Na Bɛ Sa Kɛha Ye”

“Awulae, kile yɛ kɛ bɛsi bɛyɛ nzɛlɛlɛ la.” (Luku 11:1) Gyisɛse ɛdoavolɛma ne anu ko a hanle zɔhane edwɛkɛ ne a. Mekɛ mɔɔ Gyisɛse ɛlɛbua ye la, ɔbule mrɛlɛ nwiɔ mɔɔ kile yɛ kɛzi bɛyɛ asɔne bɛmaa Nyamenle tie la. Saa yezi ɛ nwo ɛlɛ kɛ Nyamenle tie wɔ asɔneyɛlɛ a, ɛnee ɛ nye balie Gyisɛse mualɛ ne anwo.—Kenga Luku 11:5-13.

Ɛrɛlɛ ne mɔɔ lumua la twe adwenle kɔ ahenle mɔɔ yɛ asɔne ne la anwo zo. (Luku 11:5-8) Edwɛkɛ ne se, nrenya bie nyianle ɛyɛvolɛ wɔ alevinli mu nwiɔ avinli na ɛnee ɔnlɛ aleɛ biala mɔɔ ɔbava yeamaa ye a. Ahenle mɔɔ ɛnyia ɛyɛvolɛ ne la te nganeɛ kɛ ɔwɔ kɛ ɔyɛ nwolɛ debie ndɛndɛ. Ɔnva nwo kɛ aleɛ ɛdwo la, ɔhɔle ɔ gɔnwo bie sua nu kɛ ɔmaa ye paano. Mɔlebɛbo ne, ɛnee ɔ gɔnwo ne ɛngulo kɛ ɔbadwazo ɔluakɛ ɛnee ɔ nee ye abusua ne bɛla. Noko ahenle mɔɔ ɛnyia ɛyɛvolɛ la anze ɛvɛlɛ na ɔhɔle zo ɔzɛlɛle ɔ gɔnwo ne toonwo ɔdwazole ɔmanle ye debie. *

Duzu a ɛrɛlɛ ne kile yɛ wɔ asɔneyɛlɛ nwo a? Gyisɛse ɛlɛka ahile yɛ kɛ ɔwɔ kɛ yɛkɔ zo—yɛbiza, yɛkpondɛ na yɛbɔ nu. (Luku 11:9, 10) Kɛmɔti ɛ? Asoo Gyisɛse ɛlɛkile kɛ saa yɛyɛ asɔne a ɛnee yɛlɛbɔ Nyamenle mɔɔ ɔngulo kɛ ɔtie yɛ la anlenkɛ nu? Kyɛkyɛ. Gyisɛse ɛlɛkile kɛ Nyamenle ɛnle kɛ agɔnwolɛ ne mɔɔ ɛnee ɔngulo kɛ ɔkɛyɛ la, emomu, yeziezie ɔ nwo kɛ ɔbamaa menli mɔɔ fa diedi biza debie kpalɛ la asa aha mɔɔ bɛkɛbiza la. Saa yɛkɔ zo yɛbiza a ɔkile kɛ yɛlɛ diedi zɛhae. Saa yɛkɔ zo yɛbiza a, yɛkile kɛ amgba yɛhyia mɔɔ yɛlɛbiza la na yɛdie yɛdi bɔkɔɔ kɛ Nyamenle bahola ayɛ amaa yɛ—saa ɔ nee ye ɛhulolɛdeɛ yia a.—Maake 11:24; 1 Dwɔn 5:14.

Ɛrɛlɛ ne mɔɔ tɔ zo nwiɔ la twe adwenle kɔ ‘nzɛlɛlɛ Tievolɛ,’ Gyihova anwo zo. (Edwɛndolɛ 65:2) Gyisɛse bizale kɛ: “Bɛ nuhua boni yɛɛ saa ɔ ra biza ye fɛlɛ a, ɔkɛmaa ye ɛwɔlɛ a? Anzɛɛ saa ɔbiza ye kolonvia a, ɔkɛmaa ye nyamenleakɛlɛ a?” Mualɛ ne anu la ɛkɛ—selɛ biala mɔɔ lɛ ɛlɔlɛ la ɛnrɛva debie ɛtane ɛnrɛmaa ɔ mra. Akee, Gyisɛse hilehilele ɛrɛlɛ ne anu kɛ: Saa alesama selɛma mɔɔ ɛnli munli la, “bɛfa ninyɛne kpalɛ” bɛmaa bɛ mra a, “ɛnee fane nyɛ yɛɛ Selɛ ne mɔɔ wɔ anwuma la ɛnrɛva Sunsum Nwuanzanwuanza ne”—ahyɛlɛdeɛ mɔɔ tɛla biala—ɛnrɛmaa ɔ mra mɔɔ wɔ azɛlɛ ye azo mɔɔ kɛbiza ye la ɛ! *Luku 11:11-13; Mateyu 7:11.

Nyamenle ɛziezie ɔ nwo kɛ ɔbamaa menli mɔɔ fa diedi biza  debie kpalɛ la asa aha mɔɔ bɛkɛbiza la

Duzu a ɛrɛlɛ ɛhye kile yɛ wɔ Gyihova, ‘nzɛlɛlɛ Tievolɛ’ ne anwo a? Gyisɛse ɛlɛmaa yɛanwu Gyihova kɛ Selɛ mɔɔ dwenle ɔ mra nwo na yeziezie ɔ nwo kɛ ɔbali bɛ ngyianlɛ nwo gyima la. Yemɔti, Gyihova azonvolɛ bahola abikye ye na bɛaha bɛ ahonle nu edwɛkɛ bɛahile ye. Na kɛmɔ bɛze kɛ ɔkpondɛ kɛ bɛnyia debie kpalɛ la ati, bɛbahola bɛalie kɛzi ɔbabua mɔɔ bɛkɛbiza la bɛado nu ndɛndɛ, saa mualɛ ne anyɛ mɔɔ ɛnee bɛ nye la bɔbɔ a. *

Baebolo ɛgengalɛ maa April

Luku 7-21

^ ɛden. 4 Gyisɛse ɛrɛlɛ ne kile amaamuo nee nyɛleɛ mɔɔ kɔ zo wɔ ɛkɛ la. Ɛnee Dwuuma bu ɛyɛvolɛyɛlɛ kɛ nwolɛ hyia kpalɛ. Ɛnee abusua biala to paano mɔɔ bɛbali ye kenle ko ne la, yemɔti saa ɔwie a bɛta bɛsɛlɛ bie. Bieko, saa bɛle ehyiavolɛma a, abusua ne amuala da sua ekpumgbunli ko anu.

^ ɛden. 6 Ɛnee Gyisɛse nee menli ɛlɛsuzu edwɛkɛ nwo a ɔta ɔka kɛ “ɛnee fane nyɛ” ɔfa ɔkile kɛzi debie nwo hyia la. Nwomanli ko kilehile zɛhae ndotonwo ne anu kɛ: “Saa edwɛkɛ, ‘Mɔɔ lumua la le nɔhalɛ a, ɛnee mɔɔ bɛha nwolɛ edwɛkɛ amozi la ɛdeɛ, ɔtɛla zɔ.’”

^ ɛden. 7 Saa ɛkpondɛ kɛ ɛnwu kɛzi bɛyɛ asɔne bɛmaa Nyamenle tie la anwo edwɛkɛ dɔɔnwo a, nea Duzu A Baebolo ne Kilehile Amgba A? buluku ne mɔɔ Gyihova Alasevolɛ ɛyɛ la tile 17.