Ɔnva nwo kɛ me kpɔkɛdelɛ ɛnle kpalɛ na nwolɛ ngyegyelɛ ne kola ba arɛlevilɛ nu la, menwu yɛ anwuma Selɛ ne ɛlɔlɛ wɔ me ɛbɛlabɔlɛ nu dahuu. Gyihova mɔɔ melɛsonle ye kɛ adekpakyelɛnli la ɛmaa menyia anyelielɛ kpole wɔ ɛvolɛ 20 mɔɔ ɛze la anu.

Bɛwole me wɔ 1956. Bɛkawo me la ɛnee ewule wɔ me nzi bowule ne anu, yemɔti ɔzɛkyele me ndinli ne mɔ bie, ɛhye ati ɔyɛ se kɛ mebadia yɛɛ me kpɔkɛdelɛ ɛnle kpalɛ.

Kolaa na bɛawo me la, Gyihova Alasevolɛ agyalɛma bie mɔɔ sonle kɛ edwɛkpatɛlɛvolɛma la nee me awovolɛ zukoalɛ Baebolo ne. Wɔ me ngakula nu, ɛnee nolobɔlɛma mɔɔ bɛsonle wɔ ɛleka mɔɔ ɛde ɔ nwo la ekyi bie ala a wɔ me sua zo Usakos mɔɔ wɔ Namibia la a. Kɛmɔ ɛnee asafo ɛnle ɛkɛ la ati, ɛnee yɛyɛ debiezukoalɛ ne kɛ abusua. Menyianle ɛvolɛ nsuu la, bɛyɛle me apelehyɛne mɔɔ baboa yeamaa meahola bie. Mekanyia ɛvolɛ 14 la, ɛnee mepɛ mgbutike. Meangola meanwie ndoazo sukulu ɔluakɛ ɛnee bie ɛmbikye yɛ, yɛɛ ɛnee mehyia me awovolɛ moalɛ ɔlua me kpɔkɛdelɛ ne ati.

Ɛhye mɔ amuala anu, membɔle mɔdenle kɛ mebamia me nee Gyihova agɔnwolɛvalɛ ne anu. Ɛnee yɛnlɛ asafo mbuluku dɔɔnwo wɔ Afrikaans aneɛ nu, yemɔti menzukoale Nrenlenza amaa meahola meagenga bie. Menyɛle nolobɔlɛnli na bɛzɔnenle me wɔ mekɛ mɔɔ menyianle ɛvolɛ 19 la. Wɔ ɛvolɛ nna ne mɔɔ ɔdoa ye la anu, mengɔle kpɔkɛdelɛ nwo ngyegyelɛ dɔɔnwo anu. Yeanga ye zɔ, ɔluakɛ yɛwɔ sua ekyi zo la ati, menli nwo ɛzulolɛ hanle me mɔɔ mengola menyɛ dɔɔnwo wɔ daselɛlilɛ gyima ne anu a.

Yɛ abusua ne dule vile Namibia hɔle South Africa wɔ mekɛ mɔɔ ɛnee meli ɛvolɛ 20 la, na ɛkɛ ne yɛɛ mengɔle me debiezukoalɛ mɔɔ lumua a. Nea kɛzi me nye liele a! Noko ɔrale kɛ eza bɛbayɛ me anyalɛ ne anwo apelehyɛne.

Yemɔ anzi, maanzinli zo neavolɛ bie manle adekpakyelɛ nwo ɛdendɛlɛ. Ɔhanle me ahonle kpalɛ. Ɛnee me kpɔkɛdelɛ ne gyegye me kpalɛ yɛɛ ɔbayɛ se kɛ mebayɛ adekpakyelɛ gyima ne, noko ɛnee menwu kɛ Gyihova soa me adesoa ne mɔ dahuu. Yemɔti membizale adekpakyelɛ nwo adenle. Noko ɔlua me kpɔkɛdelɛ ne ati, mgbanyima ne mɔ anlie ando nu.

Me sa nu ando, membɔle kpɔkɛ kɛ mebayɛ mɔɔ mebahola la wɔ daselɛlilɛ gyima ne anu. Me mame nee mediema boale me manle menyianle adekpakyelɛ dɔnehwele ne siane nsia. Ɔlale ali kɛ mesika me bo kɛ mebayɛ akekpakyelɛ, na mebahola meagyinla me kpɔkɛdelɛ ne anloa. Membizale adekpakyelɛ nwo adenle ne bieko na menyianle. Menyɛle adekpakyelɛnli wɔ September 1, 1988.

Kɛ adekpakyelɛnli la, Gyihova boa me dahuu. Adekpakyelɛ gyima ne ɛbɔ me nwo bane yemaa meli me nganeɛdelɛ nwo ngyegyelɛ zo. Eza yemaa me ne Gyihova agɔnwolɛvalɛ ne anu ɛmia. Menli mɔɔ mehola meboa bɛ memaa bɛyila bɛ nwo zo bɛzɔne la ɛmaa menyia anyelielɛ kpole.

Me kpɔkɛdelɛ ɛtɛyɛle kpalɛ. Noko Gyihova ‘soa me adesoa ne mɔ dahuu.’ (Edw. 68:19) Ɔmaa mekola megyinla me ngyegyelɛ nloa; yɛɛ ɔmaa me nye die kɛ mede ngoane nu la!