Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Bɛhakye Bɛdabɛ Mɔɔ Bɛlɛyɛ Dahuu Ɛzonlenlɛ Gyima Ne La

Bɛhakye Bɛdabɛ Mɔɔ Bɛlɛyɛ Dahuu Ɛzonlenlɛ Gyima Ne La

“Yɛkakye kɛ bɛzile bɛhilele bɛ diedi na bɛ ɛhulolɛ manle bɛyɛle gyima ɛsesebɛ [la].”1 TƐS. 1:3.

1. Nganeɛ boni a Pɔɔlo dele manle bɛdabɛ mɔɔ bɛyɛle gyima ɛsesebɛ bɛbɔle edwɛkpa ne nolo la ɛ?

ƐNEE ɛzoanvolɛ Pɔɔlo bu ɔ mediema mrenya nee mraalɛ mɔɔ yɛ gyima ɛsesebɛ bɔ edwɛkpa ne nolo la kpalɛ. Ɔhɛlɛle kɛ: “Saa yɛkɔ yɛ Nyamenle ne nee yɛ Ze ne anyunlu a, yɛkakye kɛ bɛzile bɛhilele bɛ diedi na bɛ ɛhulolɛ manle bɛyɛle gyima ɛsesebɛ, nee kɛ bɛ anyelazo mɔɔ wɔ yɛ Awulae Gyisɛse Kelaese anu la si gyi kpundii la.” (1 Tɛs. 1:3) Gyihova noko kakye debie biala mɔɔ ye menli kɛyɛ wɔ ye ɛzonlenlɛ nu la na ɔkile nwolɛ anyezɔlɛ, saa bɛyɛ dɔɔnwo anzɛɛ ekyi bɔbɔ a.Hib. 6:10.

2. Duzu a yɛbazuzu nwo wɔ edwɛkɛ ɛhye anu a?

2 Wɔ tete ne nee ɛnɛ, Keleseɛnema ɛva ninyɛne dɔɔnwo ɛbɔ afɔle amaa bɛahola bɛayɛ dɔɔnwo wɔ Gyihova ɛzonlenlɛ nu. Wɔ edwɛkɛ ɛhye anu, yɛbazuzu ninyɛne mɔɔ ɛvoya mɔɔ lumua la anu amra bie mɔ yɛle amaa bɛazonle Gyihova la anwo. Eza yɛbazukoa mɔɔ dahuu azonvolɛ ɛlɛyɛ ye ɛnɛ nee kɛzi yɛbaboa bɛ la.

ƐVOYA MƆƆ LUMUA KELESEƐNEMA

3, 4. (a) Ndenle mɔɔ ɛvoya mɔɔ lumua la anu mediema luale zo zonlenle Gyihova la bie a le boni? (b) Kɛzi ɛvoya mɔɔ lumua la anu Belemgbunlililɛ ne anwo nolobɔlɛma holale nleanle bɛ nwo ɛ?

3 Bɛzɔnenle Gyisɛse ala la, ɔbɔle ɔ bo ɔbɔle Belemgbunlililɛ  ne nolo, na ɔtetele awie mɔ ɔmanle gyima zɔhane. (Luku 3:21-23; 4:14, 15, 43) Gyisɛse wule la, ye ɛzoanvolɛ ne mɔ nleanle edwɛkpahanlɛ gyima ne azo na ɔhɔle zo ɔdɛlɛle. (Gyi. 5:42; 6:7) Keleseɛnema bie mɔ vile bɛ azua nu hɔyɛle edwɛkpatɛlɛvolɛma. Kɛ neazo la, Felepe bɔle edwɛkpa ne nolo wɔ Palɛsetanye ɛleka dɔɔnwo. (Gyi. 8:5, 40; 21:8) Pɔɔlo noko vile ye sua nu ɔhɔyɛle edwɛkpatɛlɛvolɛ wɔ ɛleka ngakyile. (Gyi. 13:2-4; 14:26; 2 Kɔl. 1:19) Menli gyɛne le kɛ Maake, Luku, nee Seleveenɛse (Saelase) hɛlɛle Baebolo nu mbuluku ne bie anzɛɛ bɛyɛle menli mɔɔ hɛlɛle la kɛlɛhɛlɛvolɛma. (1 Pita 5:12) Mediema mraalɛ dɔɔnwo nee mediema mrenya ɛhye mɔ yɛle gyima. (Gyi. 18:26; Wulo. 16:1, 2) Mediema mrenya nee mraalɛ ɛhye mɔ anwo edwɛkɛ wɔ Keleseɛnema Giliki Ngɛlɛlera ne anu. Edwɛkɛ ɛhye mɔ kakye yɛ kɛ Gyihova anye sɔ gyima mɔɔ ye azonvolɛ yɛ la na ɔdi bɛ ngyianlɛ nwo gyima.

4 Kɛzi ɛnee ɛvoya mɔɔ lumua la anu Belemgbunlililɛ ne anwo nolobɔlɛma nyia ezukoa di bɛ ngyianlɛ nwo gyima ɛ? Bɛanzɛlɛ bɛ mediema kɛ bɛboa bɛ, yemɔti ɛnee ɔdwu mekɛ ne bie a bɛfa mekɛ ekyi bɛyɛ gyima. (1 Kɔl. 9:11-15) Noko saa bɛkyɛ bɛ debie a bɛdie. Bɛmanle bɛ aleɛ, dabelɛ, anzɛɛ bɛboale bɛ wɔ ndenle ngakyile zo. Ɛnee mediema yɛɛ asafo mumua ne boa bɛ.Bɛgenga Gyima ne 16:14, 15; Felepaema 4:15-18.

ƐNƐ MEKƐ YE DAHUU AZONVOLƐ

5. Kɛzi agyalɛma bie hanle dahuu ɛzonlenlɛ gyima ne mɔɔ bɛlɛyɛ la anwo edwɛkɛ ɛ?

5 Ɛnɛ noko, menli dɔɔnwo yɛ gyima ɛsesebɛ kɛ dahuu azonvolɛ wɔ Gyihova sua nu. (Nea ɛlɛka “Dahuu Ɛzonlenlɛ Gyima Ne Afoa Ngakyile.”) Kɛzi bɛte nganeɛ wɔ kpɔkɛ mɔɔ bɛzi la anwo ɛ? Saa ɛbiza bɛ edwɛkɛ ɛhye a, ɛ nye balie. Adiema nrenya ko ɛzonle kɛ dahuu adekpakyelɛ, adekpakyelɛ titile, edwɛkpatɛlɛvolɛ, nee maanle gyɛne zo Bɛtɛle. Ɔka kɛ: “Meze kɛ dahuu ɛzonlenlɛ gyima ne boka kpɔkɛ kpalɛ mɔɔ mezi la anwo. Menyianle ɛvolɛ 18 la, ɛnee ɔwɔ kɛ mesi kpɔkɛ kɛ mebahɔ yunivɛsiti, meayɛ gyima anzɛɛ adekpakyelɛ. Anwubielɛ ɛmaa menwu kɛ Gyihova arɛle ɛnvi afɔle mɔɔ yɛbɔ amaa yɛazonle ye dahuu la. Meva nrɛlɛbɛ nee anwosesebɛ mɔɔ Gyihova ɛva ɛmaa me la meli gyima kpalɛ mɔɔ anrɛɛ menrɛhola ye zɔ yɛ wɔ ewiade ne anu gyima gyɛne biala anu a.” Ɔ ye ka kɛ: “Gyimalilɛ biala mɔɔ menyianle ye la manle menyinle. Yɛnwu kɛzi Gyihova bɔ yɛ nwo bane na ɔkile yɛ adenle wɔ ndenle ngakyile zo la. Saa yɛdɛnlanle yɛ ɛleka bie a anrɛɛ yɛnrɛnyia ye zɔ. Meda Gyihova ase kenle ko biala kɛ yɛwɔ dahuu ɛzonlenlɛ gyima ne anu la.” Ɛkulo kɛ ɛte nganeɛ zɛhae bie ɔ?

6. Kɛzi Gyihova te nganeɛ wɔ yɛ ɛzonlenlɛ ne anwo ɛ?

6 Nɔhalɛ nu, tɛ awie biala a bahola ayɛ dahuu ɛzonlenlɛ gyima ne bie wɔ mekɛ ɛhye anu a, noko yɛ nuhua ko biala ɛlɛyɛ mɔɔ ɔbahola ye yɛ la yeamaa Gyihova. Yɛze kɛ ɔ nye sɔ mɔɔ awie biala kola ye yɛ la. Kɛ neazo la, wɔ Faelimɔn 1-3, Pɔɔlo hanle kɛ ɔbiza mediema mɔɔ bɛwɔ Kɔlɔsae asafo ne anu la, ɔbobɔle bie mɔ aluma bɔbɔ. Pɔɔlo anye zɔle bɛ gyima ne na Gyihova noko anye zɔle ye. (Bɛgenga.) Gyihova anye sɔ mɔɔ yɛdayɛ noko yɛlɛyɛ la. Noko, duzu a ɛbahola wɔayɛ wɔaboa mediema mɔɔ ɛlɛyɛ dahuu ɛzonlenlɛ gyima ne la ɛ?

KƐZI BƐBOA ADEKPAKYELƐMA LA

7, 8. Duzu a adekpakyelɛma yɛ a, na kɛzi asafo ne anu amra bahola aboa adekpakyelɛma ɛ?

7 Adekpakyelɛma boa asafo ne kpalɛ kɛmɔ ɛvoya mɔɔ lumua la anu edwɛkpakavolɛma yɛle la. Bɛ nuhua dɔɔnwo fa dɔnehwele kɛyɛ 70 ka  edwɛkɛ ne siane biala. Kɛzi ɛbahola wɔaboa bɛ ɛ?

8 Adiema adekpakyelɛnli raalɛ ko mɔɔ bɛfɛlɛ ye Shari la hanle kɛ: “Adekpakyelɛma anwo yɛ se, bɛkɔ daselɛlilɛ dahuu. Noko akee, bɛhyia anwosesebɛmanlɛ.” (Wulo. 1:11, 12) Adiema raalɛ fofolɛ noko mɔɔ ɛyɛ adekpakyelɛ ɛvolɛ dɔɔnwo la hanle adekpakyelɛma mɔɔ wɔ ye asafo ne anu la anwo edwɛkɛ kɛ: “Bɛyɛ gyima ɛsesebɛ kpalɛ. Saa awie mɔ maa bɛfo bɛ kale nu, anzɛɛ bɛmaa bɛ aleɛ, ezukoa, anzɛɛ patulo ezukoa a, bɛ nye sɔ ye kpalɛ. Ɔmaa bɛnwu kɛ bɛdwenle bɛ nwo.”

9, 10. Duzu a bie mɔ yɛ boa dahuu adekpakyelɛma mɔɔ wɔ bɛ asafo nu la ɛ?

9 Adenle bieko mɔɔ yɛdua zo yɛboa adekpakyelɛma la a le kɛ yɛ nee bɛ kɔ daselɛlilɛ. Adekpakyelɛ mraalɛ nwiɔ hanle kɛ bɛhyia mediema mɔɔ bɛ nee bɛ bɛahɔ daselɛlilɛ ewiazo wɔ dapɛne ne anu la. Adiema raalɛ ko mɔɔ kɛkala sonle wɔ Brooklyn Bɛtɛle la kakye moalɛ mɔɔ ɔnyianle wɔ mekɛ mɔɔ ɛnee ɔle adekpakyelɛ la. Ɔka kɛ: “Adiema raalɛ ko mɔɔ ɛnee lɛ kale la hanle kɛ, ‘Mekɛ biala mɔɔ ɛnnyia awie ɛ nee ye ɛngɔ daselɛlilɛ la, fɛlɛ me na me nee wɔ bahɔ.’ Ɔmanle mendwule me bodane nwo.” Adiema raalɛ ko mɔɔ bɛfɛlɛ ye Shari la ka kɛ: “Adekpakyelɛma mɔɔ bɛtɛgyale la anwo yɛ bɛ koonwu wɔ mekɛ mɔɔ bɛkɛkpɔne daselɛlilɛ la. Bɛbahola bɛamaa bɛara bɛ abusua ɛzonlenlɛ ne bie. Bɛ nee bɛ yɛ gyima gyɛne noko a ɔmaa bɛ nwo kɔ zo yɛ se.”

10 Adiema raalɛ bie mɔɔ yeyɛ dahuu ɛzonlenlɛ gyima ne asɛɛ ɛvolɛ 50 la hanle moalɛ mɔɔ ɔ nee ɔ mediema mbelazinli nyianle la anwo edwɛkɛ kɛ: “Yɛ mgbanyima ne mɔ kpɔla yɛ siane biala. Bɛbiza yɛ agbɔkɛ nu, gyima mɔɔ yɛyɛ yɛnea yɛ nwo, nee ninyɛne mɔɔ gyegye yɛ la. Bɛvile ahonle nu a bɛyɛle a. Bɛba yɛ sua nu amaa bɛanwu ninyɛne mɔɔ yɛhyia nwo la.” Mgbanyima zɛhae mɔ di Onɛsefɔlɛse neazo ne anzi. Ɛnee ɔwɔ kɛ ɔnea ye abusua ne, noko eza ɔboale Pɔɔlo.2 Tem. 1:18.

11. Adekpakyelɛ titilema gyima a le boni?

11 Dahuu ɛzonlenlɛ gyima ne foa bieko  a le adekpakyelɛ titile. Bɛ nuhua dɔɔnwo fa dɔnehwele 130 di daselɛ siane biala. Eza bɛyɛ gyima ngakyile wɔ asafo ne anu. Kɛmɔ bɛnlɛ mekɛ bɛnyɛ gyima gyɛne la ati, ɔfese ne maa bɛ ezukoa ekyi siane biala. Ezukoa ɛhye boa adekpakyelɛ titilema maa bɛdi bɛ ngyianlɛ nwo gyima amaa bɛava bɛ mekɛ ne dɔɔnwo bɛabɔ edwɛkpa ne nolo.

12. Kɛzi mgbanyima nee awie mɔ bahola aboa adekpakyelɛ titilema ɛ?

12 Duzu a yɛbahola yɛayɛ yɛaboa adekpakyelɛ titilema a? Asafo nu kpanyinli ko mɔɔ yɛ gyima wɔ yɛ ɔfese ne mɔ ko anu na ɔ nee adekpakyelɛ titilema dɔɔnwo ɛli ngitanwo la ka kɛ: “Ɔwɔ kɛ mgbanyima nee bɛ di adwelie, nwu tɛnlabelɛ mɔɔ bɛwɔ nu, nee kɛzi bɛbaboa bɛ la. Mediema bie mɔ suzu kɛ ɔluakɛ bɛmaa bɛ ezukoa ekyi siane biala la ati, asafo nea bɛ, noko bɛbahola bɛaboa bɛ wɔ ndenle ngakyile zo.” Adekpakyelɛ titilema anye die mediema mɔɔ nee bɛ kɔ daselɛlilɛ la anwo kɛ dahuu adekpakyelɛma la. Ɛbahola ɛ nee bɛ ayɛ gyima ɔ?

KƐZI BƐBOA NEAVOLƐ ADENDUVOMA LA

13, 14. (a) Duzu a ɔwɔ kɛ yɛkakye ye wɔ maangyeba zo neavolɛma nee bɛ ye mɔ anwo a? (b) Duzu a ɛbahola wɔayɛ wɔaboa bɛ a?

13 Maangyebakyi zo neavolɛma nee bɛ ye mɔ lɛ anwubielɛ dɔɔnwo nee diedi kpole yemɔti bɛmaa yɛ anwosesebɛ. Noko ɔnle kɛ yɛ rɛle fi kɛ bɛdabɛ noko bɛhyia anwosesebɛmanlɛ. Eza bɛhyia mediema mɔɔ bɛ nee bɛ bɛahɔ daselɛlilɛ la. Saa yɛfɛlɛ bɛ yɛ nee bɛ di adwelie nee nwɔhoa anzɛɛ yɛ ninyɛne gyɛne a, bɛ nye die. Saa bɛ nwo to bɛ anzɛɛ bɛto bɛ asopiti a, yɛbahola yɛahɔkpɔla bɛ na yɛali bɛ ngyianlɛ bie mɔ anwo gyima. Luku mɔɔ ɛnee le ‘ayileyɛlɛnli kulovolɛ’ la, lile Pɔɔlo nee menli mɔɔ kpɔlɔkpɔla asafo la bie mɔ ngyianlɛ nwo gyima.Kɔl. 4:14; Gyi. 20:5–21:18.

14 Neavolɛ adenduvoma nee bɛ ye mɔ hyia agɔnwolɛma mɔɔ maa anwosesebɛ na bɛlɛ ɛlɔlɛ la. Maangyebakyi zo neavolɛ bie hɛlɛle kɛ: “Me gɔnwo mɔ ze mekɛ mɔɔ mehyia anwosesebɛmanlɛ la. Bɛbiza me bɛmaa meka mɔɔ ɔgyegye me la. Bɛboa me kpalɛ ɔluakɛ bɛtie me.” Maangyebakyi zo neavolɛma anye die kɛ mediema kulo bɛ edwɛkɛ na bɛfa bɛ agɔnwolɛ la.

BƐBOA MEDIEMA MƆƆ SONLE BƐTƐLE LA

15, 16. Duzu ati a mediema mɔɔ sonle wɔ Bɛtɛle nee Nyianu Asalo la gyima ne hyia ɛ, na kɛzi yɛbahola yɛaboa bɛ ɛ?

15 Menli mɔɔ sonle wɔ Bɛtɛle nee Nyianu Asalo la yɛ gyima ɛsesebɛ boa edwɛkpahanlɛ gyima ne. Saa Bɛtɛlema wɔ wɔ asafo anzɛɛ maangyebakyi ne anu a, kɛzi ɛbahakye bɛ ɛ?

16 Saa bɛkɔ Bɛtɛle ɛkɛ ne ala a, bɛ nwo dɔ sua nu. Saa Bɛtɛlema mɔɔ ɛha la nee bɛ asafo ne anu amra fa menli mɔɔ ba Bɛtɛle fofolɛ la agɔnwolɛ na bɛnwu bɛ boɛ a, bɛ nye die. (Maake 10:29, 30) Bɛ Bɛtɛle gyima ne maa bɛnyia adenle bɛkɔ debiezukoalɛ nee daselɛlilɛ dapɛne biala. Noko ɔyɛ a Bɛtɛlema yɛ gyima ngakyile boka bɛ gyima ne anwo. Ɔbayɛ kpalɛ kɛ asafo ne anu amra bɛade bɛ ngyehyɛleɛ ne abo na bɛahile kɛ bɛ nye sɔ gyima mɔɔ Bɛtɛlema yɛ la.Bɛgenga 1 Tɛsalonaekama 2:9.

BƐBOA DAHUU AZONVOLƐ MƆƆ BƐWƆ MAANLE GYƐNE ZO LA

17, 18. Duzu gyima a dahuu azonvolɛ mɔɔ sonle wɔ maanle gyɛne zo la yɛ a?

17 Dahuu azonvolɛ bie mɔ kola nyia gyimalilɛ wɔ maanle gyɛne zo. Bɛsukoa aleɛ fofolɛ ɛlilɛ, aneɛ, amaamuo, nee ɛbɛlabɔlɛ fofolɛ. Gyima boni mɔ a dahuu azonvolɛ yɛ ye wɔ maanle gyɛne zo a?

 18 Bie mɔ le edwɛkpatɛlɛvolɛma yemɔti bɛfa bɛ mekɛ ne dɔɔnwo bɛkɔ daselɛlilɛ. Bɛle nolobɔlɛma nee kilehilevolɛma mɔɔ bɛbe kpalɛ, na bɛ nee bɛ asafo ne anu amra kyɛ bɛ anwubielɛ. Ɔfese ne maa edwɛkpatɛlɛvolɛma dabelɛ nee ezukoa ekyi bɛfa bɛdi bɛ ngyianlɛ nwo gyima. Bie mɔ sonle wɔ manle gyɛne zo Bɛtɛle anzɛɛ bɛboa bɛsisi Bɛtɛle azua, ɔfese mɔɔ bɛkile edwɛkɛ bo wɔ ɛkɛ, Nyianu Asalo, anzɛɛ Belemgbunlililɛ Asalo. Ɔfese ne anzɛɛ mediema mɔɔ wɔ ɛkɛ la maa bɛ aleɛ nee dabelɛ. Mediema ɛhye mɔ le kɛ Bɛtɛlema la, bɛkɔ debiezukoalɛ nee daselɛlilɛ dahuu. Bɛboa asafo mɔɔ bɛkɛhɔ nu la kpalɛ.

19. Duzu a ɛbahola wɔayɛ wɔaboa dahuu azonvolɛ mɔɔ ɛra wɔ maanle nu la ɛ?

19 Kɛzi ɛbahola wɔaboa dahuu azonvolɛ mɔɔ bɛra wɔ maanle nu la ɛ? Kakye kɛ saa bɛba fofolɛ a, tɛ aleɛ mɔɔ wɔ maanle ne anu la amuala a bɛkola ye di a. Ɛhye ati saa ɛkpondɛ kɛ bɛbadi aleɛ wɔ wɔ sua nu a, ɛbahola wɔabiza bɛ saa bɛkulo kɛ bɛdi aleɛ fofolɛ bie bɛnea anzɛɛ bɛkulo debie ngakyile bie a. Saa bɛlɛsukoa wɔ maanle ne anu aneɛ nee amaamuo a, bɛnrɛnwu ye ɛkɛ ne ala. Yemɔti ɔwɔ kɛ yɛnyia bɛ nwo abotane na yɛboa bɛ. Bɛkulo kɛ bɛsukoa!

20. Kɛzi yɛbahola yɛaboa dahuu azonvolɛ nee bɛ awovolɛ ɛ?

20 Mekɛ ɛlɛkɔ la, dahuu azonvolɛ mɔɔ ɛmbikye bɛ sua zo la dwenle kɛzi bɛbahola bɛanlea bɛ awovolɛ mɔɔ ɛyɛ mgbanyinli la anwo. Awovolɛ mɔɔ bɛle Alasevolɛ la kulo kɛ bɛ mra toa zo yɛ dahuu ɛzonlenlɛ gyima ne. (3 Dwɔn 4) Nɔhalɛ, dahuu azonvolɛ yɛ mɔɔ bɛbahola la bɛkɔkpɔla bɛ awovolɛ na bɛnea bɛ. Noko mediema mɔɔ bikye awovolɛ ɛhye mɔ la bɛahola aboa bɛ. Saa awovolɛ ne mɔ hyia debie a, bɛbahola bɛaboa bɛ. Ɔnle kɛ yɛ rɛle fi kɛ dahuu azonvolɛ yɛ gyima ɛsesebɛ boa daselɛlilɛ gyima ne mɔɔ nwolɛ hyia tɛla gyima biala wɔ azɛlɛ ye azo ɛnɛ la. (Mat. 28:19, 20) Ɛbahola wɔahakye dahuu azonvolɛ ɔlua bɛ awovolɛ mɔɔ ɛbaboa bɛ la azo ɔ?

21. Kɛzi menli mɔɔ le dahuu azonvolɛ la te nganeɛ wɔ moalɛ nee anwosesebɛ mɔɔ awie mɔ fa maa bɛ la anwo ɛ?

21 Menli dɔɔnwo yɛ gyima ɛsesebɛ ɔluakɛ bɛkpondɛ kɛ bɛnyia bɛ nwo. Noko menli mɔɔ yɛ dahuu ɛzonlenlɛ gyima ne la yɛ gyima ɛsesebɛ ɔluakɛ bɛkulo kɛ bɛsonle Gyihova kpalɛ na bɛboa awie mɔ. Yemɔti, bɛ nye sɔ moalɛ biala mɔɔ awie kɛva kɛmaa bɛ la. Adiema raalɛ bie mɔɔ le dahuu sonvolɛ na yezonle maanle gyɛne zo la hanle kɛ: “Kɛlata sikalɛ bɔbɔ mɔɔ bɛbahɛlɛ bɛamaa wɔ la maa ɛnwu ye kɛ menli dwenle ɛ nwo na bɛ nye die mɔɔ ɛlɛyɛ la anwo.”

22. Kɛzi ɛbu dahuu ɛzonlenlɛ gyima ne ɛ?

22 Menli mɔɔ ɛlɛyɛ dahuu ɛzonlenlɛ gyima ne la ɛkpa gyima mɔɔ maa bɛ nye die na bɛ kunlu dwo bɛ nwo la. Ɔtɛla ɛbɛlabɔlɛ biala mɔɔ wɔ azɛlɛ ye azo ɛnɛ la. Dahuu azonvolɛ bahola azukoa subane nee ninyɛne ngakyile mɔɔ ɔbaboa bɛ kɛkala nee mekɛ mɔɔ bɛwɔ ewiade fofolɛ ne anu la. Ɔnrɛhyɛ Gyihova azonvolɛ kɔsɔɔti bayɛ gyima mɔɔ maa bɛ kunlu dwo bɛ nwo dahuu la. Bɛmaa yɛhakye kɛzi menli mɔɔ ɛlɛyɛ dahuu ɛzonlenlɛ gyima ne la ‘nɔhalɛlilɛ nee bɛ ɛhulolɛ maa bɛyɛ gyima ɛsesebɛ dahuu la.’1 Tɛs. 1:3.