Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 BIKYE NYAMENLE

“Wɔye Wɔhile Menli Mɔɔ Ɛnze Nwolɛ Bie La”

“Wɔye Wɔhile Menli Mɔɔ Ɛnze Nwolɛ Bie La”

Ɛkulo kɛ ɛnwu Nyamenle anwo nɔhalɛ ne—kɛzi ɔde, mɔɔ ɔkulo nee mɔɔ ɔkyi, yɛɛ ye ɛhulolɛdeɛ kɛzi de la ɔ? Gyihova Nyamenle ɛlua ye Edwɛkɛ, Baebolo ne azo ɛla ɔ nwo nɔhalɛ ne kɔsɔɔti ali. Noko tɛ awie biala mɔɔ kola kenga Baebolo ne la a te nɔhalɛ ɛhye abo kpalɛ a. Duzu ati ɔ? Ɔluakɛ nɔhalɛ ɛhye ɛnwunlɛ le nwolɛ adenle; na tɛ awie biala a nwu ye a. Bɛmaa yɛzuzu mɔɔ Gyisɛse hanle ye wɔ ɛhye anwo la anwo.—Kenga Mateyu 11:25.

Zɔhane edwɛkɛ ne bɔ ɔ bo kɛ: “Mekɛ ne anu Gyisɛse zele kɛ.” Yemɔti, bie a mɔɔ ɛnee Gyisɛse ɛlɛka la fane mɔɔ ɛzi la anwo. Ɛnee yedea Galelima mɔɔ wɔ azuamgbole nsa mɔɔ yeyɛ nwanwane gyima wɔ zo noko bɛanyɛ ye ɛdoavolɛma la. (Mateyu 11:20-24) Bie a ɛbabiza ɛ nwo kɛ, ‘Kɛzi awie bahola anwu Gyisɛse nwanwane gyima ne na ɔnrɛlie nɔhalɛ ne mɔɔ ɔkilehile la ɔnrɛli ɛ?’ Kɛmɔ ɛnee menli ne ahonle yɛ se la ati a bɛandie edwɛkɛ ne a.—Mateyu 13:10-15.

Ɛnee Gyisɛse ze kɛ yɛbanwu Baebolo ne anu nɔhalɛ ne a, yɛhyia ninyɛne nwiɔ: Nyamenle moalɛ nee ahonle kpalɛ. Gyisɛse hanle kɛ: “Egya, anwuma nee aze Awulae, meyɛ wɔ mo kɛ ninyɛne mɔɔ wɔva wɔvea nrɛlɛbɛvolɛma nee nwomama la wɔye wɔhile menli mɔɔ ɛnze nwolɛ bie la.” Wɔnwu deɛmɔti ɔle nwolɛ adenle kɛ awie banwu Baebolo ne anu nɔhalɛ ne la ɔ? Gyihova, “anwuma nee aze Awulae” ne bahola aye nɔhalɛ ne ahile awie anzɛɛ yeava yeavea ye kɛmɔ ɔkulo la. Noko saa Nyamenle ye nɔhalɛ ne ahile a ɔnyɛ kyengye. Adenle boni azo a ɔmaa bie mɔ nwu Baebolo ne anu nɔhalɛ ne na bie mɔ ɛnnwu ye ɛ?

Gyihova kulo bɛlɛvoma, na tɛ anwomemaazoma. (Gyemise 4:6) Yeva nɔhalɛ ne yevea “nrɛlɛbɛvolɛma nee nwomama”—ewiade nrɛlɛbɛvolɛma nee nwomama mɔɔ memaa bɛ nwo zo na bɛte nganeɛ kɛ bɛngyia ye moalɛ la. (1 Kɔlentema 1:19-21) Noko ɔye nɔhalɛ ne ɔkile “menli mɔɔ ɛnze nwolɛ bie la”—bɛdabɛ mɔɔ bɛfa ahonle kpalɛ bɛba ɔ nwo ɛkɛ, na bɛda mɛlɛbɛnwoaze ali kɛ ngakula la. (Mateyu 18:1-4; 1 Kɔlentema 1:26-28) Nyamenle Ara ne, mɔɔ le Gyisɛse la, ze menli zɛhae mɔ. Ɛzonlenlɛ nu mgbanyima mɔɔ ze nwoma kpalɛ, mɔɔ bɛmemaa bɛ nwo zo la dɔɔnwo ande Gyisɛse edwɛkɛ ne abo, noko fɛlɛkyevoma mɔɔ bɛlɛ bɛ nwo aze la dele ɔ bo. (Mateyu 4:18-22; 23:1-5; Gyima ne 4:13) Mekɛ ko ne ala, sukoavolɛma nee menli mɔɔ ze nwoma la bie mɔ mɔɔ lale mɛlɛbɛnwoaze kpalɛ ali la yɛle Gyisɛse ɛdoavolɛma.—Luku 19:1, 2, 8; Gyima ne 22:1-3.

Yɛsia yɛahɔ kpuyia ne mɔɔ yɛbizale ye wɔ mɔlebɛbo ne la azo bieko: Ɛkulo kɛ ɛnwu Nyamenle anwo nɔhalɛ ne ɔ? Saa ye zɔhane a, ɛnee ɛ nye balie kɛ ɛkɛnwu kɛ Nyamenle ɛlolɛ ɛnle menli mɔɔ bu bɛ nwo kɛ bɛle ewiade nrɛlɛbɛvolɛma la anwo zo. Emomu, ɔmaa menli mɔɔ ewiade nrɛlɛbɛvolɛma ɛmbu bɛ bie la nyia ɛlolɛ. Saa ɛfa adwenle nee ahonle kpalɛ ɛsukoa Nyamenle Edwɛkɛ ne a, ɛbaboka bɛdabɛ mɔɔ Gyihova ɛmaa bɛnyia ahyɛlɛdeɛ mɔɔ sonle bolɛ—ɔ nwo nɔhalɛ ne mɔɔ bɛde ɔ bo la anwo. Ɛte zɔhane nɔhalɛ ne abo a ɛ nye balie kɛkala na yeamaa wɔanyia “nɔhalɛ ngoane ne”—dahuu ngoane wɔ Nyamenle tenlene ewiade fofolɛ ne mɔɔ yebɔ nwolɛ ɛwɔkɛ mɔɔ ɔnrɛhyɛ na yeara la anu. *1 Temɔte 6:12, 19; 2 Pita 3:13.

Baebolo ɛgengalɛ maa January

Mateyu 1-21

^ ɛden. 5 Gyihova Alasevolɛ anye balie kɛ bɛbaboa wɔ bɛamaa wɔazukoa Nyamenle anwo nɔhalɛ nee ye bodane ne anwo debie. Bɛfa Duzu A Baebolo ne Kilehile Amgba A? buluku ne bɛyɛ sua nu Baebolo ɛzukoalɛ mɔɔ bɛnlie ɛhwee a.