Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILI | MEKƐ MƆƆ KULOVOLƐ BIE KƐWU LA

Asoo Ɔle Nvonleɛ Kɛ Yɛkɛli Nyane Ɔ?

Asoo Ɔle Nvonleɛ Kɛ Yɛkɛli Nyane Ɔ?

Ɛ nwo ɛdo wɔ ekyii ɛlɛ ɔ? Bie a, ɛdele kpɔkɛ ndɛndɛ la ati, ɛ rɛle ɛvi mɔɔ zile la. Noko nyanelilɛ ɛnle zɔ. Dk. Alan Wolfelt hanle wɔ ye buluku Healing a Spouse’s Grieving Heart anu kɛ, “Yɛ rɛle ‘ɛngola ɛnvi’ nyane mɔɔ yɛdi la bɔkɔɔ.” Noko, ɔdoale zo kɛ: “Mekɛ gua nu na awie mɔ boa wɔ a, wɔ nyanelilɛ ne baha aze.”

Kɛ neazo la, suzu kɛzi tete selɛ Ebileham yɛle ye nyɛleɛ wɔ mekɛ mɔɔ ɔ ye wule la anwo nea. Baebolo ne mɔɔ bɛlimoale bɛhɛlɛle la ka kɛ “Ebileham bɔle ɔ bo kɛ ɔdi nyane na ɔzunle Sɛla.” Edwɛkɛkpɔkɛ “bɔle ɔ bo” kile kɛ ɔliele mekɛ na yeahola yeagyinla ye nyanelilɛ ne anloa. * Neazo bieko a le Gyekɔbo mɔɔ bɛbɛlɛbɛlale ye bɛmaanle ɔliele ɔlile kɛ nane kpole bie ɛhu ɔ ra Dwosefi la. Ɔlile nyane “mekɛ dɔɔnwo,” na ye abusua ne anu amra angola ankyekye ɔ rɛle. Ɛvolɛ dɔɔnwo anzi, ɛnee ɔtɛdi Dwosefi ewule ne anwo nyane.​—Mɔlebɛbo 23:2; 37:34, 35; 42:36; 45:28.

Ebileham zunle ye kulovolɛ Sɛla mɔɔ wule la

Ɛnɛ noko, menli dɔɔnwo di bɛdabɛ mɔɔ bɛbikye bɛ kpalɛ la ewule nwo nyane. Suzu neazo nwiɔ ɛhye anwo nea.

  • “Me hu, Robert wule wɔ July 9, 2008. Ninyɛne mɔɔ yɛyɛ ye alehyenlɛ biala la ala a yɛyɛle wɔ kenle ko ne mɔɔ esiane kpole ne zile la a. Kɛ mɔɔ dahuu yɛyɛ kolaa na yeahɔ gyima la, yɛdi debie yɛwie a, yɛfo yɛ nloa, yɛyɛ yɛ nwo atuu na yɛka kɛ ‘Mekulo wɔ.’ Ɛvolɛ nsia anzi, ɛnee metɛdi nyane. Menlie menli kɛ me rɛle bavi Rob mɔɔ ɛvi me sa la.”​—Gail, mɔɔ ɛli ɛvolɛ 60.

  • “Me ye wule la yebo ɛvolɛ 18 ɛdeɛ, noko me nwo tɛdɔ ye na medi nyane. Mekɛ biala mɔɔ mebanwu abɔdeɛ nu debie mɔɔ yɛ ahomeka la, mekakye ye, na medwenle kɛzi anrɛɛ ɔ nye balie mɔɔ melɛnea la anwo la.”​—Etienne, mɔɔ ɛli ɛvolɛ 84.

Ɔda ali kɛ, nyanelilɛ zɛhae mɔɔ tɛnla yɛ nu kyɛ la fɛta. Asolo kɛzi awie biala di nyane la, na ɔnle kpalɛ kɛ yɛbabua kɛzi awie yɛ ye nyɛleɛ wɔ esiane nwo la ndɛne. Eza, ɔnle kɛ yɛbua yɛ nwo fɔlɛ saa ɔzɔho kɛ yɛdi nyane yɛmaa ɔbo zo a. Kɛ ɔkɛyɛ na yɛagyinla nyanelilɛ nloa ɛ?

^ ɛden. 4 Ebileham ara Ayezeke noko lile nyane hyɛle. Kɛ mɔɔ yɛbanwu ye wɔ “Sukoa Bɛ Diedi” ne mɔɔ wɔ magazine ɛhye anu la, ɛnee Ayezeke tɛdi ye mame, Sɛla mɔɔ wule wɔ ɛvolɛ nsa mɔɔ ɛze la anwo nyane.​—Mɔlebɛbo 24:67.