Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Asoo Wɔhakyi?

Asoo Wɔhakyi?

“Bɛmaa Nyamenle ɛhakyi bɛ adwenle bɔkɔɔ.”WULO. 12:2.

1, 2. Kɛzi ndetelɛ mɔɔ yɛnyianle nee menli mɔɔ yɛ nee bɛ de la kola nyia yɛ nwo zo tumi ɛ?

ƐLEKA mɔɔ bɛtetele yɛ nee ndetelɛ mɔɔ yɛnyianle la kola nyia yɛ nwo zo tumi. Awie biala lɛ kɛzi ɔsiezie ɔ nwo; aleɛ mɔɔ ɔkulo; kɛzi ɔyɛ ye debie. Kɛmɔti ɛ? Bie vi menli mɔɔ yɛ nee bɛ de nee tɛnlabelɛ mɔɔ yɛ wɔ nu la.

2 Noko akee, ninyɛne bie mɔ anwo hyia tɛla aleɛ mɔɔ yɛkulo nee kɛzi yɛsiezie yɛ nwo la. Kɛ neazo la, bɛtete yɛ mɔɔ saa yɛnwu ninyɛne bie mɔ a yɛdie yɛto nu noko yɛnwu bie mɔ a yɛnlie yɛndo nu. Asolo awie biala kpɔkɛzilɛ wɔ ninyɛne ɛhye mɔ anwo. Yɛ kpɔkɛzilɛ kola maa kɛzi yɛtete yɛ adwenle ne bɔbɔ la da ali. Baebolo ne ka kɛ, mekɛ dɔɔnwo ne ala ‘bɛdabɛ mɔɔ bɛnle Dwuuma la ɛnlɛ Mosisi mɛla ne suzuamgba ɛdeɛ, noko bɛyɛ mɔɔ mɛla ne se la bie.’ (Wulo. 2:14) Noko asoo ɛhye kile kɛ saa Nyamenle ɛtɛdile mɛla fɔɔnwo wɔ debie bie anwo a, yɛbahola yɛali ngyinlazo mɔɔ menli mɔɔ wɔ ɛleka mɔɔ yɛwɔ la fa di gyima la azo ɔ?

3. Ninyɛne nwiɔ boni ati a Keleseɛnema ɛndwazo ala ɛnyɛ mɔɔ menli dɔɔnwo yɛ la bie ɛ?

3 Yeanyɛ boɛ fee la, ninyɛne nwiɔ mɔɔ nwolɛ hyia la ati a Keleseɛnema ɛnyɛ zɔ a. Mɔɔ ɔlumua, Baebolo ne bɔ yɛ kɔkɔ kɛ: “Adenle bie wɔ ɛkɛ ne a ɔle kpalɛ wɔ sonla nye zo, na ye awieleɛ wie ewule.” (Mrɛ. 16:25) Kɛmɔ yɛnli munli la ati, tɛ mekɛ ne amuala a yɛbanwu ninyɛne mɔɔ le kpalɛ la na yɛayɛ a. (Mrɛ. 28:26; Gyɛ. 10:23) Mɔɔ ɔtɔ zo nwiɔ, Baebolo ne ka kɛ subane nee ngyinlazo mɔɔ ewiade ne fa di gyima la vi Seetan, “ewiade ɛhye nyamenle ne.” (2 Kɔl. 4:4; 1 Dwɔn 5:19) Zɔhane ati, saa yɛkpondɛ kɛ Gyihova die yɛ to nu na ɔyila yɛ a, ɔwɔ kɛ yɛfa folɛdulɛ ne mɔɔ ɔwɔ Wulomuma 12:2 la yɛdi gyima.Bɛgenga.

4. Duzu a yɛbazuzu nwo wɔ edwɛkɛ ɛhye anu a?

 4 Edwɛkɛ dɔɔnwo mɔɔ nwolɛ hyia la wɔ Wulomuma 12:2 mɔɔ ɔwɔ kɛ yɛsuzu nwolɛ kpalɛ a. (1) Kɛmɔti a ɔhyia kɛ ‘yɛkakyi ɛ’? (2) Duzu a ɛhakyilɛ kile a? na (3) Kɛ ɔkɛyɛ na yɛahakyi ɛ? Bɛmaa yɛzuzu kpuyia nsa ɛhye mɔ anwo.

KƐMƆTI A ƆWƆ KƐ YƐKAKYI Ɛ?

5. Nwane mɔ a ɛnee Pɔɔlo edwɛkɛ ne mɔɔ wɔ Wulomuma 12:2 la fane bɛ nwo titile a?

5 Tɛ menli mɔɔ ɛnle diedima la yɛɛ Pɔɔlo hɛlɛle edwɛkɛ ne mɔɔ wɔ Wulomuma kɛlata ne anu la hɔmanle bɛ a. Ɔhɛlɛle ɔhɔmanle ɔ gɔnwo mɔ Keleseɛnema mɔɔ bɛkpokpa bɛ la. (Wulo. 1:7) Ɔdule bɛ folɛ kɛ bɛhakyi na “bɛmmamaa ewiade amaamuo di bɛ adwenle.” Wɔ Keleseɛnema mɔɔ ɛnee de Wulomu wɔ ɛvolɛ 56 Y.M. mekɛ zo, ɛnee “ewiade” ninyɛne ne bie a le ngyinlazo, amaamuo, nyɛleɛ nee ndenle mɔɔ Wulomu maanle ne fa di gyima la. Edwɛkɛkpɔkɛ “bɛmmamaa” mɔɔ Pɔɔlo vale lile gyima la kile kɛ ɛnee bie mɔ ɛmaa zɔhane ewiade ne ɛli bɛ adwenle. Kɛzi ɔlile yɛ mediema zɔhane mɔ adwenle ɛ?

6, 7. Wɔ Pɔɔlo mekɛ zo, kɛzi ɛbɛlabɔlɛ nee ɛzonlenlɛ mɔɔ hɔle zo wɔ Wulomu la gyegyele Keleseɛnema ɛ?

6 Ɛnɛ, saa nyɛvolɛ kɔ Wulomu kɛ bɛkanleɛnlea ɛkɛ a, mɔɔ bɛnwu ye la a le ɛzonlenlɛ sua, nla, ngakyedeɛ, nee nwɔhoalilɛleka mɔɔ ɛbubu. Bɛyɛle bie mɔ wɔ ɛvoya ne mɔɔ ɔlumua la anu. Ninyɛne ɛhye mɔ maa yɛnwu tete Wulomuma ɛbɛlabɔlɛ nee bɛ ɛzonlenlɛ. Nwɔhoa mɔɔ esiane wɔ nu, mgbɔnwɔ ɛnriandilɛ, yɛkile nee edwɛne mɔɔ nuhua dɔɔnwo kanvo ɛbɛla ɛtane la noko anwo edwɛkɛ wɔ tete mbuluku dɔɔnwo anu. Ɛnee gualilɛ noko kɔ zo wɔ Wulomu, yemɔti ɛnee ndenle dɔɔnwo wɔ ɛkɛ mɔɔ menli kola dua zo nyia bɛ nwo a.Wulo. 6:21; 1 Pita 4:3, 4.

7 Ɔnva nwo kɛ ɛnee ɛzonlenlɛ azua nee nyamenle dɔɔnwo wɔ Wulomu la, debie biala ɛngile kɛ Wulomuma nee bɛ nyamenle ne mɔ nyianle agɔnwolɛvalɛ kpaziwɔkɛ bie. Amaamuo yɛɛ ɛnee le bɛ ɛzonlenlɛ titile a—awolɛ kenle ɛlilɛ, agyalɛ, nee ɛzɛne ɛyɛlɛ—le ninyɛne mɔɔ ɛnee bɛta bɛyɛ. Ɛbahola wɔanwu kɛzi ɛhye gyegyele Wulomu Keleseɛnema ne la. Bie mɔ vale bɛ nwo wulale ninyɛne ɛhye mɔ bie anu, yemɔti ɔda ali kɛ ɛnee ɔwɔ kɛ bɛkakyi bɛ adwenle na bɛahola bɛayɛ nɔhalɛ Keleseɛnema, na ɛnee adwenle ɛhakyilɛ ɛhye badoa zo wɔ bɛ ɛzɔnenlɛ ne anzi.

8. Duzu ati a ewiade ne kola yɛ ɛleka mɔɔ esiane wɔ maa Keleseɛnema ɛnɛ ɛ?

8 Kɛmɔ ɛnee ɔde ye wɔ Wulomu maanle ne anu la, ɛnɛ noko ewiade ne le ɛleka mɔɔ esiane wɔ maa Keleseɛnema mɔɔ bɛyila bɛ nwo zo la. Duzu  ati ɔ? Ɔboalekɛ ewiade sunsum ne da ali wɔ ndenle dɔɔnwo azo. (Bɛgenga Ɛfɛsɛsema 2:2, 3; 1 Dwɔn 2:16.) Atiakunluwɔzo, nzuzulɛ, ngyinlazo nee ɛbɛlabɔlɛ mɔɔ kɔ zo alehyenlɛ biala wɔ ewiade ye anu la bahola anyia yɛ nwo zo tumi. Yemɔti, ndelebɛbo wɔ nu kɛ yɛbali Baebolo folɛdulɛ ɛhye azo, “bɛmmamaa ewiade amaamuo di bɛ adwenle. Bɛmaa Nyamenle ɛhakyi bɛ.” Duzu a ɔwɔ kɛ yɛyɛ a?

DUZU A ƆHYIA KƐ YƐKAKYI WƆ NWO A?

9. Nzenzaleɛ boni a menli dɔɔnwo yɛle na bɛafɛta bɛamaa ɛzɔnenlɛ a?

9 Saa awie ɛlɛsukoa Baebolo ne na ɔfa mɔɔ ɔkɛzukoa la ɔbɔ ye ɛbɛla a, ɔnyia anyuhɔlɛ wɔ sunsum nu. Ɔtwe ɔ nwo ɔfi adalɛ ɛzonlenlɛ nee ɛbɛla ɛtane biala anwo na ɔsukoa Kelaese. (Ɛfɛ. 4:22-24) Ɔyɛ yɛ fɛ kɛ yɛnwu kɛ menli dɔɔnwo yɛ zɔ ɛvolɛ biala na bɛfɛta bɛmaa ɛzɔnenlɛ bɛfa bɛyɛ bɛ nwo zo mɔɔ bɛyila bɛmaa Gyihova Nyamenle anwo sɛkɛlɛneɛ la. Nɔhalɛ, ɛhye maa Gyihova anye die. (Mrɛ. 27:11) Noko akee, ɔwɔ kɛ yɛbiza yɛ nwo kɛ: Asoo nzenzaleɛ ɛhye ala a ɔwɔ kɛ meyɛ a?

Ɔwɔ kɛ menli dɔɔnwo twe bɛ nwo fi Seetan ewiade ne anwo na bɛkakyi bɛ adwenle (Nea ɛdendɛkpunli 9)

10. Kɛmɔti a ɛhakyilɛ kɔ moa tɛla anyuhɔlɛ ɛnyianlɛ ɛ?

10 Ɛhakyilɛ kɔ moa tɛla anyuhɔlɛ ɛnyianlɛ. Buluku bie mɔɔ ɔkile Baebolo nu edwɛkɛ agbɔkɛ bo la ka kɛ edwɛkɛ mɔɔ bɛhile ɔ bo “bɛmaa Nyamenle ɛhakyi bɛ” wɔ Wulomuma 12:2 la kile kɛ yɛmaa sunsum nwuanzanwuanza ne ayɛ yɛ adwenle ne fofolɛ. Ɛhye ati, tɛ ninyɛne mɔɔ Keleseɛnenli yɛ fa kile kɛ yehakyi la ala a le kɛ ɔbagyakyi nyɛleɛ ɛtane, ɛdendɛlɛ evinli, nee ɛbɛla ɛtane ɛbɔlɛ. Menli mɔɔ ɛnze Baebolo ne anu la bie mɔ bɔbɔ bɔ mɔdenle kɛ bɛnrɛyɛ ninyɛne ɛhye mɔ. Yemɔti, duzu a boka Keleseɛnema ɛhakyilɛ ne anwo a?

11. Pɔɔlo hilele kɛ adenle boni a awie kola dua zo kakyi a?

11 Pɔɔlo hɛlɛle kɛ: “Bɛmaa Nyamenle ɛhakyi bɛ adwenle bɔkɔɔ.” Yɛ “adwenle” a yɛfa yɛsuzu edwɛkɛ nwo a. Noko wɔ Baebolo ne anu, eza ɔkile adwenle mɔɔ yɛlɛ, yɛ nyɛleɛ, nee kɛzi yɛfa yɛ adwenle yɛdi gyima la. Wɔ Pɔɔlo kɛlata ne mɔɔ ɔhɛlɛle Wulomuma ne la mɔlebɛbo, ɔhanle kɛ menli bie mɔ lɛ ‘adwenle mɔɔ ɛkpɔlɔ.’ Menli ɛhye mɔ yɛ “ninyɛne mɔɔ le kɛ amumuyɛ, asiayɛ, anyebolo, ngunzi, nungule, kɔdiawu, konle, adalɛ,” nee ninyɛndane gyɛne. (Wulo. 1:28-31) Zɔhane ati, yɛkola yɛnwu deɛmɔti Pɔɔlo dule menli mɔɔ bɛtetele bɛ wɔ ɛleka zɛhae na bɛrayɛ Nyamenle azonvolɛ folɛ kɛ “bɛmaa Nyamenle ɛhakyi bɛ adwenle bɔkɔɔ” la.

‘Bɛye ɛkpɔlɛ nee ɛya biala bɛgua. Bɛmmadi butule anzɛɛ bɛmmayɛ aholoba.’Ɛfɛ. 4:31

12. Adwenle boni a ɛnwu kɛ menli mɔɔ bɛwɔ ɛkɛ ɛnɛ la dɔɔnwo lɛ a, na kɛzi ɛhye kola yɛ esiane maa Keleseɛnema ɛ?

12 Ɔyɛ nyane kɛ menli mɔɔ bɛle kɛ bɛdabɛ mɔɔ Pɔɔlo hanle bɛ nwo  edwɛkɛ la yɛɛ ɛbɔ yɛ ɛyia a. Bie a bɛ adwenle se bɛ kɛ menli mɔɔ anye ɛtɛbukɛle anzɛɛ le kyengye la a fa ngyinlazo yɛ gyima a. Kilehilevolɛma nee awovolɛ dɔɔnwo si “atianwolilɛ” adua. Menli ɛhye mɔ die di kɛ adenle biala ɛnle ɛkɛ mɔɔ bɛbahola bɛalua zo bɛanwu mɔɔ ɔle kpalɛ nee mɔɔ ɔle ɛtane a. Bɛdabɛ mɔɔ bɛkɔ asɔne bɔbɔ la, te nganeɛ kɛ bɛkola bɛyɛ mɔɔ bɛkulo, ɔngyia kɛ bɛkɛdie Nyamenle anzɛɛ bɛkɛli ye mɛla zo. (Edw. 14:1) Subane zɛhae bahola ayɛ esiane amaa nɔhalɛ Keleseɛnema. Awie mɔɔ anye ɛnla ɛkɛ la bahola anyia adwenle ɛhye bie wɔ teokelase ngyehyɛleɛ nwo. Bie a bɛnrɛlie asafo adehilelɛ bɛnrɛdo nu anzɛɛ bɛbadendɛ bɛ nzo abo wɔ ninyɛne mɔɔ bɛngulo la anwo. Anzɛɛ bɛnlie folɛdulɛ mɔɔ gyi Baebolo ne azo mɔɔ ɔfane anyelielɛ ninyɛne, Intanɛte, nee nwoma kpole ɛzukoalɛ nwo la bɛndo nu kpalɛ.

13. Duzu ati a ɔwɔ kɛ yɛneɛnlea yɛ nwo nu kpalɛ ɛ?

13 Amaa yɛanli ewiade ninyɛne nzi bieko la, ɔwɔ kɛ yɛneɛnlea yɛ ahonle, yɛ nganeɛdelɛ, yɛ bodane nee yɛ ɛbɛlabɔlɛ nu kpalɛ. Bie a awie mɔ ɛnrɛnwu kɛzi yɛde la kpalɛ yemɔti bɛbahanvo yɛ kɛ yɛlɛyɛ deɛ. Noko saa yɛlɛmaa mɔɔ yɛsukoa ye Baebolo ne anu la ahakyi yɛ ɛbɛlabɔlɛ amgba a yɛdayɛ ngome a yɛze a.Bɛgenga Gyemise 1:23-25.

KƐZI YƐKAKYI LA

14. Duzu a bamaa yɛanwu nzenzaleɛ mɔɔ ɔwɔ kɛ yɛyɛ la ɛ?

14 Saa yɛbahola yɛahakyi a, kyesɛ yɛkakyi ninyɛne mɔɔ wɔ yɛ ahonle nu la. Duzu a baboa yɛ na yɛahakyi a? Saa yɛsukoa Baebolo ne a ɔmaa yɛnwu mɔɔ Gyihova kpondɛ kɛ yɛyɛ la. Mɔɔ yɛbayɛ ye wɔ mɔɔ yɛbazukoa anwo la bamaa yɛanwu mɔɔ wɔ yɛ ahonle nu la. Ɛhye bamaa yɛanwu nzenzaleɛ mɔɔ ɔwɔ kɛ yɛyɛ na yɛayɛ “Nyamenle ɛhulolɛdeɛ kpalɛ ne.”Wulo. 12:2; Hib. 4:12.

15. Saa Gyihova nwo yɛ a nzenzaleɛ boni a yɛbayɛ a?

15 Bɛgenga Ayezaya 64:8. Ɛzukoalɛdeɛ mɔɔ nwolɛ hyia la wɔ ndonwo ne mɔɔ ngapezonli Ayezaya vale lile gyima la anu. Yɛle ndɛtɛlɛ, yɛɛ Gyihova le Nwovolɛ, yemɔti kɛzi ɔnwo yɛ ɛ? Ɔngakyi yɛ sonlabaka ne. Gyihova tete yɛ wɔ sunsum nu, ɔntete yɛ wɔ nwonane nu. Saa yɛmaa adenle ɔnwo yɛ a, yɛbavi yɛ ahonle nu yɛayɛ nzenzaleɛ, yɛbamaa yeaboa yɛ yɛahakyi kɛzi yɛte nganeɛ nee kɛzi yɛsuzu edwɛkɛ nwo la. Sunsum nu ndetelɛ yɛɛ yɛhyia nwo na yɛahola yɛali ewiade ne azo konim a. Kɛzi ɔnwo yɛ ɛ?

16, 17. (a) Kilehile mɔɔ nwovolɛ yɛ ndɛtɛlɛ mɔɔ ɔkulo kɛ ɔfa ɔnwo debie kɛnlɛma la anu. (b) Kɛzi Nyamenle Edwɛkɛ ne boa yɛ maa yɛkakyi yɛyɛ debie kɛnlɛma wɔ Gyihova anye zo ɛ?

16 Nwovolɛ bahola anwo buakɛ kɛnlɛma a, kyesɛ ɔfa ndɛtɛlɛ kɛnlɛma ɔnwo. Noko ninyɛne nwiɔ wɔ ɛkɛ mɔɔ ɔwɔ kɛ ɔyɛ a. Mɔɔ ɔlumua la, ɔwɔ kɛ ɔfa nzule ɔwowo evinli biala mɔɔ wɔ ndɛtɛlɛ ne anu la. Akee, ɔbava nzule ekyi yeafonla ndɛtɛlɛ ne amaa saa ɔnwo deɛ ne a yeayɛ boɛ.

17 Yɛ ye nzonlɛ kɛ bɛfa nzule bɛdi gyima fane nwiɔ, bɛfa bɛwowo evinli mɔɔ wɔ ndɛtɛlɛ ne anu la yɛɛ bɛfa bɛfɔtɔ ndɛtɛlɛ ne amaa bɛahola bɛava bɛanwo deɛ ne mɔɔ bɛkpondɛ kɛ bɛnwo la. Asoo yɛnwu kɛzi Nyamenle Edwɛkɛ ne di gyima zɛhae bie wɔ yɛ ɛbɛlabɔlɛ nu la? Ɔkola ɔmaa yɛtwe yɛ nwo yɛfi ninyɛne mɔɔ yɛnze Nyamenle la yɛyɛle la anwo na yɛyɛ ninyɛne  mɔɔ sɔ ɔ nye la. (Ɛfɛ. 5:26) Bɛhakye yɛ fane dɔɔnwo kɛ yɛgenga Baebolo ne alehyenlɛ biala na yɛhɔ debiezukoalɛ, ɛleka mɔɔ bɛsukoa Nyamenle Edwɛkɛ ne la. Duzu ati a bɛtu yɛ folɛ kɛ yɛyɛ ninyɛne ɛhye mɔ ɛ? Ɔboalekɛ saa yɛyɛ zɔ a, ɛnee yɛlɛmaa Gyihova anwo yɛ.Edw. 1:2; Gyi. 17:11; Hib. 10:24, 25.

Saa ɛkakyi wɔ adwenle a ɛbahola wɔali ngyegyelɛ nwo gyima wɔ adenle kpalɛ zo wɔadɛla dɛba ne (Nea ɛdendɛkpunli 18)

18. (a) Duzu ati a saa yɛkpondɛ kɛ Nyamenle Edwɛkɛ ne maa yɛkakyi a, ɛnee ɔwɔ kɛ yɛdwenledwenle nwo ɛ? (b) Kpuyia boni mɔ a bahola aboa yɛ a?

18 Baebolo ne mɔɔ yɛbagenga ye dahuu nee ye ɛzukoalɛ le anwosesebɛ mɔɔ Nyamenle Edwɛkɛ ne bamaa yɛanyia yɛahakyi la mɔlebɛbo ala. Ɔyɛ a menli dɔɔnwo kenga Baebolo ne foa bie yemɔti bɛnwu nuhua edwɛkɛ ne ekyi. Bie a wɔyia menli ɛhye mɔ bie wɔ daselɛlilɛ nu ɛlɛ. Bie mɔ bɔbɔ kola kakye Baebolo ne anu edwɛkɛ bie bɛka. * Noko akee, bɛndwenle nwo bɛngɔ moa yɛɛ bɛnva bɛmbɔ bɛ ɛbɛla. Kɛmɔti ɛ? Saa Nyamenle Edwɛkɛ ne bahola amaa awie ahakyi a, kyesɛ ɔmaa ɔka ye ahonle. Na saa yɛbahola yɛayɛ ɛhye a, ɛnee ɔhyia kɛ yɛdwenledwenle mɔɔ yɛsukoa ye wɔ Baebolo ne anu la anwo. Ɔwɔ kɛ yɛbiza yɛ nwo kɛ: ‘Asoo mete ɔ bo kɛ ɛhye ɛnle asɔne bie ngilehilelɛ ala? Asoo metɛnwunle kɛ ɛhye a le nɔhalɛ ne a? Bieko, asoo mefa mɔɔ mesukoa la mebɔ me ɛbɛla anzɛɛ mefa mekilehile ala? Asoo medie medi kɛ Gyihova yɛɛ ɛlɛtendɛ ahile me a?’ Saa yɛdwenledwenle kpuyia zɛhae mɔ anwo a ɔbamaa yɛahwe yɛabikye Gyihova. Mɔɔ yɛkɛzukoa la ka yɛ ahonle a, ɔbamaa yɛayɛ nzenzaleɛ wɔ yɛ ɛbɛlabɔlɛ nu na Nyamenle anye balie yɛ nwo.Gyɛ. 17:9; Luku 6:45.

19, 20. Baebolo folɛdulɛ boni a saa yɛdi zo a ɔbaboa yɛ a?

19 Saa yɛkenga Nyamenle Edwɛkɛ ne dahuu na yɛdwenledwenle nwo a, ɔbamaa yɛadoa zo yɛayɛ mɔɔ bie a yɛlɛyɛ la: “Bɛye bɛ su dɛba ne nee ye nyɛleɛ ne mɔ wɔ bɛ nu bɛgua. Bɛva su fofolɛ ne, mɔɔ Nyamenle ne mɔɔ bɔle ye la nea ye ɛsaso zo kakyihakyi ye dahuu la bɛwula.” (Kɔl. 3:9, 10) Nɔhalɛ, saa yɛte Nyamenle Edwɛkɛ ne abo kpalɛ na yɛfa yɛbɔ yɛ ɛbɛla a, ɔbamaa yɛala Keleseɛnema subane ali na yeabɔ yɛ nwo bane wɔ Seetan ngane nwo.

20 Ɛzoanvolɛ Pita bɔle yɛ kɔkɔ kɛ: “Bɛyɛ tieyɛ bɛmaa Nyamenle [kɛ ngakula la] na bɛmmamaa bɛ atiakunluwɔzo sie bɛ kɛ dɛba ne mɔɔ ɛnee bɛnze nwolɛ bie la,” emomu, “bɛmaa bɛ nwo ɛde wɔ nyɛleɛ biala anu.” (1 Pita 1:14, 15) Edwɛkɛ mɔɔ doa zo la bamaa yɛanwu kɛ saa yɛbɔ mɔdenle yɛyɛ yɛ adwenle fofolɛ na yɛkakyi a, Gyihova bayila yɛ.

^ ɛden. 18 Nea neazo ne mɔɔ wɔ February 1, 1994, The Watchtower ne mukelɛ 9, ɛdendɛkpunli 7 la.