Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Yɛbanyia Ewiade Mɔɔ Basabasayɛlɛ Ɛnle Nu La Ɔ?

Yɛbanyia Ewiade Mɔɔ Basabasayɛlɛ Ɛnle Nu La Ɔ?

Asoo bɛyɛ ɛdawɔ anzɛɛ wɔ busuanli bie basabasa ɛlɛ ɔ? Ɛsulo kɛ bɛbayɛ wɔ basabasa ɔ? Bɛha basabasayɛlɛ nwo edwɛkɛ kɛ “ngyegyelɛ mɔɔ ɛlɛkɔ ɔ nyunlu wɔ ewiade amuala.” Suzu neazo bie mɔ anwo.

SUA NU NEE NLA NU BASABASAYƐLƐ: Maamgbole Koyɛlɛ Eku ne bɔle amaneɛ kɛ, “Ɛye mraalɛ nsa ɛsie ahane a, nuhua ko ahu ɛbo ye anzɛɛ ɛyɛ ye basabasa wɔ nla nu wɔ ye ɛbɛlabɔlɛ nu ɛlɛ.” Ɔyɛ alɔbɔlɛ kɛ, “mgbondabulɛ kile kɛ, wɔ ewiade amuala, ɛye mraalɛ nnu ɛsie ahane a, bɛbado nuhua ko bɔna anzɛɛ bɛbabɔ mɔdenle kɛ bɛto ye bɔna.”

GUA ZO ƐTANELILƐ: Amaneɛbɔlɛ kile kɛ eku mɔɔ yɛ basabasa mɔɔ bɛbo 30,000 la ɛlɛdi ɛtane wɔ United States. Wɔ Latin America, ɛye menli 3 ɛsie ahane a, bɛ nuhua 1 ɛha kɛ bɛyɛ ye basabasa ɛlɛ.

MENLIHUNLƐ: Bɛbu mgbonda kɛ kenlensa ye ala bɛhu menli dɔɔnwo bɛdɛla mɔɔ bɛhunle bɛ wɔ konle nu la. Bɛhu menli dɔɔnwo wɔ Africa Nyiankɛ nee America Avinli maanle ne mɔ azo bɛdɛla menli mɔɔ bɛhu bɛ wɔ ewiade amuala la. Wɔ ɛvolɛ ko pɛ anu bɛhunle menli mɔɔ bo 100,000 la wɔ Latin America yɛɛ bɛhunle kɛyɛ 50,000 wɔ Brazil angomekye. Asoo yɛbahola yɛanyia basabasayɛlɛ nwo sɔbelɛ bɔkɔɔ?

BASABASAYƐLƐ BO BAPƐ Ɔ?

Nzɔne ati a basabasayɛlɛ ɛbu zo a? Bɛnwu ninyɛne dɔɔnwo mɔɔ fa ɛhye ba la, bɛmɛ a le: nzisi mɔɔ kɔ zo wɔ menli avinli, awie mɔ ngoane mɔɔ bɛmbu bɛ, nzabolɛ nee nyiletane ɛnlonlɛ, ngakula mɔɔ bɛmaa bɛnea basabasa mɔɔ mgbanyinli yɛ la yɛɛ bɛnyɛ menli mɔɔ yɛ basabasa la ɛhwee.

Nɔhalɛ nu, maanle bie mɔ ɛlɛbɔ mɔdenle kɛ bɛbamaa basabasayɛlɛ zo ade. Amaneɛbɔlɛ kile kɛ kodiawuyɛlɛ azo ɛde kɛyɛ ɛya ko ngyɛnu 80 wɔ ɛvolɛ bulu mɔɔ ɛze la wɔ suakpole São Paulo, Brazil, mɔɔ menli dɔɔnwo wɔ zo la azo. Noko, ɛtanelilɛ ɛbu zo wɔ suakpole zɔhane azo na ɛye menli 100,000 ɛsie ahane a, bɛku nuhua 10. Duzu a bɛbayɛ bɛava bɛadu basabasayɛlɛ bo bɔkɔɔ a?

Ye sɔbelɛ mumua ne gyi menli nyɛleɛ nee bɛ subane zo. Saa basabasayɛlɛma bahakyi a, ɔwɔ kɛ bɛfa ɛlɔlɛ, ɛbulɛ, nee awie mɔ mɔɔ bɛdwenle bɛ nwo la bɛsie subane mɔɔ le kɛ anwomemaazo, anyebolo nee angomedi agyakɛ anu.

Duzu a baboa awie amaa yeayɛ nzenzaleɛ ɛhye a? Dwenle mɔɔ Baebolo ne kilehile la anwo:

  • “Ɔluakɛ saa yɛdi Nyamenle mɛla ne mɔ azo a ɛnee yɛkulo Nyamenle.”​—1 Dwɔn 5:3.

  • “[Gyihova] ɛzulolɛ le ɛtane ɛhyilɛ.”​—Mrɛlɛbulɛ 8:13.

Nyamenle anwo ɛlɔlɛ nee ɛzulolɛ mɔɔ yɛsulo kɛ yɛbayɛ debie mɔɔ ɛnzɔ ɔ nye la le debie mɔɔ kola ka menli mɔɔ yɛ basabasa bɔbɔ la ɔmaa bɛkakyi bɛ ɛbɛlabɔlɛ​—tɛ ndɛndɛ zo, noko ɔkakyi bɛ ɛbɛlabɔlɛ ne bɔkɔɔ. Asoo ɔkola ɔba ye zɔ?

 Suzu Alex, * mɔɔ lale efiade ɛvolɛ 19 wɔ Brazil ɔlua ɛtane mɔɔ ɔlile la ati la anwo nea. Ɔ nee Alasevolɛ ne mɔ zukoale Baebolo ne la, ɔrayɛle Gyihova Dasevolɛ wɔ ɛvolɛ 2000 ne anu. Asoo yehakyi ye basabasayɛlɛ subane ne ɔ? Ɛhɛe, na Alex di nyane kpole wɔ ɛtane dɔɔnwo mɔɔ ɔyɛle la anwo. Ɔka kɛ: “Mekulo Nyamenle ɔluakɛ yemaa menwu kɛ yeva me ɛtane yehyɛ me bɔkɔɔ. Gyihova anwo ɛlɔlɛ nee anyezɔlɛ ɛboa me ɛmaa mehakyi me ɛbɛlabɔlɛ.”

César mɔɔ vi Brazil la noko ɛnee twe etu sie menli nwo zo na ɔwua bɛ. Ɔyɛle ɛhye too ɛvolɛ kɛyɛ 15. Duzu a maanle ɔyɛle nzenzaleɛ a? Mɔɔ ɔla efiade ɛkɛ la, Gyihova Alasevolɛ rakpɔlale ye na bɛ nee ye zukoale Baebolo ne. César kile nu kɛ: “Bɔ zo mɔɔ menwu kɛ menyia ɛbɛlabɔlɛ nu bodane a. Menzukoale kɛ mebahulo Nyamenle na meazulo ye​—ɛnee mesulo kɛ mebazia meayɛ ɛtane na meamaa Gyihova ali nyane. Ɛnee mengulo kɛ mebayɛ debie meahile kɛ menze ayɛlɛ wɔ ye kpalɛyɛlɛ ne anwo. Ɛlɔlɛ nee ɛzulolɛ ɛhye maanle mengakyile.”

Sukoa kɛzi ɛbahola wɔadɛnla ewiade mɔɔ basabasayɛlɛ ɛnle nu la anwo debie

Duzu a edwɛkɛ ɛhye mɔ maa yɛnwu ye a? Baebolo ne lɛ tumi mɔɔ ɔkakyi menli ɛbɛlabɔlɛ bɔkɔɔ​—ɔlua bɛ nzuzulɛ mɔɔ ɔkakyi ye la. (Ɛfɛsɛsema 4:23) Alex mɔɔ yɛhanle ɔ nwo edwɛkɛ la toa zo kɛ: “Mɔɔ menzukoale ye wɔ Baebolo ne anu la le kɛ asɛɛ bɛlɛfa nzule mɔɔ anye te la bɛagua me nwo zo na ngyikyingyikyi ɔlɛwowo me nzuzulɛ ɛtane ne yeavi ɛkɛ la. Meanzuzu nwo ɛlɛ kɛ mebahola meahakyi.” Ɛhɛe, saa yɛfa Baebolo nu edwɛkɛ ne mɔɔ anwo te la yɛsie yɛ adwenle nu a, ɔbahola yeanrinzi ɛtane biala yeavi ɛkɛ. Nyamenle Edwɛkɛ ne lɛ tumi mɔɔ kola te yɛ nwo. (Ɛfɛsɛsema 5:26) Ɛhye maa menli mɔɔ ati yɛ se na bɛle angomedi la kakyi bɛ ndenle ne mɔ, na bɛbayɛ atiakunlukɛnlɛma nee anzodwolɛ menli. (Wulomuma 12:18) Baebolo ngyinlazo mɔɔ bɛfa bɛbɔ bɛ ɛbɛla la maa bɛnyia anzodwolɛ.​—Ayezaya 48:18.

Gyihova Alasevolɛ mɔɔ bo mgbe mɔtwɛ mɔɔ wɔ maanle 240 azo la ɛnwu debie mɔɔ bɛfa bɛtu basabasayɛlɛ bo la. Menli mɔɔ vi maanle, aneɛ ngakyile mɔɔ asolo biala gyinlabelɛ la ɛzukoa kɛ bɛbahulo Nyamenle na bɛazulo ye. Eza bɛkulo bɛ nwo ngoko ngoko kɛ ewiade amuala abusua ko mɔɔ anzodwolɛ wɔ bɛ avinli a. (1 Pita 4:8) Ɛhye le daselɛ mɔɔ kile kɛ yɛbanyia ewiade mɔɔ basabasayɛlɛ ɛnle nu.

EWIADE MƆƆ BASABASAYƐLƐ ƐNLE NU LA ƐBIKYE!

Baebolo ne bɔ ɛwɔkɛ kɛ ɔnrɛhyɛ Nyamenle baye basabasayɛlɛ avi azɛlɛ ye azo. Basabasayɛlɛma mɔɔ wɔ ɛkɛ ne ɛnɛ la ɛlɛkendɛ Nyamenle “ndɛnebualɛ kenle ne nee menli mɔɔ ɛnze Nyamenle la ɛzɛkyelɛ.” (2 Pita 3:5-7) Basabasayɛlɛma ɛnrɛmaa awie mɔ ɛnrɛnwu amaneɛ bieko ɛlɛ. Kɛ ɔkɛyɛ na yɛanwu kɛ Nyamenle kulo kɛ ɔfa ɔ nwo ɔdie nu na ɔtu basabasayɛlɛ bo ɛ?

Baebolo ne se, Nyamenle kyi “mɔɔ kulo konle konle la.” (Edwɛndolɛ 11:5) Bɔvolɛ ne kulo anzodwolɛ nee pɛlepɛlelilɛ. (Edwɛndolɛ 33:5; 37:28) Ɛhye ati a ɔnrɛmaa basabasayɛlɛma ɛnrɛdɛnla ɛkɛ ne dahuu la.

Ɛhɛe, ewiade fofolɛ mɔɔ anzodwolɛ wɔ nu la ɛlɛba. (Edwɛndolɛ 37:11; 72:14) Nzɔne ati a ɛnzukoa kɛ ɔkɛyɛ na wɔadɛnla ewiade mɔɔ basabasayɛlɛ ɛnle nu la anwo debie dɔɔnwo ɛ?

^ ɛden. 14 Tɛ bɛ aluma kpalɛ ɔ.