Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Ɛlɛ ‘Ahonle Mɔɔ Ɔbamaa Wɔanwu’ Gyihova Ɔ?

Ɛlɛ ‘Ahonle Mɔɔ Ɔbamaa Wɔanwu’ Gyihova Ɔ?

“Mebamaa bɛ ahonle meamaa bɛanwu kɛ medame a mele [Gyihova] a; bɛbayɛ me menli.”—GYƐ. 24:7.

1, 2. Duzu ati a bie mɔ anye die feege nwo a?

Ɛ NYE die feege nwo ɔ? Menli dɔɔnwo anye die nwo, yemɔti bɛdua ye wɔ ewiade ye ɛleka dɔɔnwo. Ɛnee tete Dwuuma noko anye die feege ma nwo kpalɛ. (Nah. 3:12; Luku 13:6-9) Ninyɛne ngakyile mɔɔ boa kpɔkɛdelɛ la wɔ feege bakama nu; yemɔti menli ka kɛ ɔle kpalɛ ɔmaa ahonle ne.

2 Mekɛ bie Gyihova vale feege yɛle ahonle ne anwo ndonwo. Tɛ anwosesebɛ mɔɔ yɛnyia yɛfi feege ma ne anu la anwo edwɛkɛ a ɛnee ɔlɛka a. Edwɛkɛ mɔɔ ɔluale ngapezonli Gyɛlɛmaya anwo zo ɔhanle la baboa wɔ nee wɔ kulovolɛma. Ɛnee ɔlɛfa yeayɛ ndonwo. Mekɛ mɔɔ yɛlɛsuzu mɔɔ ɔhanle la anwo la, dwenle mɔɔ ɛhye bahola ahile amaa Keleseɛnema la anwo.

3. Duzu a feege ne mɔɔ bɛha nwolɛ edwɛkɛ wɔ Gyɛlɛmaya tile 24 ne la gyi ɛkɛ maa a?

3 Bɛmaa yɛnlumua yɛzuzu edwɛkɛ bie mɔɔ Nyamenle hanle ye wɔ Gyɛlɛmaya mekɛ zo wɔ feege nwo la anwo. Ɛnee Dwuda maanle ne sunsum nu gyinlabelɛ ɛnle kpalɛ fee wɔ ɛvolɛ 617 K.Y.M. Nyamenle yele mɔɔ ɔbazi kenlebie la ɔhilele na ɔvale feege ahɛndɛne nwiɔ ɔyɛle nwolɛ nvoninli. Ɛnee kɛndɛne ne mɔ ko anu feege ne “le kpalɛ” noko ko ne anu ɛdeɛ ne “ɛnle kpalɛ fee.” (Bɛgenga Gyɛlɛmaya 24:1-3.) Feege ma ne mɔɔ ɛnle kpalɛ la gyi ɛkɛ maa Belemgbunli Zɛdikaya nee ye menli ne mɔɔ Belemgbunli Nɛbukadenɛza nee ye ɛlɔne ne hilele bɛ nyane la. Na Yizikeɛle, Daneɛle, nee ɔ gɔnwo mɔ nsa ne mɔɔ ɛnee wɔ Babelɔn nee Dwuuma mɔɔ ɔnrɛhyɛ bɛbava bɛ bɛahɔ lɔ la noko ɛ? Ɛnee bɛle kɛ feege ma kpalɛ ne la. Ɛnee bɛ nuhua bie mɔ bɛazia arakyekye Gyɛlusalɛm na bɛazi ye ɛzonlenlɛ sua ne bieko. Mekɛ ekyi guale nu la, ɛhye rale nu.—Gyɛ. 24:8-10; 25:11, 12; 29:10.

4. Anwosesebɛmanlɛ boni a yɛbahola yɛanyia yɛavi mɔɔ Nyamenle hanle ye wɔ feege ma kpalɛ ne anwo la anu a?

 4 Gyihova hanle ye wɔ bɛdabɛ mɔɔ bɛgyi ɛkɛ bɛmaa feege kpalɛ ne la anwo kɛ: “Mebamaa bɛ ahonle meamaa bɛanwu kɛ medame a mele [Gyihova] a; bɛbayɛ me menli.” (Gyɛ. 24:7) Ngɛlɛlera ɛhye azo a debiezukoalɛ ne gyi a, na nea kɛzi ɔmaa anwosesebɛ a! Nyamenle kulo kɛ ɔmaa yɛ nuhua ko biala ‘ahonle mɔɔ ɔbamaa yeanwu’ ye la. Wɔ ɛke, “ahonle” ne gyi ɛkɛ maa sonla mumua ne. Kpolerazulɛ biala ɛnle nwo kɛ ɛkulo kɛ ɛnyia ahonle ɛhye bie na ɛboka ye menli ne anwo. Nyamenle Edwɛkɛ ne mɔɔ ɛbazukoa na wɔava wɔali gyima, wɔanlu ɛ nwo wɔ wɔ ɛtane nwo na wɔahakyi wɔ subane, wɔayila ɛ nwo zo wɔama Nyamenle, na wɔamaa bɛazɔne wɔ wɔ Selɛ ne, Ralɛ ne, nee sunsum nwuanzanwuanza ne duma nu la boka egyakɛ mɔɔ ɔwɔ kɛ ɛtu na wɔadwu zɔhane bodane ne anwo la anwo. (Mat. 28:19, 20; Gyi. 3:19) Bie a yɛyɛ ninyɛne ɛhye mɔ dɛba anzɛɛ yɛ nee Gyihova Alasevolɛ kɔ bɛ ayia ne mɔ.

5. Nwane mɔ ahonle a Gyɛlɛmaya hɛlɛle nwolɛ edwɛkɛ titile a?

5 Saa yɛdu egyakɛ ɛhye mɔ bie anzɛɛ yɛdu ɔ mualɛ bɔbɔ a, ɔhyia kɛ yɛsuzu yɛ subane nee yɛ nyɛleɛ noko anwo. Ɛbahola wɔanwu ɛhye wɔ edwɛkɛ bieko mɔɔ Gyɛlɛmaya hanle ye wɔ ahonle ne anwo la anu. Gyɛlɛmaya buluku ne anu edwɛkɛ ne bie fane maanle mɔɔ ɛnee bɛbɔ Dwuuda bɛyia la anwo. Noko ɛnee ye edwɛkɛ ne fane Dwuuda maanle ne anu arelemgbunli nnu bie mekɛ zo amra anwo titile. (Gyɛ. 1:15, 16) Ɛhɛe, ɛnee Gyɛlɛmaya edwɛkɛ ne fane mrenya, mraalɛ nee ngakula mɔɔ bɛyila bɛ nwo zo bɛmaa Gyihova la anwo titile. Ɛnee bɛ mgbanyima ɛvi bɛ ɛhulolɛ nu ɛyila bɛ nwo zo ɛmaa ye. (Ade. 19:3-8) Wɔ Gyɛlɛmaya mekɛ zo noko, menli ne zile zo kɛ bɛyila bɛ nwo zo bɛmaa Nyamenle. Bɛhanle kɛ: “Yɛra wɔ ɛkɛ, ɔluakɛ wɔmɔ a ɛle [Gyihova] yɛ Nyamenle ne a.” (Gyɛ. 3:22) Noko akee, kɛzi ɛnee bɛ ahonle ne de ɛ?

AHONLE NE HYIA AYILEYƐLƐ

6. Duzu ati a ɔwɔ kɛ yɛmaa yɛ nye die mɔɔ Nyamenle hanle ye wɔ ahonle ne anwo la anwo kpalɛ ɛ?

6 Ɛnɛ, ayileyɛlɛma kola fa adwuleso ninyɛne neɛnlea kɛzi ahonle ne yɛ gyima la anu. Noko, Gyihova kola yɛ mɔɔ tɛla ɛhye kɛmɔ ɔyɛle ye wɔ Gyɛlɛmaya mekɛ zo la. Edwɛkɛ mɔɔ doa zo la maa yɛnwu kɛ Nyamenle a bahola ayɛ ye kpalɛ a: “Ahonle le mɛlɛbɛla tɛla debie biala, yezɛkye yebo zolɛ; nwane a kɛhola kɛde ɔ bo a? Medame [Gyihova] a meneɛnlea . . . ahonle nu a. Meboa awie biala, kɛmɔ ye ndenle ne mɔ de la, kɛmɔ ye nyɛleɛ ne si kɔ ye la.” (Gyɛ. 17:9, 10) “Ahonle ɛhye mɔɔ bɛneɛnlea nu la” ɛnvane ahonle kpalɛ ne mɔɔ ɔkola ɔsi mgbe nsa wɔ ɛvolɛ 70 anzɛɛ 80 anu la anwo. Emomu, ɛnee Gyihova ɛlɛka sɛkɛlɛneɛ adenle zo ahonle ne anwo edwɛkɛ. “Ahonle” ɛhye gyi ɛkɛ maa yɛ debie biala, yɛ atiakunluwɔzo, yɛ nzuzulɛ, yɛ adwenle, yɛ nyɛleɛ nee yɛ bodane. Ɛlɛ ahonle zɔhane bie. Nyamenle kola neɛnlea nu. Na ɛdawɔ noko ɛbahola wɔayɛ ye zɔ.

7. Edwɛkɛ boni a Gyɛlɛmaya hanle ye wɔ ye mekɛ zo Dwuuma dɔɔnwo ahonle nwo a?

7 Amaa yɛahola yɛayɛ neɛnleanu ɛhye la, yɛbahola yɛabiza yɛ nwo kɛ, ‘Kɛzi ɛnee Dwuuma dɔɔnwo mɔɔ bɛwɔ Gyɛlɛmaya mekɛ zo la sɛkɛlɛneɛ adenle zo ahonle ne de ɛ?’ Kolaa na yɛabua la, maa yɛzuzu edwɛkɛ ɛhye mɔɔ yɛ azibɛnwo mɔɔ Gyɛlɛmaya hanle la anwo: “Yizilayɛma kɔsɔɔti ɛtɛyɛle bɛ mrenyanu nzonlɛ wɔ ahonle nu.” Tɛ mrenyanu nzonlɛ ne mɔɔ ɛnee Dwuuma mrenya yɛ la anwo edwɛkɛ yɛɛ ɛnee ɔlɛka a, ɔluakɛ ɔhanle kɛ: “‘Nea! Mekɛ ne ɛlɛba,’ kɛ Gyihova se la ɛne, ‘na mebabua awie biala mɔɔ bɛyɛ ye mrenyanu nzonlɛ noko ɔyɛ ye debie kɛ bɛtɛyɛle ye mrenyanu nzonlɛ la ndɛne.’” Ɛnee Dwuuma mɔɔ bɛyɛ bɛ mrenyanu nzonlɛ la “ɛtɛyɛle bɛ  mrenyanu nzonlɛ wɔ ahonle nu.” (Gyɛ. 9:25, 26, NW) Duzu a ɛnee ɛhye kile a?

8, 9. Duzu a ɛnee ɔwɔ kɛ Dwuuma dɔɔnwo yɛ ye wɔ bɛ ahonle ne anwo a?

8 Debie bie mɔɔ Nyamenle zele Dwuuma kɛ bɛyɛ la boa yɛ maa yɛnwu mɔɔ edwɛkɛ bɛtɛyɛle “bɛ mrenyanu nzonlɛ wɔ ahonle nu” kile la: “Bɛye nwoma ne mɔɔ heda bɛ ahonle ne azo la, bɛmɛ Dwuda mrenya nee Gyɛlusalɛmma; na bɛ nyɛleɛ ɛtane ne mɔ ati, me ɛya ne anzɔ.” Noko nienwu a bɛ nyɛleɛ ɛtane ne bɔle ɔ bo a? Ɔbɔle ɔ bo wɔ bɛ ahonle nu. (Bɛgenga Maake 7:20-23.) Ɛhɛe, Nyamenle luale Gyɛlɛmaya anwo zo ɔlale deɛ mɔɔ ɔmanle Dwuuma yɛle ninyɛndane ne la ali wienyi. Bɛ ahonle ɛsolo yɛɛ ɔte atua. Ɛnee bɛ nzuzulɛ ɛnzɔ ɔ nye. (Bɛgenga Gyɛlɛmaya 5:23, 24; 7:24-26.) Nyamenle zele bɛ kɛ: “Bɛyɛ bɛ mrenyanu nzonlɛ bɛmaa Gyihova, na bɛye nwoma ne mɔɔ heda bɛ ahonle ne azo la.”—Gyɛ. 4:4, NW; 18:11, 12.

9 Zɔhane ati, ɛnee ɔwɔ kɛ Gyɛlɛmaya mekɛ zo Dwuuma maa bɛyɛ bɛ sɛkɛlɛneɛ adenle zo ahonle ne ayile—‘bɛyɛ bɛ mrenyanu nzonlɛ wɔ ahonle nu’—kɛ Mosisi mekɛ zo amra la. (Mɛla 10:16; 30:6) Ɛnee ‘nwoma ne mɔɔ heda bɛ ahonle ne azo mɔɔ bɛye la’ kile kɛ, bɛtwe bɛ nwo bɛavi debie biala mɔɔ maa bɛ ahonle ne solo mɔɔ bie a le bɛ nzuzulɛ, bɛ nganeɛdelɛ, anzɛɛ adwenle mɔɔ bɛfa bɛyɛ debie mɔɔ ɔtia Nyamenle bodane la anwo.— Gyi. 7:51.

‘AHONLE MƆƆ BAMAA YƐANWU’ YE

10. Duzu a ɔwɔ kɛ yɛyɛ mɔɔ Devidi yɛle nwolɛ neazo a?

10 Ɔwɔ kɛ yɛyɛ Nyamenle mo kɛ ɔboa yɛ ɔmaa yɛnwu kɛzi yɛ sɛkɛlɛneɛ adenle zo ahonle ne de la! Bie mɔ babiza kɛ, ‘asoo ɛhye fane Gyihova Alasevolɛ mɔɔ bɛwɔ ɛkɛ ɛnɛ la anwo ɔ?’ Menli dɔɔnwo mɔɔ wɔ asafo ne anu la ɛlɛsonle Gyihova wɔ nɔhalɛ nu yɛɛ bɛ ɛbɛla nwo te. Bɛnle kɛ tete Dwuuma mɔɔ ɛnee le kɛ ‘feege mɔɔ ɛnle kpalɛ fee la.’ Noko, bɛhakye mɔɔ Devidi zɛlɛle kɛ Gyihova ɛyɛ ɛmaa ye la: “Neɛnlea me nu, O Nyamenle, na nwu me ahonle nu! Sɔ me nea, na nwu me adwenle! Nea saa amumuyɛ bie wɔ me nu a.”—Edw. 17:3; 139:23, 24.

11, 12. (a) Duzu ati a ɔwɔ kɛ yɛ nuhua ko biala neɛnlea ye ahonle nu ɛ? (b) Duzu a Nyamenle ɛnrɛyɛ a?

11 Gyihova kpondɛ kɛ yɛ nuhua ko biala nee ye nyia abusuabɔlɛ kpalɛ. Gyɛlɛmaya hanle ye wɔ tenlenema anwo kɛ: ‘Gyihova sɔ bɛ nea na ɔnwu bɛ ahonle nee bɛ adwenle nu.’ (Gyɛ. 20:12) Saa Tumivolɛ ne neɛnlea tenlenenli bɔbɔ ahonle nu a, asoo ɔnle kɛ yɛdayɛ noko yɛneɛnlea yɛ ahonle nu ɔ? (Bɛgenga Edwɛndolɛ 11:5.) Saa yɛyɛ zɔ a, bie a yɛbanwu nyɛleɛ, bodane, anzɛɛ nganeɛdelɛ bie mɔɔ ɔwɔ kɛ yɛdi nwolɛ gyima a. Bie a yɛbanwu debie mɔɔ ɔle kɛ ‘nwoma mɔɔ heda yɛ ahonle ne azo’ wɔ sɛkɛlɛneɛ adenle zo mɔɔ ɔwɔ kɛ yɛye yɛfi ɛkɛ a. Ɛhye le ayile mɔɔ bɛyɛ ahonle ne wɔ sɛkɛlɛneɛ adenle zo. Kɛzi yɛbanleɛnlea yɛ sɛkɛlɛneɛ adenle zo ahonle ne anu ɛ? Na kɛ ɔkɛyɛ na yɛayɛ nzenzaleɛ mɔɔ hyia la ɛ?—Gyɛ. 4:4.

12 Nɔhalɛ nu: Gyihova ɛnrɛtinlitinli yɛ nwo zo kɛ yɛyɛ nzenzaleɛ. Ɔhanle ye wɔ ‘feege kpalɛ ne’ anwo kɛ “mebamaa bɛ  ahonle meamaa bɛanwu” me. Noko yeanga kɛ ɔbatinlitinli bɛ nwo zo yeamaa bɛahakyi bɛ ahonle. Ɔwɔ kɛ bɛdabɛ mumua ne bɛkpondɛ ahonle zɛhae bɛnyia ɛhulolɛ kɛ bɛbanwu Nyamenle. Asoo tɛ zɔhane ala a ɔwɔ kɛ yɛdayɛ noko yɛyɛ a?

Saa yɛneɛnlea yɛ ahonle nu yɛye atiakunluwɔzo ɛtane yɛfi nu a yɛbanyia nyilalɛ dɔɔnwo

13, 14. Adenle boni azo a Keleseɛnenli ahonle bahola aboda ye a?

13 Gyisɛse hanle kɛ: “Ahonle nu yɛɛ adwenle ɛtane mɔɔ le kɛ sonla ɛhunlɛ, awuvolɛvalɛ, adwɔmanebɔlɛ, awule ɛyɛlɛ, daselɛ adalɛ ɛlilɛ, yɛɛ nwondomgbɔ ɛpɛlɛ vi ba a.” (Mat. 15:19) Saa adiema bie mɔɔ ɛkpunli ye ahonle la sɛkye agyalɛ anzɛɛ bɔ adwɔmane na yeanlu ɔ nwo a, Nyamenle ɛlolɛ bahola avi ɔ nwo zo bɔkɔɔ. Noko, saa awie ɛtɛyɛle ɛtane kpole zɛhae bɔbɔ a, ɔbahola yeanyia atiakunluwɔzo ɛtane wɔ ye ahonle nu. (Bɛgenga Mateyu 5:27, 28.) Ɛhye ati a ɔwɔ kɛ yɛneɛnlea yɛ ahonle nu la. Asoo ɛlɛ awie mɔɔ ɛ nee ye bɛ awodeɛ ɛnle ko la anwo atiakunluwɔzo mɔɔ Nyamenle anye ɛnlie nwo la wɔ wɔ ahonle nu mɔɔ ɔwɔ kɛ ɛye ɛfi nu ɔ?

14 Anzɛɛ adiema ‘ɛnrɛhu sonla’ ɛdeɛ, noko ɔbahola yeava ɔ diema anwo edwɛkɛ yeazie ye nu yeamaa yeahakyi ɛkpɔlɛ. (Sɛlɛ. 19:17) Asoo ɔbabɔ mɔdenle yeaye nganeɛdelɛ ɛhye yeavi ye ahonle nu ɔ?—Mat. 5:21, 22.

15, 16. (a) Kɛzi Keleseɛnenli bahola ayɛ awie mɔɔ “ɔtɛyɛle ye mrenyanu nzonlɛ wɔ ahonle nu” ɛ? (b) Duzu ati a ɛsuzu kɛ Gyihova ɛnrɛlie bɛdabɛ mɔɔ ‘bɛtɛyɛle bɛ mrenyanu nzonlɛ wɔ ahonle nu’ la ɛnrɛdo nu ɛ?

15 Ɔyɛ yɛ fɛ kɛ Keleseɛnema dɔɔnwo ɛnlɛ ‘ahonle zɛhae’ bie la. Noko akee, Gyisɛse eza hanle “adwenle ɛtane” nwo edwɛkɛ. Ɛhye a le nzuzulɛ anzɛɛ subane mɔɔ kola sɛkye awie ɛbɛlabɔlɛ la. Kɛ neazo la, awie bahola ade nganeɛ kɛ nɔhalɛ mɔɔ ɔbali yeamaa ye mbusuafoɔ la anwo hyia tɛla debie biala. Nɔhalɛ, Keleseɛnema ɛngulo kɛ “bɛ ti bayɛ se” wɔ bɛ mbusuafoɔ anwo kɛmɔ bie mɔ yɛ ye wɔ “awieleɛ mekɛ” ɛhye anu la. (2 Tem. 3:1, 3) Noko yɛbahola yɛayɛ yeamaa yeabo zo wɔ nɔhalɛ mɔɔ yɛdi yɛamaa yɛ abusua ne la anu. Menli dɔɔnwo edwɛkɛ a le kɛ “mogya bɔ ɛnyane.” Yemɔti, saa bɛ busuanli bie fa awie anwo ɛya a ɔwɔ kɛ bɛdabɛ noko bɛfa ahenle anwo ɛya. Suzu mɔɔ Daena amediema ne mɔ yɛle la anwo nea. (Mɔl. 34:13, 25-30) Nganeɛdelɛ ɛtane ne mɔɔ ɛnee wɔ Abesalɛm noko ahonle nu la manle ɔhunle ɔ diema Amenɔn. (2 Sam. 13:1-30) Asoo tɛ “adwenle ɛtane” a manle bɛyɛle ɛhye mɔ ɔ?

16 Menli dɔɔnwo fa ɛya kpole wɔ mekɛ mɔɔ awie kɛyɛ bɛ ɛtane anzɛɛ bɛsuzu kɛ yeyɛ bɛ busuanli bie ɛtane la. Bie a  bɛbahwe bɛ nwo bɛavi ɔ nwo anzɛɛ bɛnrɛvɛlɛ ye wɔ bɛ sua nu. (Hib. 13:1, 2) Noko Keleseɛnenli mɔɔ kulo ɔ mediema la ɛnrɛyɛ ɛhye. Ɔluakɛ zɔhane ɛyɛlɛ ɛngile ɛlɔlɛ. Gyihova mɔɔ sɔ ahonle nea la banwu kɛ ‘bɛtɛyɛle bɛ mrenyanu nzonlɛ wɔ ahonle nu.’ (Gyɛ. 9:25, 26) Bɛhakye menli mɔɔ Gyihova dule bɛ folɛ kɛ: “Bɛye nwoma ne mɔɔ heda bɛ ahonle ne azo la.”—Gyɛ. 4:4, NW.

BƐNYIA ‘AHONLE MƆƆ BAMAA BƐANWU’ NYAMENLE LA

17. Kɛzi Gyihova anwo ɛzulolɛ boa maa yɛnyia ahonle kpalɛ ɛ?

17 Saa ɛneɛnlea wɔ ahonle nu a, bie a ɛbanwu kɛ ɛnli Gyihova edwɛkɛ zo ndɛndɛ. Yemɔti, wɔ adenle bie azo ‘bɛtɛyɛle wɔ mrenyanu nzonlɛ wɔ ahonle nu.’ Ɔbahola yeara ye kɛ ɛsulo adwenle mɔɔ menli bɛanyia ye wɔ ɛ nwo la. Anzɛɛ ɛkpondɛ kɛ ɛdie duma anzɛɛ ɛnyia ɛ nwo. Anzɛɛ, ɔdwu mekɛ ne bie bɔbɔ a ɛyɛ anzosesebɛ ekyii ɛyɛ mɔɔ ɛdawɔ mumua ne ɛkulo la, noko tɛ ɛngomekye ɔ. (Gyɛ. 7:24; 11:8) Gyɛlɛmaya hɛlɛle kɛ ye mekɛ zo Dwuuma mɔɔ ɛnli nɔhalɛ la le “menli anzosesebɛ na bɛte atua.” Ɔvale ɔzɔle zolɛ kɛ: “Bɛnga ye bɛ ahonle nu bɔbɔ kɛ, ‘Bɛmaa yɛzulo [Gyihova] yɛ Nyamenle ne mɔɔ tɔ ezule nee nyenyensuo’” la. (Gyɛ. 5:23, 24) Asoo ɛhye ɛngile kɛ kyesɛ yɛnyia Gyihova anwo ɛzulolɛ na yɛahola yɛaye ‘nwoma ne mɔɔ heda yɛ ahonle ne azo la’ yɛavi ɛkɛ ɔ? Ɛzulolɛ kpalɛ zɛhae bamaa yɛanyia ahonle mɔɔ ɔkulo kɛ ɔyɛ mɔɔ Nyamenle kpondɛ kɛ yɛyɛ la.

18. Ɛwɔkɛ boni a Gyihova ɛbɔ bɛdabɛ mɔɔ bɛwɔ ngyekyeleɛ fofolɛ ne anu la ɛ?

18 Saa yɛbɔ yɛ nwo mɔdenle a, Gyihova bamaa yɛ ‘ahonle mɔɔ bamaa yɛanwu’ ye la. Ɔbɔle bɛdabɛ mɔɔ bɛkpokpa bɛ mɔɔ bɛwɔ ngyekyeleɛ fofolɛ ne anu la ɛwɔkɛ kɛ: “Mebava me mɛla ne meawula bɛ nuhua, mebahɛlɛ ye bɛ ahonle nu; mebayɛ bɛ Nyamenle, na bɛdabɛ noko bɛayɛ me menli.” Na kɛ ɔkɛyɛ na bɛanwu ye ɛ? Ɔvale ɔzɔle zo kɛ: “Bɛ nuhua biala ɛnrɛhilehile ɔ gɔnwo anzɛɛ ɛnrɛze adiema kɛ, ‘Maa mengile wɔ Nyamenle,’ ɔluakɛ bɛ kɔsɔɔti, kpanyinli o, kakula o, bɛbanwu me. Mebava bɛ ɛtane meahyɛ bɛ, yɛɛ menrɛhakye bɛ ɛtane ne mɔ mɔɔ bɛyɛ la bieko.”—Gyɛ. 31:31-34. *

19. Anyelazo kɛnlɛma boni a wɔ ɛkɛ maa nɔhalɛ Keleseɛnema a?

19 Saa ɛkulo kɛ ɛnyia ngyekyeleɛ fofolɛ ne azo nvasoɛ dahuu wɔ anwuma anzɛɛ azɛlɛ ye azo a, kyesɛ ɛnwu Gyihova na ɛboka ye menli ne anwo. Noko saa yɛbanyia nyilalɛ ɛhye a, kyesɛ bɛdua Kelaese afɔlebɔlɛ ne azo bɛfa yɛ ɛtane bɛkyɛ yɛ. Bɛbahola bɛava yɛ ɛtane bahyɛ yɛ yemɔti ɔwɔ kɛ yɛdayɛ noko yɛfa awie mɔ ɛtane yɛkyɛ bɛ, bɔbɔ bɛdabɛ mɔɔ bɛyɛ ɛtane kpole bɛtia yɛ la. Ɔwɔ kɛ yɛbɔ mɔdenle yɛye awie mɔ anwo ɛya yɛfi yɛ ahonle nu. Ɛhye bahile kɛ yɛkulo kɛ yɛsonle Gyihova na eza yɛnwu ye kpalɛ. Saa yɛyɛ ɛhye a, yɛbayɛ kɛ menli mɔɔ Gyihova luale Gyɛlɛmaya anwo zo hanle ɛhye la: “Bɛbakpondɛ me, na bɛbanwu me. Saa bɛfa bɛ ahonle muala bɛkpondɛ me a, bɛbanwu me.”—Gyɛ. 29:13, 14.

^ ɛden. 18 Bɛhilehile ngyekyeleɛ fofolɛ ne anu wɔ Nyamenle Edwɛkɛ Mɔɔ Gyɛlɛmaya Ɛha Ɛhile Yɛ buluku ne tile 14.