Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Asoo Nɔhalɛ Ɛlɔlɛ Wɔ Ɛkɛ?

Asoo Nɔhalɛ Ɛlɔlɛ Wɔ Ɛkɛ?

‘Ɛlɔlɛ sɔ kɛ senle, Gyihova sendɔlɔra.’—SƆLƆMƆN EDWƐNE 8:6.

1, 2. Nwane mɔ a banyia Sɔlɔmɔn Edwɛne ne azo nvasoɛ a, na duzu ati ɔ? (Nea mɔlebɛbo nvoninli ne.)

ATƆFOLƐ raalɛ ne nee nrenya ne nea bɛ nyunlu na bɛsele monvoo bɛkile bɛ nwo. Awie biala nwu ye kɛ bɛkulo bɛ nwo kpalɛ. Adiema ne mɔɔ manle bɛ agyalɛ ɛdendɛlɛ ne la nwu kɛzi bɛsɔ bɛ sa wɔ ɛhulolɛ nu la na ɔbiza ɔ nwo kɛ, ‘Asoo bɛ ɛhulolɛ ne badɛnla ɛkɛ dahuu? Anzɛɛ ɔbade yeahɔ kenlebie?’ Saa kunli nee yelɛ kulo bɛ nwo kpalɛ a, ɔnva nwo ngyegyelɛ biala mɔɔ bara la, bɛbahola bɛagyinla ɔ nloa. Noko akee, agyalɛma dɔɔnwo anye ɛnlie, na bɛbɔ ewole. Ɛhye ati bie a ɛbabiza kɛ, ‘Asoo ɛhulolɛ bahola adɛnla ɛkɛ dahuu?’

2 Mekɛ bɔbɔ mɔɔ ɛnee Belemgbunli Sɔlɔmɔn de aze la, ɛnee nɔhalɛ ɛlɔlɛ dɔɔnwo ɛnle ɛkɛ. Duzu ati ɔ? Sɔlɔmɔn hilehilele nu kɛ: “Menwunle nrenya ko wɔ mrenya apenle avinli mɔɔ medi ye eni a, na wɔ mraalɛ ne mɔ avinli, meannyia bie. Debie mɔɔ mezukoa la ala ɛne: Nyamenle bɔle sonla fɔɔnwo, na sonla ɛbɔ adwenle dɔɔnwo ɛmaa ɛbɛla ɛyɛ kpomgbondee.” (Nolobɔvo ne 7:26-29) Ɛnee nyɛvolɛ mraalɛ mɔɔ bɛbɔ ɛbɛla ɛtane na bɛsonle Beeyale la nee Yizilayɛma de. Ɛhye manle Yizilayɛ mrenya nee  mraalɛ dɔɔnwo noko bɔle ɛbɛla ɛtane. * Noko ɛnee Belemgbunli Sɔlɔmɔn ɛlumua ɛhɛlɛ edwɛkɛdwɛndolɛ bie ɛvolɛ kɛyɛ 20, mɔɔ fane nrenya nee raalɛ mɔɔ ɛnee bɛkulo bɛ nwo nɔhalɛ nu la anwo. Saa yɛgya anzɛɛ yɛtɛgyale a, Sɔlɔmɔn Edwɛne ne baboa yɛ yeamaa yɛade nɔhalɛ ɛhulolɛ bo kpalɛ na yɛala ye ali.

NƆHALƐ ƐLƆLƐ WƆ ƐKƐ!

3. Duzu ati a nrenya nee raalɛ bahola anyia nɔhalɛ ɛlɔlɛ amaa bɛ nwo dahuu ɛ?

3 Kenga Sɔlɔmɔn Edwɛne 8:6. Bɛha ɛlɔlɛ nwo edwɛkɛ kɛ ‘Gyihova sendɔlɔra.’ Duzu ati ɔ? Ɔboalekɛ Gyihova subane titile a le ɛlɔlɛ, yɛɛ ɔbɔle yɛ mɔɔ yɛkola yɛda ɛlɔlɛ ali a. (Mɔlebɛbo 1:26, 27) Gyihova bɔle Adam la, ɔmanle ye yelɛ anwofɛlɛko bie. Mɔɔ Adam anye bobɔle Yive la, anyelielɛ ngome manle ɔhanle kɛzi ɔte nganeɛ ɔmaa ye la anwo edwɛkɛ. Yive noko hulole ɔ hu kpalɛ. Gyihova yele Yive vile Adam anu, yemɔti ɔnyɛ nwanwane. (Mɔlebɛbo 2:21-23) Ɔvi mɔlebɛbo ne, Gyihova yɛle ye mɔɔ nrenya nee raalɛ bahola anyia nɔhalɛ ɛhulolɛ amaa bɛ nwo dahuu.

4, 5. Edwɛkɛ boni a wɔ Sɔlɔmɔn Edwɛne ne anu a?

4 Sɔlɔmɔn Edwɛne ne ka ɛlɔlɛ mɔɔ wɔ nrenya nee raalɛ avinli la anwo edwɛkɛ kɛnlɛma. Edwɛne ne fane kakula bɛlɛra bie mɔɔ vi Hyunɛm anzɛɛ Hyulam nee ye kulovolɛ bie mɔɔ le mboaneneavolɛ la anwo. Mɔɔ zile la ɛne: Ɛnee kakula bɛlɛra ne ɛlɛyɛ gyima wɔ ɔ mediema mrenya ne vanye egyinli mɔɔ bikye ɛleka mɔɔ Belemgbunli Sɔlɔmɔn nee ye sogyama ɛyɛ bɛ azokoɛleɛ la. Ɔnwunle kakula bɛlɛra ne na ɔzoanle ye sonvolɛma ne kɛ bɛhɔva ye bɛrɛla. Ɔhanle kɛzi ɔ nwo yɛ fɛ la ɔhilele ye na ɔmanle ye ahyɛlɛdeɛ dɔɔnwo. Noko ɛnee kakula bɛlɛra ne ahonle wɔ mboaneneavolɛ ne nu yemɔti ɔzele bɛ kɛ ɔkulo kɛ ɔkɔ ye ɛkɛ. (Sɔlɔmɔn Edwɛne 1:4-14) Ɛnee mboaneneavolɛ ne noko ɛlɛkpondɛ ye yemɔti ɔhɔle azokoɛleɛ ɛkɛ ne. Ɔnwunle ye la bɛhanle ɛhulolɛ mɔɔ bɛlɛ bɛmaa bɛ nwo la anwo edwɛkɛ dɔɔnwo.Sɔlɔmɔn Edwɛne 1:15-17.

5 Mekɛ mɔɔ Sɔlɔmɔn ziale hɔle Gyɛlusalɛm la, ɔ nee bɛlɛra ne hɔle, na mboaneneavolɛ ne doale ye. (Sɔlɔmɔn Edwɛne 4:1-5, 8, 9) Edwɛkɛ biala mɔɔ Sɔlɔmɔn hanle anzɛɛ debie biala mɔɔ ɔyɛle la angola angakyi ɛlɔlɛ mɔɔ bɛlɛra ne lɛ maa mboaneneavolɛ ne la. (Sɔlɔmɔn Edwɛne 6:4-7; 7:1-10) Yemɔti Sɔlɔmɔn gyakyile bɛlɛra ne kɛ ɔzia ɔhɔ sua nu. Awieleɛ ne, Hyulam bɛlɛra ne vɛlɛle ye kulovolɛ ne kɛ ɔmaa ɔ nwo ɛyɛ ndɛ “kɛ kɛtɛboɛ” la.Sɔlɔmɔn Edwɛne 8:14.

6. Duzu ati a ɔbahola yeayɛ se kɛ yɛbanwu ahenle mɔɔ ɔlɛtendɛ wɔ Sɔlɔmɔn Edwɛne ne anu la ɛ?

6 Sɔlɔmɔn Edwɛne ne le edwɛne kɛnlɛma. Nɔhalɛ nu, bɛfɛlɛ ye “Edwɛne nu edwɛne.” (Sɔlɔmɔn Edwɛne 1:1) Noko Sɔlɔmɔn ambɔ menli mɔɔ hanle edwɛkɛ ne la aluma wɔ edwɛne ne anu. Ɛnee ɔkulo kɛ bɛnwu kɛzi edwɛkɛdwɛndolɛ le edwɛne kɛnlɛma la, yemɔti yeanva ninyɛne dɔɔnwo yeamboka ye. Aluma ɛnle edwɛne ne  anu ɛdeɛ, noko yɛnea edwɛkɛ ne a, yɛkola yɛnwu ahenle mɔɔ ɔlɛtendɛ la.

“WƆ ƐHULOLƐ NE LE KPALƐ TƐLA NWANYE”

7, 8. Kɛzi mboaneneavolɛ ne nee bɛlɛra ne hanle ɛlɔlɛ edwɛkɛ hilele bɛ nwo ɛ? Maa neazo.

7 Kakula bɛlɛra ne nee mboaneneavolɛ ne hanle edwɛkɛ ngɛnlɛma mɔɔ kile kɛ bɛkulo bɛ nwo la hilele bɛ nwo. Bie a yɛnrɛde bɛ “ɛhulolɛ” edwɛkɛ ne bie mɔ abo ɔluakɛ bɛhɛlɛle la, yebo ɛvolɛ 3,000. (Sɔlɔmɔn Edwɛne 1:2) Asolo bɛ mekɛ ne ɛdeɛ, noko yɛkola yɛnwu kɛ ɛnee bɛkulo bɛ nwo. Kɛ neazo la, mboaneneavolɛ ne hanle hilele bɛlɛra ne kɛ, “ɛ nye ma le kɛ abubule nye,” mɔɔ ɛnee ɔkile kɛ ɔ nye ma yɛ ye kɛnlɛma. (Sɔlɔmɔn Edwɛne 1:15) Bɛlɛra ne noko hanle kɛ ɔ nye le kɛnlɛma kɛ abubule nye. (Kenga Sɔlɔmɔn Edwɛne 5:12.) Ɛnee bɛlɛra ne nwu ɔ nye ma fufule ne a, ɔle kɛnlɛma kɛ abubule mɔɔ bɛbia ye meleke nu la.

8 Mboaneneavolɛ ne nee bɛlɛra ne hanvole bɛ anwofɛlɛko ne, noko yeanga ɛkɛ ne ala. Kɛ neazo la, ɛnee ɔ nye die kɛzi ɔtendɛ kɛnlɛma ɔkile awie mɔ la anwo. (Kenga Sɔlɔmɔn Edwɛne 4:7, 11.) Yemɔti mboaneneavolɛ ne hanle kɛ: “Ɛ nloa anwo fɛlɛko le kɛ ndotolo nu nzule fɛlɛko, wolɛ nee meleke wɔ ɛ tafinlima abo.” Ɛnee ye edwɛkɛ yɛ ye fɛ kɛ wolɛ nee meleke la. Mekɛ mɔɔ mboaneneavolɛ ne hanle hilele bɛlɛra ne kɛ, “ɛ nwo yɛ fɛ vi wɔ anwuma dwu aze” yɛɛ “ɛdi munli bɔkɔɔ” la, ɛnee tɛ ye anwofɛlɛko ne anwo edwɛkɛ ala a ɔlɛka a, na ɛnee ye subane kɛnlɛma ne boka nwo.

Kunli nee yelɛ bahola alua mɔɔ bɛka nee mɔɔ bɛyɛ la azo ahile kɛ bɛkulo bɛ nwo

9. (a) Ɛlɔlɛ mɔɔ ɔwɔ kɛ kunli nee yelɛ nyia maa bɛ nwo la bie a le boni? (b) Kɛmɔti a ɔhyia kɛ kunli nee yelɛ da bɛ ɛlɔlɛ ali kile bɛ nwo ɛ?

9 Ɛnɛ, kunli nee yelɛ mɔɔ sonle Gyihova la bu agyalɛ kɛ ɔnle ngyehyɛleɛ bie ala. Bɛkulo bɛ nwo kpalɛ yɛɛ bɛda ye ali. Noko ɛhulolɛ boni a ɔwɔ kɛ ɔyɛ a? Asoo ɔwɔ kɛ ɔyɛ nɔhalɛ ɛlɔlɛ ne mɔɔ Baebolo ne se yenyia yɛmaa menli kɔsɔɔti la? (1 Dwɔn 4:8) Asoo yemɔ a le ɛhulolɛ mɔɔ yɛnyia yɛmaa yɛ abusua la? Asoo yemɔ a le ɛlɔlɛ mɔɔ wɔ agɔnwolɛ nwiɔ avinli la? (Dwɔn 11:3) Anzɛɛ yemɔ a le nrenya nee raalɛ avinli ɛhulolɛ? (Mrɛlɛbulɛ 5:15-20) Nɔhalɛ nu, kɛmɔ bɛle menli mɔɔ bɛgya la ati, ɔwɔ kɛ bɛnyia nɔhalɛ ɛlɔlɛ bɛmaa bɛ nwo wɔ ndenle ɛhye mɔ kɔsɔɔti anu. Ɔlua mɔɔ bɛka nee mɔɔ bɛyɛ la azo, bɛbahola bɛamaa bɛ nuhua ko biala anwu kɛ bɛkulo ye na bɛanyia anyelielɛ kpalɛ wɔ bɛ agyalɛ nu. Kanzɛ bɛnlɛ alagye bɔbɔ a, ɔhyia kpalɛ kɛ bɛyɛ zɔ. Wɔ maanle bie mɔ mɔɔ bɛyɛ agyalɛ ngyehyɛleɛ bɛmaa awie mɔ la anu, bie a nrenya ne ɛnrɛnwu raalɛ ne toonwo atɔfolɛlielɛ  kenle ne. Yemɔti mekɛ mɔɔ bɛlɛnwu bɛ nwo na bɛ ɛlɔlɛ ne ɛlɛyɛ kpole la, ɔwɔ kɛ bɛka kɛzi bɛkulo bɛ nwo la anwo edwɛkɛ. Ɛhye bamaa bɛabikye bɛ nwo kpalɛ na bɛ agyalɛ ne anu amia.

10. Saa bɛka ɛlɔlɛ edwɛkɛ bɛkile bɛ nwo a kɛzi ɔmaa agyalɛ nu mia ɛ?

10 Saa agyalɛma da ɛlɔlɛ ali kile bɛ nwo a, ɔmaa bɛ agyalɛ ne anu mia wɔ adenle bieko azo. Wɔ edwɛne ne anu, Belemgbunli Sɔlɔmɔn hanle hilele bɛlɛra ne kɛ, “yɛbayɛ ezukoa nvutuke anwoneɛ yɛamaa wɔ, yɛava dwɛtɛ fufule yɛaduodua nu.” Ɔhanvole ye kɛ, “ɔle kɛnlɛma kɛ siane, na ɔta kɛ sɛnzɛne.” (Sɔlɔmɔn Edwɛne 1:9-11; 6:10) Noko ɛnee bɛlɛra ne ɛnyia awie mɔɔ ɔkulo ye kpalɛ la. Duzu a manle ɔlile nɔhalɛ ɔmanle mboaneneavolɛ ne a? Duzu a kyekyele ɔ rɛle wɔ mekɛ mɔɔ ɛnee bɛnnwu bɛ nwo la ɛ? (Kenga Sɔlɔmɔn Edwɛne 1:2, 3.) Ɔhakyele kɛzi edwɛkɛ mɔɔ ɛnee ɔka la, maa ɔ nye die la. Ɛnee ye ɛhulolɛ nwo edwɛkɛ mɔɔ ɔka la “le kpalɛ tɛla nwanye” maa ye, na kɛzi bɛkyekyele ɔ rɛle wɔ sua nu ɛkɛ ne la le kɛ ‘nwole evuanlɛ’ wɔ ɔ ti zo. (Edwɛndolɛ 23:5; 104:15) Ɔhyia kɛ kunli nee yelɛ ka ɛlɔlɛ edwɛkɛ kile bɛ nwo fane dɔɔnwo ɔluakɛ ɔboa ɔmaa bɛ ɛlɔlɛ ne yɛ kpole. Na saa bɛkakye edwɛkɛ ɛhye mɔ a, ɔbamaa bɛ ɛlɔlɛ ne ayɛ kpole.

MMAPELE ƐHULOLƐ NWO KƆKPULA YE “MEKƐ KPALƐ” NE

11. Duzu a yɛsukoa yɛfi edwɛkɛ mɔɔ Hyulam bɛlɛra ne hanle hilele mraalɛ mɔɔ wɔ Sɔlɔmɔn sua nu ɛkɛ la anu a?

11 Saa ɛkulo kɛ ɛgya a, duzu a ɛbahola wɔazukoa wɔavi Hyulam bɛlɛra ne ɛkɛ a? Yeannyia Belemgbunli Sɔlɔmɔn anwo ɛlɔlɛ na ɔhanle ɔhilele mraalɛ mɔɔ bɛwɔ ye sua nu ɛkɛ la wienyi kɛ: “[Bɛmmapele] ɛhulolɛ nwo kɔkpula kɛ ɛhulolɛ ne mekɛ kpalɛ kɛdwu.” (Sɔlɔmɔn Edwɛne 2:7; 3:5) Yemɔti asoo ɔle kpalɛ kɛ ɛbanyia awie biala anwo ɛhulolɛ ɔ? Kyɛkyɛ, emomu nrɛlɛbɛ wɔ nu kɛ ɛbazi abotane wɔahendɛ na wɔagya awie mɔɔ ɛkulo ye kpalɛ la.

Nrɛlɛbɛ wɔ nu kɛ ɛbazi abotane wɔahendɛ na wɔagya awie mɔɔ ɛkulo ye kpalɛ la

12. Duzu ati a ɛnee Hyulam bɛlɛra ne kulo mboaneneavolɛ ne a?

12 Duzu ati a ɛnee Hyulam bɛlɛra ne kulo mboaneneavolɛ ne a? Ɛnee ɔbu ye kɛ ɔ nwo yɛ fɛ “kɛ kɛtɛboɛ” la. “Ɔ sa mbaka le kɛ ezukoa nvutuke kpɔma,” yɛɛ ɔ gyakɛ “gyigyi ezukoa nvutuke zo.” Ɛnee tɛ kɛ ɔ nwo yɛ se na ɔ nwo yɛ fɛ ala. Ɛnee bɛlɛra ne ze kɛ mboaneneavolɛ ne kulo Gyihova yɛɛ ɔlɛ subane kɛnlɛma. Ɛhye ati a ɛnee ɔ nye die ɔ nwo kpalɛ ‘kɛ ampolo baka mɔɔ gyi ɛbɔ nu mbaka avinli la a.’Sɔlɔmɔn Edwɛne 2:3, 9; 5:14, 15.

13. Duzu ati a ɛnee mboaneneavolɛ ne kulo Hyulam bɛlɛra ne a?

13 Ɛnee Hyulam bɛlɛra ne anwo yɛ  fɛ kpalɛ. Belemgbunli Sɔlɔmɔn bɔbɔ anye liele ɔ nwo, ɔnva nwo kɛ ɛnee Belemgbunli ne “gya mraalɛ abulasia, ye mgbɔnla abulatwɛ, yɛɛ sonvolɛ mraalɛ dɔɔnwo mɔɔ bɛnze bɛ nloa” la. Asoo ɛnee bɛlɛra ne anwofɛlɛko ti a mboaneneavolɛ ne kulo ye a? Kyɛkyɛ. Ɛnee ɔdaye noko ɔkulo Gyihova na ɔlɛ subane kɛnlɛma. Kɛ neazo la, ɛnee bɛlɛra ne bɛlɛ ɔ nwo aze, yemɔti ɔhanle kɛ: “Mele kɛ Hyɛlɔn wulosu ndotolo” la. Noko ɛnee mboaneneavolɛ ne bu ye kɛ ɔle kɛnlɛma kɛ “aloa ndotolo wɔ mbowule nu.”Sɔlɔmɔn Edwɛne 2:1, 2; 6:8.

14. Saa yɛkulo kɛ yɛgya a, duzu a yɛbahola yɛazukoa yɛavi mboaneneavolɛ ne yɛɛ Hyulam bɛlɛra ne ɛkɛ a?

14 Gyihova ɛmaa ye azonvolɛ mɛla kɛ bɛgya bɛ gɔnwo “Keleseɛnenli” ala. (1 Kɔlentema 7:39) Ɛhye kile kɛ Gyihova sonvolɛ mɔɔ bɛzɔne ye ala a yɛ nee ye badu anzɛɛ yɛbagya ye a. Kɛzi ɛhye bamaa agyalɛ ayɛ kɛnlɛma ɛ? Kunli nee yelɛ bayia ngyegyelɛ wɔ alehyenlɛ biala anu. Noko saa bɛ nee Gyihova avinli le kyengye a, anzondwolɛ nee anyelielɛ bara bɛ agyalɛ ne anu. Yemɔti saa ɛkulo kɛ ɛgya a, sukoa mboaneneavolɛ ne nee Hyulam bɛlɛra ne neazo ne. Kpondɛ awie mɔɔ lɛ subane kpalɛ na ɔkulo Gyihova kpalɛ la.

Keleseɛnenli nee awie mɔɔ bɛtɛsɔnenle ye kɛ Gyihova sonvolɛ la ɛnrɛdu anzɛɛ ɔnrɛgya ye (Nea ɛdendɛkpunli 14)

“ME ATƆFOLƐ NE LE TOLA MƆƆ APIPI LA Ɔ NLOA”

15. Kɛzi Hyulam bɛlɛra ne nɔhalɛlilɛ ne le neazo kpalɛ maa Keleseɛnema mɔɔ bɛtɛgyale la ɛ?

15 Kenga Sɔlɔmɔn Edwɛne 4:12. Kɛmɔti a mboaneneavolɛ ne hanle kɛ Hyulam bɛlɛra ne le kɛ “tola mɔɔ apipi la ɔ nloa” la ɛ? Menli ɛnnyia adenle ɛngɔ tola mɔɔ apipi la ɔ nloa la anu. Ɛnee bɛlɛra ne le kɛ tola la ɔluakɛ ɛnee mboaneneavolɛ ne ala a ɔkulo ye a. Ɛnee yeyɛ ngyehyɛleɛ kɛ ɔbagya ye, yemɔti yeandie mɔɔ belemgbunli ne hanle la. Yɛɛ yeangakyi ye adwenle. Ɛnee ɔle kɛ “bane,” ɔnle kɛ “anlenkɛ” mɔɔ bɛkola bɛbuke la. (Sɔlɔmɔn Edwɛne 8:8-10) Zɔhane ala a, Keleseɛnema mɔɔ ɛlɛyɛ ngyehyɛleɛ kɛ bɛgya la ɔwɔ kɛ di nɔhalɛ maa bɛ nwo a. Ɔnle kɛ bɛnyia awie gyɛne biala anwo ɛhulolɛ.

16. Saa ɛ nee awie ɛlɛtu kɛ bɛgya a, duzu a ɛbahola wɔazukoa wɔavi Sɔlɔmɔn Edwɛne ne anu a?

 16 Mekɛ mɔɔ mboaneneavolɛ ne hanle kɛ bɛlɛra ne ɛmaa bɛvinde la, ɔ mediema ne mɔ ammaa yeangɔ. Bɛmanle ɔhɔzinzale bɛ vanye egyinli emomu. Ɛnee bɛnlie ye bɛnli ɔ? Asoo ɛnee bɛdwenle kɛ bɛ diema raalɛ ne nee mboaneneavolɛ ne kpondɛ kɛ bɛbɔ ɛbɛla ɛtane? Kyɛkyɛ. Ɛnee ɔ mediema ne mɔ kulo kɛ bɛbɔ bɛ diema raalɛ ne anwo bane na yeambɔ ɛbɛla ɛtane. (Sɔlɔmɔn Edwɛne 1:6; 2:10-15) Saa ɛ nee awie ɛlɛtu kɛ bɛgya a, kɛ ɔkɛyɛ na bɛanyɛ debie mɔɔ bamaa bɛabɔ adwɔmane la ɛ? Dumua nwu debie mɔɔ ɛnrɛyɛ la, amaa bɛ agɔnwolɛvalɛ ne anwo ade. Bɛmmamaa ɔka bɛ ngomekye wɔ ɛleka mɔɔ awie ɛnnwu bɛ la. Bɛlua adenle kɛnlɛma zo bɛla ɛlɔlɛ ali bɛhile bɛ nwo.

17, 18. Kɛzi Sɔlɔmɔn Edwɛne ne mɔɔ yɛzukoa la ɛboa wɔ ɛ?

17 Gyihova kulo kɛ agyalɛ kyɛ. Ɔkulo kɛ kunli nee yelɛ kulo bɛ nwo. Saa bɛgya a ɔwɔ kɛ bɛkulo bɛ nwo ala. Noko saa agyalɛ bahyɛ a, ɔwɔ kɛ bɛnyia ɛlɔlɛ kpole, kɛ sendɔlɔra mɔɔ ɔnnu la.Maake 10:6-9.

18 Saa ɛkulo kɛ ɛgya a, kpondɛ awie mɔɔ ɛbahulo ye kpalɛ la. Saa ɛnwu zɔhane sonla ne a, bɛbɔ mɔdenle bɛnyia ɛlɔlɛ kpole bɛmaa bɛ nwo. Kɛmɔ yɛnwunle ye wɔ Sɔlɔmɔn Edwɛne ne anu la, nɔhalɛ ɛlɔlɛ wɔ ɛkɛ, ɔluakɛ ɔle ‘Gyihova sendɔlɔra.’Sɔlɔmɔn Edwɛne 8:6.

^ ɛden. 2 Nea The Watchtower, January 15, 2007, mukelɛ 31.