Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐBƐLABƆLƐ NU EDWƐKƐ

Me Ze Ɛwu—Noko Menyia Selɛ Fofolɛ

Me Ze Ɛwu—Noko Menyia Selɛ Fofolɛ

BƐWOLE me papa wɔ Graz, Austria, wɔ 1899, yemɔti mekɛ mɔɔ Ewiade Konle I zile la ɛnee ɔ nye ɛvi. Bɛvale ye bɛbokale German sogyama ne anwo wɔ mekɛ mɔɔ Ewiade Konle II bɔle ɔ bo wɔ 1939 la anzi mekɛ ekyi bie anu. Bɛhunle ye 1943 wɔ konle nu wɔ Russia. Kɛ ɔyɛle mɔɔ me papa wule alɔbɔlɛ nu wɔ mekɛ mɔɔ ɛnee meli ɛvolɛ nwiɔ pɛ la ɛne. Meannwu ye ɛlɛ, na ɛnee medi nyane kpalɛ kɛ me gɔnwo mɔ sukuluma lɛ bɛ ze mɔ na menlɛ bie la. Nzinlii mɔɔ menyɛle kpavolɛ la, menzukoale yɛ Ze ne mɔɔ wɔ anwuma, Selɛ mɔɔ tɛla biala na ɔnwu ɛlɛ la anwo debie, yemɔti me rɛle kyekyele.

ƐNEE MELE BOY SCOUT

Me ngakula nu

Menyianle ɛvolɛ nsuu la, mengɔle Boy Scout. Boy Scout le eku mɔɔ bie wɔ ewiade ɛleka dɔɔnwo. Sogyanli kpanyinli bie mɔɔ bɛfɛlɛ ye Robert Stephenson Smyth Baden-Powell mɔɔ vi Great Britain la a dele ye wɔ 1908 ne anu a. Wɔ 1916, ɔdele Wolf Cubs (anzɛɛ Cub Scouts) ɔmanle ngakula mrenya mɔɔ bɛle me tipɛnema la.

Ɛnee ɔdwu dapɛne awieleɛ a yɛsi ndanlɛ azua yɛda ɔ bo wɔ alie nwo, yɛwula eku tɛladeɛ, yɛbɔ kenle na yɛto edwɛne yɛkpɔsa, yemɔti ɛnee me nye die kpalɛ. Saa me nee me gɔnwo mɔ Scoutma wɔ ɛhoayelɛ nu, na yɛsɔ senle nɔsolɛ nu, yɛto edwɛne yɛbɔ nwolɛ mgbɔlɛka yɛyia, na yɛdi nwɔhoa a, ɔmaa me nye die kpole. Eza yɛzukoale abɔdeɛ nwo ninyɛne dɔɔnwo, na ɔmanle me nye liele ninyɛne mɔɔ yɛ Bɔvolɛ ne ɛbɔ la anwo.

Bɛtetele yɛdayɛ mɔɔ yɛwɔ Boy Scout eku ne anu la kɛ yɛbɔ ɛbɛla kpalɛ dahuu. Edwɛkɛ mɔɔ ɛnee yɛfa yɛbiza yɛ nwo ahye la a le “Siezie Ɛ Nwo Dahuu.” Ɛnee me nye die nwo kpalɛ. Menli mɔɔ bo ɛya ko la a ɛnee wɔ yɛ ekpunli ne anu a, kɛyɛ foa ko le Katelekma, foa ko le Protestantma, yɛɛ ko le Buddhanli.

Ɔvi 1920, Scout eku ne yɛ maanle maanle avinli ayia wɔ ɛvolɛ bie mɔ anu. Mengɔle ayia ɛhye mɔ bie. Mengɔle mɔɔ tɔ zo nsuu mɔɔ bɛyɛle ye wɔ Bad Ischl, Austria, wɔ August 1951, yɛɛ mɔɔ tɔ zo ngɔnla mɔɔ bɛyɛle ye wɔ Sutton Park, mɔɔ bikye Birmingham, England, wɔ August 1957 la bie. Scoutma mɔɔ bɛbo 33,000 mɔɔ bɛvi maanle 85 anu la rale bie. Akee menli mɔɔ bo 750,000 la noko rale. Bɛ nuhua ko a le Queen Elizabeth mɔɔ vi England la. Boy Scout eku ne manle mendele nganeɛ kɛ mewɔ ewiade amuala mediemayɛlɛ eku bie anu. Ɛnee menze kɛ ɔnrɛhyɛ na meanwu mediemayɛlɛ kpalɛ mɔɔ tɛla ɛhye mɔɔ menli mɔɔ kulo Nyamenle la a wɔ nu la.

 MEKƐ MƆƆ LUMUA MƆƆ MENYIALE GYIHOVA ALASEVOLƐ LA

Rudi Tschiggerl, me gɔnwo ne mɔɔ ɔlumuale ɔlile me daselɛ la

Ɛnee ɔka ekyii mewie me ndetelɛ kɛ awie mɔɔ siezie nyɛvolɛ aleɛ wɔ March anzɛɛ April wɔ 1958 ne anu wɔ Grand Hotel Wiesler, wɔ me sua zo Graz, Austria. Rudolf Tschiggerl, me gɔnwo gyimayɛvo ko mɔɔ ɛbe wɔ aleɛ ɛdonlɛ nu la lile me daselɛ. Ɛnee metɛtele nɔhalɛ ne anwo edwɛkɛ ɛlɛ. Ɔhanle kɛ Nsa-ko ngilehilelɛ ne ɛnle Baebolo ne anu. Menzule ye kpolera kɛ ɔle adalɛ na ngilehilelɛ zɔhane wɔ Baebolo ne anu. Ɛnee mekulo ye edwɛkɛ kpalɛ yemɔti ɛnee mengulo kɛ ɔbavi Katelek Asɔne ne anu.

Ɛnee me gɔnwo Rudolf, mɔɔ meta mefɛlɛ ye Rudi la kulo kɛ ɔmaa me Baebolo. Menzele ye kɛ kyesɛ ɔle Katelek Baebolo. Ɔvale ɔmanle me na membɔle ye ɛgengalɛ bo. Menwunle kɛ trate bie mɔɔ Gyihova Alasevolɛ a yɛle la vea nu. Rudi a vale veale nu a. Me nye anlie nwo ɔluakɛ ɛnee mete nganeɛ kɛ nuhua edwɛkɛ ne ɛnle nɔhalɛ noko bɛkɛlɛ bɛmaa ɔyɛ kɛ asɛɛ ɔle nɔhalɛ la. Noko akee, ɛnee mekulo kɛ me nee ye bɔ Baebolo ne anu adawu. Rudi vale nwunu yɛle gyima yemɔti yeammaa me buluku biala bieko. Wɔ siane nsa anu, ɛnee ɔyɛ a yɛbɔ Baebolo nu adawu na mekɛ dɔɔnwo ne ala aleɛ dwo yɛ.

Menwiele me ndetelɛ ne wɔ me sua zo Graz la, me mame manle mengɔle kɛzi bɛnea hotɛle zo la anwo sukulu. Ɛnee sukulu ne wɔ Bad Hofgastein, sua bie mɔɔ wɔ Alps bɔnza ne anu la azo. Ɔluakɛ yɛ sukulu ne nee Grand Hotel ne mɔɔ wɔ Bad Hofgastein yɛ gyima bɔ nu la ati, ɛnee mekɔ ɛkɛ mekɔsukoa ninyɛne dɔɔnwo.

EDWƐKPATƐLƐVOLƐ MRAALƐ NWIƆ RAKPƆLALE ME

Ilse Unterdörfer nee Elfriede Löhr nee me bɔle Baebolo ɛzukoalɛ bo wɔ 1958

Rudi vale me address manle ɔfese ne mɔɔ wɔ Vienna la, na bɛzoanle edwɛkpatɛlɛvolɛ mraalɛ nwiɔ, Ilse Unterdörfer nee Elfriede Löhr kɛ bɛrakpɔla me. * Kenle ko bie ahenle mɔɔ die nyɛvolɛ wɔ hotɛle ɛkɛ la razele me kɛ mraalɛ nwiɔ de kale bie anu wɔ alie ne anwo na bɛkpondɛ kɛ bɛnwu me. Ɛnee menze nwolɛ ɛhwee yemɔti ɔzinle me nwo. Noko mengɔle ɛkɛ mengɔnwunle bɛ. Nzinlii a menwunle kɛ mraalɛ nwiɔ ne boka Alasevolɛ mɔɔ ɛnee fa sunsum nu aleɛ kɔmaa bɛ mediema wɔ mekɛ mɔɔ Germany Nazi arane ne vale ɔ sa dole yɛ gyima ne azo la anwo a. Kolaa na Ewiade Konle II abɔ ɔ bo la, German feabo kpolisima (Gestapo) ne hyele bɛ hɔle Lichtenburg mbulalɛ efiade ne. Nzinlii mɔɔ konle ne bɔle ɔ bo la bɛyele bɛ bɛhɔle Ravensbrück, mɔɔ bikye Berlin la.

Ɛnee mebu mediema mraalɛ ne mɔ ɔluakɛ bɛ nee me mame bɔ atipɛne. Eza ɛnee mengulo kɛ mebazɛkye bɛ mekɛ me nee bɛ azukoa na nzinlii meaha kɛ me nye ɛnlie nwo. Ɛhye ati, menganle mengilele bɛ kɛ bɛrɛlɛ me ngɛlɛlera mɔɔ fane Katelek asɔne ne ngilehilelɛ mɔɔ ka kɛ ɛzoanvolɛ Pita a le popu mɔɔ lumua a, na popuma mɔɔ ɛha la vea ɔ bo anwo la. Bɛfɛlɛ ngilehilelɛ ɛhye ɛzoanvolɛma ne agyadivoma. Na me nee me ɛsɔfo ne  bazuzu nwo. Ɛnee mesuzu kɛ yemɔ bamaa meanwu nɔhalɛ ne.

MENZUKOALE NƆHALƐ SELƐ NWUANZANWUANZA NE ANWO DEBIE

Katelek Asɔne ne kilehile kɛ Gyisɛse edwɛkɛ ne mɔɔ wɔ Mateyu 16:18, 19 la azo a ɛzoanvolɛma ne agyalilɛ ngilehilelɛ ne gyi a. Eza bɛkilehile kɛ Selɛ Nwuanzanwuanza popu ɛnyɛ nvonleɛ biala wɔ Katelek diedi nwo ngilehilelɛ ne anu. Katelekma dɔɔnwo diedi gyi ɛhye azo. Ɛnee medame noko medie medi yemɔti meze kɛ ɛnyia mɔɔ popu ɛha kɛ Nsa-ko ne le nɔhalɛ la, ɛnee yemɔ ala ɛne. Noko akee, mendwenlenle nwo kɛ saa popu ɛnli munli na ɔkola ɔfo a, ɛnee Nsa-ko ne noko bahola ayɛ adalɛ edwɛkɛ.

Mɔɔ mengɔle ɛsɔfo ne ɛkɛ la, yeangola yeambua me kpuyia ne mɔ, ɔmanle me buluku mɔɔ ka ɛzoanvolɛma ne agyalilɛ nwo edwɛkɛ la. Mengɔle sua nu mengɔgengale. Akee menvale nwolɛ kpuyia dɔɔnwo membɛlɛle ye. Yeangola ye bua yemɔti ɔzele me kɛ: “Menrɛhola menrɛhakyi wɔ adwenle, yɛɛ ɛdawɔ noko ɛnrɛhola ɛnrɛhakyi me adwenle. . . . Meyɛ wɔ tia boɛ!” Yeangulo kɛ ɔ nee me bayia abɔ adawu bieko.

Ɛhye anzi, ɛnee akee mekulo kɛ Ilse nee Elfriede nee me sukoa Baebolo ne. Bɛhilele me nɔhalɛ Selɛ Nwuanzanwuanza ne mɔɔ wɔ anwuma la anwo ninyɛne dɔɔnwo. (Dwɔn 17:11) Ɛnee asafo biala ɛnle ɛkɛ, yemɔti ɛnee mediema mraalɛ nwiɔ ne yɛ debiezukoalɛ wɔ anyelielɛma bie sua nu. Menli ekyi bie ala a ɛnee ba a. Ɔluakɛ ɛnee adiema nrenya mɔɔ ɛzɔne la ɛnle ɛkɛ mɔɔ banlea zo la ati, mediema mraalɛ nwiɔ ne a kyɛ gyimalilɛ ne yɛ a. Ɔdwu mekɛ ne bie a adiema nrenya vi ɛleka bamaa bagua nu ɛdendɛlɛ wɔ sua mɔɔ bɛkɛhaye la anu.

MEMBƆLE DASELƐLILƐ BO

Ilse yɛɛ Elfriede nee me bɔle Baebolo ɛzukoalɛ bo wɔ October 1958, na ye siane nsa anzi, wɔ January 1959 ne anu yɛɛ bɛzɔnenle me a. Kolaa na bɛazɔne me la, membizale bɛ saa mebahola me nee bɛ ahɔ azua nu meahɔnlea kɛzi bɛdi daselɛ la a. (Gyi. 20:20) Me nee bɛ hɔle kokye ala la yɛɛ menganle kɛ bɛmaa me azɛlɛsinli a. Bɛvale namule bie bɛmanle me, mengomekye mekɔ daselɛlilɛ wɔ ɛkɛ, na meyɛ siakɔkpɔla. Adiema nrenya mɔɔ menlumuale me nee ye hɔle daselɛlilɛ la nzinlii rayɛle yɛ maanzinli zo neavolɛ.

Wɔ 1960 ne mɔɔ menwiele me hotɛle nwo sukulu ne la, mengɔle me sua zo kɛ mekaboa me mbusuafoɔ meamaa bɛazukoa nɔhalɛ ne. Badwu ɛnɛ, bɛ nuhua ko bɔbɔ ɛtɛbale nɔhalɛ ne anu, noko bie mɔ ɛlɛkile nwolɛ anyelielɛ.

ME MEKƐ KƆSƆƆTI ƐZONLENLƐ GYIMA NE

Mɔɔ membole ɛvolɛ 20 la nee me ngakula nu

Wɔ 1961, ɔfese ne hɛlɛle asafo ne mɔ ngɛlata kɛ bɛva bɛ nwo bɛwula adekpakyelɛ gyima ne anu. Kɛmɔ ɛnee metɛgyale na melɛ anwosesebɛ la ati, ɛnee mebahola meayɛ bie. Noko menzuzule kɛ mebahyia kale na meahola ye yɛ yemɔti menganle mengilele maanzinli zo neavolɛ, Kurt Kuhn, kɛ mekulo kɛ meyɛ gyima ekyi menyia ezukoa mɔɔ mebava meadɔ kale a. Ɔbizale me kɛ: “Asoo ɛnee Gyisɛse nee ye ɛzoanvolɛma ne hyia kale na bɛayɛ dahuu ɛzonlenlɛ gyima ne ɔ?” Ye edwɛkɛ ne manle menwunle mɔɔ ɔwɔ kɛ meyɛ la. Menyɛle ngyehyɛleɛ mɔɔ bamaa meabɔ adekpakyelɛ bo ndɛndɛ ne ala la. Noko, kɛmɔ ɛnee meyɛ gyima dɔnehwele 72 dapɛne biala wɔ hotɛle ɛkɛ la ati, ɛnee ɔwɔ kɛ metoto ninyɛne boɛ.

Menzɛlɛle me gyima menle ne kɛ ɔmaa menyɛ  gyima dɔnehwele 60. Ɔkponlenle zo noko yeande me ahatualɛ ne azo. Yeangyɛ eza menzɛlɛle ye saa ɔbamaa meayɛ gyima dɔnehwele 48 dapɛne biala a. Ɔkponlenle zo mɔɔ yɛande me ahatualɛ ne azo a. Eza menzɛlɛle ye kɛ ɔmaa menyɛ dɔnehwele 36 ala wɔ dapɛne ne anu, anzɛɛ menva dɔnehwele 6 menyɛ gyima kenle ko biala kenle 6 wɔ dapɛne ne anu, ɛhye noko ɔkponlenle zo mɔɔ yeande me ahatualɛ ne azo a. Ɛnee ɔzɔho kɛ me gyima menle ne ɛngulo kɛ mebavi gyima ne anu. Ngyehyɛleɛ ɛhye manle membɔle dahuu adekpakyelɛ gyima ne abo. Wɔ zɔhane mekɛ ne ɛnee dahuu adekpakyelɛma fa dɔnehwele 100 a bu mgbonda siane biala a.

Ye siane nna anzi, bɛkpale me kɛ adekpakyelɛ titile, na ɛnee meyɛ gyima mɔɔ ɛnɛ mgbanyima avinli ngitanwodivo ne a yɛ la wɔ asafo ekyi bie mɔɔ wɔ Carinthia maanzinli nu, wɔ sua Spittal an der Drau azo. Ɛnee adekpakyelɛ titilema bu dɔnehwele 150 siane biala. Ɛnee menlɛ bokavolɛ, noko me nye liele gyima mɔɔ adiema raalɛ Gertrude Lobner mɔɔ yɛle gyima mɔɔ ɛnɛ a anrɛɛ asafo nu kɛlɛhɛlɛvolɛ a yɛ la vale boale me la anwo kpalɛ. *

MENYIANLE GYIMALILƐ NGAKYILE

Bɛkpale me maanzinli zo neavolɛ wɔ 1963. Ɔdwu mekɛ ne bie a, mefa keteke na meahɔkpɔlɔkpɔla asafo ne mɔ. Yɛɛ mesoa me ninyɛne me ti zo mekɔ ɛleka mɔɔ mebadɛnla la ɔluakɛ mediema dɔɔnwo ɛnlɛ kale na bɛarava me wɔ kale agyinlaleɛ. Amaa meandwe adwenle meamaa me nwo zo la, menva taxi, emomu metia mekɔ bɛ azua nu.

Mengɔle Geleade Sukulu ne mɔɔ tɔ zo 41 la bie wɔ 1965. Ɛnee yɛ nuhua dɔɔnwo mɔɔ hɔle bie la ɛtɛgyale. Ɔyɛ azibɛnwo kɛ menwiele la, bɛmanle menziale mengɔzonlenle kɛ maanzinli zo neavolɛ wɔ me maanle nu wɔ Austria la. Noko kolaa na meahɔ la, bɛmanle me nee maanzinli zo neavolɛ bie yɛle gyima dapɛne nna wɔ United State. Ɛnee mekulo adiema Anthony Conte edwɛkɛ kpalɛ. Ɔkulo menli edwɛkɛ yɛɛ ɔ nye die daselɛlilɛ gyima ne anwo kpalɛ. Yɛyɛle gyima wɔ Cornwall, mɔɔ wɔ New York la.

Kenle mɔɔ yɛgyale la

Membale me sua zo Austria la, bɛmanle me maanzinli mɔɔ mebayɛ gyima nu, na ɛkɛ ne a menyiale belazinli raalɛ anwofɛlɛko bie mɔ bɛfɛlɛ ye Tove Merete la. Ɔnyianle ɛvolɛ nnu la yɛɛ bɛbɔle ɔ bo bɛvale nɔhalɛ ne bɛtetele ye a. Saa mediema biza yɛ kɛ ɔyɛle mɔɔ yɛyiale la a, yɛfa ɛzelekɛ yɛka kɛ, “Ɔfese ne a yɛle nwolɛ ngyehyɛleɛ a.” Ye ɛvolɛ ko anzi wɔ April 1967 yɛɛ yɛgyale a, na bɛmanle yɛdoale yɛ maanzinli gyima ne azo.

Wulomuma 8:15 ka kɛzi alesama bie mɔ nee Gyihova nyia abusuabɔlɛ titile na ɔlua zo bɛbayɛ ye sunsum nu mralɛ la anwo edwɛkɛ. Bɛkola bɛfɛlɛ Nyamenle kɛ, “Egya! Me Papa.” Me nee Nyamenle nyianle agɔnwolɛvalɛ titile ɛhye wɔ 1968. Ɛkɛ ne a menwunle kɛ ɔlua Gyihova ɛlolɛ ne ati, yekpa me kɛ ye sunsum nu ralɛ. Eza membambokale mediema mɔɔ bɛva sunsum ne bɛkpokpa bɛ mɔɔ bɛwɔ ewiade amuala la anwo.

Me nee Merete yɛyɛle maanzinli nee  maangyeba zo neavolɛ gyima ne toonwo 1976. Ɔdwu ɛyɛyɛlɛ mekɛ a, sua mɔɔ yɛda nu la anu kola yɛ weɛlɛkɔkɔ bo zo. Kenle ko yɛkadwazo la, ɛnee yɛ ɛnwomenle ɛmaa kundu ne mɔɔ heda yɛ nwo zo la anloa ɛyɛ ayese ɔluakɛ ɛyɛyɛlɛ ne rale kpole! Yɛzile kpɔkɛ kɛ yɛbava debie mɔɔ maa wuluwulu ba sua nu la yeazia yɛ nwo ɔvi zɔhane mekɛ ne. Yɛkɔ ɛleka ne mɔ bie a, ɔwɔ kɛ yɛdwazo nɔɔzo yɛfinde alie nwo yɛtia ɛbɔlɛ nu kolaa na yɛagua aze. Ɛnee yɛnlɛ yɛ ti anwo sua, yemɔti saa ɔdwu Kenlenzile a yɛtɛnla sua ne mɔɔ bɛzokoɛle yɛ wɔ nu wɔ dapɛne ne anu la anu, na Dwɛkɛ nwonlomɔ yɛahɔ asafo fofolɛ nu.

Me nye sɔ moalɛ mɔɔ me ye ɛva ɛmaa me wɔ ɛvolɛ ɛhye mɔ anu la amuala kpalɛ. Ɔkulo daselɛlilɛ kpalɛ, yemɔti kenle ko bɔbɔ ɛnle ɛkɛ mɔɔ memkpale ye kyɛlɛ wɔ nwo a. Ɛnee eza ɔkulo mediema edwɛkɛ na ɔdwenle menli nwo. Ɛhye ɛboa me kpole kpalɛ.

Wɔ 1976 bɛvɛlɛle yɛ wɔ Austria Bɛtɛle wɔ Vienna, na bɛkpale me bɛbokale Ɔfese Kɔmatii ne anwo. Mekɛ zɔhane, ɛnee Austria ɔfese ne nea daselɛlilɛ gyima mɔɔ bɛyɛ ye wɔ Europe Aduduleɛ maanle dɔɔnwo anu la azo, na eza ɔyɛ ngyehyɛleɛ ɔmaa bɛpe nrɛlɛbɛ adenle zo bɛnyia mbuluku. Adiema Jürgen Rundel a ɛnee nea gyima ne azo a, na me nee ye yɛle gyima. Nzinlii bɛkpale me kɛ menea yɛ mbuluku ne mɔ mɔɔ bɛkile ɔ bo bɛkɔ Europe Aduduleɛ aneɛ bulu anu la azo. Kɛkala, Jürgen nee ɔ ye Gertrude tɛsonle kɛ adekpakyelɛma titile wɔ Germany. Ɔvi 1978, Austria ɔfese ne ɛlua kɔmputa zo ɛyɛ magazine na bɛpelente ye wɔ aneɛ nsia anu. Eza bɛfa bie bɛnwa kengavoma wɔ maanle gyɛne zo. Adiema Otto Kuglitsch nee ɔ ye Ingrid mɔɔ ɛnɛ bɛsonle wɔ Germany ɔfese ɛkɛ la a, ɛnee nea gyima ɛhye azo a.

Menyɛle daselɛlilɛ gyima ne foa ngakyile mɔɔ bie a le awɔdenle zo daselɛlilɛ la wɔ Austria

Ɛnee mediema mɔɔ wɔ Europe Aduduleɛ la dua milahyinli bie mɔ azo yɛ bɛ mbuluku wɔ bɛ maanle nu. Noko ɛnee bɛhyia maanle gyɛne zo amra moalɛ. Gyihova bɔle bɛ nwo bane, na yɛdayɛ mɔɔ yɛwɔ ɔfese ɛkɛ la anye liele mediema ɛhye mɔ mɔɔ vale nɔhalɛlilɛ zonlenle wɔ ɛleka mɔɔ bɛva bɛ sa bɛdo yɛ gyima ne azo wɔ ɛvolɛ dɔɔnwo anu la anwo kpalɛ.

YƐHƆYƐLE GYIMA TITILE BIE WƆ ROMANIA

Wɔ 1989, me nee Adiema Theodore Jaracz mɔɔ ɛnee boka Neazo Eku ne anwo la hɔle Romania.  Yɛhɔle kɛ yɛkaboa mediema dɔɔnwo bie yɛamaa bɛ nee ahyehyɛdeɛ ne abɔ nu azonle. Ɔlua ninyɛne bie mɔ ati, mediema ɛhye mɔ dele bɛ nwo vile asafo ne anwo wɔ 1949 ne anu na bɛhɔdele bɛ asafo ɛdeɛ. Noko, ɛnee bɛkɔ daselɛlilɛ na bɛsɔne fofolɛma. Bɛhyele nuhua bie mɔ bɛguale efiade ɔluakɛ bɛangɔ konle kɛmɔ ɔdole mediema mɔɔ ɛnee wɔ asafo ne anu ala la. Ɛnee arane ɛva ɔ sa ɛdo yɛ gyima ne azo wɔ Romania, yemɔti yɛ nee mediema mɔɔ Romania Maanle Kɔmatii ne dule bɛ la nee mgbanyima nna veale yɛle ayia wɔ Adiema Pamfil Albu sua nu. Yɛvale Adiema Rolf Kellner mɔɔ bahile edwɛkɛ ne abo yeahɔ Austria aneɛ nu la yɛbokale yɛ nwo.

Yɛdɛnlanle edwɛkɛ ne anwo kenle nwiɔ ne azo la, Adiema Albu kpale ɔ mediema mgbanyima nna ne kyɛlɛ kɛ bɛbɔ nu bɛyɛ ko. Ɔhanle kɛ, “Saa yɛanyɛ ye kɛkala a, yɛnrɛnyia mekɛ bieko yɛnrɛyɛ.” Ɛhye anzi mediema mɔɔ bo 5,000 la ziale rale ahyehyɛdeɛ ne anu. Nea konim mɔɔ Gyihova lile na ɔmanle Seetan bɔle anyiemgba a!

Kolaa na Communism arane ne ara awieleɛ wɔ Europe Aduduleɛ wɔ 1989 la, Neazo Eku ne vɛlɛle me nee me ye kɛ yɛrazonle wɔ ewiade amuala gyima ne ati, wɔ New York. Ɔyɛle yɛ azibɛnwo kpalɛ. Yɛbɔle yɛ gyimayɛlɛ bo wɔ Brooklyn Bɛtɛle wɔ July 1990. Bɛkpale me kɛ Neazo Eku ne Ɛzonlenlɛ Kɔmatii boavolɛma ne anu ko wɔ 1992, na ɔvi July 1994 mɔɔ ba la, meboka Neazo Eku ne anu amra anwo.

MƆƆ MEYƐ YE DƐBA NEE MƆƆ ME NYE LA YE KENLEBIE LA

Me nee me ye wɔ Brooklyn, New York

Mekɛ mɔɔ ɛnee mesiezie nyɛvolɛ aleɛ wɔ hotɛle ɛkɛ ne la ɛpɛ nu dɛbadɛba. Kɛkala me nye die nwo kɛ meboka menli mɔɔ to sunsum nu aleɛ na bɛkyɛ bɛmaa mediema mɔɔ bɛwɔ ewiade amuala la anwo. (Mat. 24:45-47) Saa medwenle ɛvolɛ mɔɔ bo 50 mɔɔ meva meyɛ dahuu ɛzonlenlɛ gyima ne la anwo a, me nye die kpole kɛ Gyihova ɛlɛyila yɛ ewiade amuala gyima ne azo la. Me nye die yɛ maanle maanle avinli nyianu ne anwo kpalɛ ɔluakɛ yɛsukoa yɛ anwuma Selɛ Gyihova, nee Baebolo nu nɔhalɛ ne anwo ninyɛne dɔɔnwo wɔ ɛkɛ.

Me nzɛlɛlɛ a le kɛ menli mgbe dɔɔnwo bazukoa Baebolo ne, bɛalie nɔhalɛ ne bɛali, na bɛ nee yɛ ewiade amuala Keleseɛnema mediemayɛlɛ ne abɔ nu azonle Gyihova. (1 Pita 2:17) Eza me nye la kɛ mebadɛnla anwuma lɔ meanwu me papa wɔ azɛlɛ ye azo wɔ ewudwazo mekɛ ne anu. Medie medi kɛ ɔ nee me mame nee me mbusuafoɔ mɔɔ ɛha la bahulo kɛ bɛbazonle Gyihova wɔ Paladaese.

Me nye la kɛ mebadɛnla anwuma lɔ meanwu me papa wɔ azɛlɛ ye azo wɔ ewudwazo mekɛ ne anu

^ ɛden. 15 Ɛbanwu bɛ ɛbɛlabɔlɛ nu edwɛkɛ wɔ The Watchtower November 1, 1979, ne anu.

^ ɛden. 27 Ɛnɛ, yɛnlɛ asafo sonvolɛ nee asafo sonvolɛ boavolɛ, emomu bɛkpa mgbanyima avinli ngitanwodivolɛ nee kɛlɛhɛlɛvolɛ wɔ asafo biala anu.