Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Asoo Ɛze?

Asoo Ɛze?

Wɔ Baebolo mekɛ nu, saa awie anye fuu suosua ye tɛladeɛ nu a, duzu a ɔkile a?

BAEBOLO ne ka tɛnlabelɛ ngakyile mɔɔ awie mɔ suosuanle bɛ adɛladeɛ wɔ nu la anwo edwɛkɛ. Nyɛleɛ ɛhye bazi adwuleso kengavoma dɔɔnwo anwo, noko akee, wɔ Dwuuma afoa nu ɔkile bɛ abɛ nu mɔɔ ɛbu, alɔbɔlɛlilɛ, bɛ nyunlu mɔɔ ɛgua aze, ɛya ɛvalɛ, anzɛɛ nyanelilɛ.

Kɛ neazo la, mekɛ mɔɔ Wulubɛn nwunle kɛ adwenle mɔɔ ɔvale kɛ ɔdie ɔ diema Dwosefi anyɛ boɛ na bɛdɔne ye bɛhɔ akɛlɛ ɛzonlenlɛ nu la, “ɔsuosuanle ye tɛladeɛ ne mɔɔ ɔwula la anu.” Bɛ ze Gyekɔbo “suosuanle ye tɛladeɛ ne mɔɔ ɔwula la anu,” wɔ mekɛ mɔɔ ɔzuzule kɛ nanemgbole bie ɛhu Dwosefi la. (Mɔl. 37:18-35) Mekɛ mɔɔ bɛzele Dwobu kɛ ɔ mra ne mɔ amuala ɛwu la, “ɔsuosuanle tɛladeɛ mɔɔ ɔwula la anu.” (Dwobu 1:18-20) Ɛbɔfoɔ bie mɔɔ “ɔsuosuanle tɛladeɛ mɔɔ ɔwula la anu [la],” rabɔle Ɛsɔfo Kpanyinli Yilae amaneɛ kɛ bɛli Yizilayɛma anwo zo konim wɔ konle ne anu, bɛhu ɔ mra nwiɔ ne, na bɛva ngyekyeleɛ ɛlɛka ne donvula. (1 Sam. 4:12-17) Mekɛ mɔɔ bɛgengale Mɛla ne bɛhilele Dwosaya na ɔnwunle ɛtane mɔɔ ye menli ne ɛyɛ la, “ɔsuosuanle ye tɛladeɛ ne mɔɔ ɔwula la anu.”—2 Arl. 22:8-13.

Mɔɔ bɛdi Gyisɛse edwɛkɛ na Ɛsɔfo Kpanyinli Kayafase zuzule kɛ Gyisɛse ɛha munzule edwɛkɛ la, “ɔsuosuanle ɔdaye mumua ne ye tɛladeɛ mɔɔ ɔwula la anu.” (Mat. 26:59-66) Relabaema amaamuo bie ka kɛ awie biala mɔɔ ɔbade kɛ bɛlɛgua duma nwuanzanwuanza ne anwo evinli la, ɔwɔ kɛ suosua ye tɛladeɛ nu. Noko Relabaema eza hanle ye wɔ Gyɛlusalɛm ɛzonlenlɛ sua ne ɛzɛkyelɛ ne anzi kɛ, “awie mɔɔ ɔbade kɛ bɛlɛgua Duma Nwuanzanwuanza ne anwo evinli ɛnɛ la, ɔnle kɛ ɔsuosua ye tɛladeɛ nu, anrɛɛ ye adɛladeɛ kɔsɔɔti bɛatete.”

Nɔhalɛ nu, awie tɛladeɛ nu mɔɔ ɔbasuosua la ɛngile ɛhwee wɔ Nyamenle anye zo, kyesɛ ahenle nyɛleɛ ne yɛ mɔɔ ɔvi ahonle nu. Ɛhye ati, Gyihova zele ye menli ne kɛ: “Bɛtete bɛ ahonle nu na tɛ bɛ adɛladeɛ nu ɔ” na ‘bɛzia bɛrɛla ye ɛkɛ.’—Dww. 2:13.