Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Gyihova Ngakyelɛ Ne Mɔ Le Nɔhalɛ

Gyihova Ngakyelɛ Ne Mɔ Le Nɔhalɛ

‘Gyihova ngakyelɛ le nɔhalɛ, ɔmaa mɔɔ ɛnze nrɛlɛbɛ la nwu nrɛlɛbɛ.’EDW. 19:7.

1. Ninyɛne boni mɔ a Nyamenle menli ta sukoa nwolɛ debie a, na saa yɛsukoa ye bieko a kɛzi ɔboa yɛ ɛ?

ƆDWU mekɛ ne bie na yɛlɛsiezie yɛ nwo yɛamaa Ɛzinzalɛ Arane Debiezukoalɛ ne a yɛka yɛkile yɛ nwo kɛ, ‘Ɔyɛ me kɛ yɛzukoa deɛ ɛhye ɛlɛ la.’ Saa ɛrale Keleseɛnema asafo ne anu la yehyɛ ekyii a, bie a wɔyɛ ye nzonlɛ kɛ ɔvi mekɛ mɔɔ kɔ mekɛ la yɛsia yɛsuzu ninyɛne bie mɔ anwo. Nyamenle Belemgbunlililɛ ne, ɛkpɔnedeɛ ne, ɛdoavolɛyɛlɛ gyima ne, nee subane le kɛ ɛlɔlɛ nee diedi le sunsum nu aleɛ mɔɔ yɛdi ye dahuu a. Saa yɛsukoa ye bieko a, ɔmaa yɛ nwo yɛ se wɔ diedi ne anu na yɛdi folɛdulɛ ɛhye azo, “bɛmmabɛlɛbɛla bɛ nwo bɛyɛ mɔɔ asɛɛ bɛtie ye edwɛkɛ ne ala a; bɛyɛ mɔɔ bɛkɛde la.”Gye. 1:22.

2. (a) Wɔ Baebolo ne anu saa bɛka “ngakyelɛ” a, duzu a ɔta ɔkile a? (b) Ngakyile boni a wɔ Nyamenle ngakyelɛ nee menli ɛdeɛ nu a?

2 Wɔ Baebolo ne anu saa bɛka “ngakyelɛ” a, ɔta ɔkile mɛla anzɛɛ adehilelɛ. Gyihova mɛla nee ye adehilelɛ le nɔhalɛ dahuu, bɛnle kɛ sonla mɛla mɔɔ ɔyɛ a bɛyɛ nzenzaleɛ wɔ nu la. Ɔwɔ nuhua kɛ bɛvale mɛla bie mɔ bɛmanle wɔ mekɛ nee tɛnlabelɛ kpɔkyee bie mɔ anu ɛdeɛ, noko bɛtɛnwunle nvonleɛ bie wɔ nwo. Edwɛndovo ne hanle kɛ: “Wɔ mɛla [anzɛɛ “ngakyelɛ,” NW] ne mɔ le fɔɔnwo dahuu.”Edw. 119:144.

3, 4. (a) Gyihova ngakyelɛ ne bie kola yɛ duzu? (b) Saa Yizilayɛma diele a anrɛɛ kɛzi ɔbaboa bɛ ɛ?

3 Ɔdwu mekɛ ne bie a, Gyihova ngakyelɛ ne mɔ bie le kɔkɔbɔlɛ. Nyamenle ngapezoma bɔle Yizilayɛma kɔkɔ dahuu. Kɛ neazo la, ɔka ekyii Yizilayɛma dwu Ɛwɔkɛ Azɛlɛ ne azo la, Mosisi bɔle bɛ kɔkɔ kɛ: ‘Bɛnlea boɛ na bɛambɛlɛbɛla bɛ nwo, bɛandwe bɛ nwo bɛanvi Gyihova anwo bɛangɔnzonle awozonle. Bɛyɛ ye zɔhane a, Gyihova bava bɛ nwo ɛya.’ (Mɛla 11:16, 17) Baebolo ne maa yɛnwu kɛ Nyamenle vale  ngakyelɛ dɔɔnwo mɔɔ boa la manle ye menli.

4 Gyihova dule Yizilayɛma folɛ fane dɔɔnwo kɛ bɛzulo ye, bɛdie ɔ ne, na bɛde ye duma nwo. (Mɛla 4:29-31; 5:28, 29) Saa bɛlile ngakyelɛ ɛhye mɔ azo a, anrɛɛ bɛnyianle nyilalɛ dɔɔnwo.Sɛlɛ. 26:3-6; Mɛla 28:1-4.

MƆƆ YIZILAYƐMA YƐLE WƆ NYAMENLE NGAKYELƐ NE MƆ ANWO LA

5. Duzu ati a Gyihova honle manle Belemgbunli Hɛzikaya ɛ?

5 Mɔɔ Nyamenle nee Yizilayɛma lua la, ɔlile ye ɛwɔkɛ zo. Kɛ neazo la, mekɛ mɔɔ Aselea Belemgbunli Sɛnakɛlebe tetale Dwuda kɛ ɔtu Belemgbunli Hɛzikaya la, Gyihova luale anwumabɔvolɛ nwo zo boale ye. Kenle ko nɔɔzo, Nyamenle anwumabɔvolɛ ko hunle Aseleama “mgbanyima nee katakyiema kɔsɔɔti,” yemɔti Sɛnakɛlebe guale ye ɔ nzi. (2 Edk. 32:21; 2 Arl. 19:35) Duzu ati a Nyamenle honle manle Belemgbunli Hɛzikaya ɛ? ‘Hɛzikaya lile nɔhalɛ manle Gyihova, yeandu ye edwɛkɛ zo ɛlɛ. Ɔlile mɛla ne mɔ mɔɔ Gyihova vale manle la azo kpalɛ.’2 Arl. 18:1, 5, 6.

Gyihova ngakyelɛ manle Dwosaya honle manle nɔhalɛ ɛzonlenlɛ (Nea ɛdendɛkpunli 6)

6. Kɛzi Belemgbunli Dwosaya hilele kɛ ɔ rɛle wɔ Gyihova nu ɛ?

6 Menli mɔɔ lile Gyihova mɛla zo la anwo neazo bieko a le Belemgbunli Dwosaya. Mekɛ mɔɔ ɛnee yeli ɛvolɛ mɔtwɛ la, ɔbɔle ɔ bo “ɔyɛle mɔɔ sɔ [Gyihova] anye la. . . . Yeangyea ɔ nye yeangɔ fema anzɛɛ bɛne zo.” (2 Edk. 34:1, 2) Dwosaya luale ananze mɔɔ ɔbubule ye nee nɔhalɛ ɛzonlenlɛ mɔɔ ɔvale ɔziele ɛkɛ la azo ɔhilele kɛ ɔ rɛle wɔ Gyihova anu. Ɔlua ɛhye ati, Dwosaya nee ye menli ne kɔsɔɔti nyianle nyilalɛ.Bɛgenga 2 Edwɛkɛsisilɛ 34:31-33.

7. Yizilayɛma bule bɛ nye guale Gyihova ngakyelɛ ne mɔ azo la, duzu a zile a?

7 Noko ɔyɛ nyane kɛ Nyamenle menli ne anva bɛ rɛle anwula Gyihova ngakyelɛ ne mɔ anu dahuu la. Ɛnee bɛ adwenle ɛngya bɛ wɔ tieyɛ nee anzosesebɛyɛlɛ nwo. Mɔɔ bɛ diedi yɛle bɛtɛɛ la, bɛ tɛnlabelɛ yɛle kɛ mɔɔ ɛzoanvolɛ Pɔɔlo hanle nwolɛ edwɛkɛ la, “adalɛma fa bɛ ngilehilelɛ nee agyiba ne mɔ mɔɔ bɛfa bɛtwe menli bɛkɔ ɛtane nu la bɔ [bɛ] kɔ ba kɛ selɛkye nee anwoma la.” (Ɛfɛ. 4:13, 14) Na kɛmɔ bɛhanle bɛdole ɛkɛ ne la, saa bɛanva bɛ nwo bɛando Nyamenle ngakyelɛ ne mɔ azo a, bɛnwu amaneɛ.Sɛlɛ. 26:23-25; Gyɛ. 5:23-25.

8. Kɛzi yɛ tɛnlabelɛ ne nee Yizilayɛma ɛdeɛ ne le ko ɛ?

8 Kɛzi Yizilayɛma neazo ne bahola  aboa yɛ ɛ? Bɛtu Nyamenle menli mɔɔ wɔ ɛkɛ ɛnɛ la noko folɛ na bɛtenrɛdenrɛ bɛ. (2 Pita 1:12) Mekɛ biala mɔɔ yɛbagenga Nyamenle Edwɛkɛ ne la, ɔle ngakyelɛ ɔmaa yɛ. Yɛlɛ adenle yɛkpa mɔɔ yɛkulo yemɔti saa yɛkulo a yɛbali Gyihova adehilelɛ zo anzɛɛ yɛbayɛ mɔɔ yɛkulo la. (Mrɛ. 14:12) Bɛmaa yɛzuzu deɛmɔti ɔwɔ kɛ yɛfa yɛ nwo yɛto Gyihova ngakyelɛ ne mɔ azo nee kɛzi saa yɛdi zo a ɔbaboa yɛ la anwo.

BƐDIE NYAMENLE NA BƐNYIA NGOANE

9. Mɔɔ ɛnee Yizilayɛma lua ɛsɛlɛ ne azo la, kɛzi Gyihova manle bɛnwunle kɛ ɔ nee bɛ lua ɛ?

9 Mɔɔ Yizilayɛma bɔle bɛ ɛvolɛ 40 adendulɛ ne mɔɔ bɛdule ye “ɛsɛlɛ kpole anu ɛzulolɛ ne” anu abo la, Gyihova anga kɛzi ɔbahile bɛ adenle, ɔbabɔ bɛ nwo bane, na yeanlea bɛ la anwo edwɛkɛ dɔɔnwo yeangile bɛ ɛkɛ ne ala. Noko ɔmanle bɛnwunle kɛ bɛbahola bɛalie ye bali na bɛava bɛ nwo bɛado ye adehilelɛ zo. Gyihova luale amungu pila ne mɔɔ hilele bɛ adenle ewiazo nee senle pila ne mɔɔ hilele bɛ adenle nɔɔzo la azo ɔhakyele Yizilayɛma kɛ ɔ nee bɛ lua kɛmɔ ɔ nee bɛ luale wɔ adenle anu ɛzulolɛ ne anu la. (Mɛla 1:19; Ade. 40:36-38) Ɔmanle bɛ sa hanle ninyɛne mɔɔ bɛhyianle nwo la. “Bɛ ndanlɛ antete yɛɛ bɛ gyakɛ amkpomgba ɛlɛ.” Ɛhɛe, bɛ sa hanle “debie biala mɔɔ bɛhyianle nwolɛ la.”Nih. 9:19-21.

10. Kɛzi Gyihova ɛlɛkile ye menli adenle ɛnɛ ɛ?

10 Ɛnɛ, Nyamenle menli ɛdwu tenlene ewiade fofolɛ ne ɛweɛne zo. Asoo yɛlɛ anwodozo kɛ Gyihova bamaa yɛ sa aha mɔɔ yɛhyia nwo na yɛahola yɛapɛ ‘anwongyelelɛ kpole’ ne mɔɔ ɛlɛba la? (Mat. 24:21, 22; Edw. 119:40, 41) Gyihova ɛtɛmanle yɛ amungu anzɛɛ senle pila kɛ ɔli yɛ nyunlu yɛhɔ ewiade fofolɛ ne anu ɛdeɛ, noko ɔlɛdua ye ahyehyɛdeɛ ne azo yeaboa yɛ amaa yɛ nye ala ɛkɛ. Kɛ neazo la, bɛha ye fane dɔɔnwo bɛhile yɛ kɛ yɛlua bɛtianwo Baebolo ɛgengalɛ, nɔsolɛ Abusua Ɛzonlenlɛ, debiezukoalɛ nee daselɛlilɛ ɛhɔlɛ zo yɛbɔ yɛ sunsum nu gyinlabelɛ ne anwo bane. Asoo yɛyɛ nzenzaleɛ amaa yɛahola yɛali adehilelɛ ɛhye mɔ azo? Saa yɛyɛ zɔ a, yɛbanyia diedi ne mɔɔ ɔbava yɛ yeahɔ ewiade fofolɛ ne anu la.

Gyihova ngakyelɛ ne mɔ maa yɛdi yɛ Belemgbunlililɛ Asalo ne eni (Nea ɛdendɛkpunli 11)

11. Kɛzi Nyamenle maa yɛnwu kɛ ɔdwenle yɛ nwo ɛ?

11 Amaa yɛ nye ahɔ zo ala ɛkɛ wɔ sunsum nu la, bɛfa ɛbɛlabɔlɛ nwo adehilelɛ bɛmaa yɛ. Ɛhye anwo neazo a le nwonane afoa nu ninyɛne nwo adwenle kpalɛ mɔɔ yɛbanyia na adwenleadwenle ando yɛ baka nu la. Eza bɛva adɛladeɛ nee anwoziezielɛ, anyelielɛ ninyɛne nee nwomazukoalɛ nwo adehilelɛ bɛmaa yɛ. Akee suzu banebɔlɛ nwo ngakyelɛ mɔɔ yɛnyia ye wɔ yɛ awuke, kale, Belemgbunlililɛ Asalo nee esiane mekɛ nu la anwo. Folɛdulɛ ɛhye mɔ kile kɛ Nyamenle dwenle yɛ nwo.

NGAKYELƐ BOALE ALUMUA KELESEƐNEMA ƆMANLE BƐLILE NƆHALƐ

12. (a) Duzu a Gyisɛse hanle nwolɛ edwɛkɛ hilele ye ɛdoavolɛma ne fane dɔɔnwo a? (b) Mɛlɛbɛnwoaze nwo neazo boni a hanle Pita ahonle a, na kɛzi ɔwɔ kɛ ɔka yɛdayɛ noko ɛ?

12 Wɔ ɛvoya ne mɔɔ lumua la anu, ɛnee Nyamenle menli asa ka ngakyelɛ dahuu. Gyisɛse zele ye ɛdoavolɛma ne fane dɔɔnwo kɛ bɛbɛlɛ bɛ nwo aze. Noko, tɛ ɔ nloa anu ala a ɔhanle ye a, ɔyɛle nwolɛ neazo. Kenle mɔɔ aleɛ kye a Gyisɛse bawu la, ɔboɔboale ye ɛzoanvolɛma ne anloa ɔ nee bɛ lile Akpabɛnwo ne. Mɔɔ Gyisɛse ɛzoanvolɛma ne de aleɛ ne anwo la, ɔdwazole ɔvile nwo ɔwowole bɛ gyakɛ anwo. Ɛhye le gyima mɔɔ sonvolɛma a ta yɛ a. (Dwɔn 13:1-17) Mɛlɛbɛnwoaze nyɛleɛ ɛhye hanle bɛ ahonle.  Wɔ ɛvolɛ 30 anzi, ɛzoanvolɛ Pita mɔɔ ɛnee wɔ aleɛlilɛ ne abo la dule ɔ gɔnwo mɔ diedima folɛ kɛ bɛbɛlɛ bɛ nwo aze. (1 Pita 5:5) Ɔwɔ kɛ Gyisɛse neazo ne maa yɛ kɔsɔɔti yɛbɛlɛ yɛ nwo aze.Fel. 2:5-8.

13. Subane mɔɔ anwo hyia la boni a Gyisɛse hakyele ye ɛdoavolɛma kɛ bɛnyia a?

13 Gyisɛse hanle diedi kpole mɔɔ ɔwɔ kɛ ye ɛdoavolɛma nyia la noko anwo edwɛkɛ dɔɔnwo. Mekɛ bie mɔɔ ɛdoavolɛma ne angola andu sunsum ɛtane bie mɔɔ ɛnee wɔ kakula nrenya bie anwo la, bɛbizale Gyisɛse kɛ: “Duzu ati a yɛangola sunsum ɛtane ne tu a?” Gyisɛse buale bɛ kɛ: “Ɔluakɛ bɛ diedi le ekyi la ati ɔ. Nɔhalɛ, meka meahile bɛ kɛ, saa bɛ diedi ne kpole le kɛ ‘mɛsetade’ ma kunlu ma ekyi bie bɔbɔ a, anrɛɛ . . . debie biala ɛyɛlɛ ɛnrɛyɛ se ɛnrɛmaa bɛ.” (Mat. 17:14-20) Wɔ Gyisɛse ɛzonlenlɛ gyima ne anu, ɔmanle ye ɛdoavolɛma ne nwunle kɛ diedi nwo hyia. (Bɛgenga Mateyu 21:18-22.) Asoo yɛlɛdua maangyeba nee maanzinli nyianu, yɛɛ debiezukoalɛ ɛhɔlɛ zo yɛamia yɛ diedi ne anu ɔ? Ayia ɛhye mɔ ɛmmaa yɛ nye ɛnlie ala; bɛmaa yɛda ye ali kɛ yɛ rɛle wɔ Gyihova anu.

14. Duzu ati a ɔwɔ kɛ yɛnyia Kelaese ɛlɔlɛ ne bie ɛnɛ ɛ?

14 Ngakyelɛ mɔɔ ɔbamaa yɛanyia ɛlɔlɛ yɛamaa yɛ nwo la wɔ Keleseɛnema Giliki Ngɛlɛlera ne anu. Gyisɛse hanle kɛ mɛla mɔɔ ɔtɔ zo nwiɔ la a le ɛhye: “Kulo ɛ gɔnwo kɛ ɛdawɔ ɛ nwo.” (Mat. 22:39) Gyisɛse adiema Gyemise vɛlɛle ɛlɔlɛ kɛ ‘mɛla titile ne.’ (Gye. 2:8) Ɛzoanvolɛ Dwɔn hɛlɛle kɛ: “Ayi mɔ, mengɛlɛ mɛla fofolɛ biala membɛlɛ bɛ; dɛba ko ne ala mɔɔ mɔlebɛbo ne bɛnyianle ye la a melɛ melɛbɛlɛ bɛ a.” (1 Dwɔn 2:7, 8) Duzu a Dwɔn vɛlɛle ye “mɛla dɛba” la? Ɛnee ɔlɛka mɛla ne mɔɔ ɔse bɛhulo bɛ nwo ngoko la anwo edwɛkɛ. Ɔle “dɛba” ɔluakɛ ɛnee Gyisɛse ɛha nwolɛ edwɛkɛ wɔ “mɔlebɛbo ne.” Noko ɛnee eza ɔle “fofolɛ” ɔluakɛ ɔle tunwomaa ɛlɔlɛ mɔɔ saa ɛdoavolɛma ne kɔ tɛnlabelɛ fofolɛ nu a bɛbahyia nwo a. Kɛ Kelaese ɛdoavolɛma la, asoo yɛ nye ɛnlie kɔkɔbɔlɛ mɔɔ boa maa yɛnea boɛ wɔ ewiade subane ne mɔɔ maa menli yɛ angomedi na bɛminli ɛlɔlɛ mɔɔ bɛlɛ bɛmaa bɛ gɔnwo mɔ la anwo ɔ?

15. Gyima titile boni a Gyisɛse rayɛle ye wɔ azɛlɛ ye azo a?

15 Ɛnee Gyisɛse anye die menli nwo. Yɛnwunle kɛzi ɔdwenle menli nwo la wɔ mekɛ mɔɔ ɔyɛle wuleravolɛma ayile na ɔdwazole mɔwuamra la. Noko akee, ɛnee tɛ Gyisɛse gyima titile a le kɛ ɔba yearayɛ menli ayile. Ye edwɛkɛhanlɛ nee ngilehilelɛ gyima ne boale menli kpalɛ. Kɛzi? Kɛ neazo la, menli mɔɔ Gyisɛse  yɛle bɛ ayile nee bɛdabɛ mɔɔ ɔdwazole bɛ wɔ ɛvoya ne mɔɔ ɔlumua anu la yɛle mgbanyinli na bɛwule, noko menli mɔɔ diele ye edwɛkɛ ne la banyia ngoane mɔɔ ɛnlɛ awieleɛ.Dwɔn 11:25, 26.

16. Kɛzi bɛyɛ Belemgbunlililɛ edwɛkɛhanlɛ nee ɛdoavolɛyɛlɛ gyima ne ɛnɛ ɛ?

16 Ɛnɛ, bɛlɛyɛ edwɛkɛhanlɛ gyima ne mɔɔ Gyisɛse bɔle ɔ bo wɔ ɛvoya ne mɔɔ lumua anu la kpole. Gyisɛse zele ye ɛdoavolɛma kɛ: “Bɛhɔ maanle ti nee maanle bo, bɛmaa menli ɛrayɛ me ɛdoavolɛma.” (Mat. 28:19) Nɔhalɛ nu, bɛyɛle, na yɛdayɛ noko yɛlɛyɛ! Gyihova Alasevolɛ mɔɔ bɛbo mgbe nsuu mɔɔ bɛbɔ mɔdenle la ɛlɛbɔ Nyamenle Belemgbunlililɛ ne nolo wɔ maanle mɔɔ bo 230 la azo, na Alasevolɛ ne mɔ nee menli dɔɔnwo sukoa Baebolo ne dahuu. Edwɛkɛhanlɛ gyima ɛhye di daselɛ kɛ yɛwɔ awieleɛ mekɛ ne anu.

BƐVA BƐ RƐLE BƐWULA GYIHOVA ANU ƐNƐ

17. Duzu folɛ a Pɔɔlo nee Pita dule a?

17 Ɔda ali kɛ, ngakyelɛ boale Keleseɛnema mɔɔ bɛlumua la ɔmanle bɛgyinlanle kpundii wɔ diedi ne anu. Nea anwosesebɛmanlɛ mɔɔ Temɔte nyianle wɔ mekɛ mɔɔ ɛzoanvolɛ Pɔɔlo mɔɔ ɛnee la efiade wɔ Wulomu hanle edwɛkɛ ɛhye hilele ye la: “Sɔ nɔhalɛ ne mɔɔ ɛdele ɛvile me ɛkɛ ne la anu boɛ.” (2 Tem. 1:13) Mɔɔ Pita dule ɔ gɔnwo mɔ Keleseɛnema folɛ wɔ kpundii ɛgyinlanlɛ, mediema ɛyɛlɛ, nee bɛ nwo zo ɛhomolɛ nwo wiele la, ɔhanle kɛ: “Meyɛ me adwenle kɛ dahuu mebahakyehakye bɛ wɔ ninyɛne ɛhye mɔ anwo, noko meze kɛ bɛze bɛ dɛba na bɛ ti ɛmi nɔhalɛ ne mɔɔ bɛnyia ye la anu kpalɛ.”2 Pita 1:5-8, 12.

18. Kɛzi ɛvoya ne mɔɔ lumua la anu Keleseɛnema bule ngakyelɛ ɛ?

18 Ɛhɛe, edwɛkɛ mɔɔ ɛnee “Nyamenle kpɔmanvolɛma nwuanzanwuanza ne mɔ ɛha ɛdo ɛkɛ” la, yɛɛ ɛnee wɔ ngɛlata ne mɔ mɔɔ Pɔɔlo nee Pita hɛlɛle la anu a. (2 Pita 3:2) Yɛ mediema mɔɔ ɛnee wɔ ɛkɛ wɔ ɛvoya ne mɔɔ lumua anu la vale ɛya wɔ adehilelɛ ɛhye anwo ɔ? Kyɛkyɛ, ɔboalekɛ ɔle Nyamenle ɛlɔlɛ mɔɔ ɔlale ye ali, ɔmanle ‘bɛhɔle zolɛ bɛnyinle wɔ yɛ Awulae nee Dievolɛ Gyisɛse Kelaese anwo nrɛlɛbɛ nee ɛlolɛ ne anu a.’2 Pita 3:18.

19, 20. Duzu ati a ɔwɔ kɛ yɛfa yɛ nwo yɛto Gyihova ngakyelɛ ne mɔ azo ɛ, na saa yɛyɛ zɔ a kɛzi ɔboa yɛ ɛ?

19 Ɛnɛ, ninyɛne dɔɔnwo wɔ Gyihova Edwɛkɛ Baebolo ne mɔɔ ɔdi munli la anu mɔɔ ɔmaa yɛfa yɛ nwo yɛto ye ngakyelɛ ne mɔ azo a. (Bɛgenga Dwɔhyua 23:14.) Yɛnwu kɛzi Nyamenle nee menli mɔɔ ɛnli munli luale wɔ ɛvolɛ dɔɔnwo anu la wɔ nu. Bɛhɛlɛ tetedwɛkɛ ɛhye bɛdo ɛkɛ amaa yeaboa yɛ. (Wulo. 15:4; 1 Kɔl. 10:11) Yɛnwu Baebolo ngapezo mɔɔ ɛra nu la. Yɛbahola yɛava ngapezo yɛado ngakyelɛ mɔɔ bɛha bɛdo ɛkɛ la anwo. Kɛ neazo la, menli dɔɔnwo ɛra Gyihova ɛzonlenlɛ ne anu kɛmɔ bɛhanle bɛdole ɛkɛ ne kɛ ɔbara wɔ “mekɛ ne mɔɔ li awieleɛ” anu la. (Aye. 2:2, 3) Ewiade ne mɔɔ nuhua ɛlɛyɛ se dɔɔnwo la, noko le Baebolo ngapezo mɔɔ ɛlɛba nu. Na kɛmɔ yɛhanle la, edwɛkɛhanlɛ gyima ne mɔɔ bɛlɛyɛ ye wɔ ewiade amuala la noko le Gyisɛse edwɛkɛ mɔɔ ɛlɛba nu.Mat. 24:14.

20 Yɛ Bɔvolɛ ne ɛla subane mɔɔ bamaa yɛava yɛ rɛle yɛawula ye nu la ali. Asoo yɛlɛnyia zolɛ nvasoɛ? Ɔwɔ kɛ yɛdie ye ngakyelɛ ne mɔ yɛdi. Zɔhane a Rosellen yɛle a. Ɔka kɛ: “Mekɛ mɔɔ melɛfa me rɛle meawula Gyihova anu bɔkɔɔ la, ɛnee melɛnwu kɛzi ɔkulo me na ɔmaa me anwosesebɛmanlɛ ne wienyi.” Bɛmaa yɛdayɛ noko yɛli Gyihova ngakyelɛ ne mɔ azo na ɔboa yɛ.