Wulu kɔ nuhua edwɛkɛ ne azo

wulu kɔ menu ngyikyi ne azo

Wulu kɔ nuninyɛne ne azo

Gyihova Alasevolɛ

Nzema

Ɛzinzalɛ Arane  |  No. 5 2017

 EDWƐKƐ TITILI | ANWUMABƆVOLƐMA​—ASOO BƐWƆ ƐKƐ? DEƐMƆTI ƆHYIA LA

Anwumabɔvolɛma​—Kɛzi Bɛka Wɔ Ɛbɛlabɔlɛ Ɛ?

Anwumabɔvolɛma​—Kɛzi Bɛka Wɔ Ɛbɛlabɔlɛ Ɛ?

Kenle ko Molɛ ewiazo, Kenneth nee Filomena mɔɔ bɛde Curaçao la hɔkpɔlale agyalɛma bie mɔɔ bɛ nee bɛ sukoa Baebolo ne la.

Kenneth ka kɛ, “yɛdwule ɛkɛ ne la ɛnee bɛdo sua ne anu yɛɛ kale ne ɛnle ɛkɛ. Noko debie hanle me kɛ menvɛlɛ ɔ ye wɔ fonu zo.”

Raalɛ ne vale ye fonu ne la, ɔhanle kɛ ɔ hu ɛhɔ gyima. Noko wɔ mekɛ mɔɔ ɔnwunle kɛ Kenneth nee Filomena gyi anlenkɛ ne anzi la, ɔrabukele bɛ.

Ɛkɛ ne ala bɛnwunle kɛ ɛnee raalɛ ne ɛlɛsu. Mekɛ mɔɔ Kenneth vale asɔneyɛlɛ bɔle Baebolo ɛzukoalɛ ne abo la raalɛ ne zunle bieko. Kenneth nee Filomena bizale ye deɛmɔti ɔlɛsu la.

Raalɛ ne hanle kɛ anrɛɛ ɔku ɔ nwo zɔhane ewia ye ne, ɔti ɛnee ɔlɛkɛlɛ nwolɛ kɛlata yeado ɔ hu ɛkɛ yɛɛ Kenneth vɛlɛle a. Ɔdoale zo kɛ yenyia adwenle nu ngyegyelɛ, ɔti bɛvale Baebolo ne anu edwɛkɛ bɛkyekyele ɔ rɛle. Anwosesebɛmaanlɛ zɔhane liele ye ngoane.

Kenneth hanle kɛ, “Yɛda Gyihova ase kɛ yemaa yɛhola yɛboa raalɛ ɛhye mɔɔ ɛnee lɛ ngyegyelɛ la. Ɔluale anwumabɔvolɛ anzɛɛ Ye sunsum nwuanzanwuanza ne azo ɔmaanle yɛvɛlɛle ye!” *

Asoo adwenle mɔɔ Kenneth nee Filomena nyianle kɛ Gyihova luale anwumabɔvolɛ anzɛɛ Ye sunsum nwuanzanwuanza ne azo vale ɔ nwo liele ninyɛne nu la le nɔhalɛ ɔ? Anzɛɛ edwɛkɛ nee edwɛkɛ a yiale a?

Yɛnrɛhola yɛnrɛzi ye pi. Noko mɔɔ yɛze la a le kɛ Nyamenle fa ye anwumabɔvolɛma boa menli. Kɛ neazo la, Baebolo ne ka kɛ Nyamenle vale anwumabɔvolɛ bie boale edwɛkpakavolɛ Felepe maanle ɔboale Yiteyopeanli abɔlɔba bie mɔɔ ɛnee ɔlɛkpondɛ sunsum nu adehilelɛ la.​—Gyima ne 8:26-31.

Ɛzonlenlɛ ngakyile maa menli die di kɛ sunsum nu abɔdeɛ bie mɔ mɔɔ lɛ tumi kpole la wɔ ɛkɛ. Bɛka bie mɔ anwo edwɛkɛ kɛ bɛle atiakunlukɛnlɛma na bɛdi Nyamenle bodane nwo gyima anzɛɛ bɛbɔ menli nwo bane. Menli dɔɔnwo ɛnlie ɛnli ala kɛ anwumabɔvolɛma wɔ ɛkɛ emomu eza bɛdie bɛdi kɛ zɔhane sunsum nu abɔdeɛ ne mɔ kola nyia yɛ ɛbɛlabɔlɛ zo tumi wɔ adenle bie azo. Noko, menli bie mɔ ɛnlie anwumabɔvolɛma ɛnli kolaa.

Asoo anwumabɔvolɛma wɔ ɛkɛ? Saa ɔle zɔ a, bɛvi ni? Anwumabɔvolɛma anwo nɔhalɛ edwɛkɛ a le boni? Kɛzi bɛka wɔ ɛbɛlabɔlɛ ɛ? Bɛmaa yɛzuzu daselɛ mɔɔ wɔ ɛkɛ la anwo.

^ ɛden. 8 Baebolo ne maa yɛnwu kɛ Nyamenle duma a le Gyihova.​—Edwɛndolɛ 83:18.