Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 KPUYIA MƆƆ VI KENGAVOMA ƐKƐ

Kpuyia Mɔɔ Vi Kengavoma Ɛkɛ

Ɛnee Yizilayɛma kenda ɛtanevolɛma wɔ baka zo ku bɛ ɔ?

Wɔ tete ne, ɛnee maanle maanle dɔɔnwo kenda ɛtanevolɛma bie mɔ wɔ baka zo ku bɛ. Ɛnee Wulomuma kyekye anzɛɛ bɔ sonla zɛhae baka nu mekɛ tendenle bɛmaa nzuhɔne nee ɛhɔne ku ye na ɔte nyane kpalɛ. Wulomuma bu baka zo ewule kɛ ɔle anyiemgba adenle mɔɔ bɛfa zo bɛtwe ɛtanevolɛma mɔɔ anwo ɛnlɛ nvasoɛ la anzo.

Duzu a ɛnee tete Yizilayɛma noko yɛ a? Ɛnee Yizilayɛma noko kenda ɛtanevolɛma wɔ baka zo ku bɛ ɔ? Mosisi Mɛla ne ka ye wienyi kɛ: ‘Saa awie to mɛla bie mɔɔ ɔfɛta ɛhunlɛ la na bɛku ye bɛkenda ye baka zo a, ɔnle kɛ bɛmaa ye funli ne kenda baka ne azo aledwolɛ ne amuala. Ɔwɔ kɛ bɛye bɛsie ye kenle ko ne ala.’ (Mɛla 21:22, 23) Ɔda ali kɛ, mekɛ mɔɔ bɛkɛlɛ Hibulu Ngɛlɛlera ne la, saa bɛbua awie ewule fɔlɛ a, bɛdumua bɛku ye kolaa na bɛahenda ye baka zo.

Ɔlua ɛhye ati, Sɛlɛvolɛma 20:2 ka kɛ: “Yizilayɛnli biala anzɛɛ ɛyɛvolɛ biala mɔɔ de Yizilayɛma avinli, mɔɔ kɛva ɔ ra kɛbɔ [afɔle] kɛmaa bozonle Molɛke la, bɛhu ye. Bɛdabɛ mɔɔ bɛwɔ maanle ne anu la ɛzi ye awolɛ ɛhu ye.” Bɛhu bɛdabɛ ‘mɔɔ bɛdi ahɔne anzɛɛ bɛle bayivolɛ la noko.’ Adenle boni azo? “Bɛzi bɛ awolɛ.”—Sɛlɛ. 20:27.

Yɛkenga ye wɔ Mɛla ne 22:23, 24, kɛ: “Saa raalɛ bie wɔ ɛkɛ na bɛyia ye kɛ bɛbagya ye, na nrenya fɛlɛ ye wɔ suakpole ne azo na ɔfa ye a, bɛva bɛ mu nwiɔ bɛvinde suakpole ne anlenkɛ kpole ne anzi lɔ na bɛzi bɛ awolɛ bɛhu bɛ. Bɛzi raalɛ ne awolɛ bɛhu ye, ɔboalekɛ ɔwɔ sua zo noko yeandeɛdea nu yeanvɛlɛ kɛ awie ɛraboa ye. Bɛhu nrenya ne noko, ɔboalekɛ yeva kakula raalɛ mɔɔ awie ɛyia ye kɛ ɔgya ye la. Bɛyɛ ye zɔhane bɛva bɛdu munzule ne abo.” Tete Yizilayɛma ɛdeɛ, ɛnee awolɛ ɛzilɛ a le adenle titile mɔɔ bɛdua zo bɛku bɛdabɛ mɔɔ bɛdi ɛtane kpole nwo fɔlɛ la a. *

Ɔda ali kɛ, mekɛ mɔɔ bɛkɛlɛ Hibulu Ngɛlɛlera ne la, saa bɛbua awie ewule fɔlɛ a, bɛdumua bɛku ye kolaa na bɛahenda ye baka zo

Mɛla ne 21:23 ka kɛ: “Awie mɔɔ bɛkɛhenda ye bɛkɛhu ye la ɛbɔ Nyamenle anwo ebele.” Ɛnee awie mɔɔ “ɛbɔ Nyamenle anwo ebele” funli mɔɔ bɛkɛhenda ye bagua nu la le kɔkɔbɔlɛ maa Yizilayɛma.

^ ɛden. 6 Mbɔlɔba dɔɔnwo die to nu kɛ wɔ Mosisi Mɛla ne anu, ɛnee bɛku ɛtanenli kolaa na bɛahenda ye baka zo. Noko akee, daselɛ dɔɔnwo wɔ kɛ mɔɔ kile kɛ badwu ɛvoya mɔɔ lumua la anu, ɛnee Dwuuma kenda ɛtanevolɛma anyewɔzo wɔ baka zo bɛmaa ɔwu.