Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Kpuyia Mɔɔ Vi Kengavoma Ɛkɛ

Kpuyia Mɔɔ Vi Kengavoma Ɛkɛ

Gyisɛse zele Sadusiima kɛ bɛdabɛ mɔɔ bɛbadwazo bɛ bɛavi ewule nu la, bɛnrɛgya. (Luku 20:34-36) Asoo azɛlɛ ye azo ewudwazo ne anwo edwɛkɛ yɛɛ ɛnee ɔlɛka ɔ?

Kpuyia ɛhye anwo hyia, titile bɛdabɛ mɔɔ bɛ kulovolɛ bie ɛha ɛleka bie la. Bie a menli ɛhye mɔ kulo kɛ bɛ nee bɛ bokavolɛ ne gya bieko saa bɛdwazo ye wɔ ewiade fofolɛ ne anu a. Kunlavolɛ nrenya ko hanle kɛ: “Me nee me ye yɛanyɛ yɛ adwenle kɛ yɛpɛ yɛ agyalɛ ne azo. Ɛnee yɛkulo kɛ yɛbɔ nu yɛsonle Gyihova kɛ kunli nee yelɛ dahuu. Nganeɛ ko ne ala a metɛte a.” Asoo bɛdabɛ mɔɔ bɛbadwazo bɛ la bɛahola agya bieko? Yɛnrɛhola yɛnrɛha.

Yɛ mbuluku ne bie ɛha kɛ Gyisɛse edwɛkɛ ɛhye fane azɛlɛ ye azo ewudwazo ne anwo na ɔda ali kɛ bɛdabɛ mɔɔ bɛbadwazo bɛ wɔ ewiade fofolɛ ne anu la ɛnrɛgya. * (Mat. 22:29, 30; Maake 12:24, 25; Luku 20:34-36) Asoo Gyisɛse edwɛkɛ ne fane menli mɔɔ bɛbadwazo bɛ bɛahɔ anwuma la noko anwo ɔ? Maa yɛzuzu mɔɔ Gyisɛse hanle la anwo.

Kɛzi edwɛkɛ ne bɔle ɔ bo la. (Kenga Luku 20:27-33.) Sadusiima mɔɔ ɛnee bɛnlie ewudwazo ne bɛnli la bɔle mɔdenle kɛ bɛdua ewudwazo ne nee bɛ diema aye ɛgyalɛ nwo kpuyia zo bɛazɔ Gyisɛse bɛanlea. * Gyisɛse buale bɛ kɛ: ‘Ewiade ɛhye anu mrenya nee mraalɛ gya bɛ nwo, na mrenya nee mraalɛ mɔɔ anwo fɛta zɔhane ewiade ne la, saa mekɛ ne dwu na bɛdwazo bɛ bɛfi ewule nu a bɛnrɛgya anzɛɛ bɛnrɛva bɛ bɛnrɛmaa agyalɛ. Bɛbayɛ kɛ anwuma soanvolɛma la na bɛnrɛwu ɛlɛ. Bɛle Nyamenle amra, ɔboalekɛ bɛdwazo bɛ bɛvi ewule nu.’Luku 20:34-36.

Duzu ati a yɛ mbuluku ne mɔ hanle kɛ ɔbayɛ kɛ ɛnee Gyisɛse ɛlɛka azɛlɛ ye azo ewudwazo ne anwo edwɛkɛ ɛ? Ndelebɛbo nwiɔ ɛhye mɔ ati ɔ. Mɔɔ lumua, ɔbayɛ kɛ azɛlɛ ye azo ewudwazo ne a ɛnee wɔ Sadusiima ne adwenle nu a. Mɔɔ tɔ zo nwiɔ, Gyisɛse hwenle menli ne adwenle hɔle Ebileham, Ayezeke, nee Gyekɔbo—tete selɛma mɔɔ bɛbadwazo bɛ bɛara azɛlɛ ye azo la anwo zo ɔvale ɔdwulale ye edwɛkɛ ne.Luku 20:37, 38.

Noko, ɔbayɛ kɛ ɛnee anwuma ewudwazo ne anwo edwɛkɛ wɔ Gyisɛse adwenle nu. Duzu a yɛbahola yɛagyinla zo yɛaha ye zɔ a? Maa yɛzuzu edwɛkɛ titile nwiɔ anwo.

‘Bɛdabɛ mɔɔ ɔfɛta kɛ . . . bɛdwazo bɛ bɛfi ewule nu la.’ Bɛbu nɔhavoma mɔɔ bɛkpokpa bɛ la kɛ bɛfɛta “Nyamenle Belemgbunlililɛ ne.” (2 Tɛs. 1:5, 11) Bɛgyinla ɛkpɔnedeɛ ne azo bɛbua bɛ benle bɛmaa ngoanelielɛ; yemɔti bɛnrɛwu kɛ ɛtanevolɛma mɔɔ bɛbua bɛ ewule fɔlɛ la. (Wulo. 5:1, 18; 8:1) Bɛhɛlɛ kɛ “nyilalɛ nee anyunlunyia” ɛha menli ɛhye mɔ mɔɔ bɛfɛta anwuma ewudwazo ne la. (Yek. 20:5, 6) Noko “ɛtanevolɛma” boka bɛdabɛ mɔɔ bɛbadwazo bɛ bɛara azɛlɛ ye azo la anwo. (Gyi. 24:15) Asoo yɛbahola yɛaha kɛ bɛ nwo “fɛta” ewudwazo ɔ?

 “Bɛnrɛwu ɛlɛ.” Gyisɛse anga kɛ: “Bɛnrɛwu bieko.” Emomu ɔhanle kɛ: “Bɛnrɛwu ɛlɛ.” Ngilebɛbo bie mɔ ka kɛ “bɛnrɛwu bieko” yɛɛ “ewule ɛnlɛ bɛ nwo zo tumi.” Bɛdabɛ mɔɔ bɛkpokpa bɛ mɔɔ bɛbava nɔhalɛlilɛ bɛawie bɛ azɛlɛ ye azo gyima ne la, bɛbadwazo bɛ bɛahɔ anwuma bɛamaa bɛ damɛnlangoate ngoane. (1 Kɔl. 15:53, 54) Ewule ɛnlɛ menli mɔɔ banyia anwuma ewudwazo ne la anwo zo tumi bieko. *

Kɛkala kɛzi ɔwɔ kɛ yɛdwula edwɛkɛ ne ɛ? Ɔbahola yeara ye kɛ menli mɔɔ bɛbadwazo bɛ nee bɛ agyalɛ nwo edwɛkɛ ne mɔɔ Gyisɛse hanle la fane bɛdabɛ mɔɔ bɛbadwazo bɛ bɛahɔ anwuma la anwo. Saa ɔle zɔ a, ɛnee ye edwɛkɛ ne maa yɛnwu anwuma ewudwazo ne anwo ninyɛne dɔɔnwo: Bɛnrɛgya, bɛnrɛwu, na wɔ adenle bie azo bɛle kɛ anwumabɔvolɛma—sunsum nu abɔdeɛ mɔɔ ɛnyelɛ ɛnnwu bɛ. Noko, mɔɔ yɛha la nee kpuyia dɔɔnwo lua.

Mɔɔ lumua, duzu ati a Gyisɛse hwenle adwenle hɔle anwuma ewudwazo ne azo wɔ mekɛ mɔɔ ɔbua Sadusiima mɔɔ ɔbayɛ kɛ ɛnee azɛlɛ ye azo ewudwazo ne a wɔ bɛ adwenle nu la ɛ? Tɛ mekɛ ne amuala a Gyisɛse bua ye dwazotiama kɛmɔ bɛkpondɛ ye la a. Kɛ neazo la, ɔzele Dwuuma mɔɔ bizale ye sɛkɛlɛneɛ la kɛ: “Bɛbubu Ɛzonlenlɛ Sua ɛhye bɛgua na mebava kenle nsa meazi.” Ɔda ali kɛ, ɛnee Gyisɛse ze adwenle mɔɔ bɛlɛ wɔ ɛzonlenlɛ sua ne anwo la, noko “Ɛzonlenlɛ Sua ne mɔɔ ɛnee Gyisɛse ɛlɛka nwolɛ edwɛkɛ la a le ɔdaye mumua ne ye sonlabaka ne.” (Dwɔn 2:18-21) Ɔbayɛ kɛ Gyisɛse dele nganeɛ kɛ nwolɛ ɛngyia kɛ ɔbabua Sadusiima mɔɔ bɛnlie ewudwazo ne nee anwumabɔvolɛma bɛnli la. (Mrɛ. 23:9; Mat. 7:6; Gyi. 23:8) Emomu, bie a ɛnee ɔkulo kɛ ɔda nɔhalɛ ne mɔɔ fane anwuma ewudwazo ne anwo la ali ɔkile ye ɛdoavolɛ nɔhavoma ne mɔɔ kenlebie bɛbanyia ewudwazo ɛhye la.

Mɔɔ tɔ zo nwiɔ, duzu ti a Gyisɛse hwenle adwenle hɔle Ebileham, Ayezeke, nee Gyekɔbo mɔɔ bɛbanyia ewudwazo wɔ azɛlɛ ye azo kenlebie la anwo zo ɔvale ɔdwulale ye edwɛkɛ ne ɛ? (Kenga Mateyu 22:31, 32.) Yɛ ye nzonlɛ kɛ Gyisɛse vale edwɛkɛ “mɔɔ fane mɔwuamra ɛdwazolɛ nwo la” a bukele ye tete selɛma ne anwo edwɛkɛ ne anye a. Bie a zɔhane edwɛkɛ ne bamaa bɛava bɛ adwenle bɛazie debie fofolɛ zo. Akee, Gyisɛse vale edwɛkɛ ne mɔɔ Gyihova hanle hilele Mosisi wɔ kpɔkɛ ne mɔɔ ɛnee ɛlɛsɔ anwo ɛkɛ ne mɔɔ Sadusiima ne ka kɛ bɛdie bɛdi la ɔlile daselɛ kɛ azɛlɛ ye azo ewudwazo ne le Nyamenle bodane mɔɔ gyi ye kpundii a.Ade. 3:1-6.

Mɔɔ tɔ zo nsa, saa Gyisɛse edwɛkɛ ne mɔɔ fane ewudwazo ne nee agyalɛ nwo la fane anwuma ewudwazo ne anwo a, asoo ɛhye kile kɛ bɛdabɛ mɔɔ bɛbadwazo bɛ bɛara azɛlɛ ye azo la bahola agya ɔ? Kpuyia ɛhye anwo nyelebɛnloa fɔɔnwo ɛnle Nyamenle Edwɛkɛ ne anu. Nɔhalɛ, saa anwuma ewudwazo ne anwo edwɛkɛ yɛɛ ɛnee Gyisɛse ɛlɛka a, ɛnee ye edwɛkɛ ne ɛngile kɛ bɛdabɛ mɔɔ bɛbadwazo bɛ bɛara azɛlɛ ye azo la bahola agya anzɛɛ bɛnrɛhola bɛnrɛgya wɔ ewiade fofolɛ ne anu.

Ɛnɛ, yɛze kɛ Nyamenle Edwɛkɛ ne se ewule pɛ agyalɛ zo. Ɛhye ati, saa kunlavolɛ nrenya anzɛɛ raalɛ si kpɔkɛ kɛ ɔgya bieko a ɔnle kɛ ye adwenle bua ye fɔlɛ. Ɛhye le ahenle ɔdaye ye kpɔkɛzilɛ na ɔnle kɛ bɛtendɛ bɛtia ye.Wulo. 7:2, 3; 1 Kɔl. 7:39.

Nɔhalɛ, ewiade fofolɛ ne anwo kpuyia dɔɔnwo wɔ ɛkɛ. Noko, kɛ anrɛɛ yɛbabɔ yɛ ti anu yɛabua la, ɔwɔ kɛ yɛkendɛ na yɛnea mɔɔ ɔbazi la. Yɛbahola yɛalie yɛali kɛ: Alesama mɔɔ bɛyɛ tieyɛ la anye balie, ɔluakɛ Gyihova bava mɔɔ yɛhyia nwo nee mɔɔ yɛkulo la yeamaa yɛ.Edw. 145:16.

^ ɛden. 4 Nea June 1, 1987, The Watchtower mukelɛ 30-31.

^ ɛden. 5 Wɔ Baebolo mekɛ nu, ɛnee ɔle amaamuo kɛ saa nrenya wu na yeanwo a, ɔ diema nrenya kola gya kunlavolɛ raalɛ ne na ɔ nee ye wo amaa ɔ diema ne mɔɔ ɛwu la duma amminli.Mɔl. 38:8; Mɛla 25:5, 6.

^ ɛden. 9 Bɛdabɛ mɔɔ bɛbanyia azɛlɛ ye azo ewudwazo ne la banyia dahuu ngoane, tɛ damɛnlangoate ngoane ɔ. Saa ɛkpondɛ kɛ ɛnwu ngakyile mɔɔ wɔ damɛnlangoate ngoane nee dahuu ngoane avinli la a nea The Watchtower, April 1, 1984, mukelɛ 30-31.