‘Mmasulo, gyinla kpundii. Gyihova wɔ Nyamenle ne nee wɔ lua.’—DWƆ. 1:9.

1, 2. (a) Subane boni mɔ a boa maa yɛgyinla sɔnea nloa a? (b) Kɛzi ɛbahilehile diedi nu ɛ? Maa ndonwo.

GYIHOVA ɛzonlenlɛ maa yɛ nye die. Noko akee, yɛ nwo kyele yɛ kɛ menli mɔɔ ɛha la, na bie bɔbɔ a ‘yɛnwu amaneɛ wɔ yɛ pɛlepɛlelilɛ ti.’ (1 Pita 3:14; 5:8, 9; 1 Kɔl. 10:13) Yemɔti, yɛhyia diedi nee akɛnrasesebɛ na yɛahola yɛagyinla sɔnea ɛhye mɔ anloa.

2 Diedi a le duzu? Ɛzoanvolɛ Pɔɔlo hɛlɛle kɛ: “Diedi a le kɛ yɛkɛzi pi wɔ ninyɛne mɔɔ yɛ nye la zolɛ la anwo, na yɛkɛlie ninyɛne mɔɔ ɛnyelɛ ɛnnwu bɛ la yɛkɛdo nu kɛ bɛwɔ ɛkɛ.” (Hib. 11:1) Baebolo ngilebɛbo fofolɛ ka kɛ: “Diedi a le agyadeɛ mɔɔ yɛ nye la zo la anwo kɛlata. Diedi a le kɛ yɛbanwu kɛ ninyɛne mɔɔ ɛnyelɛ ɛnnwu bɛ la wɔ ɛkɛ amgba.” (The Simple English Bible) Saa bɛva yɛ duma bɛyɛ agyadeɛ bie anwo kɛlata bɛmaa yɛ a, ɔmaa yɛnyia anwondozo kɛ ɔle yɛ ɛdeɛ. Kɛmɔ Nyamenle di ye edwɛkɛ zo dahuu la ati, ɔle kɛ asɛɛ yɛlɛ agyadeɛ bie anwo kɛlata la. Yɛ diedi maa yɛnyia anwodozo kɛ Baebolo ne anu ɛwɔkɛ ngakyile ne mɔ mɔɔ yɛ nye la zo la bara nu, eza yɛze ye wienyi kɛ mɔɔ ɔka ɔkile yɛ wɔ ye Edwɛkɛ ne anu kɔsɔɔti, bɔbɔ ninyɛne mɔɔ yɛnva yɛ nye yɛnwu ye la le nɔhalɛ.

3, 4. (a) Akɛnrasesebɛ a le duzu? (b) Adenle ko mɔɔ yɛdua zo a yɛbanyia diedi nee akɛnrasesebɛ kpalɛ la a le boni?

3 Akɛnrasesebɛ a le “anwosesebɛ mɔɔ yɛnyia yɛtendɛ na yɛyɛ ninyɛne wɔ anwongyelelɛ nee sɔnea mekɛ nu mɔɔ yɛnzulo la.” (The New Interpreter’s Dictionary of the Bible) Saa yɛlɛ akɛnrasesebɛ a, yɛbanyia anwondozo, yɛnrɛzulo, na ɔdwu mekɛ ne bie bɔbɔ a yɛbala akɛnrazilɛ ali.—Mak. 6:49, 50; 2 Tem. 1:7.

4 Diedi nee akɛnrasesebɛ le subane mɔɔ anwo hyia. Noko bie a yɛbade nganeɛ kɛ yɛhyia diedi nee akɛnrasesebɛ dɔɔnwo. Baebolo ne ka menli dɔɔnwo mɔɔ lale diedi nee akɛnrasesebɛ ali la anwo edwɛkɛ. Yemɔti adenle ko mɔɔ yɛdua zo a yɛbanyia diedi nee akɛnrasesebɛ kpalɛ la a le kɛ yɛbazuzu neazo ɛhye mɔ bie anwo.

 GYIHOVA NEE DWƆHYUA LUALE

5. Duzu a ɛnee Dwɔhyua hyia nwo na yeayɛ ye gyima ne kpalɛ a?

5 Bɛmaa yɛva yɛ adwenle yɛhɔ ɛvoya 35 mɔɔ ɛze ɛhɔ la anu. Gyihova vale ye tumi kpole ne liele Yizilayɛma pemgbenleamgbe vile Yigyibiti akɛlɛzonlenlɛ bo la, ɛvolɛ 40 ɛpɛ nu. Ɛnee ngapezonli Mosisi a li bɛ nyunlu a. Ɔnyianle ɛvolɛ 120 la, ɔhɔle Boka Nibo azo na ɔdole ɔ nye ɔnleanle Ɛwɔkɛ Azɛlɛ ne, na ɛkɛ ne yɛɛ ɔwule a. Dwɔhyua mɔɔ ye “nrɛlɛbɛ ne yɛle kpole” la, lile ɔ gyakɛ anu. (Mɛla 34:1-9) Ɛnee ɔka ekyii Yizilayɛma dwu Keena azɛlɛ ne azo. Ɛnee Dwɔhyua hyia anwuma nrɛlɛbɛ na yeahola yeayɛ adekilevolɛ kpalɛ. Ɛnee eza ɔwɔ kɛ ɔnyia diedi wɔ Gyihova anu na ɔmia ɔ nwo ɔgyinla kpundii anzɛɛ ɔnyia akɛnrasesebɛ.—Mɛla 31:22, 23.

6. (a) Dwɔhyua 23:6 ka kɛ yɛhyia akɛnrasesebɛ na yɛahola yɛayɛ duzu? (b) Duzu a yɛsukoa yɛfi Gyima ne 4:18-20 nee Gyima ne 5:29 ne anu a?

6 Ɔbayɛ kɛ nrɛlɛbɛ, akɛnrasesebɛ, nee diedi mɔɔ Dwɔhyua lale ye ali la boale Yizilayɛma wɔ bɛ nee Keenama konle ne anu. Noko ɛnee eza bɛhyia akɛnrasesebɛ mɔɔ ɔbamaa bali folɛ mɔɔ Dwɔhyua dule bɛ la azo a. Mɔɔ ɔka ekyii ɔwu la, ɔ nee bɛ lile nrɛlaleɛ kɛ: “Bɛnlea boɛ [anzɛɛ, bɛnyia akɛnrasesebɛ] na bɛli debie biala mɔɔ bɛhɛlɛ ye wɔ Mosisi Mɛla ne anu la azo. Bɛmmabu bɛ nye bɛgua ye kpɔkɛ ko bɔbɔ azo.” (Dwɔ. 23:6) Yɛdayɛ noko yɛhyia akɛnrasesebɛ na yɛahola yɛadie Gyihova. Mekɛ mɔɔ menli kɛha kɛ yɛyɛ debie mɔɔ ɔtia Gyihova ɛhulolɛdeɛ la bɔbɔ boka nwo. (Bɛgenga Gyima ne 4:18-20; 5:29.) Saa yɛdua asɔneyɛlɛ zo yɛfa yɛ nwo yɛto Gyihova anwo zo a, ɔbaboa yɛ yeamaa yɛanyia akɛnrasesebɛ.

MƆƆ ƆBAMAA YƐ ƐBƐLA AWIE YƐ BOƐ LA

7. Duzu a ɛnee ɔhyia kɛ Dwɔhyua yɛ na yeanyia akɛnrasesebɛ na ye ɛbɛla awie ye boɛ a?

7 Amaa yɛanyia akɛnrasesebɛ yɛayɛ Nyamenle ɛhulolɛdeɛ la, ɔwɔ kɛ yɛsukoa ye Edwɛkɛ ne na yɛfa yɛyɛ gyima. Mekɛ mɔɔ Dwɔhyua ralile Mosisi agyakɛ anu la bɛzele ye kɛ: “Mmasulo, gyinla kpundii [anzɛɛ, nyia akɛnrasesebɛ] na di mɛla ne mɔɔ me sonvolɛ Mosisi vale manle wɔ la azo. . . . Maa ɔyɛ wɔ gyima kɛ ɛkɛgenga Mɛla buluku ne dahuu wɔ bɛ ɛzonlenlɛ mekɛ biala anu. Dwenledwenle Mɛla ne anwo nɔɔzo nee ewiazo, na di mɔɔ bɛhɛlɛ ye nuhua la amuala azo. Ɛhye bamaa wɔ ɛbɛlabɔlɛ ne adenrɛ.” (Dwɔ. 1:7, 8) Dwɔhyua vale folɛdulɛ ne lile gyima yemɔti ye ‘ɛbɛla denrɛle’ anzɛɛ wiele ye boɛ. Saa yɛfa ɔ gyakɛ a yɛbanyia akɛnrasesebɛ kpalɛ, na yɛ ɛbɛla awie yɛ boɛ wɔ yɛ Nyamenle ɛzonlenlɛ nu.

Yɛ ɛvolɛ 2013 ɛvolɛdwɛkɛ ne se: ‘Mmasulo, gyinla kpundii. Gyihova wɔ Nyamenle ne nee wɔ lua.’—Dwɔhyua 1:9

8. Bɛyele ɛvolɛ 2013 ɛvolɛdwɛkɛ ne bɛvile ngɛlɛlera boni anu, na kɛzi zɔhane edwɛkɛ ne baboa wɔ ɛ?

8 Ɔbayɛ kɛ Dwɔhyua anwo yɛle se kpalɛ wɔ mekɛ mɔɔ Gyihova eza hanle kɛ: ‘Meze wɔ kɛ mmasulo, gyinla kpundii. Mmamaa wɔ ahonle tu yɛɛ mmamaa ɛ nwo bubu wɔ, ɔluakɛ medame, Gyihova wɔ Nyamenle ne, me nee wɔ lua ɛleka biala mɔɔ ɛkɔ la.’ (Dwɔ. 1:9) Gyihova nee yɛdayɛ noko lua. Yemɔti, ɔnva nwo sɔnea biala mɔɔ yɛbahɔ nu la, ɔnle kɛ ‘yɛmaa yɛ ahonle tu.’ Edwɛkɛ ɛhye a ɔwɔ kɛ yɛyɛ ye nzonlɛ kpalɛ a: ‘Mmasulo, gyinla kpundii. Gyihova wɔ Nyamenle ne nee wɔ lua.’ Edwɛkɛ ɛhye mɔɔ wɔ Dwɔhyua 1:9 la a le ɛvolɛ 2013 ɛvolɛdwɛkɛ ne a. Nɔhalɛ nu, ɔbaboa yɛ kɛmɔ menli mɔɔ yɛle diedi nee akɛnrasesebɛ nwo neazo edwɛkɛ nee bɛ nyɛleɛ kola boa yɛ la.

 BƐNYIANLE AKƐNRASESEBƐ

9. Ndenle boni azo a Releehabe lale diedi nee akɛnrasesebɛ ali a?

9 Mekɛ mɔɔ Dwɔhyua zoanle menli nwiɔ kɛ bɛhɔli busia wɔ Keena la, tuutuunli Releehabe vale bɛ veale na ɔhilele bɛ agbɔvolɛ ne mɔ adenle gyɛne. Ɔlua ye diedi nee yɛ akɛnrasesebɛ ti, bɛliele ɔ nee ye abusua ne ngoane wɔ mekɛ mɔɔ Yizilayɛma zɛkyele suakpole Gyɛleko la. (Hib. 11:30, 31; Gye. 2:25) Releehabe gyakyile ye ɛbɛlatane ne amaa yeazɔ Gyihova anye. Menli mɔɔ ɛrayɛ Keleseɛnema la bie mɔ ɛnyia diedi, akɛnrasesebɛ, nee anwosesebɛ ɛhakyi bɛ subane bɛmaa yezɔ Nyamenle anye.

10. Tɛnlabelɛ boni anu a Wulutu gyinlanle nɔhalɛ ɛzonlenlɛ nzi a, na nyilalɛ boni a ɔnyianle a?

10 Wɔ Dwɔhyua ewule nzi, Moabenli Wulutu vale akɛnrasesebɛ gyinlanle nɔhalɛ ɛzonlenlɛ nzi. Kɛmɔ ɛnee ɔ hu le Yizilayɛnli la ati, ɔbayɛ kɛ ɛnee ɔze Gyihova anwo edwɛkɛ. Ye ase Nawomi mɔɔ ɛnee le kunlavolɛ na ɔde Mowabe la zile kpɔkɛ kɛ ɔsia yeahɔ Bɛtelɛhɛm wɔ Yizilayɛ. Mɔɔ bɛlua adenle nu la Nawomi zele Wulutu kɛ ɔzia ɔhɔ ye sua zo, noko Mowabenli ne buale ye kɛ: “Mmafoa me kɛ mengyakyi wɔ mengɔ anzɛɛ menzia na memmatoa wɔ. . . . Wɔ menli bayɛ me menli, na wɔ Nyamenle ne ayɛ me Nyamenle.” (Wul. 1:16) Wulutu lile ye edwɛkɛ zo. Nzinlii, Nawomi busuanli Bowaze gyale Wulutu, ɔwole ralɛ nrenya na ɔrayɛle Devidi nee Gyisɛse bɛ nlenya. Gyihova yila menli mɔɔ da diedi nee akɛnrasesebɛ ali la.—Wul. 2:12; 4:17-22; Mat. 1:1-6.

BƐVALE BƐ NGOANE BƐDOLE ESIANE NU!

11. Kɛzi Gyɛhɔyada nee Gyihɔhyɛba lale akɛnrasesebɛ ali ɛ, na duzu a vile nu rale a?

11 Saa yɛnwu kɛ Nyamenle nee bɛdabɛ mɔɔ bɛfa ye ɛhulolɛdeɛyɛlɛ nee bɛ gɔnwo mɔ boɛyɛlɛ bɛdumua la lua a, ɔmaa yɛnyia akɛnrasesebɛ nee diedi kpole. Kɛ neazo la, maa yɛzuzu Ɛsɔfo Kpanyinli Gyɛhɔyada nee ɔ ye Gyihɔhyɛba anwo. Mekɛ mɔɔ Belemgbunli Ehazaya wule la, ɔ nli Atalaya hunle bɛdabɛ mɔɔ bɛdi ebia ne la ɔmanle ɔhale Dwowahye angome na ɔvale. Gyɛhɔyada nee Gyihɔhyɛba vale bɛ ngoane dole esiane nu vale Ehazaya ara nrenya Dwowahye veale ɛvolɛ nsia. Ye ɛvolɛ nsuu ne azo, Gyɛhɔyada manle bɛvale Dwowahye bɛziele belemgbunli na ɔmanle bɛhunle Atalaya. (2 Arl. 11:1-16) Nzinlii, Gyɛhɔyada boale Belemgbunli Dwowahye manle ɔyɛle ɛzonlenlɛ sua ne boɛ. Mekɛ mɔɔ Gyɛhɔyada wule la ɛnee yeli ɛvolɛ 130, bɛziele ye wɔ “arelemgbunli ne mɔ avinli, wɔ mɔɔ ɔyɛle ɔmanle Yizilayɛma, ye ɛzonlenlɛ kpalɛ mɔɔ ɔzonlenle Nyamenle, nee ye nyɛleɛ kpalɛ mɔɔ ɔyɛle wɔ Ɛzonlenlɛ Sua ne anwo la ati.” (2 Edk. 24:15, 16) Bieko, ɔlua akɛnrasesebɛ mɔɔ Gyɛhɔyada nee ɔ ye vale lile gyima la ati, bɛbɔle Devidi dehelɛ abusua ne anwo bane bɛhɔdwule Mɛzaya ne anwo zo.

12. Debie mɔɔ hyia akɛnrasesebɛ la boni a Yibɛdemɛlɛke yɛle a?

12 Yibɛdemɛlɛke mɔɔ ɛnee yɛ gyima wɔ Belemgbunli Zɛdikaya sua nu la vale ye ngoane dole esiane nu manle Gyɛlɛmaya. Ɛnee belemgbunli ne ɛye Gyɛlɛmaya mɔɔ bɛdonle ye ɛzonle kɛ ɔle maamɔvo la yemaa Dwuu mgbanyima kɛ bɛdo ye bula nu bɛhu ye. (Gyɛ. 38:4-6) Ɔnva nwo kɛ ɛnee menli ne ɛngulo Gyɛlɛmaya edwɛkɛ la, Yibɛdemɛlɛke vale ye ngoane dole esiane nu kpale Zɛdikaya kyɛlɛ manle ngapezonli ne. Zɛdikaya liele dole nu na ɔyele mrenya 30 ɔmanle bɛboale Yibɛdemɛlɛke bɛyele Gyɛlɛmaya. Nyamenle luale ngapezonli ne anwo zo ɔbɔle Yibɛdemɛlɛke ɛwɔkɛ kɛ saa Babelɔnema bɛateta Gyɛlusalɛm a, ɔbalie ye ngoane. (Gyɛ. 39:15-18) Ɔnyianle ye akɛnrasesebɛ ne anwo ahatualɛ.

13. Adenle boni azo a Hibuluma nsa ne lale akɛnrasesebɛ ali a, na kɛzi bɛ anwubielɛ ne bahola aboa yɛ ɛ?

 13 Gyihova azonvolɛ nsa mɔɔ bɛle Hibuluma la lale ye ali wienyi wɔ ɛvoya nsuu K.Y.M. anu kɛ, Nyamenle tua menli mɔɔ lɛ diedi nee akɛnrasesebɛ la kakɛ. Belemgbunli Nɛbukadenɛza boɔboale Babelɔn mgbanyima nloa na ɔzele bɛ kɛ bɛzonle ananze totohyia bie mɔɔ yeva nvutuke yeyɛ la. Na awie biala mɔɔ anyɛ zɔ la bɛbado ye sendɔlɔra nu bɛahu ye. Hibuluma nsa ne vale ɛbulɛ zele Nɛbukadenɛza kɛ: “Nyamenle ne mɔɔ yɛsonle ye la kola die yɛ fi sendɔlɔra ne anu, yɛɛ ɔbalie yɛ yeavi ɛ sa nu. Saa yeanlie yɛ bɔbɔ a yɛka ye wienyi kɛ yɛnrɛzonle wɔ awozonle ne mɔ, yɛɛ yɛnrɛdu yɛnrɛgua wɔ ezukoa nvutuke ananze ne mɔɔ wɔzie la anyunlu.” (Dan. 3:16-18) Hibuluma nsa ne mɔɔ bɛliele bɛ ngoane la anwo edwɛkɛ wɔ Daneɛle 3:19-30. Ɔwɔ nuhua kɛ bɛnrɛva sendɔlɔra nu ewule bɛnrɛnwunlonwula yɛ ɛdeɛ, noko yɛyia yɛ munli nu ɛgyinlanlɛ nwo sɔnea na yɛze kɛ Nyamenle bayila yɛ wɔ yɛ diedi nee yɛ akɛnrasesebɛ ne anwo.

14. Kɛmɔ Daneɛle tile 6 ne kile la, kɛzi Daneɛle lale akɛnrasesebɛ ali ɛ, na duzu a vile nu rale a?

14 Daneɛle lale diedi nee akɛnrasesebɛ ali wɔ mekɛ mɔɔ ye kpɔvolɛma manle Belemgbunli Dalayɛse lile mɛla kɛ ‘awie biala mmaye ɛdɛne maa nyamenle biala anzɛɛ biza sonla biala debie toonwo kenle kɔkɔlɛ abulasa, na ɛ ngomekye a bɛva bɛ ti bɛzɔ wɔ a. Awie biala mɔɔ anli mɛla ɛhye azo la ɔwɔ kɛ bɛfuandi ye bɛto awenade ne mɔ tunli ne anu.’ Na mɔɔ Daneɛle nwunle kɛ bɛlie mɛla ne bɛdo nu la, “ɔhɔle sua nu, ɔbukebukele ye nvɛnzɛlɛ ne mɔ mɔɔ kɔne Gyɛlusalɛm afoa nu la ɔguale nwolɛ, na kenle ko biala ɔhotole ɔzɛlɛle na ɔyɛle ye Nyamenle ne mo fane nsa, kɛmɔ ɛnee ɔyɛ ye dɛba ne la.” (Dan. 6:6-10) Awieleɛ bɔkɔɔ ne, bɛvale Daneɛle mɔɔ lɛ akɛnrasesebɛ la bɛdole awenade tunli nu, noko Gyihova liele ye.—Dan. 6:16-23.

15. (a) Diedi nee akɛnrasesebɛ nwo neazo boni a Akoyela nee Pelesela lale ye ali a? (b) Duzu a Gyisɛse edwɛkɛ mɔɔ wɔ Dwɔn 13:34 la abo kile a, na kɛzi Keleseɛnema dɔɔnwo ɛla zɛhae ɛlɔlɛ ne bie ali ɛ?

15 Wɔ tɛnlabelɛ bie mɔɔ Baebolo ne anga la anu, Akoyela nee Pelesela vale ‘bɛ ngoane dole Pɔɔlo ati nzeleba.’ (Gyi. 18:2; Wulo. 16:3, 4) Bɛvale akɛnrasesebɛ bɛlile Gyisɛse edwɛkɛ ɛhye azo: “Memaa bɛ mɛla fofolɛ: Bɛhulo bɛ nwo ngoko ngoko. Kɛ mezi mehulo bɛ la, zɔhane ala yɛɛ bɛhulo bɛ nwo ngoko ngoko a.” (Dwɔn 13:34) Mosisi Mɛla ne hanle kɛ ɔwɔ kɛ bɛkulo bɛ gɔnwo mɔ kɛ bɛdabɛ bɛ nwo la. (Sɛlɛ. 19:18) Noko ɛnee Gyisɛse mɛla ɛdeɛ ne le “fofolɛ” ɔluakɛ ɛnee ɔwɔ kɛ bɛfa bɛ ngoane bɛto ɛkɛ bɛmaa awie mɔ kɛmɔ ɔdaye  mumua ne ɔyɛle la. Keleseɛnema dɔɔnwo ɛla bɛ ɛlɔlɛ ali ɔlua akɛnrasesebɛ mɔɔ bɛnyianle bɛvale ‘bɛ ngoane bɛdole nzeleba’ mɔɔ bɛannye bɛ gɔnwo mɔ diedima bɛammaa bɛ kpɔvolɛma la azo.—Bɛgenga 1 Dwɔn 3:16.

Ɛnee ɔnle kɛ alumua Keleseɛnema gyakyi bɛ diedi nu

16, 17. Diedi nwo sɔnea boni a Kelaese alumua ɛdoavolɛma bie mɔ yiale a, na kɛzi yɛ mekɛ ye azo Keleseɛnema bie mɔ anwubielɛ nee ɛhye le ko ɛ?

16 Kɛmɔ Gyisɛse yɛle la, alumua Keleseɛnema vale akɛnrasesebɛ zonlenle Gyihova angome ala. (Mat. 4:8-10) Bɛkpole kɛ bɛbakpu ɛyɛlɛ bɛamaa Wulomu belemgbunli ne bɛava bɛali ye eni. (Nea nvoninli ne.) Daniel P. Mannix hɛlɛle kɛ: “Ɔnva nwo kɛ ɛnee afɔlemokyea mɔɔ senle wɔ nu la gyi nwɔhoalilɛ ɛleka ne mɔɔ awie biala kola kɔ ɛkɛ la, Keleseɛnema ekyi bie ala a kpole bɛ diedi ne a. Mɔɔ ɛnee ɔwɔ kɛ pilizanli yɛ la ala a le kɛ ɔbakponde ɛyɛlɛ ekyi bie wɔ senle ne anu na bɛamaa ye Afɔlebɔlɛ Amodinli kɛlata ɛnee yenyia ɔ ti. Eza bɛkilehile nu bɛkile ye kɛ tɛ maanle belemgbunli ne yɛɛ ɔlɛsonle ye a; emomu ɔdie yeado nu kɛ ɔle Wulomu maanle kpanyinli nee nyamenle ala. Noko akee, asɛɛ Keleseɛnenli biala ambɔ mɔdenle kɛ ɔnriandi.”—Those About to Die.

17 Bɛmanle ɛnɛ mekɛ ye anu Keleseɛnema mɔɔ bɛguale bɛ Nazi mbulalɛ efiade nu mɔɔ bɛku bɛ la nwolɛ adenle fane dɔɔnwo kɛ bɛva bɛ sa bɛwula kɛlata bie abo bɛhile kɛ bɛnle Gyihova Alasevolɛ bieko na bɛbanyia bɛ ti. Bɛ nuhua ekyi yɛle zɔ. Tutsima nee Hutuma mɔɔ bɛle Alasevolɛ la vale bɛ ngoane dole esiane nu bɔle bɛ mediema nwo bane wɔ menli ɛhunlɛ kpole ne mɔɔ zile wɔ Rwanda kenlensa ye la anu. Ɔhyia diedi nee akɛnrasesebɛ na awie ahola agyinla sɔnea zɛhae anloa.

KAKYE KƐ GYIHOVA NEE YƐ LUA!

18, 19. Diedi nee akɛnrasesebɛ nwo neazo boni a wɔ Baebolo ne anu mɔɔ ɔbaboa yɛ wɔ yɛ daselɛlilɛ gyima ne anu a?

18 Ɛnɛ, yɛnyia nwolɛ adenle yɛlɛyɛ gyima kpole mɔɔ bɛva bɛwula Nyamenle azonvolɛ mɔɔ bɛle menli asa nu la—Belemgbunlililɛ ne anwo nolobɔlɛ nee ɛdoavolɛyɛlɛ gyima ne bie. (Mat. 24:14; 28:19, 20) Nea kɛzi yɛ nye sɔ Gyisɛse neazo kɛnlɛma ne mɔɔ tɛla biala la a! Ɔhɔkpɔsale “azua nee namunamu zo na ɔbɔle Edwɛkpa ne mɔɔ fane Nyamenle Belemgbunlililɛ ne [anwo la] nolo.” (Luku 8:1) Kɛmɔ ɔyɛle la, yɛhyia diedi nee akɛnrasesebɛ na yɛahola yɛabɔ Belemgbunlililɛ edwɛkɛ ne nolo. Ɔlua Nyamenle moalɛ zo, yɛbahola yɛayɛ kɛ Nowa, mɔɔ vale akɛnrasesebɛ bɔle “pɛlepɛlelilɛ nwo nolo” hilele ‘amumuyɛma’ mɔɔ ɛnee bɛbawu wɔ azuyilɛ kpole ne anu la.—2 Pita 2:4, 5.

19 Asɔneyɛlɛ boa yɛ maa yɛyɛ edwɛkɛhanlɛ gyima ne. Mekɛ mɔɔ Kelaese ɛdoavolɛma bie mɔ mɔɔ bɛyɛle bɛ kpɔdekpɔde yɛle asɔne kɛ Nyamenle ɛmaa bɛ ‘akɛnrasesebɛ bɛha ye edwɛkɛ ne’ la, ɔbuale bɛ nzɛlɛle ne. (Bɛgenga Gyima ne 4:29-31.) Saa ɛsulo kɛ ɛbabɔ edwɛkɛ ne nolo wɔ azua nu a, Gyihova babua wɔ asɔne mɔɔ ɛyɛ ɛbiza diedi nee akɛnrasesebɛ la.—Bɛgenga Edwɛndolɛ 66:19, 20. *

20. Kɛ Gyihova azonvolɛ la, duzu moalɛ a wɔ ɛkɛ maa yɛ a?

20 Yɛyia ngyegyelɛ dɔɔnwo wɔ ɛtane ewiade ɛhye anu, yemɔti ɔmaa ɔyɛ se kɛ yɛbazonle Nyamenle. Noko akee, tɛ yɛ ngome a yɛlua a. Nyamenle ne yɛ lua. Zɔhane ala a, ɔ Ra ne, mɔɔ ɔle asafo ne Ati la noko nee yɛ lua a. Yɛ mediema Gyihova Alasevolɛ mɔɔ bo 7,000,000 wɔ ewiade amuala la noko wɔ ɛkɛ. Bɛmaa yɛ muala yɛbɔ nu yɛva diedi yɛbɔ edwɛkpa ne nolo na yɛmaa ɛvolɛ 2013 ɛvolɛdwɛkɛ ne mɔɔ se: ‘Mmasulo, gyinla kpundii. Gyihova wɔ Nyamenle ne nee wɔ lua’ la, ɛdɛnla yɛ adwenle nu.—Dwɔ. 1:9.

^ ɛden. 19 Ɛbanwu akɛnrasesebɛ nwo neazo dɔɔnwo wɔ edwɛkɛ ɛhye “Nyia Akɛnrasesebɛ Na Maa Ɛ Nwo Ɛyɛ Se” mɔɔ wɔ February 1, 2012, Ɛzinzalɛ Arane ne anu la anu.