Saa ɛte Mosisi duma ne a duzu a ɛdwenle nwo a? Ɛdwenle kɛ yemɔ a le . . .

  • adɔma ne mɔɔ ye mame vale ye dole kɛndɛne nu na ɔvale ɔhɔziele Naele Azule ne anloa la ɔ?
  • kakula nrenya ne mɔɔ Falo ara raalɛ ne tetele ye wɔ anwonyia nu wɔ Yigyibiti noko ɔ rɛle anvi kɛ ɔle Yizilayɛnli la?
  • nrenya ne mɔɔ vale ɛvolɛ 40 yɛle mboaneneavolɛ wɔ Medean la ɔ?
  • nrenya ne mɔɔ nee Gyihova * lile adwelie wɔ kpɔkɛ ne mɔɔ ɛlɛsɔ anyunlu la ɔ?
  • nrenya ne mɔɔ hɔle Yigyibiti Belemgbunli ne anyunlu, na ɔvale akɛnrasesebɛ ɔhanle kɛ ɔye Yizilayɛma ɔvi akɛlɛzonlenlɛ nu la ɔ?
  • nrenya ne mɔɔ Nyamenle manle ɔhanle kɛ, Ngyegyelɛ Bulu bara Yigyibiti anwo zo wɔ mekɛ mɔɔ ye belemgbunli ne andie nɔhalɛ Nyamenle ne la ɔ?
  • nrenya ne mɔɔ lile Yizilayɛma anyunlu manle bɛvile Yigyibiti la ɔ?
  • nrenya ne mɔɔ bɛmanle ɔhyɛle Nyevile Kɔkɔlɛ ne anu nwiɔ la ɔ?
  • nrenya ne mɔɔ liele Mɛla Bulu ne wɔ Nyamenle ɛkɛ manle Yizilayɛma la ɔ?

MOSISI yɛle ninyɛne ɛhye mɔ kɔsɔɔti nee dɔɔnwo mɔɔ ɛha la. Ɔnyɛ nwanwane kɛ Keleseɛnema, Dwuuma nee Ngɛnlamoma kɔsɔɔti bu nrenya nɔhavo ɛhye kpole a!

Ɔda ali wienyi kɛ ɛnee Mosisi le ngapezonli mɔɔ yɛle “ninyɛne ɛzulolɛ mgbole” a. (Mɛla ne 34:10-12) Ɔmanle Nyamenle luale ɔ nwo zo yɛle ninyɛne mgbole. Noko, ɛnee Mosisi le sonla. Kɛmɔ Yilaegya, mɔɔ vindele Mosisi anwo ɛkɛ wɔ ɛnyelɛzodeɛnwunlɛ nu wɔ Gyisɛse azɛlɛ ye azo ɛzonlenlɛ gyima ne anu de la, ɛnee Mosisi “le sonla kɛ yɛdayɛ ala la.” (Gyemise 5:17; Mateyu 17:1-9) Mosisi yiale ngyegyelɛ mɔɔ to yɛ la bie, na ɔlile zolɛ konim bɔkɔɔ.

Ɛkulo kɛ ɛnwu kɛzi ɔyɛle ye la ɔ? Suzu subane kpalɛ mɔɔ ɔlale ye ali la anu nsa nee mɔɔ yɛbahola yɛazukoa yɛavi ye neazo ne anu la anwo nea.

^ ɛden. 7 Baebolo ne kile kɛ Nyamenle duma a le Gyihova.