Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Bɛboa Gyihova Banebɔlɛ Bɔnza Ne Anu

Bɛboa Gyihova Banebɔlɛ Bɔnza Ne Anu

‘Gyihova nee maanle maanle ne mɔ baho, kɛmɔ ɔyɛ a konle nu ɔyɛ la.’—ZƐK. 14:3.

1, 2. Konle boni a ɛbikye a, na duzu a ɔngyia kɛ Nyamenle azonvolɛ bayɛ wɔ konle ɛhye anu a?

ƐNEE menli dɔɔnwo mɔɔ bɛwɔ United States la ɛlɛtie riledio zo gyimalilɛ bie wɔ October 30, 1938. Wɔ gyimalilɛ ne anu, gyimayɛvoma ne bɔle amaneɛ kɛ abɔdeɛ bie mɔ vi Mars pelanɛte ne azo ɛrava Azɛlɛ ne na bɛlɛsɛkye ye. Menli dɔɔnwo mɔɔ ɛnee ɛlɛtie edwɛkɛ ne la ande ɔ bo kɛ ɛhye le adwelie ɛlilɛ ala ɔnva nwo kɛ gyimayɛvoma ne hilehilele nu la, yemɔti ɛzulolɛ hanle bɛ. Bie mɔ bɔbɔ yɛle ninyɛne kɛ bɛfa bɛabɔ bɛ nwo bane.

2 Ɔnrɛhyɛ, konle bie bazi. Noko menli dɔɔnwo ɛtɛsieziele bɛ nwo. Bɛha konle ɛhye anwo edwɛkɛ wɔ Nyamenle Edwɛkɛ Baebolo ne anu. Bɛfɛlɛ ye Amagɛdɔn—konle ne mɔɔ Nyamenle nee ɛtanevolɛma baho la. (Yek. 16:14-16) Wɔ konle ɛhye anu, Nyamenle azonvolɛ mɔɔ bɛwɔ azɛlɛ ye azo la nee nyɛvolɛ mɔɔ bɛvi pelanɛte fofolɛ zo la ɛnrɛho. Noko, Nyamenle balua ye tumi kpole ne azo alie yɛ wɔ nwanwane adenle zo.

3. Ngapezo boni a yɛbazuzu nwo a, na duzu ati a nwolɛ hyia yɛ a?

3 Baebolo nu ngapezo bie mɔɔ ɔwɔ Zɛkalaya tile 14 la ka Amagɛdɔn ne anwo edwɛkɛ dɔɔnwo. Ɔnva nwo kɛ bɛhɛlɛle la yebo ɛvolɛ 2,500 la, ngapezo ɛhye fane yɛ nwo kpalɛ. (Wulo. 15:4) Edwɛkɛ mɔɔ ɔwɔ nu la fane ninyɛne mɔɔ ɛsisi Nyamenle menli nwo zo ɔvi mekɛ mɔɔ bɛvale Kelaese bɛziele Belemgbunli wɔ 1914 ne anu la anwo. Eza ɔka ninyɛne kpalɛ mɔɔ ɔnrɛhyɛ ɔbara la noko anwo edwɛkɛ. Ngapezo ɛhye ka “bɔnza tɛtɛlɛ” bie nee “ngoane nzule” bie anwo edwɛkɛ. (Zɛk. 14:4, 8) Bɔnza ɛhye le banebɔlɛ ɛleka titile maa Gyihova azonvolɛ. Saa yɛnwu debie mɔɔ ngoane nzule ne noko  gyi ɛkɛ maa la a, ɔbamaa yɛakpondɛ ɔ bo zo na yɛanlo bie. Yemɔti, nvasoɛ wɔ zo kɛ yɛbamaa ngapezo ɛhye anwo ahyia yɛ.—2 Pita 1:19, 20.

‘GYIHOVA KENLE NE’ MƆLEBƐBO

4. (a) Mekɛ boni a ‘Gyihova kenle ne’ bɔle ɔ bo a? (b) Kolaa na 1914 adwu la, duzu a Gyihova azonvolɛ bɔle ye nolo a, na kɛzi ewiade mgbanyima yɛle bɛ nyɛleɛ wɔ nwo ɛ?

4 Zɛkalaya tile 14 ne bɔ ɔ bo kɛ: “Awulae kenle ne ɛlɛba.” (Bɛgenga Zɛkalaya 14:1, 2.) Duzu a le kenle ɛhye? Yemɔ a le “Awulae kenle ne” mɔɔ bɔle ɔ bo wɔ mekɛ mɔɔ “azɛlɛ ye azo tumi muala” rayɛle “Awulae nee yɛ Mɛzaya ne ɛdeɛ” la. (Yek. 1:10; 11:15) Kenle ɛhye bɔle ɔ bo wɔ 1914 ne, mekɛ mɔɔ bɛvale Mɛzaya Belemgbunlililɛ ne bɛziele ɛkɛ wɔ anwuma la. Kolaa na ɛvolɛ 1914 adwu la, Gyihova azonvolɛ bɔle nolo ɛvolɛ dɔɔnwo kɛ ‘menli mɔɔ ɛnze Nyamenle’ anzɛɛ maanle maanle ne mekɛ ne bara awieleɛ wɔ zɔhane ɛvolɛ ne anu na ɔbamaa ngyegyelɛ dɔɔnwo ara. (Luku 21:24) Duzu a menli yɛle ye wɔ kɔkɔbɔlɛ ɛhye anwo a? Kɛ anrɛɛ maanyɛlɛma nee asɔne mgbanyima ne bɛadie kɔkɔbɔlɛ ɛhye mɔɔ ɔle ye mekɛ nu ɛdeɛ la, bɛgolole edwɛkpakavoma ne mɔɔ bɛkpokpa bɛ na bɛbɔ mɔdenle la anwo na bɛyɛle bɛ kpɔdekpɔde. Kɛmɔ Belemgbunlililɛ ne agyakɛ anu gyinlavolɛma ne mɔɔ bɛkpokpa bɛ la gyi ‘anwuma Gyɛlusalɛm’—Mɛzayɛ Belemgbunlilɛ ne—mɔɔ bɛboka nwo la agyakɛ anu la ati, ɛhye mɔɔ ewiade mgbanyima yɛle la hilele kɛ bɛgolole Tumivolɛ Nyamenle mumua ne anwo.—Hib. 12:22, 28.

5, 6. (a) Duzu a bɛhanle kɛ maanle maanle ne bayɛ “suakpole ne” nee ye ‘maanlema’ a? (b) “Bɛdabɛ mɔɔ bɛkɛha” la a le nwane mɔ?

5 Zɛkalaya hanle mɔɔ menli ne bayɛ la dole ɛkɛ ne kɛ: “Bɛ nee Gyɛlusalɛm [baho] na bɛava suakpole ne.” “Suakpole” ɛhye le Nyamenle Mɛzaya Belemgbunlililɛ ne anwo sɛkɛlɛneɛ. Keleseɛnema mɔɔ bɛkpokpa bɛ mɔɔ bɛ “nzi maanle wɔ anwuma” la, gyi ɔ gyakɛ anu wɔ azɛlɛ ye azo. (Fel. 3:20) ‘Bɛvale’ anzɛɛ bɛhyele mgbanyima mɔɔ ɛnee wɔ Gyihova ahyehyɛdeɛ ne foa mɔɔ wɔ azɛlɛ ye azo anu la bɛguale efiade wɔ Atlanta, Georgia, U.S.A. wɔ Ewiade Konle I ne anu. ‘Bɛvenle bɛ azua nee bɛ ninyɛne’ ɔlua mgbɔvodɛne nee atisesebɛ mɔɔ bɛyɛle menli ɛhye mɔ mɔɔ edwɛkɛ biala ɛnle bɛ nwo mɔɔ ɛnee bɛgyi bɛ munlililɛ nu la. Agbɔvolɛ ɛhye mɔ nee Keleseɛnema mɔɔ bɛkpokpa bɛ la anli ye boɛ, bɛvale bɛ sa bɛdole bɛ mbuluku ne mɔ azo, na bɛbɔle mɔdenle kɛ bɛmaa bɛagyakyi edwɛkɛhanlɛ gyima ne.

6 Ɔwɔ nuhua kɛ agbɔvolɛ ɛhye mɔ anwo zonle, bɛkpɔle Nyamenle menli, bɛbɔle adalɛ bɛdole bɛ nwo zo na bɛyɛle bɛ kpɔdekpɔde ɛdeɛ, noko bɛangola bɛanzɛkye nɔhalɛ azonvonlɛ kɔsɔɔti. Bɛhanle mɔhama ɛhye mɔ mɔɔ bɛkpokpa bɛ la anwo edwɛkɛ kɛ “bɛdabɛ mɔɔ bɛkɛha” mɔɔ “bɛbadɛnla ɛkɛ ne” la.

7. Neazo boni a Gyihova Alasevolɛ mɔɔ bɛkpokpa bɛ la ɛyɛ ɛmaa nɔhalɛ azonvolɛ mɔɔ bɛwɔ ɛkɛ ɛnɛ la kɔsɔɔti a?

7 Asoo ngapezo ɛhye rale nuhua bɔkɔɔ wɔ Ewiade Konle I la awieleɛ ɔ? Kyɛkyɛ. Ɛkpɔlɛ dɔɔnwo doale zo. (Yek. 12:17) Kɛ neazo la, bɛkpɔle yɛ mediema ne mɔ kpalɛ wɔ Ewiade Konle II la anu. Nyamenle nɔhalɛ Alasevolɛ mɔɔ bɛkpokpa bɛ la munli nu mɔɔ bɛgyinlanle la boa Nyamenle azonvolɛ mɔɔ bɛwɔ ɛkɛ ɛnɛ la ɔmaa bɛgyinla sɔnea biala mɔɔ bɛkɔ nu la anloa. Bie a le dwazotia mɔɔ ɔvi mbusua mɔɔ bɛnle diedima, bɛ gyima nu amra, anzɛɛ bɛ sukuluma mɔɔ bɛ diedi ti bɛgolo  bɛ nwo la. (1 Pita 1:6, 7) Ɔnva nwo ɛleka biala mɔɔ bɛwɔ la, nɔhalɛ azonvolɛ lɛ adwenle ko, “bɛgyi kpundii,” na ‘bɛnzulo bɛ agbɔvolɛ.’ (Fel. 1:27, 28) Noko, kɛ ɔkɛyɛ na Gyihova menli anyia bɔnebɔlɛ wɔ ewiade mɔɔ kpɔ bɛ la anu ɛ?—Dwɔn 15:17-19.

GYIHOVA YELE “BƆNZA TƐTƐLƐ” BIE

8. (a) Wɔ Baebolo ne anu, awoka kola gyinla ɛkɛ maa duzu? (b) “Ɔlivi Boka ne” gyi ɛkɛ maa duzu?

8 Kɛmɔ yɛnwu kɛ Gyɛlusalɛm—“suakpole ne”—le anwuma Gyɛlusalɛm ne anwo sɛkɛlɛneɛ la ati, zɔhane ala a “Ɔlivi Boka ne mɔɔ wɔ Gyɛlusalɛm aduduleɛ la” noko le sɛkɛlɛneɛ adenle zo debie a. Boka ɛhye gyi ɛkɛ maa duzu? Kɛzi “boka ne bakpuke” nwiɔ ɛ? Duzu ati a Gyihova vɛlɛle bɛ “me awoka” ɛ? (Bɛgenga Zɛkalaya 14:3-5.) Wɔ Baebolo ne anu, bɛkola bɛfa awoka bɛgyinla ɛkɛ bɛmaa arelemgbunlililɛ anzɛɛ arane. Eza bɛka kɛ, nyilalɛ nee banebɔlɛ wɔ Nyamenle boka ne azo. (Edw. 72:3; Aye. 25:6, 7) Ɛhye ati, ɔlivi boka ne mɔɔ Nyamenle gyi zo wɔ azɛlɛ ye azo Gyɛlusalɛm ne aduduleɛ la gyi ɛkɛ maa tumi mɔɔ Gyihova bali ye wɔ ye abɔdeɛ kɔsɔɔti azo la.

9. Adenle boni azo a “Ɔlivi Boka ne” kpukele nwiɔ a?

9 Duzu a ɔlivi boka ne mɔɔ ɔbakpuke la kile a? Boka ne mɔɔ ɔwɔ Gyɛlusalɛm aduduleɛ mɔɔ ɔbakpuke la kile kɛ Gyihova bava tumililɛ fofolɛ bie azie ɛkɛ yeamaa yeayɛ gyima titile bie. Tumililɛ ɛhye mɔɔ ɔtɔ zo nwiɔ la a le Mɛzaya Belemgbunlililɛ ne mɔɔ ɔwɔ Gyisɛse Kelaese asa nu la. Ɛhye ati a Gyihova vɛlɛle “Ɔlivi Boka ne” mɔɔ ɔkpukele nwiɔ la kɛ “me awoka” la. (Zɛk. 14:4) Ɔ mu nwiɔ le ye ɛdeɛ.

10. “Bɔnza tɛtɛlɛ” ne mɔɔ la awoka nwiɔ ne avinli la gyi ɛkɛ maa duzu?

10 Mekɛ mɔɔ sɛkɛlɛneɛ adenle zo boka ne kpukele manle ko hɔle sɔlɔ na ko hɔle nyiakɛ la, Gyihova vale ɔ gyakɛ ziele awoka nwiɔ ne azo. “Bɔnza tɛtɛlɛ” bie ralale Gyihova agyakɛ abo. Sɛkɛlɛneɛ adenle zo bɔnza ɛhye gyi ɛkɛ maa banebɔlɛ mɔɔ Gyihova azonvolɛ nyia ye wɔ ye tumililɛ ne nee ɔ Ra ne Mɛzaya Belemgbunlililɛ ne abo la. Gyihova ɛnrɛmaa bɛnrɛzɛkye nɔhalɛ ɛzonlenlɛ ɛlɛ. Mekɛ boni a ɔlivi boka ne kpukele nwiɔ a? Ɛhye zile wɔ ɛvolɛ 1914 ne anu, mekɛ mɔɔ Maanle Maanle Mekɛ ne rale ye awieleɛ na bɛvale Mɛzaya Belemgbunlililɛ ne bɛziele ɛkɛ la. Mekɛ boni a nɔhalɛ azonvolɛ bɔle ɔ bo nriandinle hɔle sɛkɛlɛneɛ adenle zo bɔnza ne anu a?

BƐNRIANDINLI BƐHƆLE BƆNZA NE ANU!

11, 12. (a) Mekɛ boni a bɛbɔle ɔ bo bɛnriandinle bɛhɔle sɛkɛlɛneɛ adenle zo bɔnza ne anu a? (b) Duzu a kile kɛ Gyihova bava ye tumi kpole ne aboa ye menli a?

11 Gyisɛse bɔle ye ɛdoavolɛ ne mɔ kɔkɔ kɛ: “Aleɛabo amra amuala bakpɔ bɛ wɔ me ti.” (Mat. 24:9) Ɛkpɔlɛ ɛhye ɛyɛ kpole kpalɛ wɔ awieleɛ mekɛ ɛhye anu ɔvi 1914. Ɔnva nwo ɛkpɔlɛ kpole ne mɔɔ menli mɔɔ bɛkpokpa bɛ la agbɔvolɛ vale rale bɛ nwo zo wɔ Ewiade Konle I anu la, bɛangola bɛangu nɔhavoma ne amuala. Bɛliele bɛ bɛvile Babelɔn Kpole ne—adalɛ ɛzonlenlɛ maanle ne asa nu wɔ ɛvolɛ 1919 ne anu. (Yek. 11:11, 12) * Zɔhane mekɛ ne a bɛbɔle ɔ bo bɛnriadinle bɛhɔle Gyihova awoka ne mɔ bɔnza ne anu a.

12 Banebɔlɛ bɔnza ɛhye ɛhɔ zo ɛbɔ  nɔhalɛ azonvolɛ mɔɔ bɛwɔ azɛlɛ ye kɔsɔɔti azo la anwo bane ɔvi ɛvolɛ 1919 mɔɔ ba la. Wɔ maanle dɔɔnwo anu, bɛvale bɛ sa bɛdole daselɛlilɛ gyima ne nee Baebolo nwo mbuluku mɔɔ Gyihova Alasevolɛ yɛ la azo ɛvolɛ dɔɔnwo. Nyɛleɛ zɛhae tɛkɔ zo wɔ maanle bie mɔ azo. Ɔnva nwo mɔdenle biala mɔɔ maanle maanle ne babɔ la, bɛnrɛhola bɛnrɛzi nɔhalɛ ɛzonlenlɛ adenle! Gyihova bava ye tumi kpole ne aho amaa ye menli.—Mɛla 11:2.

13. Kɛzi yɛboa Gyihova banebɔlɛ bɔnza ne anu ɛ, na duzu ati a ɛnɛ yɛɛ nwolɛ hyia kpalɛ ɛ?

13 Saa yɛbeta Gyihova anwo na yɛgyinla kpundii wɔ nɔhalɛ ne anu a, ɔ nee ɔ Ra Gyisɛse Kelaese bɛaboa yɛ, na Nyamenle ɛnrɛmaa debie anzɛɛ ‘awie ɛnrɛlie yɛ ɛnrɛvi Ɔ sa nu.’ (Dwɔn 10:28, 29) Gyihova ɛziezie ɔ nwo kɛ ɔbava moalɛ biala mɔɔ yɛhyia nwo na yɛadie ye kɛ Awulae Tumivolɛ na yɛahola yɛali nɔhalɛ dahuu yɛamaa Mɛzaya Belemgbunlililɛ ne la yeamaa yɛ. Ɔhyia kɛ yɛboa banebɔlɛ bɔnza ne anu, ɔluakɛ bɔnza ɛhye balie nɔhalɛ azonvolɛ wɔ anwongyelelɛ kpole ne mɔɔ ɔlɛba ndɛndɛ la anu.

‘KONLE MEKƐ’ NE

14, 15. Wɔ ‘kenle ne mɔɔ Nyamenle’ nee ye agbɔvolɛ baho la, duzu a bado bɛdabɛ mɔɔ bɛnle banebɔlɛ bɔnza ne anu la ɛ?

14 Mekɛ mɔɔ yɛlɛbikye ewiade ɛhye awieleɛ ne kpalɛ la, Seetan bamia ɛkpɔlɛ mɔɔ ɔfa ɔba Gyihova azonvolɛ nwo zo la anu. Akee ‘kenle ne mɔɔ Nyamenle’ nee ye agbɔvolɛ baho la babɔ ɔ bo. Ɔnrɛhyɛ Gyihova bamaa Seetan aho ye konle mɔɔ li awieleɛ. Kenle zɔhane anwuma nee aze Tumivolɛ ne bala ɔ nwo ali kɛ Kovolɛ kpole wɔ zɔhane ‘konle ne anu.’—Zɛk. 14:3.

15 Wɔ Nyamenle konle mekɛ ne anu, duzu a bado bɛdabɛ mɔɔ bɛnle banebɔlɛ “bɔnza tɛtɛlɛ” ne anu la ɛ? Bɛnrɛnwu “wienyi” biala. Ɛhye kile kɛ bɛnrɛnyia Nyamenle anyunlu ɛlolɛ. Wɔ konle mekɛ zɔhane mɔɔ ɛlɛba la anu, “ewulenzane badɔ mgbɔnwɔ, mgbɔnwɔndua, afunlumu, asoaso, yɛɛ nane biala mɔɔ wɔ kpɔvolɛ ne azokoɛleɛ la avinli.” Ɛhye kile kɛ nvasoɛ biala ɛnrɛra maanle maanle ne mɔ akodeɛ ne azo. Ninyɛne ɛhye mɔ kɔsɔɔti bagyengye kɛ asɛɛ “ɛyɛlɛ” ɛhye bɛ la, bɛnrɛhola bɛnrɛva bɛnrɛyɛ ɛhwee. Gyihova eza bava ewulenzane nee “ewule” ngakyile ali gyima. Ewule ɛhye mɔ bɛazɛkye ninyɛne dɔɔnwo. Wɔ kenle zɔhane, “bɛ nye . . . yɛɛ bɛ tafinlima bakpɔlɔ.” Bɛnrɛhola bɛnrɛyɛ yɛ ɛhwee yɛɛ bɛnrɛhola bɛnrɛdendɛ bɛnrɛtia Nyamenle. (Zɛk. 14:6, 7, 12, 15) Menli mɔɔ bɛahɔ Seetan afoa wɔ azɛlɛ ye azo la anwo bazo kpole kpalɛ noko bɛbazɛkye bɛ kɔsɔɔti. (Yek. 19:19-21) “Kenle zɔhane menli mɔɔ [Gyihova] ɛhu bɛ la avunli bagua ye yɛlɛdɛdɛ, ɔvi maanle ti yeahɔdwu maanle bo.”—Gyɛ. 25:32, 33.

16. Nyamenle konle mekɛ ne ɛlɛbikye yemɔti kpuyia boni mɔ a ɔwɔ kɛ yɛsuzu nwo a, na duzu a ɔwɔ kɛ yɛyɛ a?

16 Awie biala nwu amaneɛ wɔ konle mekɛ nu, bɔbɔ bɛdabɛ mɔɔ bɛdi konim la. Aleɛ wie. Agyadeɛ kola minle. Nwolɛ adenle mɔɔ yɛlɛ ye ɛbɛlabɔlɛ nu la bie mɔ kola fi yɛ sa. Yɛ fanwodi nwo kola ba edwɛkɛ. Saa yɛkɔ tɛnlabelɛ zɛhae anu a, duzu a yɛbayɛ a? Yɛ ahonle badu ɔ? Yɛbakpo yɛ diedi wɔ anwongyelelɛ mekɛ nu ɔ? Asoo yɛ abɛ nu babu na yɛ anyelazo awie? Nea kɛzi nwolɛ bahyia kɛ yɛbanyia diedi kɛ Gyihova balie yɛ wɔ anwongyelelɛ kpole ne anu na yɛadɛnla Gyihova banebɔlɛ bɔnza ne anu dahuu a!—Bɛgenga Habakɛke 3:17, 18.

 “NGOANE NZULE NE BAZENZE”

17, 18. (a) Duzu a le “ngoane nzule” ne? (b) “Aduduleɛ nyevile ne” nee “adɔleɛ nyevile ne” gyi ɛkɛ maa duzu? (d) Duzu a wɔsika ɛ bo kɛ ɛbayɛ a?

17 Wɔ Amagɛdɔn ne anzi, “ngoane nzule” ne mɔɔ ɔvi Mɛzaya Belemgbunlililɛ ebia ne anu la bazenze kpalɛ. Zɛhae “ngoane nzule” ne a le Gyihova nziezielɛ mɔɔ maa bɛnyia ngoane la. “Aduduleɛ nyevile ne” a le Nyevile Wulera ne yɛɛ “adɔleɛ nyevile ne” a le Mɛdetɛlenia Nyevile ne. Duzu a nyevile nwiɔ ɛhye mɔ kile a? Nyevile Wulera ne gyi ɛkɛ maa mɔwuamra. Na kɛmɔ abɔdeɛ mɔɔ ngoane wɔ nu la ɛbu Mɛdetɛlenia Nyevile ne anu la ati, ɔgyi ɛkɛ ɔmaa “menli pemgbenleamgbe” ne mɔɔ bɛbanyia bɛ ti wɔ Amagɛdɔn ne anu la. (Bɛgenga Zɛkalaya 14:8, 9; Yek. 7:9-15) Ɛhye ati, bɛbalie ekpunli nwiɔ ne anu amra bɛavi Adam ewule ne fɔlɛbualɛ bo ɔlua sɛkɛlɛneɛ adenle zo ngoane nzule anzɛɛ “nzule ne mɔɔ maa ngoane la azudenle ne” mɔɔ bɛbanlo bie la azo.—Yek. 22:1, 2.

Sika ɛ bo kɛ ɛbaboa Gyihova banebɔlɛ bɔnza ne anu dahuu

18 Mekɛ mɔɔ Gyihova bazɛkye ɛtane ewiade ɛhye la, ɔbabɔ yɛ nwo bane yeava yɛ yeahɔ ye tenlene ewiade fofolɛ ne anu. Ɔnva nwo kɛ bɛkpɔ yɛ wɔ maanle kɔsɔɔti anu la, bɛmaa yɛsika yɛ bo kɛ yɛbali nɔhalɛ yɛamaa Nyamenle Belemgbunlililɛ ne na yɛaboa Gyihova banebɔlɛ bɔnza ne anu dahuu.

^ ɛden. 11 Nea Revelation—Its Grand Climax at Hand! mukelɛ 169-170.