Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Mekɛ Mɔɔ Ɛ Ye Anzɛɛ Ɛ Hu Anli Nɔhalɛ La

Mekɛ Mɔɔ Ɛ Ye Anzɛɛ Ɛ Hu Anli Nɔhalɛ La

“Mekɛ mɔɔ me hu hanle kɛ ɔgyakyi me yeahɔva kakula bɛlɛra la anrɛɛ mewu. Saa mekakye afɔle ngakyile mɔɔ mebɔ memaa ye la a, ɔyɛ me nyane kpalɛ.”​—Maria, Spain.

“Mekɛ mɔɔ me ye gyakyile me arɛlevilɛ nu la, ɛnee ɔle kɛ asɛɛ mewu mewie. Yɛ nzuzulɛ, yɛ anyelazo, nee yɛ adwenle ngyehyɛlɛ muala zɛkyele. Ɔdwu mekɛ ne bie a mesuzu kɛ debie biala ɛyɛ boɛ, noko ɔngyɛ ɛnee nyane ne ɛye ɔ ti bieko.”​—Bill, Spain.

NƆHALƐ mɔɔ bɛnli ye wɔ agyalɛ nu la yɛ abodelɛ kpole. Nɔhalɛ nu, agyalɛma bie mɔ fa bɛ ɛtane kyɛ bɛ nwo na bɛbɔ nu bɛsiezie ye bieko. * Noko saa agyalɛ ne gyinla anzɛɛ yeangyinla bɔbɔ a, kunli ne anzɛɛ yelɛ ne mɔɔ bɛanli nɔhalɛ bɛammaa ye la bali nyane kpole kpalɛ. Kɛzi menli ɛhye mɔ bahola ali nganeɛdelɛ ɛhye anwo gyima ɛ?

NGƐLƐLERA MƆƆ BABOA WƆ

Agyalɛma mɔɔ bɛ nwo ɛnlɛ edwɛkɛ la dɔɔnwo ɛnyia arɛlekyekyelɛ ɛvi Ngɛlɛlera ne anu, ɔnva nwo kɛ tɛnlabelɛ ne gyegye adwenle la. Bɛnwu ye kɛ Nyamenle nwu bɛ monle ne na ɔte bɛ nyane ne bie.​—Malakae 2:13-16.

“Saa adwenleadwenle bo me nwo zo a, ɛkyekye me rɛle ɛmaa medi fɛlɛko.”​Edwɛndolɛ 94:19.

Bill hanle kɛ, “Mekɛ mɔɔ mengengale ngyɛnu ɛhye la, mempɛle ye nvoninli kɛ Gyihova ɛlɛkyekye me rɛle kɛ mɔɔ selɛ mɔɔ se anwunvɔne bayɛ la.”

“Ɛle nɔhalɛ ɛmaa bɛdabɛ mɔɔ bɛdi nɔhalɛ bɛmaa wɔ la.”​Edwɛndolɛ 18:25.

Carmen mɔɔ ɔ hu anli nɔhalɛ wɔ siane dɔɔnwo anu la hanle kɛ, “Me hu anli nɔhalɛ ammaa me. Noko meze kɛ Gyihova bali nɔhalɛ amaa me. Ɔnrɛmaa me sa ɛnrɛzi aze ɛlɛ.”

‘Bɛmmadwenle debie biala anwo, emomu wɔ debie biala anu bɛlua asɔneyɛlɛ nee modolɛ zo bɛva bɛ nzɛlɛlɛ bɛdo Nyamenle anyunlu; na Nyamenle anzodwolɛ ne mɔɔ bo ndelebɛbo muala azo la babɔ bɛ ahonle nwo bane.’​Felepaema 4:6, 7.

Sasha ka kɛ, “Mengengale ngɛlɛlera ɛhye fane dɔɔnwo. Mɔɔ menyɛle asɔne fane dɔɔnwo la, amgba Nyamenle maanle me anzodwolɛ wɔ me ɛbɛlabɔlɛ nu.”

Ɛnee ɔdwu mekɛ ne bie a, menli mɔɔ yɛha bɛ nwo edwɛkɛ wɔ anwuma ɛke la asa nu kpondɛ ado. Noko bɛnyianle Gyihova anu anwodozo na bɛzukoale ye Edwɛkɛ ne mɔɔ maa anwosesebɛ la. Bill hanle kɛ: “Mekɛ mɔɔ ɔzɔho kɛ debie biala ɛzɛkye la, diedi mɔɔ ɛnee melɛ ye la maanle menyianle bodane wɔ me ɛbɛlabɔlɛ nu. Ɔwɔ nuhua kɛ ɛnee ‘melua ewule bɔnza nu bɔbɔ’ ɛdeɛ, noko Gyihova bokale me nwo.”​—Edwɛndolɛ 23:4

^ ɛden. 4 Amaa wɔanwu kɛ ɔwɔ kɛ ɛfa ɛkyɛ anzɛɛ ɔnle kɛ ɛfa ɛkyɛ la, nea edwɛkɛ “When a Mate Is Unfaithful” mɔɔ wɔ Awake! April 22, 1999 anu la.