Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

1 Ɔboa Ɔmaa Yɛkoati Ngyegyelɛ

1 Ɔboa Ɔmaa Yɛkoati Ngyegyelɛ

Baebolo ne ka kɛ ye folɛdulɛ vi Nyamenle sunsum nu na “ɔle kpalɛ ɔmaa ngilehilelɛ, bɛ nyunlu ɛhwilɛ, ninyɛne ɛdenrɛdenrɛlɛ.” (2 Timote 3:16) Asoo ɔle nɔhalɛ? Nea kɛzi Baebolo ne anu nrɛlɛbɛ ne ɛboa bie mɔ ɛmaa bɛgyinla ɛbɛlabɔlɛ nu ngyegyelɛ mɔɔ anrɛɛ bahola ado bɛ ɛbɔ nu la anloa a.

NZABOLƐ

Delphine mɔɔ yɛbɔle ye duma wɔ edwɛkɛ mɔɔ li ɛhye anyunlu la dele nganeɛ kɛ ye adwenleadwenle ne kpondɛ amaa nza ɛnlonlɛ adɔ ɔ nwo. Baebolo ne ɛndua nza mɔɔ bɛno ye nrɛlɛbɛ nu la, noko ɔse: “Ɛ nee nzabovoma mmatu.” (Mrɛlɛbulɛ 23:20) Nzabolɛ kola sɛkye yɛ kpɔkɛdelɛ, ɔkola ɔsɛkye yɛ nee yɛ mbusua avinli na ɔku menli ɛvolɛ biala. Saa menli tie Baebolo ne folɛdulɛ a, bɛkola bɛkoati ngyegyelɛ ɛhye mɔ anu dɔɔnwo.

Delphine yɛle ye zɔ. Kɛkala ɔka kɛ: “Menwunle ye kɛ nza ne amboa ammaa me adwenleadwenle ne anvi ɛkɛ. Menvale folɛdulɛ mɔɔ wɔ Felepaema 4:6, 7 ne mɔɔ se: ‘Bɛmmadwenle debie biala anwo, emomu . . . bɛva bɛ nzɛlɛlɛ bɛdo Nyamenle anyunlu’ la menlile gyima. Nɔsolɛ biala mɔɔ adwenleadwenle badɔ me nwo la, mesɛlɛ Gyihova. Meka me nganeɛdelɛ muala; ɛya, kɛzi ɔboda me, yɛɛ kɛzi me sa nu ɛdo la mekile ye na mesɛlɛ ye kɛ ɔboa me ɔmaa menyia adwenle kpalɛ. Aleɛ kye a, menea menwu ye kɛ menrɛdwenle ngyegyelɛ ne anwo. Ɛhye boale maanle menyele me adwenle menvile debie mɔɔ menlɛ ye la azo na menvale menziele mɔɔ melɛ la azo. Menzile kpɔkɛ kɛ menrɛnlo nza bieko. Ɔluakɛ, anzodwolɛ ne mɔɔ menyianle la sonle bolɛ somaa mɔɔ ɛnee memkpondɛ kɛ meminli ye a.”

 ƐBƐLATANE

Ɛhye boka nyɛleɛ ngakyile mɔɔ maa menli ɛbolɛ te na bɛdi nyane la anwo. Noko Baebolo ngyinlazo kola boa yɛ maa yɛnwu mɔɔ fa ngyegyelɛ ɛhye mɔ ba la na yɛtwe yɛ nwo yɛfi nwolɛ​—kɛ neazo la anyezohulolɛ mɔɔ ɛnfɛta nee nla nwo nvoninli. Kpavolɛ bie mɔɔ bɛfɛlɛ ye Samuel la hanle kɛ, “Anyezohulolɛ le debie ekyii bie ala. Ɔdwu mekɛ ne bie a, menwu kɛ mengulo ahenle ne noko yemɔ ɔ nye die me nwo. Ɛhye a maa anyezohulolɛ ne yɛ fɛ la.” Samuel nwunle kɛ akee bɛbɔ ye somolɛ wɔ anyezohulolɛ nwo wɔ mekɛ bɔbɔ mɔɔ bie a ɔnle ye adwenle nu la, na yemɔ akee maanle ɔvale ɔziele ɔ nye zo kɛ ɔdi anyezo. Noko ɔgyegyele ye. Ɔka kɛ: “Ɔ nzi yɛ ɛzulolɛ ɔluakɛ ɔmaa ɛnyia angomedi subane.”

Samuel gengale mgbavolɛ nee mbɛlɛra nwo edwɛkɛ bie wɔ jw.org wɛbsaete ne azo. Na ɔdwenlenle Mrɛlɛbulɛ 20:11 ne anwo. Ɔse: “Kakula bɔbɔ fa ye nyɛleɛ kile ye subane, saa ɔle kpalɛ o, ɔle ɛtane o.” Kɛzi ɔboale ye ɛ? Samuel nwunle kɛ ye nyɛleɛ ne anwo ɛnde yɛɛ ɔnle kpalɛ. Ɔse: “Menzukoale kɛ ngakula mɔɔ di anyezo la nyia subane mɔɔ ɔmmaa bɛnyɛ kunli anzɛɛ yelɛ kpalɛ kenle bie a. Akee mendwenlenle kɛzi me ye mɔɔ mebagya ye kenle bie la bade nganeɛ la anwo, saa ɔnwu kɛ me nee raalɛ gyɛne ɛlɛdi anyezo a. Ɛhye maanle menwunle kɛ subane ɛhye kola boda. Ye ɛyɛlɛ ɛnyɛ se ɛdeɛ noko ɔnle kpalɛ fee.” Samuel hakyile. Anyezohulolɛ mɔɔ ɔgyakyile la boale maanle ɔhoatile ɛbɛlatane.

Antonio edwɛkɛ ɛdeɛ ne anye le mgbole ɔluakɛ ɛnee nlanwonvoninli ɛnleanlɛ ɛha ɔ nwo. Ɛnee ɔgya raalɛ mɔɔ ɔkulo ye kpalɛ la ɛdeɛ, noko ɛnee ɔngola ɔngyakyi nyɛleɛ ɛhye. Ɔka kɛ, 1 Pita 5:8 mɔɔ ɔdwenlenle nwolɛ la boale ye. Ɔse: “Bɛmaa bɛ nye ɛla ɛkɛ, bɛzinza! Bɛ kpɔvolɛ Abɔnsam luolua nu kɛ awenade mɔɔ ɛlɛkpo akpondɛ awie ame ye la.” Antonio ka kɛ: “Nlanwonvoninli ɛhye mɔɔ tɛnla sonla adwenle nu kyɛ la ɛbɔ yɛ ɛyia. Ngyɛnu zɔhane boale me ɔmaanle mendwenlenle ɛleka mɔɔ sɔnea zɔhane vi ba la anwo. Ɛnee ɔwɔ kɛ meyɛ ye ndɛ mekakye kɛ nlanwonvoninli ɛhye mɔ vi Abɔnsam ɛkɛ. Kɛkala meze kɛ Gyihova ala a bahola aboa me amaa ‘me nye ala ɛkɛ na meazinza a,’ amaa meahola meaho meatia deɛ ɛhye mɔɔ ɛlɛgyegye me adwenle, me ahonle nee me agyalɛ la.” Antonio nyianle moalɛ mɔɔ ɛnee ɔhyia la na yehola yegyakyi nyɛleɛ ɛtane ɛhye. Na yemɔ ɛboa ɛmaa yehoati ngyegyelɛ mgbole mɔɔ anrɛɛ bahola ado ye la.

Nɔhalɛ nu, Baebolo ne maa yɛ folɛdulɛ kpalɛ mɔɔ boa maa yɛkoati ngyegyelɛ mgbole a. Noko saa ngyegyelɛ ne ɛzɔ ndinli mɔɔ ɛtu ye a ɔndu noko ɛ? Yɛnlea kɛzi Nyamenle Edwɛkɛ ne bahola aboa yɛ yeamaa yɛali nwolɛ gyima la.

Baebolo ne folɛdulɛ bahola amaa yɛahoati ngyegyelɛ bie mɔ