Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐBƐLABƆLƐ NU EDWƐKƐ

“Menwunle Ye, Noko Meande Ɔ Bo”

“Menwunle Ye, Noko Meande Ɔ Bo”

Wɔ 1975 ne anu mɔɔ ɛnee menyia ɛvolɛ nwiɔ la, me mame nwunle debie ɛzulolɛ bie wɔ me nwo. Mekɛ mɔɔ ɛnee me mame ɛdwu me la, ɔ gɔnwo bie dele debie kpole bie aze manle ɔyɛle dede. Me mame nwunle kɛ meanga me nwo bɔbɔ. Ɔkadwu ɛvolɛ nsa la, ɛnee mengola tendɛ. Akee me abusua ne dele amaneɛbɔlɛ mɔɔ yɛ azibɛnwo la—dɔketama hanle kɛ mele mumule!

Mekɛ mɔɔ ɛnee metɛde kakula la, me awovolɛ bɔle ewole, yemɔti me Mame angomekye a tetele me nee me mediema ne mɔ a, yɛle mrenya nwiɔ yɛɛ raalɛ ko. Zɔhane mekɛ ne, ɛnee bɛmmaa ngakula mɔɔ le mumule wɔ France la ɛngɔ sukulu kɛmɔ bɛyɛ ye ɛnɛ la, yɛɛ ɔdwu mekɛ ne bie a, kɛzi bɛkile bɛ debie la maa bɛdi nyane. Noko, sumunli me ngakula nu, menyia adenle bie mɔ mɔɔ mumulema dɔɔnwo annyia la. Maa mengilehile nu.

Mekɛ mɔɔ ɛnee meli ɛvolɛ kɛyɛ nnu la

Mekɛ bie anu, ɛnee kilehilevolɛma dɔɔnwo die di kɛ ɔwɔ kɛ bɛmaa kakula mɔɔ le mumule la nea ye kilehilevolɛ ne anloa na ɔsukoa ɛdendɛlɛ. Nɔhalɛ nu, ɛleka mɔɔ menyinle wɔ France la, ɛnee bɛngile mumule aneɛ wɔ sukulu nu fee. Ɛnee bɛkyekye ngakula mɔɔ bɛle mumule la asa wɔ bɛ nzi wɔ mekɛ mɔɔ bɛlɛsukoa debie la.

Mekɛ mɔɔ mɛlɛnyi la, ɛnee awie fa dɔnehwele dɔɔnwo kile me ɛdendɛlɛ dapɛne biala. Ɛnee bɛsɔ me awudwelɛ anzɛɛ me ti na bɛmaa meka edwɛkɛ dɔɔnwo mɔɔ mende la. Ɛnee mengola me nee ngakula gyɛne ɛndendɛ. Menwunle amaneɛ wɔ zɔhane mekɛ ne mɔ anu.

Menyianle ɛvolɛ nsia la, akee bɛmanle mengɔle mumule sukulu titile bie mɔɔ bɛda ɛkɛ la anu. Ɛhye a le mekɛ mɔɔ lumua mɔɔ me nee ngakula gyɛne mɔɔ bɛle mumule la dule a. Ɛkɛ ne noko, ɛnee bɛngile mumule aneɛ wɔ ɛkɛ. Saa yɛfa yɛ sa yɛtendɛ wɔ sukulu ɛkɛ a, bɛtea yɛ anzɛɛ bɛtwe yɛ ti enrinli ne. Noko akee, ɛnee yɛfea yɛfa yɛ sa yɛtendɛ. Awieleɛ bɔkɔɔ ne, ɛnee mekola me nee ngakula gyɛne tendɛ. Kɛ ɛvolɛ nna mɔɔ yɛ anyelielɛ la bɔle ɔ bo la ɛne.

Noko akee, mekɛ mɔɔ menyianle ɛvolɛ bulu la, bɛyele me bɛhɔle mɔlebɛbo sukulu mɔɔ ngakula mɔɔ tendɛ a wɔ ɛkɛ la anu. Me nwo bubule me! Ɛnee medwenle kɛ ngakula mɔɔ le mumule la kɔsɔɔti ɛwu na yeha me ngomekye wɔ ewiade. Dɔketama dule me abusua ne folɛ kɛ bɛfa mumule aneɛ bɛtendɛ bɛkile me a menrɛnwu tendɛ, yemɔti bɛanzukoa mumule aneɛ yɛɛ bɛammaa me nee ngakula mɔɔ bɛle mumule la andu. Mekakye kɛ mekɛ bie yɛhɔle dɔketa bie ɛkɛ. Ɛnee ɔlɛ mumule aneɛ buluku la ye ɛkponle ne azo. Mekɛ mɔɔ menwunle nvoninli ne mɔɔ wɔ zolɛ la, mendendenle me sa wɔ zolɛ na menganle kɛ, “Mekulo buluku ɛhye!” Ndɛndɛ ne ala, dɔketa ne vale buluku ne veale. *

 MEMBƆLE Ɔ BO MENZUKOALE BAEBOLO NE

Me mame bɔle mɔdenle vale Keleseɛne ngyinlazo tetele yɛ. Ɛnee ɔ nee yɛ kɔ debiezukoalɛ wɔ Mérignac Gyihova Alasevolɛ Asafo ne mɔɔ bikye Bordeaux la. Kɛmɔ mele kakula la ati, ɛnee mende ninyɛne mɔɔ bɛsukoa la abo kpalɛ. Noko akee, ɛnee menli mɔɔ wɔ ɛkɛ la batɛnla me nwo ɛkɛ na bɛkɛlɛ mɔɔ bɛlɛka la bɛkile me. Kɛzi bɛlɛ ɛlɔlɛ na bɛdwenle me nwo la hanle me kpalɛ. Me Mame nee me zukoale Baebolo ne wɔ sua nu, noko ɛnee mende mɔɔ ɔlɛkile me la abo kpalɛ. Mendele nganeɛ kɛ ngapezonli Daneɛle, wɔ mekɛ mɔɔ anwumabɔvolɛ bie hanle ngapezo edwɛkɛ hilele ye la, ɔhanle kɛ: “Mendele edwɛkɛ ɛhye, na meande ɔ bo.” (Daneɛle 12:8) Wɔ me afoa nu, “Menwunle ye, noko meande ɔ bo.”

Noko akee, menwunle Baebolo ne anu nɔhalɛ ne ngyikyi ngyikyi. Me nye liele mɔɔ mendele ɔ bo wienyi la anwo na membɔle mɔdenle menvale membɔle me ɛbɛla. Eza, menzukoale kɛzi awie mɔ bɔ bɛ ɛbɛla la. Kɛ neazo la, Baebolo ne ka kɛ yɛzi abotane. (Gyemise 5:7, 8) Ɛnee mende mɔɔ ɔkile la abo kpalɛ. Noko akee, mekɛ mɔɔ menwunle kɛzi me gɔnwo mɔ mediema ɛlɛda subane ɛhye ali la, mendele mɔɔ abotane kile la abo. Nɔhalɛ nu, Keleseɛne asafo ne ɛboa me kpole kpalɛ.

ARƐLEBƆLƐ HAKYILE ANYELIELƐ

Stéphane boale me manle mendele Baebolo ne abo

Mekɛ mɔɔ melɛnyi la, kenle ko bie menwunle kɛ mgbavolɛ bie ɛlɛfa mumule aneɛ adendɛ ahile bɛ nwo wɔ gua zo. Membɔle ɔ bo kɛ me nee bɛ tu wɔ fealera nu na menzukoale France Mumule Aneɛ ne. Mendoale zo mengɔle Keleseɛne nyianu na Dasevolɛ kpavolɛ ko, mɔɔ bɛfɛlɛ ye Stéphane la boale me. Ɔbɔle mɔdenle biala kɛ ɔ nee me badendɛ, na ɔmanle me nye liele ɔ nwo kpalɛ. Noko, me rɛle bɔle kpole. Kɛmɔ Stéphane le Keleseɛnenli mɔɔ ɔngyi afoa biala la ati bɛdole ye efiade. Me nwo bubule me! Stéphane hɔle la, me rɛle bɔle na mengɔ debiezukoalɛ kpalɛ.

Siane 11 anzi, bɛyele Stéphane na ɔrale sua nu. Nea kɛzi ɔzinle me nwo wɔ mekɛ mɔɔ Stéphane bɔle ɔ bo kɛ ɔfa mumule aneɛ ɔ nee me adendɛ la. Ɛnee menlie menli! Duzu a ɛzi a? Stéphane ɛzukoa France Mumule Aneɛ ne wɔ efiade. Menwunle kɛzi Stéphane ɛlɛtoto ɔ sa nee kɛzi ɔlɛyɛ ɔ nyunlu la, me nye liele kpole wɔ mekɛ mɔɔ ɛnee melɛdwenle mɔɔ ɛhye amuala bahile amaa me anwo la.

AKEE MENDELE BAEBOLO NE ABO

Stéphane nee me bɔle ɔ bo zukoale Baebolo ne. Ɔvi zɔhane mekɛ ne yɛɛ membɔle ɔ bo kɛ mefa Baebolo nu nɔhalɛ ngyikyi mɔɔ mezukoa la kɔsɔɔti meabɔ nu a. Mekɛ mɔɔ mele kakula la, ɛnee me nye die nvoninli ngɛnlɛma mɔɔ wɔ yɛ Baebolo mbuluku ne anu la anwo, ɛnee mefa menli mɔɔ wɔ nvoninli ne anu la metoto nwo na mesuzu debie biala mɔɔ wɔ nu la anwo amaa edwɛkɛ ne aha me adwenle nu. Ɛnee mezukoa Ebileham, “abozonli” ne yɛɛ “menli pemgbenleamgbe” ne anwo debie, noko mekɛ mɔɔ bɛhilehilele ɛhye anu wɔ mumule aneɛ nu la yɛɛ mendele ɔ bo kpalɛ a. (Mɔlebɛbo 22:15-18; Yekile 7:9) Ɛnee ɔda ali wienyi kɛ me sa ɛha aneɛ mɔɔ mete la, aneɛ mɔɔ la me ahonle nwo la.

Mekɛ mɔɔ ɛnee mekɔ debiezukoalɛ a mete mɔɔ bɛka abo la, ɔhanle me ahonle na ɛnee mekulo kɛ mesukoa dɔɔnwo. Ɔlua Stéphane moalɛ zo, ndelebɛbo mɔɔ melɛ wɔ Baebolo ne anu la yɛle kpole, na wɔ 1992, menyilale me nwo zo memanle Gyihova Nyamenle na bɛzɔnenle me. Noko akee, ɔnva nwo kɛ menyia anyuhɔlɛ la, kɛmɔ me nee menli andendɛ wɔ me ngakula nu la ati, ɔmaa mese nyiane yɛɛ menea me nwo boɛ.

ƐNEE MESE NYIANE

Awieleɛ bɔkɔɔ ne, bɛvale mumulema ekpunli ekyi ne mɔɔ mewɔ nu la bɛbokale asafo bie mɔɔ wɔ  Pessac, mɔɔ wɔ Bordeaux ɛleka bie la anwo. Ɛhye boale kpalɛ, na mengɔle zo menyianle anyuhɔlɛ wɔ sunsum nu. Ɔwɔ nuhua kɛ ɛnee ɔyɛ se ɔmaa me kɛ me nee menli badendɛ ɛdeɛ, noko me gɔnwo mɔ mɔɔ te edwɛkɛ la nleanle kɛ mebade debie biala abo. Gilles nee Elodie mɔɔ le agyalɛma la bɔle mɔdenle kɛ bɛ nee me badendɛ. Saa yɛkpɔne debiezukoalɛ a bɛta bɛfɛlɛ me bɛmaa me nee bɛ di aleɛ anzɛɛ no kafe, na ɛhye manle yɛyɛle agɔnwolɛ kpalɛ. Nea kɛzi ɔyɛ anyelielɛ kɛ ɛbaboka menli mɔɔ dua Nyamenle ɛlɔlɛ adenle ne azo la anwo a!

Me ye Vanessa boa me kpalɛ

Asafo ɛhye anu a menwunle Vanessa mɔɔ anwo yɛ fɛ la. Atiakunlukɛnlɛma nee pɛlepɛlelilɛ mɔɔ wɔ ɔ nwo la manle me nye liele ɔ nwo. Yeambu kɛzi mele mumule la kɛ adenzilɛ, emomu, ɔbule ye kɛ ɔbamaa yeanyia anwubielɛ kɛnlɛma. Mengulole ye, na yɛgyale wɔ 2005 anu. Ɔwɔ nuhua kɛ mengulo ɛdendɛlɛ dɔɔnwo ɛdeɛ, noko Vanessa ɛboa me ɛmaa mehola meli nyianezelɛ zo na mekola metendɛ wɔ menli nu. Me nye sɔ kɛzi ɔboa me ɔmaa medi me ɛzonlelilɛ nwo gyima la.

AHYƐLƐDEƐ BIEKO MƆƆ VI GYIHOVA ƐKƐ

Ɛvolɛ ne mɔɔ yɛgyale la anu, Gyihova Alasevolɛ ɔfese ne mɔɔ wɔ Louviers, France la dole ɛsalɛ vɛlɛle me kɛ bɛtete me bɛamaa meahile edwɛkɛ bo wɔ siane ko anu. Kenlensa ye, ɔfese ne ɛlɛbɔ mɔdenle ayɛ DVD dɔɔnwo wɔ France Mumule Aneɛ nu. Kɛmɔ bɛlɛ gyima dɔɔnwo la ati, ɛnee bɛhyia menli dɔɔnwo mɔɔ bahile edwɛkɛ bo la.

Melɛfa France Mumule Aneɛ meamaa Baebolo ɛdendɛlɛ

Me nee Vanessa te nganeɛ kɛ gyima mɔɔ meyɛ wɔ ɔfese ɛkɛ ne la le nwolɛ adenle kpole nee ahyɛlɛdeɛ mɔɔ vi Gyihova Nyamenle ɛkɛ a, noko, ɛnee yɛsulo. Duzu a ɛnee bado yɛ mumule aneɛ ekpunli ne a? Kɛzi yɛbayɛ yɛ sua ne ɛ? Asoo Vanessa banyia gyima wɔ nehane? Gyihova lile ngyegyelɛ ko biala anwo gyima wɔ nwanwane adenle zo. Mendele nganeɛ kɛ Gyihova kulo yɛ nee mumulema mɔɔ ɛha la edwɛkɛ amgba.

MEDIEMA BOA ME

Kɛmɔ meboka nwo a bɛkile edwɛkɛ bo la ati, meze debie biala mɔɔ bɛyɛ bɛfa bɛboa mumulema bɛmaa bɛnyia sunsum nu moalɛ la kpalɛ. Nea kɛzi ɔyɛ anyelielɛ kɛ me mediema gyimayɛvoma bɔ mɔdenle kɛ bɛ nee me bɛadendɛ a. Mumule aneɛ ekyi mɔɔ bɛsukoa na bɛbɔ mɔdenle bɛka bɛkile me la ka me ahonle. Mende nganeɛ kɛ menlɛ awie—ɔmba ye zɔ fee. Ɛlɔlɛ ɛhye mɔ kɔsɔɔti maa yɛnwu koyɛlɛ mɔɔ wɔ Gyihova menli avinli la.—Edwɛndolɛ 133:1.

Melɛyɛ gyima wɔ Edwɛkɛbohilelɛ Ɛleka ne wɔ ɔfese ɛkɛ

Meda Gyihova ase kɛ ɔdua Keleseɛne asafo ne azo ɔnea kɛ awie wɔ ɛkɛ mɔɔ baboa me dahuu a. Eza me nye sɔ me afoa nu ɛdeɛ ekyi mɔɔ meyɛ meboa me gɔnwo mɔ mumulema memaa bɛnwu yɛ Bɔvolɛ ne mɔɔ lɛ ɛlɔlɛ na bɛbikye ye la. Me nye la kenle mɔɔ ngyegyelɛ kɔsɔɔti bavi ɛkɛ na yɛ muala yɛaha “aneɛ tagyee” ne—mɔɔ le Gyihova Nyamenle nee ye bodane ne anwo nɔhalɛ ne—kɛ abusua ko mɔɔ koyɛlɛ wɔ yɛ avinli la.—Zɛfanaya 3:9.

^ ɛden. 9 Ɛvolɛ 1991 ne anu a France arane ne hanle kɛ bɛva mumule aneɛ bɛhile ngakula mɔɔ bɛle mumule la debie wɔ sukulu a.