DIEDI A LE DUZU?

Kɛmɔ bɛhile wɔ Baebolo ne anu la, “diedi” kile debie mɔɔ nwolɛ daselɛ kpalɛ ti yɛdie yɛdi kɛ ɔle zɔ la. Awie mɔɔ lɛ diedi wɔ Nyamenle anu la lɛ anwodozo kɛ Ɔbali Ye ɛwɔkɛ biala azo.

KƐZI MOSISI LALE DIEDI ALI Ɛ?

Mosisi vale ye ɛbɛlabɔlɛ ziele Nyamenle ɛwɔkɛ ne mɔ azo. (Mɔlebɛbo 22:15-18) Ɔnyianle adenle kɛ ɔbabɔ ɛbɛla mɔɔ ahunlundwolɛ wɔ nu la wɔ anwonyia nu wɔ Yigyibiti, noko ɔkpole, “ɔhulole kɛ ɔ nee Nyamenle menli ne kɛli nyane tɛla kɛ ɔ nye kɛlie ɛtane nwo mekɛ ekyi bie a.” (Hibuluma 11:25) Asoo ɔle kpɔkɛ mɔɔ yeandwenle nwolɛ na yeazi mɔɔ bamaa yeanlu ɔ nwo nzinlii? Kyɛkyɛ, ɔluakɛ Baebolo ne ka kɛ Mosisi, ‘hɔle zo gyinlanle kpundii kɛ sonla mɔɔ ɛnwu Nyamenle ne mɔɔ bɛnnwu ye la.’ (Hibuluma 11:27) Mosisi annu ɔ nwo wɔ kpɔkɛ mɔɔ ɔgyinlanle diedi zo ɔzile la anwo.

Mosisi boale awie mɔ manle bɛnyianle diedi. Kɛ neazo la, suzu mɔɔ zile wɔ mekɛ mɔɔ ɔbayɛ kɛ ɛnee Yizilayɛma anwo ɛha nu wɔ Falo ɛlɔnema nee Nyevile Kɔkɔlɛ ne avinli la anwo nea. Mekɛ mɔɔ bɛ ahonle dule kɛ ɔnrɛhyɛ bɛbazɛkye bɛ la, Yizilayɛma zunle vɛlɛle Gyihova nee Mosisi. Boni a Mosisi bayɛ ye wɔ nwolɛ a?

Bie a ɛnee Mosisi ɛnze kɛ Nyamenle bamaa Nyevile Kɔkɔlɛ ne anu ahyɛ nwiɔ, na yeamaa Yizilayɛma ava ɛkɛ ne ahɔ. Noko akee, ɛnee Mosisi lɛ diedi kɛ Nyamenle bayɛ nwolɛ debie ava abɔ Ye menli nwo bane. Na ɛnee Mosisi kulo kɛ ɔ gɔnwo mɔ Yizilayɛma nyia diedi ko ne ala bie. Yɛkenga kɛ: “Na Mosisi zele menli ne kɛ, ‘Bɛmmasulo, bɛgyinla kpundii na bɛnlea kɛ ɛnɛ [Gyihova] bazi alie bɛ la.’” (Adendulɛ 14:13) Asoo Mosisi holale manle ɔ gɔnwo mɔ Yizilayɛma diedi yɛle kpole? Ɔyɛle zɔ, ɔluakɛ Baebolo ne ka Mosisi nee Yizilayɛma kɔsɔɔti anwo edwɛkɛ kɛ: ‘Diedi zo yɛɛ Yizilayɛma luale mɔɔ bɛpɛle Nyevile Kɔkɔlɛ ne kɛ asɛɛ bɛlua azɛlɛ resee zo la a.’ (Hibuluma 11:29) Mosisi diedi ne amboa ɔ ngomekye, emomu, ɔboale awie biala mɔɔ zukoale la.

DUZU A YƐSUKOA YƐFI NU A?

Yɛbahola yɛazukoa Mosisi na yɛava yɛ ɛbɛlabɔlɛ yɛazie Nyamenle ɛwɔkɛ ne mɔ azo. Kɛ neazo la, Nyamenle ɛbɔ ɛwɔkɛ kɛ yɛfa ye ɛzonlenlɛ ne yɛdumua wɔ yɛ ɛbɛlabɔlɛ nu a ɔbamaa yɛ sa aha yɛ nwonane afoa nu ngyianlɛ. (Mateyu 6:33) Ɔle nɔhalɛ kɛ, bie a ɔbayɛ se kɛ yɛbaho yɛatia nwonane afoa nu ninyɛne mɔɔ bɛtwe adwenle bɛkɔ zo dɔɔnwo ɛnɛ la. Noko yɛbahola yɛanyia anwodozo kɛ yɛbɔ mɔdenle yɛmaa yɛ ɛbɛlabɔlɛ yɛ sikalɛ na yɛfa yɛ adwenle yɛsie yɛ ɛzonlenlɛ ne azo a, Gyihova bamaa yɛ asa aha mɔɔ yɛhyia la kɔsɔɔti. Yebɔ ɛwɔkɛ kɛ: “Menrɛgyakyi bɛ ɛlɛ, yɛɛ me rɛle ɛnrɛvi bɛ fee.”—Hibuluma 13:5.

Yɛbɔ mɔdenle noko yɛboa awie mɔ yɛmaa bɛnyia diedi. Kɛ neazo la, awovolɛ mɔɔ ze nrɛlɛbɛ la nwu kɛ bɛlɛ adenle dɔɔnwo bɛboa bɛ mra bɛmaa bɛnyia diedi. Ngakula ɛlɛnyi a, ɔwɔ kɛ bɛnyia ndelebɛbo mɔɔ hyia la kɛ Nyamenle wɔ ɛkɛ na yemaa yɛ kpalɛ nee ɛtane nwo ngyinlazo. Bieko, ɔwɔ kɛ bɛmaa bɛnwu kɛ bɛdi ye ngyinlazo ne anzi a yɛɛ bɛ ɛbɛlabɔlɛ bayɛ anyelielɛ kpalɛ a. (Ayezaya 48:17, 18) Awovolɛ maa bɛ mra ahyɛlɛdeɛ mɔɔ sonle bolɛ la wɔ mekɛ mɔɔ bɛkɛboa bɛ bɛkɛmaa bɛkɛnyia diedi kɛ, “Nyamenle wɔ ɛkɛ na ɔyila bɛdabɛ mɔɔ bɛbɔ mɔdenle bɛkpondɛ ɔ bo zo la.”—Hibuluma 11:6, Holy Bible—Easy-to-Read Version.