“Bɛhile [anzɛɛ bɛkpa] mɔɔ bɛkɛzonle ye la.”—DWƆ. 24:15.

11. Duzu a Baebolo ne ka ye wɔ ɛnwomenlelielɛ nee ninyɛne mɔɔ yɛfa yɛdielie yɛ nye la anwo a, na duzu a ɔwɔ kɛ yɛmaa ɔtɛnla yɛ adwenle nu a?

KPƆKƐZILƐ nwo hyia kpole kpalɛ. Saa awie kulo kɛ ɔbɔ kpɔkɛ bie a, ɔlɛ adenle ɔkpa ninyɛne bie mɔ mɔɔ kola nyia ye ɛbɛlabɔlɛ zo tumi la. Kɛ neazo la: Saa ɛlua adenle bie anu na ɔkpakye nwiɔ arɛlevile nu a, boni a ɛbava zo a? Saa ɛze ɛleka mɔɔ ɛlɛkɔ la a, ɛbava nuhua ne mɔɔ ɔbava wɔ yeahɔ ɛkɛ la azo, ɛnrɛva nuhua ne mɔɔ bamaa wɔaminle la azo.

1-3. (a) Duzu ati a Dwɔhyua le awie mɔɔ zile kpɔkɛ kpalɛ wɔ ye ɛbɛlabɔlɛ nu la anwo neazo ɛ? (b) Saa ɔwɔ kɛ yɛsi kpɔkɛ bie a, duzu a ɔwɔ kɛ yɛkakye a?

2 Baebolo ne ka menli dɔɔnwo mɔɔ ɛnee ɔwɔ kɛ bɛsi kpɔkɛ la anwo edwɛkɛ. Kɛ neazo la, ɛnee ɔwɔ kɛ Kain si kpɔkɛ kɛ ɔbamaa ye ɛyavalɛ avo ɔ nwo zo anzɛɛ ɔbahomo zo. (Mɔl. 4:6, 7) Ɛnee ɔwɔ kɛ Dwɔhyua noko kpa kɛ ɔbazonle nɔhalɛ Nyamenle ne anzɛɛ awozonle ne mɔ. (Dwɔ. 24:15) Ɛnee Dwɔhyua kulo kɛ ɔtwe ɔbikye Gyihova; yemɔti, ɔzile kpɔkɛ mɔɔ bamaa yeayɛ zɔ la. Ɔluakɛ ɛnee Kain ɛnlɛ bodane zɛhae bie la ati, ɔzile kpɔkɛ mɔɔ bamaa yeahwe ɔ nwo yeavi Gyihova anwo la.

3 Ɔdwu mekɛ ne bie a ɔwɔ kɛ yɛdayɛ noko yɛsi kpɔkɛ mɔɔ nwolɛ hyia kpalɛ la. Saa ɔba ye zɔhane a, ɔwɔ kɛ yɛkakye kɛ yɛ kpɔkɛzilɛ ne bahola awula Gyihova anyunlunyia na yeahwe yɛ yɛabikye ye anzɛɛ yeahwe yɛ yɛavi ɔ nwo. (Bɛgenga Hibuluma 3:12.) Wɔ edwɛkɛ ɛhye nee mɔɔ doa zo la anu, yɛbazuzu ninyɛne nsuu mɔɔ ɔnle kɛ yɛmaa bɛtwe yɛ bɛfi Gyihova anwo la anwo.

GYIMA

4. Duzu ati a gyimayɛlɛ nwo hyia ɛ?

4 Keleseɛnema lɛ ɛzonlelilɛ kɛ bɛkɛnlea bɛ nwo nee bɛ mbusua. Baebolo ne ka kɛ saa awie ɛngulo kɛ ɔnea ye abusua a, ɛnee yezɛkye yedɛla sonla mɔɔ ɛnlɛ diedi la. (2 Tɛs. 3:10; 1 Tem. 5:8) Ɔda ali wienyi  kɛ gyimayɛlɛ nwo hyia wɔ ɛbɛlabɔlɛ nu, noko saa yɛannea boɛ a gyima bamaa yɛahwe yɛ nwo yɛavi Gyihova anwo. Adenle boni azo?

5. Duzu a nwolɛ hyia wɔ mekɛ mɔɔ yɛlɛsuzu gyima nwo la ɛ?

5 Fa ye kɛ ɛlɛkpondɛ gyima. Saa ɛwɔ maanle mɔɔ gyima nwo yɛ se la anu a, ɔbahola yeamaa wɔalie gyima biala mɔɔ ɛ sa baha ye la wɔado nu. Saa ɔba ye kɛ gyima ne nee Baebolo nu ngyinlazo ɛnnyia ɛ? Na saa gyima ne bamaa wɔadudu adenle, yeazi wɔ ɛzonlenlɛ gyima ne adenle anzɛɛ yeamaa ɛ nee wɔ abusua ne avinli ade noko ɛ? Asoo ɛbanyia adwenle kɛ gyima ɛtane tɛla awule la ati, ɛbayɛ gyima ne ɔ? Kakye kɛ saa ɛfa adenle ɛtane zo a, ɔbamaa wɔahwe ɛ nwo wɔavi Gyihova anwo. (Hib. 2:1) Ɛlɛkpondɛ gyima anzɛɛ ɛlɛneɛnlea gyima mɔɔ ɛyɛ ye kɛkala la anu a, kɛzi ɛbahola wɔazi kpɔkɛ kpalɛ ɛ?

6, 7. (a) Gyima nwo bodane boni mɔ a awie bahola ava azie ɔ nye zo a? (b) Bodane boni a bamaa wɔabikye Gyihova a, na duzu ati ɔ?

6 Kɛmɔ yɛlumua yɛha la, maa mɔɔ ɛkpondɛ la ɛdɛnla wɔ adwenle nu. Biza ɛ nwo kɛ, ‘Duzu a mekulo kɛ me gyima maa mekola meyɛ a?’ Saa ɛkpondɛ kɛ wɔ gyima maa ɛ nee wɔ abusua ne nyia mɔɔ bɛhyia nwo na bɛahola bɛazonle Gyihova la a, Gyihova bayila wɔ mɔdenlebɔlɛ ne azo. (Mat. 6:33) Saa wɔ gyima sɛkye anzɛɛ wɔ ezukoa fi ɛ sa a, Gyihova ɛnrɛbu ɔ nye ɛnrɛgua ɛ nwo zo. (Aye. 59:1) Ɔze “kɛ ɔsi ɔdie menli kpalɛ ɔfi bɛ sɔnea nu” la.—2 Pita 2:9.

7 Na saa wɔ adwenle a le kɛ ɛkpondɛ anwonyia ɛ? Bie a ɛbayɛ boɛ. Noko akee, kakye kɛ “boɛyɛlɛ” ɛhye ɛmmaa mgbane—ɛnrɛhola nwolɛ kakɛ tua. (Bɛgenga 1 Temɔte 6:9, 10.) Anwonyia ɛhulolɛ nee gyima dɔɔnwo dɔɔnwo kola twe yɛ fi Gyihova anwo.

8, 9. Duzu a ɔwɔ kɛ awovolɛ suzu nwo wɔ subane mɔɔ bɛlɛ ye wɔ gyima nwo la anwo a? Kilehile nu.

8 Saa ɛle wovolɛ a, suzu kɛzi wɔ neazo ne baha ɛ mra la anwo. Duzu a bɛnwu kɛ nwolɛ hyia wɔ kpalɛ a, wɔ gyima anzɛɛ ɛ nee Gyihova bɛ agɔnwolɛvalɛ ne? Saa bɛnwu kɛ gyinlabelɛ, duma, yɛɛ anwonyia a nwolɛ hyia wɔ kpalɛ a, bɛbali wɔ neazo ɛtane ɛhye anzi ɔ? Asoo ɛbulɛ mɔɔ bɛlɛ bɛmaa wɔ kɛ wovolɛ la azo ɛnrɛde ɔ? Keleseɛnenli kakula ko ka kɛ: “Mekakye kɛ ɛnee me papa gyima hyia ye tɛla debie biala. Mɔlebɛbo ne, ɛnee ɔle kɛ asɛɛ ɔyɛ gyima ɛsesebɛ amaa abusua ne anyia ninyɛne kpalɛ mɔɔ yɛhyia la. Ɛnee ɔkulo kɛ ɔnea yɛ kpalɛ. Noko kenlensa ye, ninyɛne ɛhakyi. Ɔyɛ gyima mekɛ biala, na ɔtotɔ ninyɛne awolɛ ɛsesebɛ mɔɔ yɛngyia nwo la ɔmaa yɛ. Ɔlua ɛhye ati, ɛnee bɛze yɛ kɛ abusua mɔɔ bɛlɛ ezukoa noko bɛmboa menli wɔ sunusm nu. Me nye balie kɛ me papa baboa yɛ susum nu tɛla kɛ ɔbayɛ gyima yeanyia ezukoa dɔɔnwo la.”

9 Awovolɛ, bɛmmatwe bɛ nwo bɛfi Gyihova anwo ɔlua gyima mɔɔ bɛbava bɛ nwo bɛawula nu dɔɔnwo la azo. Bɛva bɛ nyɛleɛ bɛhile bɛ mra kɛ bɛdie bɛdi nɔhalɛ nu kɛ agyadeɛ kpole mɔɔ yɛ sa bahola aha ye la ɛnle nwonane nu ninyɛne, emomu ɔle sunsum nu ninyɛne.—Mat. 5:3.

10. Saa kakula ɛlɛsi gyima nwo kpɔkɛ a, duzu a ɔwɔ kɛ ɔsuzu nwo a?

10 Saa ɛle kakula mɔɔ ɛlɛsuzu gyima nwo a, kɛzi ɛbahola wɔazi kpɔkɛ kpalɛ ɛ? Kɛmɔ yɛlumua yɛha la, ɔwɔ kɛ ɛnwu debie mɔɔ gyi ɛ nye zo la. Asoo ndetelɛ mɔɔ ɛlɛnyia nee gyima mɔɔ ɛlɛsukoa la bamaa wɔanyia adenle wɔayɛ Belemgbunlililɛ gyima ne kpalɛ anzɛɛ ɔbahwe wɔ yeavi Gyihova anwo?  (2 Tem. 4:10) Asoo wɔ bodane a le kɛ ɛbazukoa menli mɔɔ bɛ anyelielɛ gyi bɛ ezukoa mɔɔ wɔ bange anzɛɛ ninyɛne mɔɔ bɛlɛ azo la ɔ? Anzɛɛ ɛbanyia Devidi mɔɔ hɛlɛle edwɛkɛ ɛhye la anwondozo ne bie: “Ɛnee mele kakula, na kɛkala meyɛ kpanyinli; na metɛnwunle kɛ bɛkpo tenlenenli ɛlɛ; yɛɛ metɛnwunle kɛ ɔ mra ɛlɛsɛlɛzɛlɛ aleɛ ali”? (Edw. 37:25) Kakye kɛ adenle ne ko bamaa wɔahwe ɛ nwo wɔavi Gyihova anwo, noko ko ne bamaa wɔanyia asetɛnla kpalɛ mɔɔ tɛla biala. (Bɛgenga Mrɛlɛbulɛ 10:22; Malakae 3:10.) Adenle ne boni a ɛbakpa a? *

ƐNWOMENLELIELƐ NEE ANYELIELƐ NINYƐNE

11. Duzu a Baebolo ne ka ye wɔ ɛnwomenlelielɛ nee ninyɛne mɔɔ yɛfa yɛdielie yɛ nye la anwo a, na duzu a ɔwɔ kɛ yɛmaa ɔtɛnla yɛ adwenle nu a?

11 Baebolo ne ɛndua anyelielɛ, yɛɛ ɔmbu ɛnwomenlelielɛ nee anyelielɛ ninyɛne kɛ ɔsɛkye mekɛ. Pɔɔlo hɛlɛle Temɔte kɛ “nwonane agbɔkɛ nu ɛkpundinlɛ hyia.” (1 Tem. 4:8) Baebolo ne ka bɔbɔ kɛ “mekɛ mɔɔ bɛsele” nee “mekɛ mɔɔ bɛsi agole” la wɔ ɛkɛ, yɛɛ ɔmaa bɛ menle ɛlielɛ kpalɛ nwo anwosesebɛ. (Nolo. 3:4; 4:6) Noko saa yɛannea boɛ a, ɛnwomenlelielɛ nee anyelielɛ ninyɛne bahola ahwe yɛ avi Gyihova anwo. Kɛzi? Ninyɛne nwiɔ a kola yɛ ngyegyelɛ kpalɛ a—ninyɛne mɔɔ yɛkpa nee mekɛ dodo mɔɔ yɛfa yɛyɛ la.

Ɛnwomenlelielɛ kpalɛ maa ahonle tɔ azule nu

12. Ninyɛne mɔɔ ɛfa ɛdie ɛ menle nee mɔɔ ɛfa ɛdielie ɛ nye la anwo edwɛkɛ boni a ɔwɔ kɛ ɛsuzu nwo a?

12 Mɔɔ ɔlumua, maa yɛzuzu ninyɛne mɔɔ yɛkpa la anwo. Ɛbahola wɔanyia ɛnwomenlelielɛ nee anyelielɛ ninyɛne mɔɔ ɔfɛta. Noko, dɔɔnwo wɔ ɛkɛ mɔɔ bɛkanvo ninyɛne mɔɔ Nyamenle kyi a. Bie mɔ a le basabasayɛlɛ, sunsum ɛtane nyɛleɛ, nee nla nu ɛbɛla ɛtane. Ɛhye ati, ɔhyia kɛ ɛneɛnlea ninyɛne mɔɔ ɛfa ɛdie ɛ menle nee mɔɔ ɛfa ɛdielie ɛ nye la anu kpalɛ. Tumi boni a ɔnyia ye wɔ ɛ nwo zo a? Asoo ɔmaa ɛnyia basabasayɛlɛ, ɛzulɛ anzɛɛ maanle nwo ɛhulolɛ subane? (Mrɛ. 3:31) Ɔmaa ɛsɛkye ezukoa ɔ? Asoo ɔmaa awie mɔ kpo aze? (Wulo. 14:21) Menli boni mɔ a ninyɛne mɔɔ ɛfa ɛdie ɛ menle nee mɔɔ ɛfa ɛdielie ɛ nye la maa ɛfa bɛ agɔnwolɛ a?  (Mrɛ. 13:20) Ɔmaa ɛnyia atiakunluwɔzo ɛtane ɔ?—Gye. 1:14, 15.

13, 14. Duzu a ɔhyia kɛ ɛsuzu nwo wɔ mekɛ dodo mɔɔ ɛfa ɛdielie ɛ nye la anwo a?

13 Maa yɛzuzu mekɛ mɔɔ yɛfa yɛdie yɛ menle nee mɔɔ yɛfa yɛdielie yɛ nye la noko anwo. Biza ɛ nwo kɛ, ‘Asoo mefa mekɛ dɔɔnwo medie me nye na meava mekɛ ekyi bie ala meayɛ me ɛzonlenlɛ gyima ne ɔ?’ Saa ɛfa mekɛ dɔɔnwo ɛdie ɛ menle anzɛɛ ɛ nye a, zolɛ ɛnrɛra wɔ nvasoɛ. Nɔhalɛ nu, bɛdabɛ mɔɔ bɛfa mekɛ mɔɔ fɛta la bɛdie bɛ nye la anye die kpalɛ. Duzu ati ɔ? Ɔluakɛ bɛze kɛ bɛlumua “bɛyɛ” ninyɛne mɔɔ anwo hyia kpalɛ la ati, saa bɛlɛdie bɛ menle a bɛ adwenle ɛmbua bɛ fɔlɛ.—Bɛgenga Ɛfɛsɛsema 5:10.

14 Ɔnva nwo kɛ awie bahola ade nganeɛ kɛ mekɛ dɔɔnwo mɔɔ ɔfa ɔdie ɔ nye fɛta la, saa ɔtoa zo ɔyɛ zɔ a ɔbahola yeahwe ye yeavi Gyihova anwo. Bie dole adiema raalɛ ko mɔɔ bɛfɛlɛ ye Kim mɔɔ yenyia ɛvolɛ 20 la. Ɔka kɛ: “Ɛnee mekɔ ɛkponledolɛ bo Yalɛ, Folɛ nee Molɛ biala. Noko kɛkala menwu kɛ ninyɛne dɔɔnwo mɔɔ anwo hyia mɔɔ ɔwɔ kɛ meyɛ la wɔ ɛkɛ. Kɛ neazo la, kɛmɔ mele adekpakyelɛnli la ati, medwazo nwonlomɔ dɔne nsia mekɔ daselɛlilɛ, yemɔti menrɛhola menrɛliele me nye dedee aleɛbahye dɔne ko anzɛɛ dɔne nwiɔ. Meze kɛ anyelielɛ ɛnle ɛtane ɛdeɛ, noko ɔkola ɔtwehwe sonla adwenle. Ɔle kɛ ninyɛne mɔɔ ɛha la, ɔlɛ ye mekɛ.”

15. Kɛ ɔkɛyɛ na awovolɛ aboa bɛ mra bamaa bɛanyia anyelielɛ ninyɛne mɔɔ fɛta la ɛ?

15 Ɔle awovolɛ ɛzonlelilɛ kɛ bɛbali bɛ mra nwonane nu, sunsum nu, nee nganeɛdelɛ nu ngyianlɛ nwo gyima. Ɛhye kile kɛ bɛbayɛ ɛnwomenlelielɛ nwo ngyehyɛleɛ. Saa ɛle wovolɛ a, mmatua ɛ mra anyelielɛ ɛka kɛ ɔle ɛtane kɛ awie kɛlie ɔ nye. Mekɛ ko ne ala, bɔ mɔdenle koati ninyɛndane. (1 Kɔl. 5:6) Saa ɛdwenle nwolɛ kpalɛ a, ɛbanyia ɛnwomenlelielɛ nee anyelielɛ ninyɛne mɔɔ bamaa wɔ abusua ne ahonle adɔ ye azule nu la. * Wɔ adenle ɛhye azo, ɛ nee ɛ mra ne mɔ bava adenle mɔɔ ɔbamaa bɛabikye Gyihova la azo.

ABUSUA NU NGITANWOLILƐ

16, 17. Tɛnlabelɛ boni a ɛmaa awovolɛ dɔɔnwo ɛli nyane a, na duzu a maa yɛnwu kɛ Gyihova ze nyane mɔɔ bɛdi la ɛ?

16 Kɛmɔ abusuabɔlɛ mɔɔ wɔ wovolɛ nee ralɛ avinli anu yɛ se kpalɛ la ati, Gyihova vale hilehilele ɛlɔlɛ mɔɔ ɔlɛ ɔmaa ye menli la anu. (Aye. 49:15) Zɔhane ati, ndelebɛbo wɔ nu kɛ busuanli bie kpo Gyihova a ye alɔvolɛ di nyane la. Adiema raalɛ ko mɔɔ bɛdule ɔ ra la hanle kɛ: “Me adwenle zɛkyele. Membizale me nwo kɛ, ‘Duzu ati a yekpo Gyihova ɛ?’ Mendele nganeɛ kɛ medi nwolɛ ɛzonle, na membuale me nwo fɔlɛ.”

17 Gyihova te wɔ nyanelilɛ ne abo. Mekɛ mɔɔ sonla mɔɔ ɔlumua nee menli dɔɔnwo mɔɔ nzinlii dɛnlanle aze kolaa na Azuyilɛ ne ara dele atua la, ‘ɔyɛle ye nyane.’ (Mɔl. 6:5, 6) Ɔbahola yeayɛ se yeamaa menli mɔɔ ɛhye bie ɛtɛtole bɛ la kɛ bɛbade nyanelilɛ ɛhye abo. Noko akee, nrɛlɛbɛ ɛnle nu kɛ ɛkɛmaa busuanli mɔɔ bɛdu ye la nyɛleɛ ɛtane ne kɛhwe wɔ kɛvi Gyihova anwo. Kɛ ɔkɛyɛ na wɔagyinla nyane mɔɔ busuanli mɔɔ kɛkpo Gyihova maa bɛdi la anloa ɛ?

18. Duzu ati a saa kakula bie kpo Gyihova a ɔnle kɛ awovolɛ te nganeɛ kɛ bɛdi nwolɛ ɛzonle ɛ?

18 Mmabua ɛ nwo fɔlɛ wɔ mɔɔ ɛzi la anwo. Gyihova ɛmaa awie biala adenle kɛ ɔzi ye kpɔkɛ, na abusua ne anu sonla biala mɔɔ ɛyila ɔ nwo zo ɛzɔne la “ɔdaye ɔbazoa ye adesoa.” (Gal. 6:5) Awieleɛ  bɔkɔɔ ne, ɛtanevolɛ ne a Gyihova bamaa yeabu ye nyɛleɛ ne anwo mgbonda a, tɛ ɛdawɔ ɔ. (Yiz. 18:20) Bieko, mmafa ɛzonle ne ɛsoa awie mɔ. Die Gyihova anzohwenlɛ nwo ngyehyɛleɛ ne to nu. Abɔnsam a ɔwɔ kɛ ɛfa ɔ nwo ɛya a—tɛ mboaneneavolɛma mɔɔ bɛkulo kɛ bɛbɔ asafo ne anwo bane la ɔ.—1 Pita 5:8, 9.

Nvonleɛ biala ɛnle nwolɛ kɛ ɛbanyia anyelazo kɛ wɔ kulovolɛ ne bazia ara Gyihova ɛkɛ

19, 20. (a) Duzu a ɔwɔ kɛ awovolɛ mɔɔ bɛdu bɛ mra la yɛ fa gyinla bɛ nyanelilɛ ne anloa a? (b) Anyelazo kpalɛ boni a ɔwɔ kɛ awovolɛ ɛhye mɔ nyia a?

19 Saa ɛfa Gyihova anwo ɛya a, ɛbahwe ɛ nwo wɔavi ɔ nwo. Nɔhalɛ, ɔwɔ kɛ ɛmaa wɔ busuanli ne mɔɔ ɛkulo ye edwɛkɛ la nwu kpɔkɛ mɔɔ wɔzi kɛ ɛmaa Gyihova alumua wɔ wɔ debie biala—mɔɔ wɔ abusua nu edwɛkɛ boka nwo anyunlu la. Yemɔti, amaa wɔahola wɔagyinla tɛnlabelɛ ne anloa la, ɔwɔ kɛ ɛbɔ wɔ sunsum nu gyinlabelɛ ne anwo bane. Mmatwe ɛ nwo ɛfi ɛ mediema Keleseɛnema anwo ɛlɛ. (Mrɛ. 18:1) Ka kɛzi ɛte nganeɛ la kile Gyihova wɔ nzɛlɛlɛ nu. (Edw. 62:7, 8) Mmafa ninyɛne ɛye ɛ nloa ɛ nee busuanli bie mɔɔ bɛdu ye la dua Intanɛte anzɛɛ fonu zo di adwelie. (1 Kɔl. 5:11) Kɔ zo fa ɛ nwo wula sunsum nu gyimalilɛ nu dɔɔnwo. (1 Kɔl. 15:58) Adiema raalɛ ne mɔɔ yɛha ɔ nwo edwɛkɛ wɔ anwuma ɛkɛ la ka kɛ, “Meze kɛ ɔwɔ kɛ memaa me nye bolo Gyihova ɛzonlenlɛ nwo na memaa me nwo yɛ se wɔ sunsum nu amaa saa me ra raalɛ ne sia ba Gyihova ɛkɛ a, meahola meaboa ye.”

20 Baebolo ne ka kɛ ɛlɔlɛ lɛ “debie biala anwo anyelazo.” (1 Kɔl. 13:4, 7) Nvonleɛ biala ɛnle nwolɛ kɛ ɛbanyia anyelazo kɛ wɔ kulovolɛ ne bazia ara. Ɛvolɛ biala, ɛtanevolɛma dɔɔnwo nu bɛ nwo na bɛsia bɛba Gyihova ahyehyɛdeɛ ne anu. Gyihova ɛnva bɛ nwo edwɛkɛ ɛnzie ye nu. Emomu, “fakyɛ wɔ [ye] afoa.”—Edw. 86:5.

SI KPƆKƐ KPALƐ

21, 22. Kɛmɔ ɛlɛ adenle ɛsi ɛ ti anwo kpɔkɛ la ati, duzu a wɔsika ɛ bo kɛ ɛbayɛ a?

21 Gyihova vale adenle mɔɔ sonla lɛ kpa mɔɔ ɔkulo la bɔle ye. (Bɛgenga Mɛla ne 30:19, 20.) Noko ɛzonlelilɛ wɔ nwo. Ɔwɔ kɛ Keleseɛnenli biala biza ɔ nwo kɛ: ‘Adenle ne boni anu a melua a? Memaa me gyima, ɛnwomenlelielɛ yɛɛ anyelielɛ ninyɛne, anzɛɛ busuanli bie ɛhwe me ɛvi Gyihova anwo ɔ?’

22 Gyihova kulo ye menli dahuu. Debie kokye mɔɔ kola twe yɛ fi Gyihova anwo la a le kpɔkɛ ɛtane ɛbɔlɛ. (Wulo. 8:38, 39) Noko akee, ɔnle kɛ yɛmaa ɛhye si! Fa yɛ wɔ bodane kɛ ɛnrɛmaa debie biala ɛnrɛhwe wɔ ɛnrɛvi Gyihova anwo. Yɛbazuzu ninyɛne nna bieko mɔɔ ɔwɔ kɛ yɛsi kpɔkɛ kpalɛ wɔ nwo la anwo wɔ edwɛkɛ mɔɔ doa zo la anu.

^ ɛden. 10 Saa ɛkpondɛ kɛzi bɛsi gyima nwo kpɔkɛ la anwo edwɛkɛ dɔɔnwo a, nea Questions Young People Ask—Answers That Work, Foa 2 tile 38.

^ ɛden. 15 Saa ɛkpondɛ nzuzulɛ bie mɔ a nea November 2011 Awake! ne mukelɛ 17-19.