Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILE | YEKILE MƆƆ MAA YƐNWU SUNSUM NU ƐLEKA NE LA

Menli Mɔɔ Bɛwɔ Sunsum Nu Ɛleka Ne La Anwo Kpuya

Menli Mɔɔ Bɛwɔ Sunsum Nu Ɛleka Ne La Anwo Kpuya

Asoo wɔbiza bɛdabɛ mɔɔ bɛwɔ sunsum nu ɛleka ne nee bɛdabɛ mɔɔ bɛwɔ lɔ la anwo edwɛkɛ ɛlɛ? Saa ɔle zɔ a, ɛnee tɛ ɛ ngomekye ɔ. Ɛvolɛ mgbe dɔɔnwo mɔɔ ɛze la, menli ɛbɔ bɛ ti anu ɛha nwolɛ edwɛkɛ dɔɔnwo. Bie mɔ die di kɛ yɛ nlenyia mɔ wɔ sunsum nu ɛleka ɛhye mɔɔ ɔwɔ kɛ yɛdi bɛ eni a. Bie mɔ suzu kɛ anwuma lɔ le ɛleka mɔɔ anzodwolɛ wɔ a, na anwumabɔvolɛma nee kpalɛma mɔɔ bɛwu la wɔ ɛkɛ a. Eza bie mɔ se, nyamenle dɔɔnwo wɔ sunsum nu ɛleka ne.

Menli dɔɔnwo su kpolera kɛ yɛnrɛhola yɛnrɛnwu debie biala mɔɔ fale sunsum nu ɛleka ne anwo la, ɔluakɛ awie biala vi lɔ ɛtɛbakanle nehane edwɛkɛ ɛtɛkilele yɛ. Noko, adwenle ɛhye ɛndenrɛ. Gyisɛse Kelaese dɛnlanle anwuma, wɔ sunsum nu ɛleka ne kolaa na yeara azɛlɛ ye azo. Ɔhanle ye wienyi ɔhilele ɛvoya mɔɔ limoa la ɛzonlenlɛ nu mgbanyima ne kɛ: “Mevi anwuma membale kɛ mebayɛ mɔɔ zoanle me la ɛhulolɛdeɛ, na meamba kɛ mebali me ti anwo.” Ɛnee Gyisɛse ɛlɛka edwɛkɛ mɔɔ ɔtɛbɔle zolɛ ɛlɛ la ahile ye ɛzoanvolɛma kɛ: “Egya awuke nu ɛkɛ ne azua ngome.”​—Dwɔn 6:38; 14:2.

Nɔhalɛ nu, Gyisɛse ɔ Ze a le Nyamenle, mɔɔ ye duma a le Gyihova, na Ye “awuke” wɔ anwuma lɔ. (Edwɛndolɛ 83:18) Ɔti, awie biala ɛnrɛhola ɛnrɛha anwuma lɔ edwɛkɛ kpalɛ ɛnrɛdɛla Gyihova nee Gyisɛse Kelaese. Bɛlale edwɛkɛ dɔɔnwo mɔɔ fale sunsum nu ɛleka ne anwo la ali, ɔlua yekile mɔɔ bɛyele bɛhilele nɔhavoma ne la azo.

Edwɛkɛ mɔɔ doa zo la ka Baebolo ne foa bie mɔ mɔɔ kilehile yekile ngakyile mɔɔ menli bie mɔ nwunle bɛ la anu. Ɛlɛdwenle yekile ɛhye mɔ anwo a, kakye kɛ sunsum nu ɛleka ne ɛnle debie mɔɔ yɛkola yɛsɔ nu anzɛɛ yɛnwu ye a. Ɔti, kɛ anrɛɛ Nyamenle bava edwɛkɛ agbɔkɛ mɔɔ sunsum nu abɔdeɛ ala a bɛade ɔ bo la, ɔluale yekile zo amaa yɛanwu kɛzi sunsum nu ɛleka ne de la. Yekile ne baboa wɔ yeamaa wɔade bɛdabɛ mɔɔ bɛwɔ sunsum nu ɛleka ne mɔɔ “azua ngome” wɔ ɛkɛ la abo.