Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Boa Awie Mɔ Maa Bɛyɛ Mɔɔ Bɛbahola Ye Yɛ La Amuala

Boa Awie Mɔ Maa Bɛyɛ Mɔɔ Bɛbahola Ye Yɛ La Amuala

“Mebamaa me nye ara ɛ nwo zo na meadu wɔ folɛ.”EDW. 32:8.

1, 2. Kɛzi Gyihova bu ye azonvolɛ mɔɔ wɔ azɛlɛ ye azo la ɛ?

SAA awovolɛ nwu kɛ bɛ mra ɛlɛdi nwɔhoa a, mekɛ dɔɔnwo ne ala ɔsi bɛ nwo kɛ ngakula kola yɛ ninyɛne bie mɔ la. Bie a wɔnwu kɛ ɔle nɔhalɛ. Kakula ne bie kulo bɔɔlo ɛbɔlɛ yɛɛ bie noko kulo ninyɛne mɔɔ bɛdolɔ anzɛɛ bɛhyehyɛ la ɛyɛlɛ. Ɔnva nwolɛ kɛzi biala de la, awovolɛ anye die kɛ bɛbaboa bɛ mra bɛamaa bɛayɛ mɔɔ bɛbahola ye yɛ la amuala.

2 Gyihova noko anye die ɔ mra mɔɔ bɛwɔ azɛlɛ ye azo la anwo. Ɔbu ye azonvolɛ mɔɔ bɛwɔ ɛkɛ ɛnɛ la kɛ “maanle maanle ne mɔ . . . anwonyia.” (Hagae 2:7) Ɔlua bɛ diedi nee bɛ anwofamaa ne ati bɛsonle bolɛ kpalɛ. Bie a wɔyɛ ye nzonlɛ kɛ Alasevolɛ mɔɔ bɛwɔ ɛkɛ ɛnɛ la lɛ ɛlolɛ ahyɛlɛdeɛ ngakyile. Bie mɔ bɔ mɔdenle wɔ menli nu ɛdendɛlɛ nu yɛɛ bie mɔ noko kola toto ninyɛne boɛ. Mediema mraalɛ dɔɔnwo kola sukoa aneɛ gyɛne ndɛndɛ fa di gyima wɔ daselɛlilɛ nu, bie mɔ noko nea wuleravolɛma anzɛɛ boa menli mɔɔ hyia moalɛ la. (Wulo. 16:1, 12) Asoo yɛ nye ɛnlie kɛ yɛ nee mediema ɛhye mɔ kɔsɔɔti bɔ nu sonle wɔ asafo ne anu ɔ?

3. Kpuyia boni mɔ a yɛbazuzu nwo wɔ edwɛkɛ ɛhye anu a?

3 Noko akee, yɛ mediema ne bie mɔ mɔɔ ngakula anzɛɛ menli mɔɔ bɛzɔne bɛ fofolɛ boka nwo la, ɛtɛsosɔle ndinli wɔ asafo ne anu. Kɛ ɔkɛyɛ na yɛaboa bɛ yɛamaa bɛahola bɛayɛ mɔɔ  bɛbahola ye yɛ la amuala ɛ? Kɛmɔti a ɔwɔ kɛ yɛbɔ mɔdenle yɛkpondɛ mɔɔ le kpalɛ wɔ bɛ nwo la, na yɛbu bɛ kɛmɔ Gyihova bu bɛ la ɛ?

GYIHOVA NWU KPALƐ MƆƆ YE AZONVOLƐ YƐ LA

4, 5. Kɛzi edwɛkɛ mɔɔ wɔ Maanlebuvolɛma 6:11-16 la maa yɛnwu kɛ Gyihova nwu mɔɔ ye azonvolɛ kola ye yɛ la amuala ɛ?

4 Baebolo ne maa yɛnwu ye wienyi kɛ Gyihova kola nwu ye azonvolɛ subane kpalɛ nee mɔɔ bɛkola bɛyɛ la. Kɛ neazo la, mekɛ mɔɔ bɛkpale Gedɛyɔn kɛ ɔhɔlie Nyamenle menli ne ɔvi bɛ agbɔvolɛ, Medeanema asa nu la, ɔzinle ɔ nwo kɛ anwumabɔvolɛ ne zele ye kɛ: ‘Nrenya katakyie, Gyihova nee wɔ lua la.’ Ɔda ali kɛ, wɔ zɔhane mekɛ ne ɛnee Gedɛyɔn ɛmbu ɔ nwo kɛ ɔle “nrenya katakyie.” Ɛnee ɔnlie ɔ nwo ɔnli, na ɔte nganeɛ kɛ ɔnrɛhola ɔnrɛlie Nyamenle menli ne, noko Gyihova nwunle ye wɔ adenle ngakyile zo. Ɔnwunle mɔɔ ɛnee Gedɛyɔn bahola ayɛ la yemɔti ɔluale ɔ nwo zo ɔliele Yizilayɛma.Bɛgenga Maanlebuvolɛma 6:11-16.

5 Ɛnee Gyihova lɛ Gedɛyɔn anu anwodozo kɛ ɔbahola yealie Yizilayɛma ɔluakɛ ɛnee Yenwu mɔɔ ɔbahola ye yɛ la. Kɛ neazo la, Gyihova anwumabɔvolɛ nwunle kɛ Gedɛyɔn vale ye anwosesebɛ muala wozole atoko. Anwumabɔvolɛ ne nwunle debie bieko. Wɔ Baebolo mekɛ nu, ɛnee ɛyazonlɛma ta wozo bɛ ma wɔ alie nwo amaa anwoma ne ava abonle ne ahɔ. Noko Gedɛyɔn wozole ye atoko ne wɔ sua nu amaa Medeanema annwu ye na bɛawua ye ma ne. Gyihova nwunle kɛ Gedɛyɔn yɛ gyima ɛsesebɛ, eza ɔkola ɔnwu kɛzi tɛnlabelɛ bie de la na ɔfi nrɛlɛbɛ nu ɔsi kpɔkɛ amaa esiane ando ye. Nɔhalɛ, Gyihova nwunle mɔɔ Gedɛyɔn bahola ayɛ la amuala, yemɔti ɔtetele ye ɔmanle ɔyɛle.

6, 7. (a) Kɛzi ɛnee adwenle mɔɔ Gyihova lɛ ye wɔ ngapezonli Emɔso anwo la le ngakyile fi Yizilayɛma bie mɔ ɛdeɛ ne anwo ɛ? (b) Duzu a maa yɛnwu kɛ ɛnee Emɔso ze deɛ ɛ?

6 Zɔhane ala a Gyihova nwunle mɔɔ ngapezonli Emɔso bahola ayɛ la amuala a. Wɔ sonla nye zo, ɛnee ye sonvolɛ ɛhye ɛngulo ɔ nwo edwɛkɛ na ɔnle sonla titile biala. Ɛnee ɔle mboaneneavolɛ na ɔyɛ feege ne mɔɔ bɛbu ye kɛ ɔle ehyianvolɛma aleɛ la anwo gyima. Noko Gyihova kpale Emɔso kɛ ɔhɔdea Yizilayɛ mbusua bulu ne mɔɔ ɛgyakyi Ye ɛzonlenlɛ la. Yizilayɛma bie mɔ zuzule kɛ ɔnfɛta gyima ɛhye.Bɛgenga Emɔso 7:14, 15.

7 Ɛnee Emɔso vi sua ekyi bie mɔɔ ɛde ɔ nwo la azo, noko ɛnee ɔze bɛ amaamuo nee bɛ arelemgbunli ne mɔ anwo edwɛkɛ dɔɔnwo. Ɛnee ɔze tɛnlabelɛ ɛtane mɔɔ Yizilayɛma wɔ nu nee maanle mɔɔ ɛbɔ bɛ ɛyia la anwo edwɛkɛ dɔɔnwo. Bie a ɔdele ɔvile gualilɛma ɛkɛ. (Emɔso 1:6, 9, 11, 13; 2:8; 6:4-6) Baebolo nwo mbɔlɔba bie mɔ ka Emɔso anwo edwɛkɛ kɛ ɔle kɛlɛvolɛ kpalɛ. Ɛnee ngapezonli ɛhye kpa edwɛkɛ agbɔkɛ mɔɔ ɔ bo ɛdelɛ ɛnyɛ se noko tumi wɔ nu la a kɛlɛ ye edwɛkɛ a. Nɔhalɛ nu, akɛnrasesebɛ mɔɔ Emɔso vale deanle ɛsɔfo Amazaya la manle ɔlale ali kɛ Gyihova kpale awie mɔɔ fɛta, na ɔkola ɔfa awie mɔɔ bie a sonla nye zo a ɔnfɛta la ɔdi ye bodane nwo gyima ɔmaa ɔyɛ boɛ.Emɔso 7:12, 13, 16, 17.

8. (a) Kɛzi Gyihova manle Devidi anwosesebɛ ɛ? (b) Duzu ati a edwɛkɛ mɔɔ wɔ Edwɛndolɛ 32:8 la bahola aboa menli mɔɔ ɛnlie bɛ nwo ɛnli la ɛ?

8 Ɔle nɔhalɛ, Gyihova nwu mɔɔ ye sonvolɛ biala bahola ye yɛ la. Ɔzile Belemgbunli Devidi ahonle kɛ ɔbahile ye adenle, na ‘yeamaa ɔ nye ara ɔ nwo zo’ dahuu. (Bɛgenga Edwɛndolɛ 32:8.) Wɔnwu deɛmɔti edwɛkɛ ɛhye maa yɛ  anwosesebɛ la ɔ? Ɔwɔ nuhua kɛ ɔdwu mekɛ ne bie a yɛnlie yɛ nwo yɛnli, noko Gyihova bahola aboa yɛ yeamaa yɛayɛ mɔɔ ɛnee yɛsuzu kɛ yɛnrɛhola ye yɛ la na yɛadwu yɛ bodane nwo. Kɛmɔ kilehilevolɛ kpalɛ kola boa sukoavo mɔɔ ɛnlɛ anwubielɛ wɔ ye debiezukoalɛ nu la, Gyihova noko kile yɛ adenle amaa yɛahola yɛayɛ mɔɔ yɛbahola ye yɛ la amuala. Ɔdua yɛ mediema mrenya nee mraalɛ anwo zo ɔboa yɛ. Adenle boni azo?

FA WƆ ADWENLE SIE KPALƐ MƆƆ MENLI YƐ LA AZO

9. Kɛ ɔkɛyɛ na yɛali Pɔɔlo folɛdulɛ ne mɔɔ se ‘yɛdwenle’ yɛ gɔnwo mɔ boɛyɛlɛ nwo la azo ɛ?

9 Pɔɔlo dule Keleseɛnema kɔsɔɔti folɛ kɛ “awie biala mmadwenle ɔ ngomekye ye boɛyɛlɛ nwo na ɔdwenle ɔ gɔnwo mɔ noko ɛdeɛ nwo.” (Bɛgenga Felepaema 2:3, 4.) Adwenle mɔɔ wɔ Pɔɔlo folɛdulɛ ne anu la a le kɛ yɛbanwu mɔɔ awie mɔ bahola ayɛ la na yɛaboa bɛ. Saa awie kile yɛ nwo anyelielɛ wɔ anyuhɔlɛ bie mɔɔ yɛnyia ye la anwo a, kɛzi yɛte nganeɛ ɛ? Fane dɔɔnwo ne ala, ɔmaa yɛnyia ɛhulolɛ kɛ yɛbayɛ dɔɔnwo, yɛbayɛ mɔɔ yɛbahola la amuala. Zɔhane ala noko yɛɛ saa yɛnwu mɔɔ yɛ mediema diedima bahola ayɛ la a, yɛboa bɛ yɛmaa bɛnyia anyuhɔlɛ na bɛnyi sunsum nu a.

10. Nwane mɔ titile a hyia yɛ moalɛ a?

10 Nwane mɔ titile a hyia yɛ moalɛ a? Nɔhalɛ nu, yɛ kɔsɔɔti yɛhyia moalɛ ɔvi mekɛ mɔɔ kɔ mekɛ la. Noko, ngakula anzɛɛ mediema mɔɔ bɛzɔnenle bɛ ɛtɛkyɛle la ɔwɔ kɛ te nganeɛ kɛ bɛboka asafo ne anwo. Ɛhye bamaa bɛanwu kɛ bɛlɛ gyima bɛyɛ wɔ Gyihova asafo ne anu. Na saa ɔba ye kɛ bɛnyɛ ɛhwee anzɛɛ bɛngile mɔɔ bɛyɛ la anwo anyezɔlɛ a, ɔmaa bɛ sa nu to, bɛto bɛ adwenle nu mɔɔ bɛnnyia ɛhulolɛ kɛ bɛbayɛ dɔɔnwo, debie mɔɔ Nyamenle Edwɛkɛ ne maa bɛ anwosesebɛ kɛ ɔwɔ kɛ bɛyɛ la.1 Tem. 3:1.

11. (a) Kɛzi asafo nu kpanyinli bie boale adiema nrenya bie mɔɔ ɛnee se nyiane la ɛ? (b) Duzu a ɛsukoa ɛfi Julien anwubielɛ ne anu a?

11 Adiema kpanyinli ko mɔɔ bɛfɛlɛ ye Ludovic la nyianle moalɛ wɔ ye mgbavolɛ nu na ɔka kɛ: “Meyɛ ye nzonlɛ kɛ saa mekile adiema bie anwo anyelielɛ a, ɔnyia anyuhɔlɛ ndɛndɛ.” Ludovic hanle vanenle adiema nrenya Julien mɔɔ ɛnee se nyiane la anwo kɛ: “Ɔluakɛ ɛnee Julien se nyiane noko ɔkulo kɛ ɔyɛ dɔɔnwo wɔ mekɛ mɔɔ ɔnlie ɔ nwo ɔnli la ati, ɔmaa ɔyɛ ngakyile. Noko menwunle kɛ ɔlɛ atiakunlukɛnlɛma na ɔkulo kɛ ɔboa mediema. Ɛhye ati, meandendɛ ɔ nyunlu, emomu menvale me adwenle menziele ye subane kɛnlɛma ne azo, ma membɔle mɔdenle memboale ye.” Nzinlii, bɛkpale ye kɛ asafo nu sonvolɛ, na kɛkala ɔle dahuu adekpakyelɛnli.

BOA BƐ MAA BƐYƐ MƆƆ BƐBAHOLA YE YƐ LA AMUALA

12. Saa awie bahola aboa awie a subane kpalɛ boni a ɔwɔ kɛ ɔnyia a? Maa neazo.

12 Nɔhalɛ, saa yɛbahola yɛaboa awie mɔ yɛamaa bɛayɛ mɔɔ bɛbahola ye yɛ la amuala a, kyesɛ yɛfa nwunu yɛdi gyima. Kɛmɔ yɛnwunle ye wɔ Julien edwɛkɛ ne anu la, yɛbahola yɛanlea ye subane kpalɛ ne na yɛabu yɛ nye yɛagua ye bɛtɛɛyɛlɛ ne azo. Zɔhane a Gyisɛse yɛle ɛzoanvolɛ Pita a. Ɛnee Pita ɛnzi pi noko Gyisɛse hanle kɛ ɔbazi pi kɛ bodane la.Dwɔn 1:42.

13, 14. (a) Kɛzi Baanabase lale nwunu ali wɔ kpavolɛ Maake edwɛkɛ ne anu ɛ? (b) Kɛzi adiema kakula ko nyianle Maake moalɛ ne bie ɛ? (Nea mɔlebɛbo nvoninli ne.)

13 Baanabase lale ɛhye bie ali hilele Dwɔn mɔɔ ye Wulomu duma a le Maake la. (Gyi. 12:25) Maake ‘boale’ Pɔɔlo nee Baanabase wɔ bɛ edwɛkpatɛlɛvolɛ adendulɛ ne mɔɔ lumua la anu. Noko, mekɛ mɔɔ bɛdwule Pamefelea la, Maake gyakyile  bɛ ɛkɛ ne ziale hɔle. Ɛnee ɔwɔ kɛ bɛ ngome bɛkɔfa adenle bie mɔɔ nwule wɔ zo la azo bɛkɔ sɔlɔ. (Gyi. 13:5, 13) Ɔbayɛ kɛ Baanabase bule ɔ nye guale pi mɔɔ ɛnee Maake ɛnzi la azo na nzinlii ɔvale nwolɛ adenle ne ɔtetele ye. (Gyi. 15:37-39) Ɛhye boale kpavolɛ ɛhye ɔmanle ɔrayɛle Gyihova sonvolɛ mɔɔ bɔ mɔdenle. Ɔyɛ anyelielɛ kɛ mekɛ mɔɔ bɛdole Pɔɔlo efiade wɔ Wulomu la, Maake hɔnleanle ye na ɔvale Pɔɔlo ahyebizalɛ ɔhɔmanle Keleseɛnema mɔɔ ɛnee wɔ Kɔlɔsae la. Pɔɔlo hanle ɔ nwo edwɛkɛ kpalɛ. (Kɔl. 4:10) Nea kɛzi Baanabase anye balie wɔ mekɛ mɔɔ Pɔɔlo bɔbɔ hanle kɛ Maake ɛraboa ye la ɛ!2 Tem. 4:11.

14 Alexandre mɔɔ bɛkpa ye kɛ asafo nu kpanyinli kenlensa ye la ka kɛzi adiema bie mɔɔ lɛ nwunu boale ye la anwo edwɛkɛ kɛ: “Mekɛ mɔɔ mele kakula la, ɛnee ɔyɛ se ɔmaa me kɛ mebayɛ nzɛlɛlɛ wɔ bagua nu. Kpanyinli ko hilele me kɛzi mebazie me nwo diinyi meayɛ nzɛlɛlɛ la. Kɛ anrɛɛ ɔbabu ɔ nye yeagua me nwo zo la, ɛnee ɔmaa meta meyɛ nzɛlɛlɛ wɔ debiezukoalɛ nee daselɛlilɛ ayia bo. Yeangyɛ biala menyianle anwodozo.”

15. Kɛzi Pɔɔlo hanvole ɔ mediema ɛ?

15 Saa yɛnwu subane kpalɛ bie wɔ Keleseɛnenli bie anwo a, asoo yɛka kɛzi yɛ nye die ye subane kpalɛ ne anwo la ɔ? Wɔ Wulomuma tile 16 ne, Pɔɔlo bobɔle ɔ gɔnwo mɔ mɔɔ bo 20 la aluma wɔ bɛ subane kpalɛ ne ati. (Wulo. 16:3-7, 13) Kɛ neazo la, Pɔɔlo hanle kɛ ɛnee Andulonaekɛse nee Dwuniase ɛva mekɛ tendenle ɛzonle Kelaese ɛdɛla ye ɔvale ɔzile bɛ kpundiigyinlanlɛ ne azo. Pɔɔlo eza hanvole Wulufɛse ɔ nli, wɔ ɛlɔlɛ mɔɔ ɔlale ye ali ɔhilele ye la anwo.

Frédéric (bɛne zo) zile Rico adua kɛ ɔhɔ zo ɔzonle Gyihova (Nea ɛdendɛkpunli 16)

16. Duzu a bahola avi nganvolɛ mɔɔ ɛbava wɔamaa kakula bie la anu ara a?

16 Saa yɛkanvo yɛ mediema nɔhalɛ nu a, nvasoɛ dɔɔnwo bavi nu ara. Maa yɛva kakula nrenya bie mɔɔ bɛfɛlɛ ye Rico mɔɔ ɛnee wɔ France mɔɔ ɔ sa nu dole ɔluakɛ ye papa mɔɔ ɛnle diedinli dwazole tiale ye kɛ ɔnrɛmaa bɛnrɛzɔne ye la kɛ neazo. Rico nyianle adwenle kɛ, ɔwɔ kɛ ɔkendɛ kɔkpula kɛ ɔbanyia ɛvolɛ 18 kolaa na yeahola yeazonle Gyihova. Eza ɔlile nyane kɛ bɛgolole ɔ nwo wɔ sukulu la. Frédéric mɔɔ le asafo nu kpanyinli mɔɔ bɛzele ye kɛ ɔ nee kakula nrenya ne ɛzukoa debie la, ka kɛ: “Mengavole Rico ɔluakɛ dwazotia ne ɛhile kɛ yeva akɛnrasesebɛ yela ye diedi ne ali.” Nganvolɛ ɛhye mɔ manle Rico anwosesebɛ wɔ ye kpɔkɛ mɔɔ ɔbɔle kɛ ɔbayɛ neazo kpalɛ la anu na yeboa ye yemaa yebikye ɔ ze. Rico nyianle ɛvolɛ 12 la bɛzɔnenle ye.

Jérôme (fema zo) boale Ryan manle ɔfɛtale edwɛkpatɛlɛvolɛ (Nea ɛdendɛkpunli 17)

17. (a) Kɛzi yɛkola yɛboa yɛ mediema yɛmaa bɛnyia anyuhɔlɛ ɛ? (b) Kɛzi edwɛkpatɛlɛvolɛ bie hilele anyelielɛ wɔ ngakula mrenya bie anwo ɛ, na boni a vi nu rale a?

17 Kenle biala mɔɔ yɛkɛhile anyezɔlɛ wɔ gyimalilɛ bie mɔɔ yɛ diema bie kɛyɛ ye kpalɛ anzɛɛ yɛkɛyɛ bɛ mo wɔ bɛ mɔdenlebɔlɛ nwo la, yɛmaa bɛ anwosesebɛ bɛsonle Gyihova kpalɛ. Sylvie, * mɔɔ ɛva  ɛvolɛ dɔɔnwo ɛzonle wɔ France Bɛtɛle la, hanle kɛ mediema mraalɛ bahola ahanvo mediema mrenya ne mɔ. Ɔhanle kɛ mraalɛ bahola ahile anyezɔlɛ wɔ ninyɛne dɔɔnwo mɔɔ bɛkɛyɛ ye nzonlɛ la anwo. Yemɔti, “bɛ anwosesebɛmanlɛ ne bahola ado mɔɔ mediema mrenya mɔɔ bɛlɛ anwubielɛ kɛha la azo.” Ɔvale ɔzɔle zo kɛ: “Mebu nganvolɛ kɛ ɔle ɛzonlelilɛ.” (Mrɛ. 3:27) Jérôme, mɔɔ le edwɛkpatɛlɛvolɛ wɔ French Guiana ɛboa mgbavolɛ dɔɔnwo ɛmaa bɛlɛyɛ edwɛkpatɛlɛvolɛ gyima. Ɔka kɛ: “Menwu ye kɛ saa mekanvo ngakula mrenya wɔ edwɛkɛ fɔɔnwo bie mɔ mɔɔ bɛkɛha ye wɔ daselɛlilɛ nu anzɛɛ wɔ bɛ mualɛ mɔɔ bɛziezie ye kpalɛ bɛmaa la anwo a, ɔmaa bɛnyia anwodozo. Ɔlua ɛhye azo, ɔmaa bɛkola bɛyɛ dɔɔnwo.”

18. Duzu ati a mediema mgbavolɛ mɔɔ yɛ nee bɛ bayɛ gyima la azo lɛ nvasoɛ ɛ?

18 Yɛbahola yɛamaa yɛ mediema anyia sunsum nu anyuhɔlɛ, ɔlua gyima mɔɔ yɛ nee bɛ babɔ nu ayɛ la azo. Kpanyinli bie bahola aha ahile adiema kakula mɔɔ ɔze kɔmputa nye zo kpalɛ la kɛ ɔpelente edwɛkɛ bie ɔvi jw.org ne azo ɔmaa mediema mɔɔ bɛ nye ɛvi la, na ɛhye bahola amaa mediema ɛhye mɔ mɔɔ bɛnlɛ kɔmputa la anwosesebɛ. Anzɛɛ, saa ɛlɛyɛ gyima wɔ Belemgbunlililɛ Asalo ne anwo a, kɛmɔti a ɛndo ɛsalɛ ɛnvɛlɛ kakula nrenya bie ɛmboka ɛ nwo ɛ? Ninyɛne zɛhae mɔ mɔɔ ɛbavi wɔ ɛhulolɛ nu wɔayɛ la bamaa wɔanyia adenle wɔahanvo ngakula na ɛ nee bɛ abɔ adawu.Mrɛ. 15:23.

SIEZIE Ɛ NWO MAA KENLEBIE

19, 20. Duzu ati a ɔwɔ kɛ yɛboa awie mɔ yɛmaa bɛnyia anyuhɔlɛ ɛ?

19 Mekɛ mɔɔ Gyihova kpale Dwɔhyua kɛ ɔli Yizilayɛma ati la, eza ɔzele Mosisi kɛ “si ye ahonle na maa ye anwosesebɛ.” (Bɛgenga Mɛla ne 3:28.) Menli dɔɔnwo ɛlɛba asafo ne anu. Keleseɛnema amuala—tɛ mgbanyima ne mɔ angome—bahola aboa mediema mrenya ngakula nee fofolɛma bɛamaa bɛayɛ mɔɔ bɛbahola ye yɛ la amuala. Ɔlua zo, menli dɔɔnwo bava bɛ nwo awula dahuu ɛzonlenlɛ gyima ne anu, na bɛ nuhua dɔɔnwo ‘ahola ahilehile’ awie mɔ.2 Tem. 2:2.

20 Saa yɛwɔ asafo mɔɔ bɛ nwo zonle anzɛɛ ekpunli ekyi mɔɔ ɛlɛba arayɛ asafo bɔbɔ la anu a, bɛmaa yɛziezie yɛ nwo yɛmaa kenlebie. Debie mɔɔ nwolɛ hyia kpalɛ la a le kɛ, yɛbazukoa Gyihova mɔɔ nwu ninyɛne kpalɛ mɔɔ ye azonvolɛ yɛ ye dahuu la.

^ ɛden. 17 Tɛ ye duma kpalɛ ɔ.