Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

“Ka Kile Yɛ, Mekɛ Boni A Ɛhye Mɔ Bazi A?”

“Ka Kile Yɛ, Mekɛ Boni A Ɛhye Mɔ Bazi A?”

“Ka debie mɔɔ bazi ahile kɛ wɔ ɛralɛ ne ɛdwu na ewiade ɛhye ɛlɛba awieleɛ la kile yɛ?”MAT. 24:3.

1. Duzu a ɛnee ɛzoanvolɛma ne kpondɛ kɛ bɛnwu ye mɔɔ yɛdayɛ noko yɛkpondɛ kɛ yɛnwu ye a?

ƐNEE Gyisɛse gyima wɔ azɛlɛ ye azo ɛlɛba ye awieleɛ na ye ɛdoavolɛma kpondɛ kɛ bɛnwu mɔɔ ɔbazi kenlebie la. Yemɔti, mɔɔ ɛnee ye ewule mekɛ ɛlɛbikye la, ye ɛzoanvolɛma ne nna bizale ye kɛ: “Ka mekɛ mɔɔ ɛhye mɔ kɛzi la kile yɛ, na ka debie mɔɔ bazi ahile kɛ wɔ ɛralɛ ne ɛdwu na ewiade ɛhye ɛlɛba awieleɛ la kile yɛ?” (Mat. 24:3; Maake 13:3) Gyisɛse ngapezo ne mɔɔ wɔ Mateyu ati 24 nee 25 la bua bɛ kpuyia ne. Ɔhanle ninyɛne dɔɔnwo mɔɔ anwo hyia la anwo edwɛkɛ wɔ ngapezo zɔhane anu. Ye edwɛkɛ ne fane yɛ nwo ɔluakɛ yɛdayɛ noko yɛkpondɛ kɛ yɛnwu mɔɔ ɔbazi kenlebie la.

2. (a) Duzu anwo nɔhalɛ ndelebɛbo a yɛva ɛvolɛ dɔɔnwo yɛkpondɛ a? (b) Kpuyia nsa boni mɔ a yɛbazuzu nwo a?

2 Gyihova azonvolɛ ɛva asɔneyɛlɛ nee mekɛ tendenle ɛzukoa Gyisɛse ngapezo ne mɔɔ fane awieleɛ mekɛ ne anwo la. Bɛbɔ mɔdenle kɛ bɛbanyia mekɛ mɔɔ Gyisɛse edwɛkɛ ne bara nu la anwo nɔhalɛ ndelebɛbo. Bɛmaa yɛzuzu “mekɛ” nsa bie anwo yɛva yɛhilehile nzenzaleɛ mɔɔ yɛyɛ ye wɔ yɛ ndelebɛbo bie mɔ anwo la anu. Mekɛ boni a ‘anwongyelelɛ kpole ne’ babɔ ɔ bo a? Mekɛ boni a Gyisɛse babua menli ndɛne kɛ bɛle “mboane” anzɛɛ “mbɔnkye” a? Mekɛ boni a Gyisɛse ‘bara’ a?Mat. 24:21; 25:31-33.

MEKƐ BONI A ANWONGYELELƐ KPOLE NE BABƆ Ɔ BO A?

3. Ɛnee kɛzi yɛte anwongyelelɛ kpole ne abo ɛ?

3 Dɛba ne, ɛnee yɛdwenle kɛ anwongyelelɛ kpole ne bɔle ɔ bo wɔ 1914 wɔ Ewiade Konle I anu na Gyihova “[pɛle] mekɛ ne azo” wɔ mekɛ mɔɔ konle ne rale awieleɛ wɔ 1918 amaa mɔhama ne anyia adenle abɔ edwɛkpa ne nolo ahile aleɛabo amra amuala la. (Mat. 24:21, 22) Na saa bɛwie edwɛkɛhanlɛ gyima ne a, bɛbazɛkye Seetan ewiade ne. Yemɔti, yɛzuzule kɛ anwongyelelɛ kpole ne le afoa nsa: Ɔbabɔ ɔ bo (1914-1918), bɛbapɛ zo  (ɔvi 1918 mɔɔ kɔ la), na ɔbahɔ ye awieleɛ wɔ Amagɛdɔn.

4. Nwunu boni a ɛmaa yɛde Gyisɛse ngapezo ne mɔɔ fane awieleɛ mekɛ ne anwo la abo kpalɛ a?

4 Noko, ɔlua Gyisɛse ngapezo ne anu neɛnleanu bieko mɔɔ yɛyɛ la ati, yɛnwu kɛ Gyisɛse awieleɛ mekɛ ne anwo ngapezo ne foa bie bara nu fane nwiɔ. (Mat. 24:4-22) Ɔlumuale ɔrale nu wɔ ɛvoya ne mɔɔ lumua Y.M. la anu wɔ Dwudiya, na ɔbara nu bieko wɔ mekɛ ɛhye anu wɔ ewiade amuala. Nwunu ɛhye ɛmaa yɛyɛ nzenzaleɛ wɔ yɛ ndelebɛbo bie mɔ anu. *

5. (a) Duzu a bɔle ɔ bo wɔ 1914 a? (b) Ɛvolɛ boni anu a nyanedelɛ mɔɔ ɔle kɛ ɛhye la bie zile wɔ ɛvoya ne mɔɔ lumua Y.M. la anu a?

5 Eza yɛnwunle kɛ anwongyelelɛ kpole ne foa mɔɔ lumua la ambɔ ɔ bo 1914. Kɛmɔti ɛ? Ɔboalekɛ Baebolo ngapezo ne anga kɛ konle a bava anwongyelelɛ kpole ne ara a, emomu, ɔhanle kɛ saa bɛteta adalɛ ɛzonlenlɛ a. Ɛhye ati, ninyɛne mɔɔ sisile 1914 la, ɛnle anwongyelelɛ kpole ne mɔlebɛbo, ɔle “awolɛ nyane ɛdelɛ bo ɛbɔlɛ.” (Mat. 24:8) “Awolɛ nyane” ɛhye le kɛ mɔɔ ɔzile Gyɛlusalɛm nee Dwudiya wɔ 33 Y.M. kɔdwu 66 Y.M. la.

6. Kɛ ɔkɛyɛ na yɛanwu kɛ anwongyelelɛ kpole ne ɛbɔ ɔ bo ɛ?

6 Kɛ ɔkɛyɛ na yɛanwu kɛ anwongyelelɛ kpole ne ɛbɔ ɔ bo ɛ? Gyisɛse hanle kɛ: “Saa bɛnwu ‘Munzudeɛ ne mɔɔ bɔ maanle’, mɔɔ Nyamenle kpɔmanvolɛ Daneɛle hanle nwolɛ edwɛkɛ la kɛ ɔgyi ɛleka nwuanzanwuanza ne a, (Kengavolɛ, te ɛhye abo!) ɛnee bɛdabɛ mɔɔ bɛwɔ Dwudiya la ɛnriandi ɛhɔ awoka ne mɔ azo.” (Mat. 24:15, 16) Edwɛkɛ “ɔgyi ɛleka nwuanzanwuanza ne” lumuale rale nu wɔ 66 Y.M., wɔ mekɛ mɔɔ Wulomu sogyama (“Munzudeɛ ne”) tetale Gyɛlusalɛm nee ye ɛzonlenlɛ sua ne (mɔɔ ɛnee le ɛleka nwuanzanwuanza wɔ Dwuuma anye zo la). Edwɛkɛ “ɔgyi” bara nu kpole wɔ mekɛ mɔɔ Maamgbole Koyɛlɛ Eku ne (ɛnɛ mekɛ  ye “Munzudeɛ ne”) bateta Keleseɛnemaanle (mɔɔ ɔle nwuanzanwuanza wɔ adalɛ Keleseɛnema anye zo) nee Babelɔn Kpole ne foa mɔɔ ɛha la. Ɛtetalɛ ɛhye anwo edwɛkɛ wɔ Yekile 17:16-18. Ɛhye a babɔ anwongyelelɛ kpole ne abo a.

7. (a) Kɛzi ‘sonla hale’ wɔ ɛvoya ne mɔɔ lumua la anu ɛ? (b) Duzu a yɛ nye la kɛ ɔbazi kenlebie a?

7 Eza Gyisɛse hanle kɛ: “[Bɛbapɛ] mekɛ ne azo.” Edwɛkɛ ɛhye lumuale rale nu wɔ mekɛ mɔɔ Wulomu sogyama ne ‘pɛle’ bɛ ɛtetalɛ ne azo wɔ ɛvolɛ 66 Y.M. la. Keleseɛnema mɔɔ bɛkpokpa bɛ mɔɔ bɛwɔ Gyɛlusalɛm nee Dwudiya la nriandile amaa ‘sonla aha’ anzɛɛ bɛalie bɛ ngoane. (Bɛgenga Mateyu 24:22; Mal. 3:17) Yemɔti, duzu a yɛ nye la kɛ ɔbazi wɔ anwongyelelɛ kpole ne mɔɔ ɛlɛba la anu a? Gyihova ‘bapɛ’ ɛtetalɛ ne mɔɔ Maamgbole Koyɛlɛ Eku ne bava ara adalɛ ɛzonlenlɛ zo la azo, ɔnrɛmaa bɛnrɛzɛkye nɔhalɛ ɛzonlenlɛ bɛnrɛboka adalɛ ɛzonlenlɛ nwo. Ɛhye bamaa Nyamenle menli ne aha.

8. (a) Saa anwongyelelɛ kpole ne foa mɔɔ lumua la pɛ nu a, ninyɛne boni mɔ a basisi a? (b) Ɔda ali kɛ mekɛ boni anu a 144,000 ne mɔɔ li awieleɛ la banyia ye anwuma ahatualɛ ne a? (Nea awieleɛdwɛkɛ ne.)

 8 Saa anwongyelelɛ kpole ne foa mɔɔ lumua la pɛ nu a duzu a bazi a? Gyisɛse edwɛkɛ ne kile kɛ mekɛ bie bapɛ nu kolaa na Amagɛdɔn ne abɔ ɔ bo. Duzu a basisi mekɛ zɔhane a? Mualɛ ne wɔ Yizikeɛle 38:14-16 nee Mateyu 24:29-31. (Bɛgenga.) (Nea awieleɛdwɛkɛ 2.) Yemɔ anzi, Amagɛdɔn ne mɔɔ ɔbava anwongyelelɛ kpole ne yeara ye awieleɛ na ɔle kɛ Gyɛlusalɛm ɛzɛkyelɛ ne mɔɔ ɔrale 70 Y.M. la, baye ɔ ti. (Mal. 4:1) Amagɛdɔn konle ne mɔɔ ɔbava anwongyelelɛ kpole ne yeara ye awieleɛ la bayɛ ngakyile, ɔluakɛ “sumunli kɛ ewiade bɔle ɔ bo dedee mɔɔ yeradwu ɛnɛ la, bie ɛtɛsile ɛlɛ.” (Mat. 24:21) Ɔpɛ nu a, Kelaese Ɛvolɛ Apenle Tumililɛ ne babɔ ɔ bo.

9. Kɛzi Gyisɛse ngapezo ne mɔɔ fane anwongyelelɛ kpole ne anwo la ka yɛ ɛ?

9 Anwongyelelɛ kpole ne anwo ngapezo  ɛhye maa yɛ anwosesebɛ. Kɛmɔti ɛ? Ɔluakɛ ɔmaa yɛnyia anwodozo kɛ, ɔnva nwo ngyegyelɛ biala mɔɔ yɛbahɔ nu la, Gyihova menli, kɛ ekpunli la, baho adɔ zo. (Yek. 7:9, 14) Mɔɔ ɔhyia kpalɛ la, yɛ nye die, ɔboalekɛ wɔ Amagɛdɔn ne anu, Gyihova bamaa bɛanwu kɛ ye tumililɛ fɛta na yeade ye duma nwuanzanwuanza ne anwo.Edw. 83:18; Yiz. 38:23.

MEKƐ BONI A GYISƐSE BABUA MENLI NDƐNE KƐ BƐLE MBOANE ANZƐƐ MBƆNKYE Ɛ?

10. Ndelebɛbo boni a ɛnee yɛlɛ ye wɔ mekɛ mɔɔ bɛbabua menli ndɛne kɛ bɛle mboane anzɛɛ mbɔnkye la anwo a?

10 Akee bɛmaa yɛzuzu mekɛ mɔɔ bɛbabua menli ndɛne kɛ bɛle mboane anzɛɛ mbɔnkye kɛmɔ Gyisɛse hanle nwolɛ edwɛkɛ wɔ ye ɛrɛlɛ ne anu la noko anwo. (Mat. 25:31-46) Mekɛ bie, ɛnee yɛsuzu kɛ mboane ne anzɛɛ mbɔnkye ne ndɛnebualɛ ne bahɔ zo wɔ awieleɛ mekɛ ne kɔsɔɔti anu, ɔvi 1914 mɔɔ ɔba la. Yɛhanle kɛ bɛdabɛ mɔɔ bɛndie Belemgbunlililɛ edwɛkɛ ne mɔɔ bɛbawu kolaa na anwongyelelɛ kpole ne abɔ ɔ bo la le mbɔnkye—bɛnrɛnyia ewudwazo.

11. Kɛmɔti a Gyisɛse ɛnrɛhola ɛnrɛbɔ ɔ bo ɛnrɛbua menli ndɛne kɛ bɛle mboane anzɛɛ mbɔnkye wɔ 1914 ɛ?

11 Wɔ 1995 ne anu, Ɛzinzalɛ Arane bie hilehilele edwɛkɛ ne mɔɔ wɔ Mateyu 25:31 la anu bieko, ɔse: “Mekɛ mɔɔ medame Sonla Ra, menwɔra kɛ Belemgbunli, mɔɔ ɛnee me soanvolɛma ne amuala wɔ me nwo ɛkɛ ne la, mebadɛnla me anyunlunyia belemgbunli ebia ne anu.” Bɛnwunle kɛ Gyisɛse rayɛle Nyamenle Belemgbunlililɛ ne azo Belemgbunli wɔ 1914, noko yeandɛnla ye “anyunlunyia belemgbunli ebia ne anu” kɛ “aleɛabo amra amuala” Ndɛnebuavolɛ. (Mat. 25:32; fa to Daneɛle 7:13 anwo.) Noko, mboane ne nee mbɔnkye ne anwo ɛrɛlɛ ne maa ɔda ali kɛ Gyisɛse bayɛ Ndɛnebuavolɛ. (Bɛgenga Mateyu 25:31-34, 41, 46.) Kɛmɔ Gyisɛse ambɔ ye gyima bo kɛ aleɛabo amra amuala Ndɛnebuavolɛ wɔ 1914 la ati, ɔnrɛhola ɔnrɛbua menli ndɛne kɛ bɛle mboane anzɛɛ mbɔnkye ɔvi zɔhane ɛvolɛ ne. * Yemɔti, mekɛ boni a Gyisɛse babɔ ye ndɛnebualɛ ne abo a?

12. (a) Mekɛ boni a Gyisɛse babɔ ɔ bo ayɛ gyima kɛ aleɛabo amra amuala Ndɛnebuavolɛ a? (b) Ninyɛne mɔɔ ɔbasisi la boni a bɛha nwolɛ edwɛkɛ wɔ Mateyu 24:30, 31 nee Mateyu 25:31-33, 46 a?

 12 Gyisɛse ngapezo ne mɔɔ fane awieleɛ mekɛ ne anwo la maa yɛnwu kɛ saa bɛsɛkye adalɛ ɛzonlenlɛ a, ɔbabɔ ɔ bo yeayɛ gyima kɛ aleɛabo amra amuala Ndɛnebuavolɛ. Kɛmɔ yɛhanle ye wɔ  ɛdendɛkpunli 8 ne anu la, ninyɛne mɔɔ ɔbasisi la bie mɔ wɔ Mateyu 24:30, 31. Saa ɛkenga ɛkɛ ne a, ɛbanwu kɛ Gyisɛse hanle ninyɛne mɔɔ ɔhanle ye wɔ ye ɛrɛlɛ ne mɔɔ fane mboane ne nee mbɔnkye ne anwo la bie mɔ anwo edwɛkɛ wɔ ɛkɛ. Kɛ neazo la, sonla Ra ne bara anyunlunyia nu mɔɔ ye soanvolɛma ne wɔ ɔ nwo ɛkɛ a; ɔbaboɔboa aleɛabo amra amuala anloa; bɛdabɛ mɔɔ bɛbabu bɛ kɛ bɛle mboane la “[bɛamaa] bɛ nye zo” ɔluakɛ bɛbanyia “ngoane mɔɔ ɛnlɛ awieleɛ.” * Bɛdabɛ mɔɔ bɛbabu bɛ kɛ bɛle mbɔnkye la “bali nyane” ɔluakɛ bɛbadea bɛ “ndeanlɛ mɔɔ ɛnlɛ awieleɛ.”Mat. 25:31-33, 46.

13. (a) Mekɛ boni a Gyisɛse babua menli ndɛne kɛ bɛle mboane anzɛɛ mbɔnkye ɛ? (b) Kɛzi ndelebɛbo ɛhye ka adwenle mɔɔ yɛlɛ ye wɔ yɛ ɛzonlenlɛ gyima ne anwo la ɛ?

13 Ɛhye ati, duzu a yɛbahola yɛaha a? Gyisɛse babua aleɛabo amra amuala ndɛne kɛ bɛle mboane anzɛɛ mbɔnkye wɔ mekɛ mɔɔ ɔbara wɔ anwongyelelɛ kpole ne anu la. Ɔbadea mbɔnkye ne mɔ “ndeanlɛ mɔɔ ɛnlɛ awieleɛ” la wɔ Amagɛdɔn, anwongyelelɛ kpole ne awieleɛ. Kɛzi ndelebɛbo ɛhye ka adwenle mɔɔ yɛlɛ ye wɔ yɛ ɛzonlenlɛ gyima ne anwo la ɛ? Ɔmaa yɛnwu kɛzi yɛ edwɛkɛhanlɛ gyima ne anwo hyia la. Kɛkala mɔɔ anwongyelelɛ kpole  ne ɛtɛbɔle ɔ bo la, menli lɛ adenle kakyi bɛ adwenle bɛfa anuhɔlɛ ɛdenraa ne “mɔɔ kɔ ngoane mɔɔ ɛnlɛ awieleɛ la” anu. (Mat. 7:13, 14) Nɔhalɛ, menli bahola ala mboane anzɛɛ mbɔnkye subane ali. Noko, ɔwɔ kɛ yɛkakye kɛ anwongyelelɛ kpole ne anu a bɛbabua menli ndɛne kɛ bɛle mboane anzɛɛ mbɔnkye a. Zɔhane ati, ɔwɔ kɛ yɛbɔ mɔdenle yɛka Belemgbunlililɛ edwɛkɛ ne yɛkile menli dodo biala mɔɔ yɛbahola la.

Menli lɛ adenle kakyi bɛ adwenle kolaa na anwongyelelɛ kpole ne abɔ ɔ bo (Nea ɛdendɛkpunli 13)

MEKƐ BONI A GYISƐSE BARA A?

14, 15. Ngɛlɛlera nna boni mɔ a twe adwenle kɔ Kelaese ɛralɛ ne mɔɔ ɔbara kenlebie kɛ Ndɛnebuavolɛ la azo a?

 14 Asoo Gyisɛse ngapezo ne mɔɔ yɛzuzu nwo bieko la maa yɛnwu kɛ ɔwɔ kɛ yɛyɛ nzenzaleɛ wɔ ndelebɛbo mɔɔ yɛlɛ ye wɔ mekɛ mɔɔ ninyɛne gyɛne mɔɔ anwo hyia basisi la noko anu ɔ? Ngapezo mumua ne bua kpuyia ɛhye. Bɛmaa yɛnlea.

15 Wɔ Gyisɛse ngapezo ne mɔɔ wɔ Mateyu 24:29–25:46 la anu, ɔhwenle adwenle ɔhɔle ninyɛne mɔɔ basisi awieleɛ mekɛ ɛhye nee anwongyelelɛ kpole ne mɔɔ ɛlɛba anu la azo titile. Wɔ ɛkɛ ne, Gyisɛse hanle ye ‘ɛralɛ’ ne anwo edwɛkɛ fane mɔtwɛ. * Mɔɔ fane anwongyelelɛ kpole ne anwo la, ɔhanle kɛ: ‘Bɛkɛnwu medame Sonla Ra kɛ melua amungu nu melɛba.’ “Bɛnze kenle mɔɔ bɛ Awulae ne kɛra la.” “Medame Sonla Ra, mebara mekɛ mɔɔ bɛ nye ɛnla la.” Na wɔ ye mboane ne nee mbɔnkye ne anwo ɛrɛlɛ ne anu, ɔhanle kɛ: ‘Bɛkɛnwu medame Sonla Ra kɛ melɛ anyunlunyia kpole melɛba.’ (Mat. 24:30, 42, 44; 25:31) Ngɛlɛlera nna ɛhye mɔ amuala fane Kelaese ɛralɛ ne mɔɔ ɔbara kenlebie kɛ Ndɛnebuavolɛ la anwo. Nienwu a yɛnwu ngɛlɛlera nna ne mɔɔ ɛha la wɔ Gyisɛse ngapezo ne anu a?

16. Ngɛlɛlera boni bieko a ka Gyisɛse ɛralɛ ne anwo edwɛkɛ a?

16 Gyisɛse hanle ye wɔ sonvolɛ nɔhavo mɔɔ ze nrɛlɛbɛ la anwo kɛ: ‘Na ɔ menle ne bato ye kɛ ɔlɛyɛ ye zɔhane a, ɛhye le nyilalɛ kpole maa ye.’ Wɔ mbɛlɛra ne mɔ anwo ɛrɛlɛ ne anu, Gyisɛse hanle kɛ: “Na mɔɔ bɛhɔle la yɛɛ atɔfolɛ nrenya ne rale a.” Gyisɛse hanle ye wɔ nzunza ne anwo ɛrɛlɛ ne anu kɛ: “Ɔhyɛle kpalɛ na bɛ menle ne ara.” Wɔ ɛrɛlɛ ko ne ala anu, bɛ menle ne hanle kɛ: ‘Anrɛɛ mera la, meahɔlie me ezukoa ɔ nli ne nee nvasoɛ ne amuala.’ (Mat. 24:46; 25:10, 19, 27) Gyisɛse ɛralɛ nna ɛhye mɔ fane mekɛ boni anwo?

17. Duzu a yɛhanle ye wɔ Gyisɛse ɛralɛ ne mɔɔ ɔwɔ Mateyu 24:46 la anwo a?

 17 Yɛhanle ye wɔ yɛ mbuluku ne mɔ anu kɛ ngɛlɛlera nna ɛhye mɔ fane Gyisɛse ɛralɛ ne mɔɔ ɔrale 1918 la anwo. Maa yɛva Gyisɛse edwɛkɛ ne mɔɔ ɔfane “sonvolɛ nɔhavo mɔɔ ze nrɛlɛbɛ” anwo la kɛ neazo. (Bɛgenga Mateyu 24:45-47.) Yɛdele ɔ bo kɛ ye ‘ɛralɛ’ ne mɔɔ ɔwɔ ngyɛnu 46 la fane mekɛ mɔɔ Gyisɛse ranleɛnleanle menli mɔɔ bɛkpokpa bɛ sunsum nu gyinlabelɛ nu wɔ 1918 la anwo, na wɔ 1919 ne, bɛmanle sonvolɛ ne nleanle ɔ Menle ne agya ninyɛne ne mɔ amuala azo. (Mal. 3:1) Noko, Gyisɛse ngapezo ne mɔɔ yɛzuzu nwolɛ bieko la ɛmaa yɛnwu kɛ ɔwɔ kɛ yɛyɛ nzenzaleɛ wɔ ndelebɛbo mɔɔ yɛlɛ ye wɔ mekɛ mɔɔ Gyisɛse ngapezo ne anu ninyɛne bie mɔ bara nu la anwo. Duzu ati ɔ?

18. Duzu a Gyisɛse ngapezo ne mɔɔ yɛzuzu nwo la kɔsɔɔti ɛmaa yɛnwu ye wɔ ye ɛralɛ ne anwo a?

18 Ngyehyɛnu ne mɔ mɔɔ li Mateyu 24:46 anyunlu la, maa yɛnwu kɛ Gyisɛse ‘ɛralɛ’ ɛhye fane mekɛ mɔɔ ɔbarabua ndɛne wɔ anwongyelelɛ kpole ne anu la anwo. (Mat. 24:30, 42, 44) Bieko, kɛmɔ yɛnwunle ye wɔ  ɛdendɛkpunli 12 ne la, Gyisɛse ‘ɛralɛ’ ne mɔɔ wɔ Mateyu 25:31 la fane ndɛnebualɛ mekɛ ne mɔɔ ɔbara kenlebie la anwo. Yemɔti, ndelebɛbo wɔ nu kɛ yɛbaha kɛ Gyisɛse ɛralɛ ne mɔɔ ɔbamaa sonvolɛ nɔhavo mɔɔ ze nrɛlɛbɛ anlea ye agya ninyɛne ne mɔ amuala azo mɔɔ wɔ Mateyu 24:46, 47 la noko bayɛ kenlebie, wɔ anwongyelelɛ kpole ne anu. * Nɔhalɛ nu, Gyisɛse ngapezo ne mɔɔ yɛzuzu nwo la kɔsɔɔti ɛmaa yɛnwu kɛ ye ɛralɛ mɔtwɛ ne amuala fane ye kenlebie ɛralɛ ne mɔɔ ɔbarabua ndɛne wɔ anwongyelelɛ kpole ne anu la anwo.

19. Nzenzaleɛ boni mɔ a yɛyɛ ye wɔ yɛ ndelebɛbo bie mɔ anu a, na kpuyia boni mɔ a yɛbabua ye wɔ edwɛkɛ mɔɔ doɔdoa zo la anu a?

19 Duzu a yɛzukoa a? Yɛbizale kpuyia wɔ “mekɛ” nsa bie anwo wɔ edwɛkɛ ɛhye mɔlebɛbo. Yɛlumuale yɛnwunle kɛ anwongyelelɛ kpole ne ambɔ ɔ bo wɔ 1914, na emomu, ɔbabɔ ɔ bo mekɛ mɔɔ Maamgbole Koyɛlɛ Eku ne bateta Babelɔn Kpole ne la. Akee yɛzuzule deɛmɔti Gyisɛse ndɛnebualɛ ne mɔɔ fane mboane ne nee mbɔnkye ne anwo ambɔ ɔ bo 1914, na emomu, wɔ anwongyelelɛ kpole ne anu la anwo. Awieleɛ bɔkɔɔ ne, yɛnwunle deɛmɔti yɛka kɛ tɛ 1919 a Gyisɛse kpale sonvolɛ nɔhavo ne kɛ ɔnlea ye agya ninyɛne ne mɔ amuala azo, na emomu, anwongyelelɛ kpole ne anu la. Ɛhye ati, “mekɛ” nsa ne mɔɔ yɛhanle nwolɛ edwɛkɛ la amuala fane anwongyelelɛ kpole ne mɔɔ ɔbara kenlebie la anwo. Kɛzi nzenzaleɛ ɛhye ka ndelebɛbo mɔɔ yɛlɛ ye wɔ sonvolɛ nɔhavo ne anwo ɛrɛlɛ ne anwo la ɛ? Bieko, kɛzi ɔka ndelebɛbo mɔɔ yɛlɛ ye wɔ Gyisɛse ndonwo, anzɛɛ mrɛlɛ mɔɔ ɛlɛba nu wɔ awieleɛ mekɛ ɛhye anu la ɛ? Yɛbabua kpuyia ɛhye mɔ mɔɔ anwo hyia la wɔ edwɛkɛ mɔɔ doɔdoa zo la anu.

 

^ ɛden. 4 Ɛdendɛkpunli 4: Saa ɛkpondɛ nwolɛ edwɛkɛ dɔɔnwo a, nea February 15, 1994, The Watchtower ne, mukelɛ 8-21 yɛɛ May 1, 1999 ɛdeɛ ne, mukelɛ 8-20.

^ ɛden. 11 Ɛdendɛkpunli 8: Ninyɛne mɔɔ bɛha nwolɛ edwɛkɛ wɔ ngyehyɛnu ɛhye mɔ anu la anu ko a le ‘Nyamenle menli ne mɔɔ yekpa nu yeye bɛ mɔɔ bɛbahuohua bɛ nloa la.’ (Mat. 24:31) Yemɔti, ɔbayɛ kɛ bɛbadwazo bɛdabɛ mɔɔ bɛkpokpa bɛ mɔɔ anwongyelelɛ kpole ne foa mɔɔ lumua bara la ɛnee bɛwɔ azɛlɛ ye azo la amuala bɛahɔ anwuma kolaa na Amagɛdɔn konle ne abɔ ɔ bo. Ɛhye le edwɛkɛ ne mɔɔ yɛhanle ye wɔ “Questions From Readers” mɔɔ wɔ August 15, 1990 The Watchtower ne mukelɛ 30 la, anwo ndelebɛbo fofolɛ.

^ ɛden. 12 Ɛdendɛkpunli 11: Nea October 15, 1995, The Watchtower ne, mukelɛ 18-28.

^ ɛden. 15 Ɛdendɛkpunli 12: Nea edwɛkɛ ne mɔɔ ɔ nee edwɛkɛ ɛhye le ko mɔɔ ɔwɔ Luku 21:28 la.

^ ɛden. 18 Ɛdendɛkpunli 15: Giliki yɛkpɔkɛ er′kho·mai yɛɛ bɛhile ɔ bo “melɛba” nee “kɛra” yɛɛ mebara la.

Ɛdendɛkpunli 18: Giliki edwɛkɛkpɔkɛ ne mɔɔ bɛhile ɔ bo, ɔ menle ne “bato ye” wɔ Mateyu 24:46 la, yemɔ ala a eza bɛhile ɔ bo “melɛba” nee kɛra yɛɛ mebara wɔ Mateyu 24:30, 42, 44 la.