Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

“Ɛnee Nyamenle Wɔ Ni?”

“Ɛnee Nyamenle Wɔ Ni?”

“META MEBIZA KPUYA ƐHYE: ƐNEE NYAMENLE WƆ NI?”​—Pope Benedict XVI, wɔ mekɛ mɔɔ ɔhɔkpɔlale pilizama mɔɔ ɛnee wɔ Auschwitz, Poland la.

ESIANE KPOLE BIE ƐZI ƐMAA WƆBIZA Ɛ NWO ƐLƐ KƐ ‘NA NYAMENLE WƆ NI?’ ANZƐƐ DEBIE BIE ƐZI WƆ ƐBƐLABƆLƐ NU ƐMAA WƆBIZA KƐ ASOO NYAMENLE DWENLE Ɛ NWO Ɔ?

Bie a ɛte nganeɛ kɛ Sheila mɔɔ vi United States la. Bɛtetele ye wɔ abusua mɔɔ kulo Nyamenle ɛzonlenlɛ la anu. Ɔka kɛ: “Ɔvi me ngakula nu, kɛmɔ meze kɛ Nyamenle a le yɛ Bɔvolɛ la ati mendwenle membikyele ye. Noko, me nee ye annyia abusuabɔlɛ biala. Meze kɛ ɔlɛnea me noko ɔwɔ moa. Meande nganeɛ kɛ Nyamenle ɛngulo me edwɛkɛ, noko ɛnee meze kɛ ɔndwenle me nwo.” Kɛmɔti a Sheila dele nganeɛ zɔhane ɛ? Ɔkile nu kɛ: “Me abusua ne ngyegyelɛ yɛle kɛ nyevile azɛlɛkye, ɔngyakyi ɛlɛ. Na ɛbaha kɛ ɛnee Nyamenle ɛnle ɛkɛ ne bɔbɔ.”

Bie a, ɛze kɛ Nyamenle Tumivolɛ Bedevinli ne wɔ ɛkɛ kɛ mɔɔ Sheila ze ye la. Noko bie a ɛbade nganeɛ kɛ asoo ɔdwenle ɛ nwo ɔ? Tenlenenli Dwobu mɔɔ ɛnee lɛ diedi wɔ Bɔvolɛ ne tumi nee ye nrɛlɛbɛ ne anu la dele zɔhane nganeɛ ne. (Dwobu 2:3; 9:4) Mɔɔ esiane doɔdoale zo rale ɔ nwo zo na ye anyelazo wiele la, ɔbizale Nyamenle kɛ: “Duzu ati a ɛfa ɛ nye ɛfea, na ɛbu me wɔ kpɔvolɛ ɛ?”​—Dwobu 3:24.

Duzu a Baebolo ne ka a? Saa esiane si a, asoo ɔwɔ kɛ yɛbɔ Nyamenle somolɛ ɔ? Asoo daselɛ bie wɔ ɛkɛ mɔɔ ɔkile kɛ Nyamenle dwenle yɛ nuhua ko biala anwo ɔ? Kɛ ɔkɛyɛ na yɛ nuhua ko biala anwu kɛ amgba Nyamenle nwu ye, ɔdwenle ɔ nwo, ɔte ye edwɛkɛ bo yɛɛ ɔdi ngyegyelɛ mɔɔ ɔlɛyia ye la anwo nyane na ɔbaboa ye ɛ?

Wɔ edwɛkɛ mɔɔ doa zo la anu, yɛbazuzu mɔɔ abɔdeɛ kilehile yɛ wɔ kɛzi Nyamenle dwenle yɛ nwo la anwo. (Wulomuma 1:20) Eza yɛbanlea mɔɔ Baebolo ne ka ye wɔ kɛzi Nyamenle dwenle yɛ nwo la anwo. Saa ɛdua ninyɛne mɔɔ yebɔ yɛɛ ye Edwɛkɛ ne azo ɛsukoa ɔ nwo debie dɔɔnwo a ‘ɛbanwu ye’ kpalɛ. Yɛɛ ɛbanyia ye nu anwodozo kpole kɛ ‘ɔdwenle ɛ nwo.’​—1 Dwɔn 2:3; 1 Pita 5:7.