Mekɛ mɔɔ adekpakyelɛma nwiɔ bie wolole awuke bie mɔɔ wɔ Kenya anu la, nrenya ekyii bie mɔɔ bɛnwunle kɛ ɔla ɛkpa zo la yɛle bɛ azibɛnwo. Ɛnee ye anwuma le ekyii bie, na ɔ sa le nzinrenzinra. Mɔɔ bɛhilele ye Nyamenle ɛwɔkɛ mɔɔ yebɔ kɛ “abuburama bawuluwulu kɛ ahɛtɛboɛ” la, nrenya ɛhye anye liele kpalɛ.—Aye. 35:6.

Adekpakyelɛma ne nwunle kɛ bɛvale mbowule nu ewule bie bɛwole Onesmus mɔɔ ɛnee yebo ɛvolɛ 30 la. Ye mbowule nu ɛnyɛ se, yemɔti debie ɛsesebɛ ekyi ka ye a ɛnee ɔlɛbubu. Ɔluakɛ ye ewule ne ayile ɛnle ɛkɛ la ati, ɛnee Onesmus anye la kɛ ɔbade nyane na yeadɛnla abuburama ebia nu ye ngoane mekɛ kɔsɔɔti.

Onesmus maanle bɛ nee ye zukoale Baebolo ne. Noko akee, ɛnee ye mame ɛngulo kɛ ɔkɛhɔ Keleseɛnema nyianu, ɔluakɛ ɛnee ɔdwenle kɛ ɔbamaa yeaboda na ye nyane ne ayɛ kpole. Yemɔti mediema hyele nyianu ne edwɛkɛ ne guale apawa zo maanle Onesmus diele ye wɔ sua nu. Mɔɔ Onesmus zukoale debie siane nnu la, ɔyɛle kɛ ɔbahɔ debiezukoalɛ ɔnva nwo ngyegyelɛ biala mɔɔ ɔbara la.

Asoo debiezukoalɛ mɔɔ ɔhɔle la manle Onesmus nyane ne yɛle kpole ɔ? Yeanyɛ zɔ fee. Onesmus ka kɛ, “Me nyane ne mɔɔ ɛnee mete la bɔle ɔ bo kɛ ɔka aze wɔ debiezukoalɛ bo.” Ɔdwenlenle kɛ ye diedi fofolɛ ne ɛmaa yenyia ahomeka. Onesmus mame nwunle nzenzaleɛ mɔɔ ɛra ɔ ra ne anu la, ɔvale anyelielɛ ɔliele ɔdole nu kɛ bɛ nee ye ɛzukoa Baebolo ne. Ɔka kɛ, “Me ra ne ayile a le Nyamenle ɛzonlenlɛ.”

Yeangyɛ, Onesmus rayɛle nolobɔlɛnli mɔɔ bɛtɛsɔnenle ye. Ɔliele ɛzɔnenlɛ na kɛkala ɔlɛsonle kɛ asafo nu sonvolɛ. Ɔnva nwo kɛ Onesmus agyakɛ nee ɔ sa ko ɛnyɛ gyima la, ɔlɛ ɛhulolɛ kɛ ɔbayɛ mɔɔ ɔbahola la wɔ Gyihova ɛzonlenlɛ nu. Ɛnee ɔkulo kɛ ɔyɛ adekpakyelɛ boavolɛ, noko ɔhwehwenle ɔ bo aze. Duzu ati ɔ? Ɔluakɛ ɛnee ɔze kɛ kyesɛ awie pia ye ɛhwili ne na yeadu ɔ bo. Mɔɔ ɔvale ye ngyegyelɛ ne ɔdole ɔ mediema Keleseɛnema anyunlu la, bɛbɔle ɛwɔkɛ kɛ bɛbaboa ye. Bɛlile bɛ ɛwɔkɛ zo na bɛboale Onesmus bɛmanle ɔyɛle adekpakyelɛ boavolɛ.

Ɛhulolɛ mɔɔ ɛnee Onesmus lɛ kɛ ɔbayɛ dahuu adekpakyelɛ la noko maanle ɔdwenlenle ngyegyelɛ ko ne ala anwo. Noko akee, kenle ko bie, alehyenlɛ ne anu tɛkese ne maanle ye anwosesebɛ mɔɔ ɔhyia la. Ɛnee edwɛkɛ ne wɔ Edwɛndolɛ 34:8: “O bɛzɔ [Gyihova] bɛnlea na bɛkɛnwu kɛ ɔle kpalɛ!” Mɔɔ Onesmus dwenlenle edwɛkɛ ne anwo la, ɔzile kpɔkɛ kɛ ɔbayɛ dahuu adekpakyelɛ. Kɛkala ɔfa kenle nna ɔkɔ daselɛlilɛ dapɛne ne anu, na ɔlɛ Baebolo sukoavoma dɔɔnwo mɔɔ bɛlɛnyia anyuhɔlɛ wɔ sunsum nu a. Ɔhɔle Adekpakyelɛ Ɛzonlenlɛ Sukulu ne bie wɔ ɛvolɛ 2010 ne. Onesmus anye liele kpole wɔ mekɛ mɔɔ ɔnwunle kɛ mediema mrenya nwiɔ ne mɔɔ ralile ye daselɛ la anu ko boka ye kilehilevolɛma ne anwo la!

Kɛkala, Onesmus awovolɛ ɛnde aze, noko mediema mrenya nee mraalɛ mɔɔ bɛwɔ ye asafo ne anu la maa ɔnyia ye ngyianlɛdeɛ kɔsɔɔti. Ɔ nye sɔ nyilalɛ mɔɔ ɔlɛ ye kɛkala la amuala, na ɔ nye la kɛ mekɛ bie ɛlɛba mɔɔ ‘awie biala ɛnrɛha kɛ, “Me nwo ɛdo me” a.’—Aye. 33:24.