Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Bɛdie Gyihova Mboaneneavolɛma Ne

Bɛdie Gyihova Mboaneneavolɛma Ne

“Bɛdie bɛ mgbanyima ne mɔ na bɛli bɛ mɛla zo. Mgbanyima zɛhae mɔ a dahuu nea bɛ ɛkɛla zo a.”—HIB. 13:17.

1, 2. Duzu ati a ɔfɛta kɛ Gyihova vale ɔ nwo dole mboaneneavolɛ nwo ɛ?

GYIHOVA fa ɔ nwo to mboaneneavolɛ nwo. (Yiz. 34:11-14) Ɛhye fɛta ɔluakɛ ɔboa ɔmaa yɛte kɛzi Gyihova de la abo kpalɛ. Mboaneneavolɛ mɔɔ lɛ ɛlɔlɛ la maa ɔ nye bolo ye ɛzonlelilɛ mɔɔ ɔlɛ kɛ ɔbanlea ye mboane ne mɔ boɛ la anwo. Ɔfa bɛ ɔkɔ adidi na ɔmaa bɛ nzukpa bɛno (Edw. 23:1, 2); ɔsi epe ɔnea bɛ alehyenlɛ nee aledwolɛ (Luku 2:8); ɔbɔ bɛ nwo bane ɔfi awenade nee bɛdi nwo (1 Sam. 17:34, 35); ɔfia mboane mralɛ ne mɔ ɔ kɛnra azo (Aye. 40:11); ɔkpondɛ mɔɔ ɛminli la na ɔyɛ mɔɔ kɛboda la ayile.—Yiz. 34:16.

2 Ɔluakɛ ɛnee Gyihova menli mɔɔ dɛnlanle aze tete ne la le mboaneneavolɛma nee ɛyazonlɛma la ati, bɛdele deɛmɔti Gyihova Nyamenle vale ɔ nwo dole mboaneneavolɛ mɔɔ lɛ ɛlɔlɛ anwo la abo kpalɛ. Ɛnee bɛze kɛ mboane hyia ɛlɔlɛ yɛɛ bɛ ɛnleanlɛ hyia alagye amaa bɛayɛ boɛ. Zɔhane ala a ɔde wɔ menli ɛnleanlɛ nwo wɔ sunsum nu a. (Maake 6:34) Saa menli ɛnlɛ sunsum nu adehilelɛ kpalɛ a, ɔmaa bɛfɛ. Bɛnlɛ banebɔlɛ yɛɛ bɛ ɛbɛlabɔlɛ sɛkye kɛmɔ ‘mboane mɔɔ ɛzande na bɛnlɛ neavolɛ’ de la. (1 Arl. 22:17) Noko, Gyihova fi ɛlɔlɛ nu maa ye menli asa ka mɔɔ bɛhyia nwo la.

3. Duzu a yɛbazuzu nwo wɔ edwɛkɛ ɛhye anu a?

3 Yɛdayɛ noko yɛte deɛmɔti Gyihova fa ɔ nwo to mboaneneavolɛ nwo la abo. Gyihova maa ye menli ne mɔɔ bɛle kɛ mboane la asa kɛ mɔɔ bɛhyia nwo la. Bɛmaa yɛnlea kɛzi ɔkile ye mboane ne adenle ɛnɛ na ɔmaa bɛ sa ka mɔɔ bɛhyia nwo la. Eza yɛbazuzu mɔɔ ɔwɔ kɛ mboane ne yɛ ye wɔ Gyihova adehilelɛ nwo la anwo.

MBOANENEAVOLƐ KPALƐ NE ƐMAA YƐ MBOANENEAVOLƐ NGYIKYI

4. Kɛzi Gyisɛse nea Gyihova mboane ne ɛ?

4 Gyihova ɛkpa Gyisɛse kɛ Keleseɛne asafo ne Ati. (Ɛfɛ. 1:22, 23) Kɛ “mboaneneavolɛ kpalɛ” la,  Gyisɛse maa yɛnwu mɔɔ ɔ Ze kulo, ye bodane nee ye subane. Gyisɛse ‘vale ye ngoane dole aze manle ye mboane’ ne bɔbɔ. (Dwɔn 10:11, 15) Nea kɛzi Kelaese ɛkpɔnelɛ afɔle ne le nyilalɛ maa alesama a! (Mat. 20:28) Ɛhye le Gyihova bodane “amaa awie biala mɔɔ kɛlie [Gyisɛse] kɛli la anwu na yeanyia ngoane mɔɔ ɛnlɛ awieleɛ”!—Dwɔn 3:16.

5, 6. (a) Nwane a Gyisɛse ɛkpa ye kɛ ɔnlea ye mboane ne azo a, duzu a ɔwɔ kɛ mboane ne yɛ na bɛanyia ngyehyɛleɛ ɛhye azo nvasoɛ ɛ? (b) Debie titile mɔɔ ɔmaa yɛtie asafo nu mgbanyima la a le duzu?

5 Kɛzi mboane ne da ye ali kɛ Gyisɛse Kelaese a le bɛ Mboaneneavolɛ Kpalɛ ɛ? Gyisɛse hanle kɛ: “Me mboane ne tie me ne; meze bɛ, yɛɛ bɛtoa me bo zo.” (Dwɔn 10:27) Mboaneneavolɛ Kpalɛ ne ane mɔɔ yɛtie la kile kɛ yɛbali ye adehilelɛ kɔsɔɔti azo. Menli mɔɔ yekpa bɛ kɛ bɛboa ye bɛmaa ɔnlea mboane ekpunli ne mɔɔ yɛbadie bɛ la boka nwo. Gyisɛse hilele kɛ ye ɛzoanvolɛ nee ɛdoavolɛ ne mɔ bɛadoa gyima ne mɔɔ ɔbɔle ɔ bo la azo. Ɛnee ɔwɔ kɛ ‘bɛkilehile’ na bɛmaa ‘Gyisɛse mboane mralɛ ne mɔ aleɛ.’ (Mat. 28:20; bɛgenga Dwɔn 21:15-17.) Mɔɔ edwɛkpa ne dɛlɛle na ɛdoavolɛma ne yɛle dɔɔnwo la, Gyisɛse kpale Keleseɛnema mɔɔ bɛnyi sunsum nu la kɛ bɛnlea asafo ne mɔ azo.—Ɛfɛ. 4:11, 12.

6 Ɛzoanvolɛ Pɔɔlo kɛlɛ neavolɛma mɔɔ ɛnee wɔ ɛvoya ne mɔɔ lumua la anu asafo mɔɔ ɛnee wɔ Ɛfɛsɛse anu la, ɔhanle kɛ sunsum nwuanzanwuanza ne ɛkpa bɛ neavolɛma kɛ ‘bɛnlea Nyamenle asafo ne azo.’ (Gyi. 20:28) Sunsum nwuanzanwuanza ne a kpa asafo nu mgbanyima mɔɔ bɛwɔ ɛkɛ ɛnɛ la noko a, ɔluakɛ bɛgyinla Ngɛlɛlera ne mɔɔ bɛluale sunsum nwuanzanwuanza ne azo a bɛhɛlɛle la azo a bɛkpa bɛ a. Yemɔti, saa yɛtie asafo nu mgbanyima a, ɛnee yɛlɛkile kɛ yɛbu Gyihova nee Gyisɛse, Mboaneneavolɛma mgbole nwiɔ ne. (Luku 10:16) Ɛhye a le debie titile mɔɔ ɔti ɔwɔ kɛ yɛfi yɛ ɛhulolɛ nu yɛtie mgbanyima ne mɔ a. Noko akee, ninyɛne gyɛne wɔ ɛkɛ mɔɔ ɔti ɔwɔ kɛ yɛtie bɛ a.

7. Kɛzi mgbanyima boa yɛ maa yɛ nee Gyihova nyia agɔnwolɛvalɛ kpalɛ ɛ?

7 Anwosesebɛmanlɛ nee folɛdulɛ mɔɔ mgbanyima fa maa bɛ mediema mekɛ biala la gyi Ngɛlɛlera ne azo. Tɛ bodane mɔɔ bɛgyinla zo bɛyɛ ɛhye la a le kɛ bɛkile bɛ mediema kɛzi ɔwɔ kɛ bɛbɔ bɛ ɛbɛla la. (2 Kɔl. 1:24) Emomu, bɛkulo kɛ bɛboa bɛ bɛmaa bɛgyinla Ngɛlɛlera ne azo bɛsi kpɔkɛ kpalɛ, amaa koyɛlɛ nee anzondwolɛ adɛnla asafo ne anu. (1 Kɔl. 14:33, 40) Baebolo ne ka kɛ mgbanyima ne mɔ a “dahuu nea bɛ ɛkɛla zo a.” Ɛhye kile kɛ bɛkulo kɛ bɛboa asafo ne anu sonla ko biala bɛmaa ɔ nee Gyihova nyia agɔnwolɛvalɛ kpalɛ. Yemɔti saa bɛnwu kɛ adiema bie kpondɛ avo anzɛɛ ‘ɛyɛ ɛtane’ bie bɔbɔ a, bɛyɛ ndɛ bɛboa ye. (Gal. 6:1, 2; Dwuudu 22) Asoo ɛhye mɔ ɛnle ndelebɛbo kpalɛ mɔɔ ɔdaye ti ɔwɔ kɛ ‘yɛtie yɛ mgbanyima ne mɔ na yɛdi bɛ mɛla zo’ ɔ?—Bɛgenga Hibuluma 13:17.

8. Duzu a mgbanyima yɛ bɔ mboane ne anwo bane a?

8 Ɛzoanvolɛ Pɔɔlo mɔɔ ɛnee le mboaneneavolɛ mɔɔ lɛ ɛlɔlɛ la, bɔle ɔ mediema mɔɔ bɛwɔ Kɔlɔsae la kɔkɔ kɛ: “Bɛnlea boɛ na awie anva mɛlɛbɛla nee adalɛ nrɛlɛbɛ mɔɔ bɛlua ewiade amaamuo zo bɛhyehyɛ, nee mɔɔ vi awozinli ewiade ye sunsum nu tumima ɛkɛ ne na ɔnvi Kelaese ɛkɛ ne la anyɛ bɛ ngɛkɛlɛ.” (Kɔl. 2:8) Kɔkɔbɔlɛ ɛhye noko maa yɛnwu debie bieko mɔɔ ɔti ɔhyia kɛ yɛtie mgbanyima ne mɔ la. Bɛbɔ mediema  anwo bane bɛfi adalɛ diedi ngakyile mɔɔ kola twe bɛ fi Gyihova anwo la anwo. Ɛzoanvolɛ Pita bɔle “Nyamenle kpɔmanvolɛma” nee “kilehilevolɛma alane” mɔɔ bɛbabɔ mɔdenle kɛ “bɛbɛlɛbɛla bɛdabɛ mɔɔ bɛtɛtinle sunsum nu” la anwo kɔkɔ. (2 Pita 2:1, 14) Mgbanyima mɔɔ bɛwɔ ɛkɛ ɛnɛ la noko fa kɔkɔbɔlɛ zɛhae bie maa wɔ ye mekɛ nu. Mgbanyima ne mɔ ati ɛdi wɔ sunsum nu yɛɛ bɛlɛ ɛbɛlabɔlɛ nu anwubielɛ dɔɔnwo. Bieko, kolaa na bɛakpa bɛ la, bɛlale ye ali kɛ bɛlɛ Ngɛlɛlera ne anu ndelebɛbo kpalɛ na bɛkola bɛkilehile. (1 Tem. 3:2; Tae. 1:9) Bɛ adwenle mɔɔ ɛdi sunsum nu, Baebolo nu nrɛlɛbɛ mɔɔ bɛlɛ, ne kpundii mɔɔ bɛgyi la maa bɛkola bɛfa adehilelɛ kpalɛ bɛmaa mediema.

Mgbanyima ne mɔ bɔ mediema mɔɔ bɛwɔ asafo ne anu la anwo bane kɛ mboaneneavolɛ (Nea ɛdendɛkpunli 8)

MBOANENEAVOLƐ KPALƐ MAA YE MBOANE ALEƐ NA ƆBƆ BƐ NWO BANE

9. Kɛzi Gyisɛse kile Keleseɛnema asafo ne adenle na ɔmaa bɛ aleɛ ɛnɛ ɛ?

9 Gyihova dua ye ahyehyɛdeɛ ne azo ɔmaa mediema mɔɔ bɛwɔ ewiade amuala la sunsum nu aleɛ dɔɔnwo. Yɛnyia Ngɛlɛlera ne anu folɛdulɛ dɔɔnwo yɛfi yɛ mbuluku ne mɔ anu. Bieko, saa ɔdwu mekɛ ne bie a, ahyehyɛdeɛ ne dua ngɛlata zo anzɛɛ neavolɛ adenduvoma anwo zo ɔfa adehilelɛ ɔmaa asafo nu mgbanyima. Wɔ ndenle ɛhye mɔ azo, mboane ne nyia adehilelɛ mɔɔ anu la ɛkɛ.

10. Gyima boni a sunsum nu mboaneneavolɛma yɛ ye wɔ mboane mɔɔ kɛminli la anwo a?

10 Ɔle mboaneneavolɛma gyima kɛ bɛbabɔ mboane ne anwo bane na  bɛanlea bɛ boɛ. Asafo nu mgbanyima anye wɔ bɛdabɛ mɔɔ bɛ diedi ɛha aze anzɛɛ bɛnde kpɔkɛ wɔ sunsum nu la anwo. (Bɛgenga Gyemise 5:14, 15.) Bie mɔ bɔbɔ ɛvi nɔhalɛ ne anu, bɛgyakyi debiezukoalɛ ɛhɔlɛ. Wɔ tɛnlabelɛ zɛhae anu, asoo ɔnrɛyɛ kpalɛ kɛ kpanyinli mɔɔ lɛ ɛlɔlɛ la bayɛ mɔɔ ɔbahola biala la yeakpondɛ mboane ne yeamaa bɛ anwosesebɛ kɛ bɛzia bɛrɛla asafo ne anu ɔ? Kpolerazulɛ biala ɛnle nwo! Gyisɛse hilehilele nu kɛ: “Bɛ Ze mɔɔ wɔ anwuma la ɛmkpondɛ kɛ ngakula ɛhye mɔ anu ko minli.”—Mat. 18:12-14.

KƐZI ƆWƆ KƐ YƐBU MBOANENEAVOLƐ NGYIKYI NE MƆ SINLIDƆLƐ Ɛ?

11. Duzu a maa ɔyɛ se ɔmaa bie mɔ kɛ bɛbadie mgbanyima ne mɔ ɛ?

11 Gyihova nee Gyisɛse le Mboaneneavolɛma mɔɔ bɛdi munli. Mboaneneavolɛma ngyikyi ne mɔɔ bɛle menli na bɛva asafo ne bɛwula bɛ sa nu la ɛnli munli. Ɛhye maa ɔyɛ se ɔmaa bie mɔ kɛ bɛkɛdie bɛ. Bie a bɛbazuzu kɛ: ‘Bɛnli munli kɛ yɛdayɛ la. Duzu ati a ɔwɔ kɛ yɛtie bɛ folɛdulɛ ɛ?’ Nɔhalɛ nu, mgbanyima ne mɔ ɛnli munli. Noko akee, ɔnle kɛ yɛfa yɛ adwenle yɛsie bɛ nvonleɛ zo.

12, 13. (a) Nvonleɛ boni a menli mɔɔ lile Gyihova menli ne anyunlu wɔ tete ne la bie mɔ yɛle a? (b) Duzu ati a bɛhɛlɛle mrenya mɔɔ ɛnee lɛ ɛzonlelilɛ la sinlidɔlɛ wɔ Baebolo ne anu ɛ?

12 Ngɛlɛlera ne ka menli mɔɔ Gyihova manle bɛlile ye menli ne anyunlu wɔ tete ne la nvonleɛ nwo edwɛkɛ. Kɛ neazo la, bɛkpokpale Devidi kɛ Yizilayɛ belemgbunli nee adekilevolɛ. Noko, nzinlii ɔyɛle ɛtane ɔtiale Nyamenle. Ɔvale awuvolɛ raalɛ bie na ɔhunle ɔ hu. (2 Sam. 12:7-9) Suzu ɛzoanvolɛ Pita noko anwo. Ɔnva nwo kɛ ɛnee ɔlɛ ɛzonlelilɛ kpole wɔ Keleseɛne asafo ne anu la, ɔyɛle nvonleɛ mgbole. (Mat. 16:18, 19; Dwɔn 13:38; 18:27; Gal. 2:11-14) Saa yɛye Gyisɛse a, ɔvi Adam nee Yive anwo zo mɔɔ ɔba la dasanli biala ɛnli munli.

13 Duzu ati a Gyihova manle bɛhɛlɛle menli mɔɔ ɔvale bɛ ɔlile gyima la sinlidɔlɛ wɔ Baebolo ne anu ɛ? Ɔyɛle zɔ ɔvale ɔhilele kɛ ɔkola ɔmaa menli mɔɔ ɛnli munli la kile ye menli adenle. Nɔhalɛ, ɔyɛ zɔ mekɛ biala. Yemɔti, ɛnɛ, ɔnle kɛ yɛgyinla mgbanyima ne mɔ sinlidɔlɛ zo yɛtendɛ yɛtia bɛ anzɛɛ yɛkpo bɛ adehilelɛ. Gyihova kulo kɛ yɛbu bɛ na yɛtie bɛ ne.—Bɛgenga Adendulɛ 16:2, 8.

14, 15. Duzu a yɛsukoa yɛfi adenle mɔɔ Gyihova luale zo vale adehilelɛ manle ye menli wɔ tete ne la anu a?

14 Tieyɛ mɔɔ yɛbayɛ yɛamaa mgbanyima ne mɔ la le debie mɔɔ anwo hyia kpalɛ. Dwenle kɛzi Gyihova vale adehilelɛ manle ye menli wɔ tete ne amaa bɛanyia bɛ ti wɔ ngyegyelɛ mekɛ nu la anwo. Mɔɔ Yizilayɛma vile Yigyibiti la, Nyamenle luale Mosisi nee Aalɔn anwo zo vale adehilelɛ manle bɛ. Ɛnee ɔwɔ kɛ Yizilayɛma tie adehilelɛ mɔɔ se bɛli aleɛ titile bie, na bɛva boane mɔɔ bɛkɛhu ye la mogya bɛyɛ bɛ nlenkɛ ne mɔ anloa la azo, amaa bɛanyia bɛ ti wɔ ngyegyelɛ ne mɔɔ ɔtɔ zolɛ bulu la anu. Ɛnelɛ biala vi anwuma anva adehilelɛ ɛhye ammaa. Ɛnee ɔwɔ kɛ bɛtie mgbanyima mɔɔ wɔ Yizilayɛ mɔɔ ɛnee nyia adehilelɛ fi Mosisi ɛkɛ la. (Ade. 12:1-7, 21-23, 29) Wɔ ndenle ɛhye mɔ azo, Gyihova luale Mosisi nee mrenya mgbanyima ne mɔ anwo zo ɔhilele ye menli ne adenle. Ɛnɛ, Gyihova dua asafo nu mgbanyima nwo zo yɛ zɔhane ala.

15 Eza suzu mekɛ ngakyile mɔɔ Gyihova luale menli anzɛɛ anwumabɔvolɛma nwo zo ɔvale adehilelɛ ɔmanle ye menli wɔ Baebolo mekɛ nu la anwo. Fane dɔɔnwo ne ala, adehilelɛ zɛhae mɔ liele bɛ ngoane. Mekɛ ɛhye mɔ amuala anu, Nyamenle zile kpɔkɛ kɛ ɔbamaa  menli tumi yeamaa bɛadendɛ ye duma nu na bɛaha mɔɔ ɔwɔ kɛ ye menli ne yɛ na bɛanyia ngoane la bɛahile bɛ. Asoo yɛnlie yɛnli kɛ Gyihova bahola ayɛ deɛ ko ne ala bie wɔ Amagɛdɔn ɔ? Ɔbayɛ kpalɛ kɛ mgbanyima mɔɔ gyi Gyihova ahyehyɛdeɛ ne agyakɛ anu ɛnɛ la nea boɛ na bɛanva tumi mɔɔ wɔ bɛ sa nu la bɛanli gyima wɔ adenle ɛtane zo.

“MBOANE EKPUNLI KO MƆƆ BƐ NEAVOLƐ KO”

16. “Edwɛkɛ” boni a ɔwɔ kɛ yɛtie ye boɛ a?

16 Gyihova menli kɔsɔɔti le “mboane ekpunli ko” yɛɛ bɛwɔ “neavolɛ ko,” Gyisɛse Kelaese abo. (Dwɔn 10:16) Gyisɛse hanle kɛ ɔ nee ye ɛdoavolɛma ne “lua dahuu kɔkpula ewiade awieleɛ.” (Mat. 28:20) Kɛ Belemgbunli mɔɔ wɔ anwuma la, ɔbanlea anyuhɔlɛ gyima mɔɔ ɛlɛkɔ zo la azo kɔkpula kɛ ɔbarabua Seetan ewiade ne ndɛne. Kɛ ɔkɛyɛ na yɛayɛ ko na yɛanyia banebɔlɛ wɔ Nyamenle ahyehyɛdeɛ ne anu ɛ? Baebolo ne bua kɛ: “Bɛbade edwɛkɛ wɔ bɛ nzi kɛ ɔlɛka yeahile bɛ kɛ, ‘Adenle ne ɛne, bɛlua nuhua.’” Ngilehilelɛ mɔɔ Gyihova dua Baebolo ne azo fa maa yɛ, nee ninyɛne mɔɔ Ɔ nee Gyisɛse dua mboaneneavolɛma mɔɔ bɛkpa bɛ anwo zo bɛka bɛkile yɛ la boka “edwɛkɛ” ne mɔɔ yɛbade la anwo.—Bɛgenga Ayezaya 30:21; Yekile 3:22.

Mgbanyima bɔ mrɛladane ko mbusua nwo bane fi agɔnwolɛ ɛtane nwo (Nea ɛdendɛkpunli 17, 18)

17, 18. (a) Kɛzi mboane ne ngoane la esiane nu ɛ, noko anwodozo boni a yɛlɛ a? (b) Duzu a yɛbazuzu nwo wɔ edwɛkɛ mɔɔ doa zo la anu a?

17 Seetan lua nu “ɛlɛkpo kɛ awenade, ɔlɛkpondɛ awie yeahye ye yeali.” (1 Pita 5:8) Kɛ nane anwo ɛzulolɛ mɔɔ ɛhɔne ɛlɛku ye la, ɔlɛtetɛ mboane ne yeakpondɛ nwolɛ adenle yeahye nuhua ne mɔɔ ɛyɛ bɛtɛɛ anzɛɛ ɛde ɔ nwo la. Ɛhye titile ati a ɔwɔ kɛ yɛtwe yɛbikye yɛ mediema, ‘mboaneneavolɛma nee [yɛ] ɛkɛla sinzavolɛma’ ne dahuu a. (1 Pita 2:25) Yekile 7:17 ka ye wɔ menli mɔɔ bɛbavi ɛsalɛ wɔ anwongyelelɛ kpole ne anu la anwo kɛ: “Boaneralɛ ne [Gyisɛse] . . . bayɛ mboaneneavolɛ anlea bɛ, na ɔbayɛ bɛ tataa yeahɔ nzubula mɔɔ maa ngoane la anwo. Na Nyamenle bakyikyi bɛ nye anwo monle.” Ɛwɔkɛ boni a tɛla ɛhye a?

18 Kɛkala mɔɔ yɛzuzu asafo nu mgbanyima gyima mɔɔ bɛlɛ kɛ bɛnea asafo ne azo anwo la, ɔwɔ kɛ yɛbiza kɛ, Kɛ ɔkɛyɛ na mrenya ɛhye mɔ mɔɔ bɛkpa bɛ la anlea Gyisɛse mboane ne boɛ wɔ adenle mɔɔ fɛta la azo ɛ? Yɛbabua kpuyia ɛhye wɔ edwɛkɛ mɔɔ doa zo la anu.