Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILI | NYAMENLE AHYƐLƐDEƐ NE SONLE BOLƐ MAA WƆ Ɔ?

Kɛzi Nyamenle Ahyɛlɛdeɛ Mɔɔ Tɛla Biala La Sonle Bolɛ Ɛ?

Kɛzi Nyamenle Ahyɛlɛdeɛ Mɔɔ Tɛla Biala La Sonle Bolɛ Ɛ?

Duzu a maa ahyɛlɛdeɛ bie sonle bolɛ maa wɔ a? Bie a ninyɛne nna ɛhye ati ɔ: (1) ahenle mɔɔ vale ahyɛlɛdeɛ ne maanle la, (2) deɛmɔti ɔvale ɔmaanle la, (3) afɔle mɔɔ ɔbɔle amaa yeava yeamaa la yɛɛ (4) ngyianlɛ mɔɔ ahyɛlɛdeɛ ne di la. Ninyɛne ɛhye mɔɔ yɛbadwenle nwo la baboa yɛ amaa anyezɔlɛ mɔɔ yɛlɛ yɛmaa ɛkpɔnedeɛ ne la ayɛ kpole.

AHENLE MƆƆ VALE MAANLE LA

Ahyɛlɛdeɛ bie mɔ sonle bolɛ ɔluakɛ ahenle mɔɔ vale maanle yɛ la lɛ tumi anzɛɛ yɛbu ye la ati. Ahyɛlɛdeɛ bie mɔ ɛnzonle bolɛ kpalɛ ɛdeɛ, noko yɛ nye die nwo ɔluakɛ yɛ busuanli anzɛɛ yɛ gɔnwo bie a vale maanle yɛ a. Kɛ ahyɛlɛdeɛ ne mɔɔ Jordan mɔɔ yɛha ɔ nwo edwɛkɛ la asa hanle ye la de la ɛne. Kɛzi ɛhye fale ɛkpɔnedeɛ ahyɛlɛdeɛ ne anwo ɛ?

Mɔɔ limoa, Baebolo ne se “Nyamenle zoanle ɔ Ra kokye ne wɔ ewiade amaa ɔlua ɔ nwo zo yɛanyia ngoane.” (1 Dwɔn 4:9) Nɔhalɛ edwɛkɛ ɛhye maa ahyɛlɛdeɛ ne sonle bolɛ amgba. Awie biala ɛnlɛ tumi kpole ɛndɛla Nyamenle. Hibulu edwɛndolɛnli bie hanle kɛ: “Maa bɛnwu kɛ ɛdawɔ ɛ ngomekye, mɔɔ wɔ duma a le [Gyihova] la a ɛle Anwuma Anwumanli ne mɔɔ sie azɛlɛ ye a.” (Edwɛndolɛ 83:18) Yɛnrɛhola yɛnrɛnyia ahyɛlɛdeɛ bie yɛnrɛvi awie mɔɔ lɛ tumi kpole zɛhae la ɛkɛ.

Mɔɔ tɔ zo nwiɔ, Nyamenle le “yɛ ze.” (Ayezaya 63:16) Kɛzi? Ɔmaa yɛ ngoane. Bieko, ɔnea yɛ kɛ mɔɔ selɛ kpalɛ bie nea ɔ mra la. Mekɛ mɔɔ Nyamenle tendɛ ahile ye menli wɔ tete ne la, ɔhanle kɛ, “Yizilayɛ, ɛle me ra nrenya mɔɔ mekulo wɔ, ɛle ralɛ nrenya mɔ ɛla me ahonle nwo. . . . Yemɔti me nwo dɔ wɔ; nɔhalɛ, mebanwu wɔ anwunvɔne.” (Gyɛlɛmaya 31:20) Kɛ Nyamenle te nganeɛ maa ye azonvolɛ ɛnɛ la ɛne. Ɔle yɛ Bɔvolɛ bedevinli, yɛ Ze nee yɛ Gɔnwo. Asoo ɛhye ɛngile kɛ ahyɛlɛdeɛ biala mɔɔ vi ye ɛkɛ la sonle bolɛ ɔ?

 DEƐMƆTI ƆVALE ƆMAANLE LA

Ahyɛlɛdeɛ bie mɔ sonle bolɛ ɔluakɛ ahenle vile ye ahonle nu a ɔvale ɔmaanle a na tɛ kɛ asɛɛ ɔwɔ kɛ ɔyɛ la ati ɔ. Awie mɔɔ fi ye ahonle nu kyɛ debie la anye ɛnla kɛ ɛbayɛ bie wɔazie ɔ gyakɛ anu.

Nyamenle vale ɔ Ra ne maanle ɔluakɛ ɔkulo yɛ. Baebolo ne ka kɛ, “Ɛhye azo a bɛluale bɛlale Nyamenle ɛlɔlɛ ne ali wɔ yɛ nwo a.” Duzu ati a ɔyɛle ɛhye a? “Amaa ɔlua ɔ nwo zo yɛanyia ngoane.” (1 Dwɔn 4:9) Asoo ɛnee ɔle Nyamenle gyima kɛ ɔkɛyɛ ɛhye ɔ? Kyɛkyɛ! “Kelaese Gyisɛse ɛkpɔnedeɛ ne mɔɔ ɔduale la” ɛnee le Nyamenle “ɛlolɛ.”Wulomuma 3:24.

Duzu ati a Nyamenle ahyɛlɛdeɛ ne le “ɛlolɛ” ɛ? Baebolo ne kilehile nu kɛ: “Nyamenle ɛla ɔdaye mumua ne ye ɛlolɛ ne ali ɛhile yɛ, yemɔ a le kɛ, mekɛ mɔɔ ɛnee yɛtɛde ɛtanevolɛma la, Kelaese wule maanle yɛ.” (Wulomuma 5:8) Nɔhalɛ ɛlɔlɛ a hanle Nyamenle maanle ɔboale alesama mɔɔ ɛtane wɔ bɛ nwo na bɛ nwo yɛ anwunvɔne la a. Yɛandɔ ɛlɔlɛ ɛhye yɛɛ yɛnrɛhola nwolɛ kakɛ tua. Ye ahyɛlɛdeɛ ne le ɛlɔlɛ kpole mɔɔ bie ɛtɛsile ɛlɛ a.

AFƆLE MƆƆ ƆBƆLE

Ahyɛlɛdeɛ bie mɔ sonle bolɛ ɔluakɛ ɔmaa yɛnwu afɔle kpole mɔɔ maavolɛ ne bɔle la. Saa awie fa debie mɔɔ sonle bolɛ maa ye la kyɛ yɛ a, yɛ nye die nwo ɔlua afɔle mɔɔ yebɔ la ati.

Nyamenle vale “ɔ Ra kokye ne ɔmaanle.” (Dwɔn 3:16) Ɔvale awie mɔɔ la ye ahonle nwo la a ɔmaanle yɛ a. Nyamenle nee Gyisɛse bɔle nu yɛle gyima ɛvolɛ dɔɔnwo na ɔrayɛle awie mɔɔ Nyamenle ‘anye die’ ɔ nwo kpalɛ a. (Mrɛlɛbulɛ 8:30) Gyisɛse le Nyamenle “kulovolɛ Ralɛ” nee “Nyamenle ne mɔɔ bɛnnwu ye la ɛsaso.” (Kɔlɔsaema 1:13-15) Agɔnwolɛvalɛ kyengye mɔɔ la Nyamenle nee Gyisɛse avinli la bo yɛ ndelebɛbo zo.

Noko, Nyamenle anva ‘ɔ Ra ne bɔbɔ ambɔ abokɛ.’ (Wulomuma 8:32) Gyihova vale debie mɔɔ sonle bolɛ kpalɛ la maanle yɛ. Ahyɛlɛdeɛ ɛhye maanle ɔminlinle debie kpole kpalɛ.

NGYIANLƐ MƆƆ ƆDI LA

Ahyɛlɛdeɛ bie mɔ sonle bolɛ ɔluakɛ bɛdi ngyianlɛ bie mɔɔ anwo hyia ndɛndɛ la anwo gyima. Kɛ neazo la, saa awie fi ye ɛhulolɛ nu tua wɔ ewule bie mɔɔ bahu wɔ la ayileyɛlɛ nwo kakɛ mɔɔ ɛnrɛhola ye tua la a, nea kɛzi ɛ nye balie a! Ahyɛlɛdeɛ zɛhae sonle bolɛ kpole, ɔnle zɔ ɔ?

“Kɛ mɔɔ Adam ati menli kɔsɔɔti wu la, zɔhane ala a Kelaese ati menli kɔsɔɔti banyia ngoane a.” (1 Kɔlentema 15:22) Kɛmɔ yɛle Adam abozoamra la ati, yɛ muala ‘yɛlɛwu,’ yɛ nwo to yɛ yɛɛ yɛngola yɛ nee Nyamenle ɛnva agɔnwolɛ ɔluakɛ yɛ adwenle bua yɛ fɔlɛ wɔ ɔ nyunlu. Na kɛ menli la, yɛnrɛhola yɛnrɛmaa yɛ nwo nee awie mɔ “ngoane.” Baebolo ne ka kɛ: “Awie biala ɛnrɛhola ɔ nwo kpɔne, anzɛɛ ye ngoane nwo kakɛ tua maa Nyamenle, . . . Ɔnrɛhola ye tua ɛlɛ.” (Edwɛndolɛ 49:7, 8) Yɛhyia moalɛ ɛsesebɛ ɔluakɛ yɛnrɛhola ɛkpɔnedeɛ ne anwo kakɛ tua. Ɔhale yɛ ngome a anrɛɛ yɛyɛ anwunvɔne.

Ɔlua Gyihova ɛlɔlɛ kpole ne ati, ɔvile ye ɛhulolɛ nu ɔduale yɛ “ewule” ne anwo kakɛ, amaa ɔlua Gyisɛse anwo zo ‘menli kɔsɔɔti anyia ngoane.’ Kɛzi ɛkpɔnedeɛ ne di ɛhye anwo gyima ɛ? “Ɔ Ra Gyisɛse  mogya ne te yɛ nwo fi ɛtane muala anwo.” Saa yɛnyia diedi wɔ Gyisɛse mogya ne anu a yɛbanyia ɛtanefakyɛ nee dahuu ngoane. (1 Dwɔn 1:7; 5:13) Na boni a ɛkpɔnedeɛ ne bayɛ amaa yɛ alɔvolɛ mɔɔ bɛwu la ɛ? “Kɛ mɔɔ ewule luale sonla ko anwo zo a rale la, zɔhane ala a ewudwazo ɛlua sonla ko [Gyisɛse] anwo zo ɛra a.”1 Kɔlentema 15:21. *

Ahyɛlɛdeɛ biala ɛnle ɛkɛ mɔɔ vi anwuma anzɛɛ vi ɛlɔlɛ nu mɔɔ sonle bolɛ tɛla Gyisɛse afɔlebɔlɛ ne a. Awie biala ɛtɛmaanle yɛ debie mɔɔ tɛla mɔɔ Gyihova Nyamenle ɛva ɛmaa yɛ la. Na ahyɛlɛdeɛ biala ɛnle ɛkɛ mɔɔ tɛla afɔlebɔlɛ ne mɔɔ ɔdie yɛ ɔfi ɛtane nee ewule nu la. Ɛhɛe, ahyɛlɛdeɛ biala ɛndɛla ɛkpɔnedeɛ ne.

 

^ ɛden. 19 Saa ɛkpondɛ Nyamenle bodane mɔɔ ɔlɛ kɛ ɔbadwazo mowuamra la anwo edwɛkɛ dɔɔnwo a, nea Duzu A Baebolo Ne Kola Kilehile Yɛ A? mɔɔ Gyihova Alasevolɛ ɛyɛ la tile 7 anu, bie wɔ www.jw.org/nzi.