Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Bɛli Mgbanyima Mɔɔ Wɔ Bɛ Avinli La Eni

Bɛli Mgbanyima Mɔɔ Wɔ Bɛ Avinli La Eni

“Bɛnwu kpanyinli a bɛli ye eni.”—SƐLƐ. 19:32.

1. Tɛnlabelɛ mɔɔ yɛ alɔbɔlɛ la boni a alesama wɔ nu a?

TƐ Gyihova ngyehyɛleɛ a le kɛ alesama banwu amaneɛ wɔ bɛ mgbanyinli mekɛ nu. Emomu, ɛnee ɔle ye bodane kɛ mrenya nee mraalɛ banyia kpɔkɛdelɛ mɔɔ di munli wɔ Paladaese. Noko kɛkala, “abɔdeɛ muala ɛlɛte nyane kɛ asɛɛ [bɛvo] awolɛ zo.” (Wulo. 8:22) Ɛsuzu kɛ saa Nyamenle nwu kɛzi alesama ɛlɛnwu amaneɛ ɔlua ɛtane ti a, kɛzi ɔbade nganeɛ ɛ? Yeanga ye zɔ, bɛkpo mgbanyima dɔɔnwo wɔ mekɛ mɔɔ bɛhyia moalɛ la.—Edw. 39:5; 2 Tem. 3:3.

2. Duzu ati a Keleseɛnema dwenle menli mɔɔ anye ɛvi la boɛyɛlɛ nwo ɛ?

2 Gyihova menli anye die kɛ bɛlɛ menli mɔɔ anye ɛvi la wɔ bɛ asafo ne mɔ anu a. Yɛnyia bɛ nrɛlɛbɛ ne azo nvasoɛ yɛɛ bɛ diedi nwo neazo ne maa yɛ anwosesebɛ. Mgbanyima ɛhye mɔ mɔɔ bɛla yɛ ahonle nwo la bie mɔ le yɛ mbusuafoɔ. Noko, saa bɛle yɛ mbusuafoɔ anzɛɛ bɛnle yɛ mbusuafoɔ bɔbɔ a, bɛ boɛyɛlɛ nwo hyia yɛ kpalɛ. (Gal. 6:10; 1 Pita 1:22) Saa yɛsuzu kɛzi Nyamenle bu mgbanyima ɛhye mɔ la anwo a ɔbaboa yɛ muala. Eza yɛbazuzu gyima mɔɔ abusua ne anu amra nee asafo ne lɛ ye yɛ wɔ mgbanyima ɛhye mɔ anwo la anwo.

 “MMAKPO ME”

3, 4. (a) Debie titile mɔɔ Edwɛndolɛ 71 kɛlɛvolɛ ne bizale Gyihova la a le boni? (b) Duzu a menli mɔɔ anye ɛvi mɔɔ bɛwɔ asafo ne anu la bahola abiza Nyamenle a?

3 Sunsum ne manle Edwɛndolɛ 71:9 kɛlɛvolɛ ne zɛlɛle Nyamenle kɛ: “Mmakpo me wɔ me mrelera nu; saa me anwosesebɛ wie a, mmakpo me.” Ɔbayɛ kɛ edwɛkɛ ɛhye le Edwɛndolɛ 70 ne ndoazo. Yemɔti, Devidi a yɛle nzɛlɛlɛ ɛhye mɔɔ ɔwɔ Edwɛndolɛ 71:9 la. Ɔzonlenle Nyamenle sumunli ye ngakula nu toonwo ɔyɛle kpanyinli, na Gyihova manle ɔyɛle ninyɛne mɔɔ yɛ azibɛnwo. (1 Sam. 17:33-37, 50; 1 Arl. 2:1-3, 10) Yemɔ bɔbɔ, Devidi dele nganeɛ kɛ ɔwɔ kɛ ɔsɛlɛ Gyihova kɛ ɔhɔ zo ɔnwu ye anwunvɔne.—Bɛgenga Edwɛndolɛ 71:17, 18.

4 Menli dɔɔnwo wɔ ɛkɛ ɛnɛ mɔɔ bɛle kɛ Devidi. Ɔnva nwo kɛ bɛ nye ɛvi na “munzule mekɛ ne” ɛdo bɛ la, bɛye Nyamenle ayɛlɛ dahuu kɛmɔ bɛ anwosesebɛ de la. (Nolo. 12:1-7) Bɛ nuhua dɔɔnwo ɛngola ɛnyɛ dɔɔnwo wɔ debie le kɛ daselɛlilɛ gyima ne anu, kɛmɔ ɛnee bɛyɛ ye mekɛ bie la. Noko bɛkola bɛsɛlɛ Gyihova kɛ ɔhɔ zo ɔnlea bɛ. Mgbanyima ɛhye mɔ mɔɔ bɛdi nɔhalɛ la lɛ anwondozo kɛ Nyamenle babua bɛ asɔneyɛlɛ. Yeanyɛ boɛ fee la, bɛ nzɛlɛlɛ ne nee edwɛkɛ mɔɔ sunsum ne manle Devidi hanle la yia.

5. Kɛzi Gyihova bu ye nɔhalɛ azonvolɛ mɔɔ anye ɛvi la ɛ?

5 Ngɛlɛlera ne ka ye wienyi kɛ Gyihova bu mgbanyima ɛhye mɔ mɔɔ bɛdi nɔhalɛ la kɛ bɛsonle bolɛ na ɔkulo kɛ ye azonvolɛ di bɛ eni. (Edw. 22:24-26; Mrɛ. 16:31; 20:29) Sɛlɛvolɛma 19:32 ka kɛ: “Bɛnwu kpanyinli a bɛli ye eni, bɛdwazo enililɛ nu bɛmaa mɔɔ ati zo ɛdu la na bɛzulo bɛ Nyamenle ne; medame a mele [Gyihova] a.” Ɛnee menli mɔɔ anye ɛvi wɔ asafo ne anu mɔɔ ɔwɔ kɛ bɛbu bɛ la anwo hyia kpalɛ wɔ mekɛ mɔɔ bɛhɛlɛle edwɛkɛ ɛhye la, na zɔhane ala a ɔde ye ɛnɛ noko a. Na bɛ ɛnleanlɛ noko ɛ? Ɔle nwane gyima?

ABUSUA NE ƐZONLELILƐ

6. Neazo boni a Gyisɛse yɛle ye wɔ awovolɛ ɛnleanlɛ nwo a?

6 Baebolo ne ka kɛ: “Bɛli bɛ ze mɔ nee bɛ nli mɔ eni.” (Ade. 20:12; Ɛfɛ. 6:2) Gyisɛse zile edwɛkɛ ɛhye dawua wɔ mekɛ mɔɔ ɔdeanle Falasiima mɔɔ ɛnee bɛkpo kɛ bɛkɛnlea bɛ awovolɛ la. (Maake 7:5, 10-13) Gyisɛse mumua ne yɛle neazo kpalɛ. Kɛ neazo la, mɔɔ ɔka ekyii ɔwu wɔ baka ne azo la, ɔvale ye mame mɔɔ ɔbayɛ kɛ ɛnee ɔle kunlavolɛ la ɛnleanlɛ ɔwulale ye ɛdoavolɛ Dwɔn mɔɔ ɔkulo ye edwɛkɛ kpalɛ la asa nu.—Dwɔn 19:26, 27.

7. (a) Awovolɛ ɛnleanlɛ nwo adehilelɛ boni a ɛzoanvolɛ Pɔɔlo vale manle a? (b) Adwenle boni a wɔ Pɔɔlo edwɛkɛ ne anzi a?

7 Sunsum ne manle ɛzoanvolɛ Pɔɔlo hɛlɛle kɛ ɔle diedima gyima kɛ bɛbanlea bɛ sua nu amra. (Bɛgenga 1 Temɔte 5:4, 8, 16.) Suzu adwenle mɔɔ wɔ edwɛkɛ mɔɔ Pɔɔlo hɛlɛle hɔmanle Temɔte anu la anwo nea. Pɔɔlo hilele menli mɔɔ ɔwɔ kɛ asafo ne fa ezukoa boa bɛ nee bɛdabɛ mɔɔ ɔnle kɛ bɛboa bɛ la. Ɔhanle kɛ ɔwɔ kɛ mralɛ, nlɔnra, nee mbusuafoɔ mɔɔ bɛle diedima la a nea akpanyima mɔɔ ɔle kunlavolɛ la a. Yemɔti, ɔnle kɛ bɛyɛ adesoa bɛmaa asafo ne wɔ ezukoa afoa nu. Adenle ko mɔɔ Keleseɛnema dua zo yɛ “nyamenlezonlenlɛ gyima ne” ɛnɛ la a le kɛ bɛbava bɛ mbusuafoɔ nwonane nu ngyianlɛ bɛamaa bɛ.

8. Duzu ati a nrɛlɛbɛ wɔ nu kɛ Baebolo ne angile adenle fɔɔnwo bie mɔɔ ɔwɔ kɛ bɛfa zo bɛnea awovolɛ mɔɔ bɛ nye ɛvi la ɛ?

8 Ye sikalɛ a le kɛ, ɔle Keleseɛne mralɛ mɔɔ bɛnyi la ɛzonlelilɛ kɛ bɛbava  nwonane afoa nu moalɛ mɔɔ bɛ awovolɛ hyia nwo la bɛamaa bɛ. Ɛnee Pɔɔlo ɛlɛka ‘diedinli ne mbusuafoɔ’ anwo edwɛkɛ, noko ɔnle kɛ bɛbu bɛ nye bɛgua awovolɛ mɔɔ bɛnle Keleseɛnema la anwo zo. Mralɛ dua ndenle ngakyile zo a nea bɛ awovolɛ a. Gyinlabelɛ ne amuala ɛnle ko. Menli mɔɔ ɔwɔ kɛ bɛnea bɛ la ngyianlɛ, bɛ subane, nee bɛ kpɔkɛdelɛ ɛnle ko. Mgbanyima bie mɔ lɛ mralɛ dɔɔnwo, yɛɛ bie ɛdeɛ kokye. Bie mɔ nyia moalɛ fi Arane ɛkɛ, bie mɔ noko ɛnnyia bie. Asolo menli mɔɔ bɛnea bɛ la biala ngyianlɛ. Ɛhye ati, nrɛlɛbɛ ɛnle nu kɛ yɛbadendɛ yɛatia ndenle mɔɔ menli dua zo nea bɛ mbusuafoɔ mɔɔ bɛ nye ɛvi la. Gyihova kola yila kpɔkɛzilɛ biala mɔɔ ɔgyi Ngɛlɛlera ne azo la ɔmaa ɔyɛ boɛ. Yɛnwu ye zɔ ɔvi Mosisi mekɛ zo.—Ɛdi. 11:23.

9-11. (a) Tɛnlabelɛ mɔɔ anu yɛ se la boni a bie mɔ ɛhɔ nu a? (Nea mɔlebɛbo nvoninli ne.) (b) Duzu ati a ɔnle kɛ mralɛ mɔɔ ɛnyi la pele bɛ nwo gyakyi dahuu ɛzonlenlɛ gyima ne ɛ? Maa neazo.

9 Saa awovolɛ mɔɔ bɛ nye ɛvi la nee bɛ mra ɛnde ɛleka ko a, ɔmaa bɛ ɛnleanlɛ yɛ se. Awovolɛ kpɔkɛdelɛ mɔɔ ɔkakyi arɛlevilɛ nu ɔluakɛ bie a ɔdɔle aze, ye bowule ɛbu, anzɛɛ esiane gyɛne ɛdo ye la maa nwolɛ kyia kɛ bɛkɔkpɔla Selɛ anzɛɛ Ninli bie. Yemɔ anzi, bie a bɛbahyia moalɛ ɔvi mekɛ mɔɔ kɔ mekɛ anzɛɛ dahuu. *

10 Mediema mɔɔ dahuu ɛzonlenlɛ gyima ne ati bɛvi sua nu la kola yia ɛhye anwo ngyegyelɛ. Bɛ nuhua ne mɔɔ bɛsonle kɛ Bɛtɛlema, edwɛkpatɛlɛvolɛma, nee neavolɛ adenduvoma la amuala anye die bɛ gyima ne anwo, na bɛbu ye kɛ ɔle nyilalɛ mɔɔ ɔvi Gyihova ɛkɛ. Noko saa bɛ awovolɛ nwo to bɛ a, bie a edwɛkɛ mɔɔ bɛdumua bɛka la a le kɛ, ‘Ɔwɔ kɛ yɛsia yɛkɔ sua nu yɛkɔnea yɛ awovolɛ.’ Ɔbayɛ kpalɛ kɛ bɛbava asɔneyɛlɛ bɛazuzu nwo saa bɛ awovolɛ die to nu anzɛɛ bɛnlie bɛndo nu a. Ɔnle kɛ awie biala pele ɔ nwo gyakyi ye nwolɛ adenle ne anu, yɛɛ tɛ mekɛ ne amuala a ɔhyia kɛ bɛyɛ zɔ a. Asoo ye anwondolɛ ne le mekɛ ekyi nu ɛdeɛ mɔɔ ye ɛkɛ ne asafo ne bahola aboa ye ɔ?—Mrɛ. 21:5.

11 Suzu mediema mrenya nwiɔ bie mɔɔ ɛnee sonle wɔ manle gyɛne zo la neazo ne anwo. Ɛnee ko sonle kɛ edwɛkpatɛlɛvolɛ wɔ Ameleka Nyiakɛ, yɛɛ ko ne noko wɔ ewiade amuala gyima ne ati wɔ Brooklyn, New York. Ɛnee mediema ɛhye mɔ awovolɛ mɔɔ bɛ nye ɛvi la hyia moalɛ. Bɛ nee bɛ ye mɔ hɔkpɔlale bɛ wɔ Japan, na bɛzuzule moalɛ kpalɛ mɔɔ bɛbahola bɛava bɛamaa bɛ la anwo. Agyalɛma ne mɔɔ bɛwɔ Ameleka Nyiakɛ la yɛle kɛ bɛgyakyi bɛ gyima ne bɛahɔ sua nu. Asafo mɔɔ bɛ awovolɛ wɔ nu la mgbanyima avinli ngitanwodivolɛ ne vɛlɛle bɛ wɔ telefuu zo. Ɛnee mgbanyima ne mɔ ɛzuzu edwɛkɛ ne anwo na bɛkulo kɛ bɛtoa bɛ edwɛkpatɛlɛvolɛ gyima ne azo. Ɛnee mgbanyima ne mɔ anye sɔ agyalɛma ne gyima mɔɔ bɛlɛyɛ la, na ɛnee bɛkulo kɛ bɛboa bɛ bɛmaa bɛnea bɛ awovolɛ ne mɔ. Abusua ne anu amra kɔsɔɔti anye liele moalɛ ɛhye anwo.

12. Bodane boni a ɔwɔ kɛ Keleseɛne mbusua nyia ye wɔ kpɔkɛzilɛ biala mɔɔ bɛfa bɛanlea menli mɔɔ bɛ nye ɛvi la anwo a?

12 Ɔwɔ kɛ Keleseɛne mbusua mɔɔ kulo kɛ boa mgbanyima la kɔsɔɔti nwu kɛ adenle mɔɔ bɛbalua zo bɛayɛ ye la ɛnrɛgua Nyamenle duma ne anwo evinli. Yɛngulo kɛ yɛbayɛ kɛ ɛzonlenlɛ nu adekilevoma mɔɔ ɛnee wɔ Gyisɛse  mekɛ zo la ɛlɛ. (Mat. 15:3-6) Yɛkulo kɛ yɛ kpɔkɛzilɛ wula Nyamenle nee asafo ne anyunlunyia.—2 Kɔl. 6:3.

ASAFO NE ƐZONLELILƐ

13, 14. Kɛmɔti a yɛkola yɛgyinla Ngɛlɛlera ne azo yɛka kɛ asafo ne lɛ ɛhulolɛ kɛ ɔbaboa menli mɔɔ anye ɛvi la ɛ?

13 Tɛ yɛ muala a yɛbahola yɛaboa bɛdabɛ mɔɔ bɛwɔ dahuu ɛzonlenlɛ gyima ne anu wɔ adenle mɔɔ yɛha nwolɛ edwɛkɛ la azo a. Noko edwɛkɛ bie mɔɔ zile wɔ ɛvoya mɔɔ lumua la kile kɛ asafo ne mɔ lɛ ɛhulolɛ kɛ bɛbaboa nɔhavoma mɔɔ bɛ nye ɛvi la. Baebolo ne ka ye wɔ Gyɛlusalɛm asafo ne anu amra anwo kɛ, “bɛ nuhua biala angyia.” Ɛhye ɛngile kɛ ɛnee bɛnyia bɛ nwo. Ɛnee bie mɔ ɛnlɛ bie noko “bɛhyɛle bɛmanle awie biala nyianle bie, kɛmɔ bɛ ɛhyianlɛ ngakyile ne mɔ de la.” (Gyi. 4:34, 35) Nzinlii, edwɛkɛ fofolɛ zile. Bɛdele kɛ “bɛbu bɛ nye bɛgua bɛ ahunlanvolɛ mraalɛ ne mɔ anwo zo wɔ dahuu ndɔnielilɛ nu.” Yemɔti, ɛzoanvolɛma ne yɛle ngyehyɛleɛ kpale mrenya mɔɔ fɛta la manle bɛlile ahunlanvolɛ ne mɔ ngyianlɛ nwo gyima. (Gyi. 6:1-5) Ɛnee nziezielɛ ɛhye le mekɛ ezinra nu debie mɔɔ bamaa bava menli mɔɔ rayɛle Keleseɛnema wɔ Pɛntekɔso 33 Y.M., nee bɛdabɛ mɔɔ bɛdɛnlanle Gyɛlusalɛm amaa bɛanyi sunsum nu la ngyianlɛdeɛ bɛmanle bɛ ɛdeɛ, noko mɔɔ ɛzoanvolɛma ne yɛle la maa yɛnwu kɛ asafo ne bahola aboa mediema mɔɔ hyia moalɛ la.

14 Kɛmɔ yɛnwu ye la, Pɔɔlo vale adehilelɛ mɔɔ ɔbamaa bɛanwu Keleseɛne ahunlanvolɛ mɔɔ fɛta kɛ bɛboa bɛ wɔ asafo ne anu la ɔmanle Temɔte. (1 Tem. 5:3-16) Baebolo kɛlɛvolɛ Gyemise noko hanle ɛzonlelilɛ mɔɔ Keleseɛnema lɛ kɛ bɛbanlea nrisa, ahunlanvolɛ, nee menli gyɛne wɔ bɛ ngyianlɛ nu la anwo edwɛkɛ. (Gye. 1:27; 2:15-17) Ɛzoanvolɛ Dwɔn noko hanle kɛ: “Saa awie mɔɔ lɛ ewiade ye anu ninyɛne la nwu ɔ diema mɔɔ ɛhyia, na ɔye ɔ nye ɔto ɛbɔ nu a, ɛnee kɛ ɔsi ɔka kɛ ɔkulo Nyamenle ɛ?” (1 Dwɔn 3:17) Saa ɔle Keleseɛnenli ko biala gyima kɛ ɔbaboa menli mɔɔ hyia moalɛ la a, ɛnee tɛ zɔhane ala a ɔwɔ kɛ asafo ne noko yɛ ɔ?

Esiane si a, kɛzi asafo ne bahola aboa ɛ? (Nea ɛdendɛkpunli 15, 16)

15. Ninyɛne mɔɔ bɛbahola bɛayɛ bɛaboa mediema mɔɔ bɛ nye ɛvi la bie a le boni?

15 Wɔ maanle bie mɔ anu, arane yɛ ngyehyɛleɛ maa bɛdabɛ mɔɔ bɛkpɔne gyima, ɔfa kpɔkɛdelɛ nwo moalɛ ɔmaa, na ɔmaa bɛnea bɛ wɔ sua nu. (Wulo. 13:6) Ɔnle zɔ wɔ ɛleka ne bie mɔ. Ɛhye ati, asolo moalɛ mɔɔ mbusuafoɔ nee  asafo ne bava amaa mediema mɔɔ bɛ nye ɛvi la wɔ tɛnlabelɛ biala anu. Saa bɛ mra mɔɔ bɛle diedima la nee bɛ ɛnde ɛleka ko a, ɔbaha moalɛ mɔɔ bɛfa bɛmaa bɛ la. Ɔwɔ kɛ mralɛ ne mɔ nee bɛ awovolɛ ne mɔ asafo nu mgbanyima di ngitanwo bɛmaa awie biala nwu tɛnlabelɛ mɔɔ abusua ne wɔ nu la. Kɛ neazo la, mgbanyima ne mɔ bahola aboa awovolɛ ne mɔ bɛamaa bɛanyia moalɛ mɔɔ arane fa maa la. Eza bɛbahola bɛaboa bɛ bɛamaa bɛali bɛ ayileyɛlɛ nee kakɛ gyɛne nwo ngyegyelɛ nwo gyima. Deɛ ɛhye mɔɔ bɛfi ɛlɔlɛ nu bɛyɛ la boa amaa tɛnlabelɛ bie anzɛkye na bɛanyia moalɛ kpalɛ wɔ ye mekɛ nloa. Nɔhalɛ nu, menli ɛhye mɔ yɛ “gyima” mɔɔ bɛ mra ne mɔ a anrɛɛ ɔwɔ kɛ yɛ la maa bɛ, na ɔmaa abusua ne anu ngyegyelɛ zo te.

16. Kɛzi Keleseɛnema bie mɔ boa mgbanyima mɔɔ wɔ bɛ asafo ne anu la ɛ?

16 Ɔlua ɛlɔlɛ mɔɔ bɛlɛ bɛmaa menli mɔɔ anye ɛvi la ati, Keleseɛnema bie mɔ ɛvi bɛ ɛhulolɛ nu ɛva bɛ mekɛ nee bɛ anwosesebɛ ɛboa wɔ ndenle bie mɔ azo. Bɛfa bɛyɛ bɛ adwenle kɛ bɛbahile mgbanyima mɔɔ wɔ bɛ asafo ne anu la anwo anyelielɛ kpalɛ. Mediema mɔɔ ɛha wɔ asafo ne anu la yɛ ngyehyɛleɛ nea bɛ. Bɛnwu kɛ bɛ tɛnlabelɛ ɛnrɛmaa bɛnrɛhola dahuu ɛzonlenlɛ gyima ne bie yɛ, yemɔti bɛ nye die kɛ bɛbaboa bɛ mra bamaa bɛahɔ zo bɛayɛ. Nea subane kɛnlɛma mɔɔ mediema ɛhye mɔ da ye ali a! Noko, bɛ ahunlunyele ne ɛnye ɛzonlelilɛ mɔɔ bɛ mra lɛ kɛ bɛbanlea bɛ awovolɛ la ɛnvi bɛ kɔme zo bɔkɔɔ.

BƐLUA BƐ ƐDENDƐLƐ KƐNLƐMA ZO BƐLI MGBANYIMA ENI

17, 18. Duzu ati a subane kpalɛ nwo hyia wɔ mgbanyima ɛnleanlɛ nu ɛ?

17 Menli mɔɔ bɔ nu nea mgbanyima la bahola amaa yeayɛ anyelielɛ. Saa ɛboka nwo a, bɔ mɔdenle fa adwenle kpalɛ yɛ. Ɔdwu mekɛ ne bie a, mgbanyinli te nganeɛ kɛ bɛ nwo ɛnlɛ nvasoɛ biala, na ɔmaa bɛ rɛle bɔ. Ɛhye ati, ɔhyia mɔdenlebɔlɛ na bɛalua ɛdendɛlɛ kɛnlɛma zo bamaa bɛ anwosesebɛ. Bɛ nuhua ne mɔɔ ɛzonle wɔ nɔhalɛlilɛ nu la fɛta nganvolɛ. Gyihova nee bɛ mediema Keleseɛnema arɛle ɛnrɛvi mɔɔ bɛyɛle ye wɔ ye ɛzonlenlɛ nu la.—Bɛgenga Malakae 3:16; Hibuluma 6:10.

18 Bieko, ngyegyelɛ mɔɔ wɔ mgbanyima ɛnleanlɛ nu la azo te wɔ mekɛ mɔɔ menli mɔɔ nea bɛ la maa bɛ nye die la. (Nolo. 3:1, 4) Menli mɔɔ anye ɛvi la anu dɔɔnwo ɛmkpondɛ ninyɛne dɔɔnwo. Bɛze kɛ subane mɔɔ bɛda ye ali la bahola aha kɛzi menli bɛarakpɔla bɛ la. Menli mɔɔ ta kɔkpɔla bɛ la ka kɛ, “Mengɔle kɛ mekamaa adiema kpanyinli bie anwosesebɛ noko mekavi ɛkɛ la ɛnee menyia anwosesebɛ.”—Mrɛ. 15:13; 17:22.

19. Anyelazo boni a mgbanyinli nee ngakula kɔsɔɔti bahola anyia a?

19 Yɛ nye la mekɛ mɔɔ amaneɛnwunlɛ nee ngyegyelɛ mɔɔ mgbanyinliyɛlɛ fa ba abo bapɛ la. Noko kɛkala, ɔwɔ kɛ Nyamenle azonvolɛ maa dahuu ngoane nwo anyelazo ne tɛnla bɛ adwenle nu. Yɛze kɛ Nyamenle ɛwɔkɛ ne mɔ anu diedi le kɛ sɛkɛ wɔ ngyegyelɛ mekɛ nu. Ɔlua diedi ɛhye ati, “yɛmkpo aze. Saa yɛ nwonane ɛlɛwie bɔbɔ a, Nyamenle kakyi yɛ sunsum nu nwonane ne alehyenlɛ biala.” (2 Kɔl. 4:16-18; Hib. 6:18, 19) Saa ɛye Nyamenle ɛwɔkɛ ne mɔ anu diedi mɔɔ ɛlɛ la ɛsie ahane a, duzu a baboa wɔ na wɔali wɔ ɛzonlelilɛ mɔɔ ɛlɛ kɛ neavolɛ la anwo gyima a? Yɛbazuzu ndenle mɔɔ fɛta la bie mɔ anwo wɔ edwɛkɛ mɔɔ doa zo la anu.

^ ɛden. 9 Edwɛkɛ mɔɔ doa zo la ka ndenle mɔɔ mralɛ bahola alua zo anlea bɛ awovolɛ mɔɔ anye ɛvi la anwo edwɛkɛ.