Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 BAEBOLO NE KAKYI SONLA

“Akee Menyia Fanwodi Kpalɛ.”

“Akee Menyia Fanwodi Kpalɛ.”
  • BƐWOLE YE: 1981

  • MAANLE MƆƆ ƆVI NU: UNITED STATES

  • MƆƆ ƆYƐLE LA: RALƐ SEKYERAVOLƐ

ME ƐBƐLA DƐBA:

Bɛwole me wɔ Moundsville, sua ekyi bie mɔɔ wɔ Ohio Azule ne anloa wɔ West Virginia, U.S.A. sɔlɔ nehane la. Ɛnee yɛle ngakula nna, na medame a metɔ zo nwiɔ a, ɛnee yɛ nuhua nsa le mrenya yemɔti ɛnee anyelielɛ wɔ yɛ abusua ne anu kpalɛ. Me awovolɛ yɛ gyima kpalɛ, bɛdi nɔhalɛ yɛɛ bɛlɛ menli nwo ɛlɔlɛ. Ɛnee yɛnlɛ ezukoa ɛdeɛ, noko ɛnee dahuu yɛ sa ka mɔɔ yɛhyia nwo la. Kɛmɔ bɛle Gyihova Alasevolɛ la ati, me awovolɛ bɔle mɔdenle vale Baebolo ngyinlazo tetele yɛ wɔ yɛ ngakula nu.

Noko akee, mekɛ mɔɔ melɛnyi la, me ahonle bɔle ɔ bo vile mɔɔ bɛhilele me la azo. Ɛnee mennwu kɛzi ɛbɛlabɔlɛ mɔɔ gyi Baebolo ngyinlazo zo la bamaa me nye alie anzɛɛ meanyia ahunlundwolɛ a. Menzuzule kɛ saa meyɛ mɔɔ me kulo la a ɔbamaa me nye alie kpalɛ. Yeangyɛ biala yɛɛ mengyakyile Keleseɛne nyianuhɔlɛ a. Me mediema nwiɔ noko bokale me nwo wɔ atuadelɛ ɛhye anwo. Yɛ awovolɛ yɛle biala mɔɔ bɛbahola la kɛ bɛboa yɛ noko yɛammaa bɛ adenle.

Meannwu kɛ amuanrɛɛ fanwodi ne mɔɔ mese mekpondɛ la bamaa meayɛ akɛlɛ. Kenle ko bie mɔɔ mevi sukulu melɛkɔ sua nu la, me gɔnwo bie manle me sigalɛte. Menliele. Ɔvi mekɛ zɔhane mɔɔ kɔ la, menyɛle ninyɛne dɔɔnwo mɔɔ boda la. Nzinlii, ɛnee meno nyiletane, mebo nza na mebɔ ɛbɛlatane. Wɔ ɛvolɛ dɔɔnwo mɔɔ doa zo la anu, menzɔle nyiletane mɔɔ anu yɛ se la meneanle ngyikyi ngyikyi na menyɛle akɛlɛ memanle nuhua dɔɔnwo ne ala. Me ti minle nyiletane ne anu la, membɔle ɔ bo kɛ metɔne nyiletane meava meanlea me nwo.

Menyɛle biala kɛ mebu me nye meagua mɔɔ melɛyɛ la azo, noko me adwenle hakyele me kɛ adenle mɔɔ melua zo la ɛnle kpalɛ. Noko, ɛnee mete nganeɛ kɛ yekpa nwolɛ yemɔti menrɛgyakyi. Me nee menli dɔɔnwo kɔ ɛkponledolɛ nee kɔnsɛte ɛdeɛ, noko ɛnee me nwo ta yɛ me koonwu na meyɛ basaa. Ɔyɛ a medwenle kɛzi me awovolɛ bɔ ɛbɛla kpalɛ na bɛdi bɛ nwo eni la anwo na ɔsi me nwo kɛ medɔ gua zo la.

 KƐZI BAEBOLO NE HAKYILE ME SUBANE LA:

Ɛnee menlɛ anyelazo biala kɛ mebahola meahakyi ɛdeɛ, noko ɛnee bie mɔ ɛndwenle zɔ. Wɔ ɛvolɛ 2000 ne anu, me awovolɛ vɛlɛle me kɛ memaa yɛhɔ Gyihova Alasevolɛ maangyeba nyianu ne bie. Mendwehwenle me bo aze na mengɔle. Ɔzinle me nwo kɛ me mediema nwiɔ ne mɔɔ bɛde atua la noko hɔle bie a.

Wɔ nyianu ne abo, mengakyele kɛ mengɔle kɔnsɛte wɔ ɛleka zɔhane wɔ ɛvolɛ mɔɔ ɛze ɛhɔ la anu. Ngakyile mɔɔ menwunle ye la hanle me kpole kpalɛ. Wɔ kɔnsɛte ne abo, bɛhanle ewula bɛguale ɛkɛ na sigalɛte esike ne bole zolɛ. Menli mɔɔ hɔle kɔnsɛte ne la anu dɔɔnwo ɛnlɛ adwenle kpalɛ, na edwɛkɛ mɔɔ wɔ edwɛne ne anu la maa sonla nwo bubu ye. Noko wɔ nyianu ne abo, menli mɔɔ anye die kpalɛ la a menwunle bɛ a—bɛyɛle me akoaba, ɔnva nwo kɛ menwunle bɛ ɛhyɛ la. Ɛnee ɛkɛ ne le bɔkɔbɔkɔ, na anyelazo wɔ edwɛkɛ ne mɔɔ bɛlɛka la anu. Menwunle kɛzi Baebolo ne anu nɔhalɛ ne boa la ɔzinle me nwo kɛ memkpole ye mekɛ bie la!—Ayezaya 48:17, 18.

“Baebolo ne boale me manle mengyakyile nyiletane ɛnlonlɛ nee ye ɛdɔnenlɛ na membɔle ɛbɛla kpalɛ”

Bɛwiele nyianu ne la yeangyɛ, menzile kpɔkɛ kɛ mesia meahɔ Keleseɛne asafo ne anu. Me mediema ne mɔ noko, ɔlua anwubielɛ mɔɔ bɛnyianle ye wɔ nyianu ne abo la ati, bɛzile kpɔkɛ na bɛziale. Yɛliele yɛdole nu kɛ bɛ nee yɛdayɛ menli nsa ne ɛyɛ Baebolo ɛzukoalɛ.

Baebolo edwɛkɛ mɔɔ hanle me ahonle kpalɛ la a le Gyemise 4:8, mɔɔ se: “Bɛhwe bɛbikye Nyamenle, na ɔdaye noko ɔkɛbikye bɛ” la. Menwunle kɛ saa mekulo kɛ mebikye Nyamenle a, ɛnee ɔwɔ kɛ memaa me ɛbɛlabɔlɛ nwo te. Nzenzaleɛ gyɛne mɔɔ ɛha a le kɛ, ɔwɔ kɛ megyakyi sigalɛte ɛnlonlɛ nee nyiletane na megyakyi nzabolɛ.—2 Kɔlentema 7:1.

Mengyakyile agɔnwolɛ dɛba ne mɔ na menvale fofolɛ wɔ Gyihova azonvolɛ avinli. Keleseɛnenli kpanyinli ne mɔɔ nee me zukoale Baebolo ne la boale me kpalɛ. Ɛnee dahuu ɔfɛlɛ me wɔ moba zo yɛɛ ɔfa sua nu na ɔnea kɛzi me nwo de la. Ɛnɛ bɔbɔ, ɔle me gɔnwo kpalɛ ne mɔ anu ko.

Wɔ 2001 ne anu, menvale nzule nu ɛzɔnenlɛ menyɛle me nwo zo mɔɔ meyila memaa Gyihova la anwo sɛkɛlɛneɛ, me mediema nwiɔ ne noko yɛle zɔ. Ɛbahola wɔanwu kɛzi me awovolɛ nee me diema kakula nrenya ne mɔɔ lile nɔhalɛ la anye liele wɔ mekɛ mɔɔ yɛ abusua ne bɔle nuhua bieko wɔ Gyihova ɛzonlenlɛ nu la.

KƐZI YEBOA ME:

Ɛnee medwenle kɛ Baebolo ngyinlazo le kyengye, noko kɛkala, mebu bɛ kɛ bɛle banebɔlɛ kpalɛ. Baebolo ne boale me manle mengyakyile nyiletane ɛnlonlɛ nee ye ɛdɔnenlɛ na membɔle ɛbɛla kpalɛ.

Menyia nwolɛ adenle kɛ meboka Gyihova azonvolɛ ewiade amuala mediemayɛlɛ ne anwo la. Menli ɛhye kulo bɛ nwo, na bɛfa koyɛlɛ bɛsonle Nyamenle. (Dwɔn 13:34, 35) Menyia nyilalɛ titile bie wɔ mediemayɛlɛ ɛhye anu—yemɔ a le me ye, Adrianne mɔɔ mekulo ye kpalɛ na ɔla me ahonle zo la. Yɛ Bɔvolɛ ne mɔɔ yɛbɔ nu yɛsonle ye la maa yɛ nye die.

Kɛ anrɛɛ mebali angomedi ɛbɛlabɔlɛ nzi la, kɛkala, melɛyɛ dahuu ɛzonlenlɛ gyima ne bie na melɛkilehile menli kɛzi bɛdabɛ noko bɛbahola bɛanyia Nyamenle Edwɛkɛ ne azo nvasoɛ la. Gyima ɛhye ɛmaa me nye ɛlie kpole kpalɛ. Mekola mefa anwodozo kpole meka kɛ Baebolo ne ɛhakyi me subane. Akee menyia fanwodi kpalɛ.