Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Mmamaa Debie Biala Si Wɔ Anyunlunyia Ɛnyianlɛ Adenle

Mmamaa Debie Biala Si Wɔ Anyunlunyia Ɛnyianlɛ Adenle

‘Mɔɔ le bɛlɛvo la banyia anyunlunyia.’—MRƐ. 29:23.

1, 2. (a) Duzu a aneɛ mɔɔ bɛlumuale bɛvale bɛhɛlɛle Baebolo ne la edwɛkɛ agbɔkɛ mɔɔ bɛhile ɔ bo enililɛ anzɛɛ “anyunlunyia” la kile a? (b) Kpuyia boni mɔ a yɛbazuzu nwo wɔ edwɛkɛ ɛhye anu a?

SAA ɛte edwɛkɛkpɔkɛ “anyunlunyia” a, duzu a ba wɔ adwenle nu a? Asoo abɔdeɛ kɛnlɛmaleɛ ne ɔ? (Edw. 19:1) Anzɛɛ ayɛlɛyelɛ nee anyunlunyia mɔɔ bɛfa bɛmaa menli mɔɔ ɛnyia bɛ nwo, ze nrɛlɛbɛ, anzɛɛ ɛyɛ ninyɛne mgbole la ɔ? Wɔ aneɛ mɔɔ bɛlumuale bɛvale bɛhɛlɛle Baebolo ne la anu, edwɛkɛ agbɔkɛ mɔɔ bɛhile ɔ bo “anyunlunyia” la kile debie mɔɔ ɔyɛ ɛlomboɛ. Wɔ tete ne mɔɔ ɛnee bɛfa bulalɛ a bɛpɛ ezukoa la, ezukoa ne ɛlomboɛ yɛɛ ɛnee kile kɛzi ɔsonle bolɛ a. Edwɛkɛ agbɔkɛ mɔɔ bɛfa bɛkile debie mɔɔ ɔyɛ ɛlomboɛ la eza kile kɛ deɛ ne sonle bolɛ, ɔle kɛnlɛma, anzɛɛ ɔsɔ ɛnyelɛ.

2 Bie a yɛ nye balie tumi, gyinlabelɛ, anzɛɛ duma mɔɔ awie ɛlie la anwo ɛdeɛ, noko duzu a Nyamenle kpondɛ kɛ menli yɛ a? Ngɛlɛlera ne ka kɛ Nyamenle fa anyunlunyia maa menli. Kɛ neazo la, Mrɛlɛbulɛ 22:4 ka kɛ: ‘Mɛlɛbɛnwoaze nee Gyihova ɛzulolɛ nwo ahatualɛ a le anwonyia, enililɛ anzɛɛ anyunlunyia, yɛɛ ngoane.’ Ɛdoavolɛ Gyemise noko hɛlɛle kɛ: “Bɛbɛlɛ bɛ nwo aze wɔ Awulae anyunlu, na ɔkɛmaa bɛ zo.” (Gye. 4:10) Anyunlunyia boni a Gyihova fa maa menli a? Duzu a bahola azi yɛ adenle wɔ ye ɛnyianlɛ nwo a? Na kɛzi yɛbahola yɛaboa awie mɔ yɛamaa bɛanyia anyunlunyia ɛhye ɛ?

3-5. Ndenle boni mɔ azo a Gyihova wula yɛ anyunlunyia a?

3 Edwɛndolɛnli ne vale anwodozo hanle kɛ Gyihova bazɔ ɔ sa fema ne anu na yeahile ye adenle yeahɔ nɔhalɛ anyunlunyia nu. (Bɛgenga Edwɛndolɛ 73:23, 24.) Kɛzi Gyihova yɛ ɛhye ɛ? Gyihova dua ndenle ngakyile zo ɔdi ye azonvolɛ mɔɔ bɛbɛlɛ bɛ nwo aze la eni ɔfa ɔwula bɛ anyunlunyia. Ɔmaa bɛ nrɛlɛbɛ ɔmaa bɛnwu ye ɛhulolɛdeɛ. (1 Kɔl. 2:7) Ɔdi bɛdabɛ mɔɔ  bɛtie ye edwɛkɛ na bɛdi zo la eni ɔmaa bɛ nee ye nyia abusuabɔlɛ.—Gye. 4:8.

4 Gyihova eza ɛva Keleseɛnema ɛzonlenlɛ gyima ne mɔɔ anyunlunyia kpole wɔ nu la ɛwula ye azonvolɛ asa. (2 Kɔl. 4:1, 7) Gyima ɛhye maa yɛnyia anyunlunyia. Gyihova ɛbɔ bɛdabɛ mɔɔ bɛfa bɛ ɛzonlenlɛ gyima ne bɛye ye ayɛlɛ na bɛboa awie mɔ la ɛwɔkɛ kɛ: “Mebali menli mɔɔ di me eni la eni.” (1 Sam. 2:30) Gyihova ɛmaa bɛnyia duma kpalɛ yeva yeli bɛ eni, na ɔda ali kɛ Nyamenle azonvolɛ mɔɔ ɛha la bɛaha bɛ nwo edwɛkɛ kpalɛ.—Mrɛ. 11:16; 22:1.

5 Duzu a bɛdabɛ mɔɔ ‘bɛfa bɛ rɛle bɛwula Gyihova anu na bɛdua ye adenle ne anu la,’ banyia ye kenlebie a? Bɛbɔ bɛ ɛwɔkɛ kɛ: ‘Gyihova bakpogya bɛ zo yeamaa bɛanyia azɛlɛ ne; bɛbanwu amumuyɛma ɛzɛkyelɛ.’ (Edw. 37:34) Bɛ nye la kɛ bɛbanyia dahuu ngoane. Ɛhye le enililɛ mɔɔ ɔnlɛ ye ɛsaso.—Edw. 37:29.

‘TƐ MENLI ANYUNLUNYIA YƐƐ MEKPONDƐ A’

6, 7. Duzu ati a ɛnee menli dɔɔnwo ɛngulo kɛ bɛdie Gyisɛse bɛdi ɛ?

6 Duzu a bahola azi yɛ adenle wɔ anyunlunyia mɔɔ Gyihova kpondɛ kɛ ɔfa ɔmaa yɛ la anwo a? Nuhua ko a le kɛ yɛbamaa menli mɔɔ ɛnzulo Nyamenle la edwɛkɛ nwo ahyia yɛ somaa. Suzu mɔɔ ɛzoanvolɛ Dwɔn hɛlɛle ye wɔ mgbanyima bie mɔɔ ɛnee wɔ Gyisɛse mekɛ zo anwo la anwo nea: ‘Mgbanyima ne mɔ anu dɔɔnwo liele Gyisɛse lile; na Falasiima ati bɛangola nwolɛ edwɛkɛ ka bagua nu anrɛɛ bɛkɛye bɛ ali bɛkɛvi nyianu sua ne anu. Bɛkulo menli anyunlunyia bɛtɛla Nyamenle anyunlunyia.’ (Dwɔn 12:42, 43) Saa mgbanyima ɛhye mɔ ammaa Falasiima ne edwɛkɛ nwo angyia bɛ somaa a anrɛɛ nea kɛzi ɔbaboa bɛ a!

7 Ɛnee Gyisɛse ɛlumua ɛha deɛmɔti menli dɔɔnwo ɛnrɛlie ye ɛnrɛli la anwo edwɛkɛ. (Bɛgenga Dwɔn 5:39-44.) Ɛnee Yizilayɛma ɛva ɛvolɛ dɔɔnwo ɛhendɛ Mɛzaya ne. Ɔbahola yeara ye kɛ mekɛ mɔɔ Gyisɛse bɔle ye ngilehilelɛ ne abo la, bie mɔ nwunle kɛ Daneɛle ngapezo ne mɔɔ fane mekɛ mɔɔ Kelaese ne bara anwo la ɛdwu. Siane ekyi pɛle nu mɔɔ ɛnee Dwɔn Sɔnevolɛ ne ɛlɛka edwɛkɛ ne la, menli dɔɔnwo hanle kɛ: ‘Bekezɛ yemɔ a le Mɛzaya ne.’ (Luku 3:15) Mɛzaya ne mɔɔ bɛva mekɛ dɔɔnwo bɛnlea ye ade la wɔ bɛ avinli ɛlɛkilehile. Noko menli mɔɔ ze Mɛla ne la anlie ye. Gyisɛse kile deɛmɔti bɛyɛle zɔ anu la, ɔhanle kɛ: ‘Bɛkpondɛ kɛ bɛwula bɛ ngome bɛ nwo ngoko ngoko anyunlunyia, na bɛmpele bɛnlie anyunlunyia bɛnvi Nyamenle kokye ne ɛkɛ, na ɛnee kɛ ɔkɛyɛ na bɛalie me bɛali ɛ?’

8, 9. Fa kɛnlaneɛ nwo ndonwo ne kilehile kɛzi menli anyunlunyia bahola azi Nyamenle anyunlunyia ne adenle la anu.

8 Yɛbahola yɛava anyunlunyia yɛado kɛnlaneɛ nwo yɛava yɛahilehile kɛzi sonla anyunlunyia kola si Nyamenle anyunlunyia adenle la anu. Nwɔlɔra dɔɔnwo wɔ anwomanyunlu. Ɛkakye mekɛ mɔɔ li awieleɛ mɔɔ ɛnleanle anwomanyunlu nɔsolɛ nu ɛnwunle kɛzi nwɔlɔra ne mɔ ta la ɔ? ‘Nwɔlɔra ne mɔ ngɛnlɛma’ anzɛɛ bɛ anyunlunyia yɛ azibɛnwo. (1 Kɔl. 15:40, 41) Noko saa ɛwɔ suakpole mɔɔ ngɛnlaneɛ dɔɔnwo wɔ zo la azo na ɛnea anwomanyunlu a kɛzi ɛnwu bɛ ɛ? Suakpole ne azo ngɛnlaneɛ ne ɛmmaa ɛnnwu nwɔlɔra ne mɔ ɛdalɛ ne kpalɛ! Asoo ngɛnlaneɛ mɔɔ bɛwɔ ndenle ne mɔ anloa, nwɔhoalilɛ ɛleka ne mɔ, nee azua ne mɔ anu la anloa yɛ se anzɛɛ le ngɛnlɛma tɛla nwɔlɔra ne mɔ ɛdalɛ ne la ati ɔ? Kyɛkyɛ! Kɛmɔ suakpole ne azo ngɛnlaneɛ ne mɔ bikye yɛ na bɛwa yɛ nye la ati, bɛmmaa yɛnwu nwɔlɔra ne mɔ ɛdalɛ ne kpalɛ. Saa yɛbahola yɛanwu kɛzi nwɔlɔra ne mɔ ngɛnlɛma de la a, kyesɛ yɛfi ɛleka mɔɔ ngɛnlaneɛ mɔɔ menli ɛyɛ la wɔ la.

9 Yemɔti, saa yɛdi ewiade anyunlunyia  nzi a, yɛnrɛnyia anyunlunyia kpalɛ ne mɔɔ Gyihova kpondɛ kɛ ɔfa ɔmaa yɛ la. Menli dɔɔnwo ɛndie Belemgbunlililɛ ne anwo edwɛkɛ ne ɔluakɛ bɛsulo adwenle mɔɔ bɛ gɔnwo mɔ anzɛɛ bɛ mbusuafoɔ bɛanyia ye wɔ bɛ nwo la. Asoo Nyamenle azonvolɛ noko bɛahola akpondɛ menli nyunlu anyunlunyia? Fa ye kɛ bɛha bɛhile kpavolɛ bie kɛ ɔhɔha edwɛkɛ ne wɔ ɛleka bie mɔɔ menli dɔɔnwo ze ye noko bɛnze kɛ ɔle Gyihova Dasevolɛ la. Asoo ɛzulolɛ bamaa yeazia? Na saa bɛgolo awie anwo wɔ ye teokelase bodane nwo ɛ? Asoo ɔbamaa menli mɔɔ sunsum nu ninyɛne nwo ɛngyia bɛ la azɛkye ye adwenle? Anzɛɛ bie a Keleseɛnenli bie ɛyɛ ɛtane kpole bie. Asoo gyinlabelɛ mɔɔ ɔlɛ ye wɔ asafo ne anu mɔɔ ɔbavi ɔ sa nee nyane mɔɔ menli mɔɔ bɛkulo ye edwɛkɛ bɛali la ati, ɔbavea ye ɛtane ne azo ɔ? Saa agɔnwolɛvalɛ mɔɔ ɔ nee Gyihova lɛ la yɛɛ nwolɛ hyia ye kpalɛ a, ɔbavɛlɛ asafo ne anu “mgbanyima” yeamaa bɛaboa ye.—Bɛgenga Gyemise 5:14-16.

10. (a) Saa yɛdwenle kɛzi menli babu yɛ la anwo somaa a kɛzi ɔbaha yɛ nyɛleɛ ɛ? (b) Yɛbɛlɛ yɛ nwo aze a duzu a yɛbanyia a?

10 Bie a yɛlɛbɔ mɔdenle yeadwu Keleseɛnema ɛnyinlɛ nwo na yɛ gɔnwo diedinli bie ɛdu yɛ folɛ. Saa yɛfi nɔhalɛlilɛ nu yɛdie ye folɛdulɛ ne yɛto nu na yɛammaa anwomemaazo, sonla nyunlu ɛlolɛ, anzɛɛ yɛanva edwɛkɛ yɛanye yɛ nwo yɛ nloa a, ɔbaboa yɛ. Anzɛɛ fa ye kɛ ɛ nee ɛ gɔnwo diedinli bie ɛlɛyɛ gyima bie. Asoo ɛbamaa ahenle mɔɔ bɛbava nzuzulɛ kpalɛ mɔɔ ɛbava wɔamaa nee gyima ɛsesebɛ mɔɔ ɛbayɛ anwo nganvolɛ bɛamaa ye la agyegye wɔ? Saa ɛwɔ tɛnlabelɛ ɛhye mɔ bie anu a, nwu ye kɛ: “Mɔɔ le bɛlɛvo la banyia ɔ nyunlu [anzɛɛ, anyunlunyia].”—Mrɛ. 29:23.

11. Kɛzi ɔwɔ kɛ yɛte nganeɛ wɔ nganvolɛ nwo ɛ, na duzu ati ɔ?

11 Ɔwɔ kɛ neavolɛma nee menli mɔɔ “anye bolo” kɛ bɛkɛnyia nwolɛ adenle wɔ asafo ne anu la noko nea boɛ wɔ menli nganvolɛ nwo. (1 Tem. 3:1; 1 Tɛs. 2:6) Saa bɛkanvo adiema bie wɔ gyima kpalɛ bie mɔɔ ɔkɛyɛ la anwo a, duzu a ɔwɔ kɛ ɔyɛ a? Ɔda ali kɛ ɔnrɛzi ngakyelɛ sɛkɛlɛneɛ ɔnrɛwula ɔdaye ɔ nwo anyunlunyia kɛmɔ Belemgbunli Sɔɔlo yɛle la. (1 Sam. 15:12) Noko akee, asoo ɔbalie yeado nu kɛ Gyihova ɛlolɛ yɛɛ ɛmaa yehola yeyɛ zɔ a, na Nyamenle nyilalɛ nee ye moalɛ ala a bamaa yeawie ye boɛ kenlebie ɔ? (1 Pita 4:11) Kɛzi yɛte nganeɛ wɔ nganvolɛ nwo la maa anyunlunyia mɔɔ yɛkulo la da ali.—Mrɛ. 27:21.

“BƐLƐYƐ MƆƆ BƐ ZE KPALƐ NE KULO LA”

12. Duzu a ammaa Dwuuma bie mɔ andie Gyisɛse edwɛkɛ ne ɛ?

12 Debie bieko mɔɔ ɔbahola yeazi anyunlunyia mɔɔ yɛbanyia yɛavi Nyamenle ɛkɛ adenle la a le yɛ atiakunluwɔzo. Atiakunluwɔzo ɛtane kola si yɛ adenle wɔ nɔhalɛ ne anwo. (Bɛgenga Dwɔn 8:43-47.) Gyisɛse hanle hilele Dwuuma bie mɔ kɛ bɛngulo kɛ bɛkɛdie ye edwɛkɛ ɔluakɛ ‘bɛkulo kɛ bɛyɛ mɔɔ bɛ ze Abɔnsam kulo la.’

13, 14. (a) Duzu a neɛnleanuma ɛha ye wɔ yɛ adwenle ne nee menli ɛdendɛlɛ nwo a? (b) Nwane a yɛkulo kɛ yɛtie ye a?

13 Ɔdwu mekɛ ne bie a edwɛkɛ mɔɔ yɛkpondɛ kɛ yɛte la yɛɛ yɛtie a. (2 Pita 3:5) Gyihova bɔle yɛ mɔɔ yɛkola yɛye yɛ adwenle yɛfi edwɛkɛ mɔɔ yɛngulo kɛ yɛtie la azo a. Gyinla ekyii na fa wɔ adwenle kɔ alɛra ngakyile mɔɔ ɛbade ye kɛkala la azo. Bie a wɔanva wɔ adwenle wɔangɔ nuhua dɔɔnwo azo wɔ mekɛ ekyi mɔɔ ɛze ɛhɔ la anu. Ndinli dɔɔnwo ne mɔɔ wɔ wɔ adwenle ne anu la kola boa wɔ maa ɛfa wɔ adwenle ɛsie debie ko azo na eza ɛtie alɛra fofolɛ. Noko menli mɔɔ yɛ neɛnleanu la ɛnwu kɛ saa awie kpondɛ kɛ ɔtie menli dɔɔnwo mɔɔ ɛlɛtendɛ la wɔ mekɛ ko ne ala anu a yemɔ ye ɛyɛlɛ ɛnla aze. Ɛhye kile  kɛ saa menli nwiɔ ɛlɛtendɛ wɔ mekɛ ko ne ala anu a, ɔwɔ kɛ ɛkpa ko mɔɔ ɛbamaa wɔ adwenle ahɔ zo la. Mɔɔ ɛkulo kɛ ɛtie la yɛɛ ɛbakpa a. Dwuuma mɔɔ ɛnee kulo kɛ yɛ mɔɔ bɛ ze Abɔnsam kulo la andie Gyisɛse.

14 Yɛnyia nrɛlaleɛ yɛfi ‘nrɛlɛbɛvolɛ sua’ nu nee ‘koasea sua nu.’ (Mrɛ. 9:1-5, 13-17) Nrɛlɛbɛvolɛ nee koasea tea nu fɛlɛ yɛ wɔ sɛkɛlɛneɛ adenle zo dahuu, ɛhye ati, ɔwɔ kɛ yɛkpa mɔɔ yɛbadie ye la. Nuhua ne boni a yɛbalie ye ɛvɛlɛlɛ ne azo a? Ahenle mɔɔ yɛkpondɛ kɛ yɛyɛ ye ɛhulolɛdeɛ la. Gyisɛse mboane ne tie ɔ ne na bɛdi ɔ nzi. (Dwɔn 10:16, 27) Bɛle “nɔhalɛ ne ɛdeɛ.” (Dwɔn 18:37) ‘Bɛnze ɛyɛvolɛ ne.’ (Dwɔn 10:5) Menli ɛhye mɔ mɔɔ bɛbɛlɛ bɛ nwo aze la nyia anyunlunyia.—Mrɛ. 3:13, 16; 8:1, 18.

‘ƆLE ANYUNLUNYIA ƆMAA BƐ’

15. Kɛzi Pɔɔlo amaneɛnwunlɛ ne ‘yɛle anyunlunyia’ manle awie mɔ ɛ?

15 Mɔdenle mɔɔ yɛbɔ yɛyɛ Gyihova ɛhulolɛdeɛ la boa awie mɔ ɔmaa bɛnyia anyunlunyia. Pɔɔlo hɛlɛle Ɛfɛsɛse asafo ne kɛ: “Mesɛlɛ bɛ kɛ bɛmmamaa amaneɛ mɔɔ melɛnwu ye wɔ bɛ ti la bɔ bɛ rɛle; ɔle [anyunlunyia] ɔmaa bɛ.” (Ɛfɛ. 3:13) Adenle boni azo a ɛnee Pɔɔlo amaneɛnwunlɛ ne ‘le anyunlunyia’ maa Ɛfɛsɛsema ɛ? Pɔɔlo yiale sɔnea dɔɔnwo wɔ Ɛfɛsɛse noko kɛzi ɔdoale zo ɔzonlenle bɛ la manle bɛnwunle kɛ nwolɛ adenle mɔɔ bɛnyia ye kɛ Keleseɛnema la sonle bolɛ na ɔnle kɛ bɛbu ye debie ekyi. Saa Pɔɔlo asa nu dole wɔ amaneɛnwunlɛ ne anu a, asoo anrɛɛ ɔnrɛhile kɛ abusuabɔlɛ mɔɔ bɛ nee Gyihova lɛ, bɛ ɛzonlenlɛ gyima ne, nee bɛ anyelazo ne ɛnle mgbane ɔ? Pɔɔlo luale neazo mɔɔ ɔyɛle la azo ɔmanle ɔlale ali kɛ afɔle biala mɔɔ ɔwɔ kɛ yɛbɔ na yɛayɛ Keleseɛnema la fɛta.

16. Amaneɛnwunlɛ boni a Pɔɔlo hɔle nu wɔ Lesetela a?

16 Maa yɛnlea kɛzi Pɔɔlo mɔdenlebɔlɛ ne nee ye kpundiigyinlanlɛ ne boale la. Gyima ne 14:19, 20 bɔ amaneɛ kɛ: “Dwuuma bie vi Anteɔko mɔɔ wɔ Paesedea maanzinli nu nee Ayekoneɛm la rale, bɛralile menli ne anzo bɛhɔle bɛ afoa na bɛzile Pɔɔlo awolɛ bɛmanle ɔ nye zo bulule; bɛhwenle ye bɛhɔdole sua ne kandiba, ɛnee bɛdwenle kɛ yewu. Na mɔɔ diedima ne rabɔle yiale ye la, ɔ nye rale zolɛ na ɔdwazole ɔ nee bɛ hɔle sua nu. Aleɛ hyenle la ɔ nee Baanabase bɛhɔle Dɛbi.” Fa ye kɛ anrɛɛ ɛwu na ye alehyenlɛ nu wɔdia mayɛle 60 (anzɛɛ km 100) adenle!

17, 18. (a) Adenle boni azo a Temɔte lile amaneɛ mɔɔ Pɔɔlo nwunle ye wɔ Lesetela la anzi a? (b) Tumi boni a Pɔɔlo kpundiigyinlalɛ ne nyianle ye wɔ Temɔte anwo zo a?

17 Ɛnee Temɔte boka “diedima” mɔɔ boale Pɔɔlo la anwo ɔ? Ɛzoanvolɛma Gyima buluku ne anga noko ɔbahola yeara  ye kɛ ɛnee ɔboka nwo. Suzu mɔɔ Pɔɔlo hɛlɛle ye wɔ Temɔte kɛlata ne mɔɔ ɔtɔ zolɛ nwiɔ anu la anwo nea: “Wɔli me ngilehilelɛ, me nyɛleɛ nee me ɛbɛlabɔlɛ nu bodane ne anzi; . . . mɔɔ zile me nwo zo wɔ Anteɔko, [bɛdule me wɔ suakpole ne azo] Ayekoneɛm [anrɛɛ bɛsi me awolɛ bɛahu me] yɛɛ Lesetela [awolɛ mɔɔ bɛzile me] la amuala, ɛzulolɛ mɔɔ menwunle ye la le kpole. Noko Awulae yele me vile ɔ muala anu.”—2 Tem. 3:10, 11; Gyi. 13:50; 14:5, 19.

18 Temɔte nwunle ‘nyɛleɛ ɛhye mɔ’ kɔsɔɔti na ɛnee ɔze Pɔɔlo kpundiigyinlanlɛ ne anwo edwɛkɛ dɔɔnwo. Temɔte zukoale ninyɛne dɔɔnwo vile Pɔɔlo ɛkɛ. Mekɛ mɔɔ Pɔɔlo hɔle Lesetela la, ɔnwunle kɛ Temɔte le Keleseɛnenli mɔɔ yɛ neazo kpalɛ na ɛnee “mediema mɔɔ wɔ Lesetela nee Ayekoneɛm la kanvo [ye] kpole kpalɛ.” (Gyi. 16:1, 2) Yeangyɛ, bɛvale gyima dɔɔnwo bɛwulale Temɔte asa.—Fel. 2:19, 20; 1 Tem. 1:3.

19. Kɛzi yɛ kpundiigyinlanlɛ bahola aboa awie mɔ ɛ?

19 Mɔdenle mɔɔ yɛbɔ yɛyɛ Nyamenle ɛhulolɛdeɛ la kola boa awie mɔ zɔhane ala, titile ngakula ɔluakɛ bɛ nuhua dɔɔnwo bɛanyi arayɛ Nyamenle azonvolɛ mɔɔ bɛbɔ mɔdenle kpalɛ. Tɛ kɛzi yɛdi daselɛ la angome a ngakula nea na bɛsukoa a, emomu, kɛzi yɛdi ɛbɛlabɔlɛ nu ngyegyelɛ nwo gyima la noko. Pɔɔlo ‘lile debie biala ɔ kunlu’ amaa menli mɔɔ bali nɔhalɛ la kɔsɔɔti anyia “ngoanelielɛ ne nee anyunlunyia ne mɔɔ ɛnlɛ awieleɛ la.”—2 Tem. 2:10.

Ngakula anye die Keleseɛne mgbanyima mɔdenlebɔlɛ nwo

20. Duzu ati a ɔwɔ kɛ yɛtoa zo yɛkpondɛ anyunlunyia ne mɔɔ Nyamenle fa maa la ɛ?

20 Yemɔti, asoo ɔnle kɛ yɛtoa zo ‘yɛkpondɛ anyunlunyia ne mɔɔ vi Nyamenle kokye ne ɛkɛ la ɔ?’ (Dwɔn 5:44; 7:18) Adenle biala azo! (Bɛgenga Wulomuma 2:6, 7.) Gyihova bamaa ‘menli mɔɔ ɛlɛkpondɛ ye anyunlunyia ne la ngoane mɔɔ ɛnlɛ awieleɛ.’ Bieko, yɛ “abotane nee kpalɛyɛlɛ” maa bie mɔ gyinla kpundii, na bɛbanyia nvasoɛ dahuu. Ɛhye ati, mmamaa debie biala si wɔ adenle wɔ anyunlunyia ne mɔɔ Nyamenle fa maa mɔɔ ɛbanyia la anwo.