Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ TITILE | DEƐMƆTI YƐDI NƆHALƐ LA

Nvasoɛ Wɔ Zo Kɛ Yɛbali Nɔhalɛ

Nvasoɛ Wɔ Zo Kɛ Yɛbali Nɔhalɛ

“Yɛsi pi kɛ yɛ adwenle nu le wienyi, ɔboalekɛ yɛkpondɛ kɛ dahuu yɛyɛ mɔɔ le kpalɛ la.”​—Hibuluma 13:18.

Ɔdwu mekɛ ne bie a Giliki edwɛkɛkpɔkɛ mɔɔ bɛhile ɔ bo “mɔɔ le kpalɛ la” eza kile “nɔhalɛlilɛ.” Eza ɔkola ɔkile ɛbɛla kpalɛ ɛbɔlɛ.

Kilisienema bu edwɛkɛ mɔɔ sunsum ne hanle ɛzoanvolɛ Pɔɔlo maanle ɔhanle la kpalɛ: “Yɛkpondɛ kɛ dahuu yɛyɛ mɔɔ le kpalɛ la.” Duzu a ɛhye kile a?

NGYEGYELƐ NE VI YƐ AHONLE NU

Menli dɔɔnwo nea bɛ nwo wɔ neanleɛ nu nwonlomɔ biala kolaa na bɛavinde. Nzɔne ati ɔ? Ɔluakɛ bɛkulo kɛ bɛ nwo yɛ fɛ. Noko debie bie wɔ ɛkɛ mɔɔ ɔhyia ɔtɛla enrinli mɔɔ bɛpepɛ ye kɛnlɛma anzɛɛ tɛladeɛ kɛnlɛma. Nɔhalɛ, mɔɔ wɔ yɛ ahonle nu la kola boa anzɛɛ sɛkye yɛ anwoziezielɛ.

Nyamenle Edwɛkɛ ne ka ye wienyi kɛ yɛkola yɛyɛ ɛtane. Mɔlebɛbo 8:21 ka kɛ, “Meze kɛ sonla yemɔ, ye ngakula nu amuala ɛnee ye adwenle nee ye ahonle nu le bile.” Yemɔti amaa yɛali nɔhalɛ la, ɔwɔ kɛ yɛko yɛtia ɛtane subane ne mɔɔ bɛvale bɛwole yɛ la. Ɛzoanvolɛ Pɔɔlo hilehilele ɛtane mɔɔ ɔko ɔtia ye la anu kɛ: “Wɔ me nuhua a ɛnee me nye die Nyamenle mɛla ne anwo kpalɛ. Na menwu mɛla fofolɛ bie wɔ me sonlabaka ye nvɛyeba ne mɔ amuala anu. Mɛla ɛhye ko tia mɔɔ me adwenle kulo kɛ ɔyɛ la, na ɔmaa meyɛ kanranli memaa ɛtane mɛla ne mɔɔ ɛlɛdi gyima wɔ me sonlabaka ne anu la.”​—Wulomuma 7:22, 23.

Kɛ neazo la, saa yɛ ahonle twehwe yɛ kɛ yɛyɛ debie ɛtane na yɛnyia ɛhulolɛ kɛ yɛbɔ adalɛ a, yɛkola yɛsi kpɔkɛ kɛ yɛbali yɛ ahonle ne anzi anzɛɛ yɛnrɛli ɔ nzi. Saa yɛsi kpɔkɛ kɛ yɛkpo adwenle ɛtane a, yɛbahola yɛali nɔhalɛ ɔnva nwo kɛ menli mɔɔ ɛnli nɔhalɛ la ɛbɔ yɛ nwo ɛyia la.

KƐZI YƐDI ZOLƐ KONIM LA

Amaa yɛali nɔhalɛ la, ɔwɔ kɛ yɛnyia ɛbɛlabɔlɛ nwo ngyinlazo kpalɛ. Noko, ɔyɛ alɔbɔlɛ kɛ menli dɔɔnwo nyia mekɛ dɔɔnwo si ‘kpɔkɛ wɔ anwoziezielɛ’ nwo tɛla kɛ bɛbadwenle bɛ ɛbɛlabɔlɛ ngyinlazo kpalɛ nwo la. Ɔlua ɛhye ati, bɛbɔ adalɛ wɔ tɛnlabelɛ mɔɔ ɔbaboa bɛ la anu. Buluku bie ka kɛ: “Nɔhalɛ nu, amaa yeambɔ anyiemgba la yɛbɔ adalɛ ngyikyi mɔɔ bɛnnwu yɛ nzi amaa bɛabu yɛ kɛ yɛdi nɔhalɛ.” (The (Honest) Truth About Dishonesty) Asoo yɛlɛ ngyinlazo kpalɛ mɔɔ bamaa yɛanwu kɛ adalɛbɔlɛ ɛnle debie kpalɛ ɔ? Yɛ nye die kɛ bie wɔ ɛkɛ la.

Menli dɔɔnwo mɔɔ wɔ ewiade la ɛnwu kɛ Baebolo ne di ngyianlɛ ɛhye anwo gyima bɔkɔɔ. Baebolo ne lɛ ɛbɛlabɔlɛ nwo ngyinlazo mɔɔ le kpalɛ tɛla biala. (Edwɛndolɛ 19:7) Ɔfa adehilelɛ kpalɛ ɔmaa wɔ ninyɛne mɔɔ le kɛ abusua asetɛnla, gyimayɛlɛ, ɛbɛlabɔlɛ kpalɛ nee kɛzi yɛbabikye Nyamenle la anwo. Ɔle debie mɔɔ bɛva bɛli gyima mekɛ tendenle. Maanle maanle, menli ekpunli, mbusua nee menli kɔsɔɔti kola fa ye mɛla nee ye ngyinlazo di gyima. Saa yɛkenga Baebolo ne, yɛdwenledwenle mɔɔ ɔka la  anwo na yɛfa ye folɛdulɛ ne yɛdi gyima a, yɛbatete yɛ ahonle ne amaa yɛali nɔhalɛ na yɛayɛ mɔɔ tenrɛ la.

Noko, saa yɛnyia Baebolo ne anu ndelebɛbo a yemɔ ɛngile kɛ yɛbali adalɛbɔlɛ zo konim. Kɛ ɔde ye biala la, yɛde ewiade mɔɔ nuhua ɛbɛlabɔlɛ ɛzɛkye la anu na ɔpiepia yɛ ɔmaa yɛdie ye ngyinlazo mɔɔ ɛkpɔlɔ la yɛto nu. Ɛhye ati a nwolɛ hyia kɛ yɛsɛlɛ Nyamenle moalɛ la. (Felepaema 4:6, 7, 13) Saa yɛyɛ zɔ a, yɛbanyia akɛnrasesebɛ yɛayɛ mɔɔ tenrɛ na yɛali nɔhalɛ wɔ debie biala anu.

NƆHALƐLILƐ ZO NVASOƐ

Hitoshi, mɔɔ yɛlimoa yɛha ɔ nwo edwɛkɛ la nyianle dumamɔlɛ kpalɛ kɛ gyimayɛvo mɔɔ ɔdi nɔhalɛ. Kɛkala ɔyɛ gyima ɔmaa gyimamenle bie mɔɔ ɔ nye die ye nɔhalɛlilɛ ne anwo la. Hitoshi ka kɛ, “Me nye ɛlie kɛ menyia gyima mɔɔ maa mekɔ zo menyia adwenle mɔɔ anu te la.”

Bie mɔ noko ɛnwu kɛ edwɛkɛ ɛhye le nɔhalɛ. Bɛnyia Baebolo ngyinlazo ɛhye mɔɔ se ‘yɛkpondɛ kɛ dahuu yɛdi nɔhalɛ wɔ debie biala anu’ la azo nvasoɛ. Suzu bɛ neazo ne anwo.

  • Adwenle Mɔɔ Anu Te

    “Menyianle ɛvolɛ 13 la mengyakyile sukulu na menvale me nwo membɔle nwulema bie anwo. Ɔlua ɛhye azo, ɛnee me ezukoa mɔɔ melɛ la ɛya ngyɛnu 95 vi adalɛbɔlɛ nu. Nzinlii, mengyale na me nee me hu yɛbɔle ɔ bo kɛ yɛ nee Gyihova Alasevolɛ sukoa Baebolo ne. Yɛzukoale kɛ Gyihova * Nyamenle kyi adalɛbɔlɛ, yemɔti yɛbɔle kpɔkɛ kɛ yɛkakyi yɛ ɛbɛlabɔlɛ. Wɔ 1990 ne anu, yɛyilale yɛ nwo zo yɛmaanle Gyihova na bɛzɔnenle yɛ kɛ Gyihova Alasevolɛ.”​—Mrɛlɛbulɛ 6:16-19.

    “Mekɛ bie, ɛnee awule ninyɛne ɛyi me sua ne anu tɔ, noko kɛkala ninyɛne ɛhye mɔ bie ɛnle ɛkɛ; na yemaa menyia adwenle mɔɔ anu te. Saa medwenle ɛvolɛ dɔɔnwo mɔɔ menvale membɔle adalɛ la anwo a, meyɛ Gyihova mo kɛ yeze me anwunvɔne kpole zɛhae la. Nɔsolɛ biala melɛda a me kunlu dwo me nwo ɔluakɛ meze kɛ Gyihova anye die me nwo.”​—Cheryl, Ireland.

    “Mekɛ mɔɔ me gyima nu kpanyinli ne nwunle kɛ meanlie belaebo meanvi gualilɛnli bie ɛkɛ ne la ɔzele me kɛ: ‘Wɔ Nyamenle ne ɛmaa wɔyɛ awie mɔɔ ɛdi nɔhalɛ a! Ɔle nyilalɛ kɛ yɛnyia wɔ wɔ yɛ gyima ye anu a.’ Nɔhalɛ mɔɔ medi wɔ ninyɛne kɔsɔɔti anu la ɛboa ɛmaa menyia adwenle mɔɔ anu te wɔ Gyihova Nyamenle anyunlu. Eza ɔmaa menyia adenle meboa me abusua ne nee awie mɔ memaa bɛdi nɔhalɛ.”​—Sonny, Hong Kong.

  • Anzodwolɛ

    “Meyɛ gyima wɔ maanle maanle avinli bange bie mɔɔ kpanyinli ne ɛnle ɛkɛ a medame a me wɔ ɛkɛ ne la anu. Wɔ gyima ɛhye anu, bɛbu bɛ nye bɛgua nɔhalɛlilɛ zo amaa bɛanyia bɛ nwo. Adwenle mɔɔ menli dɔɔnwo lɛ la a le kɛ, ‘Saa mebɔ adalɛ ekyi na menyia me nwo, na meboa maanle ne a nzɔne nvonleɛ a wɔ nwo a?’ Noko medi nɔhalɛ la ati, me nzo nu dwo me. Mezi kpɔkɛ kɛ mebahɔ zo meali nɔhalɛ na meagyinla ngyegyelɛ biala mɔɔ bavi nu ara la anloa. Me gyimamenlema ze kɛ menrɛbɔ adalɛ menrɛhile bɛ anzɛɛ menrɛbɔ adalɛ menrɛmaa bɛ.”​—Tom, United States.

  • Ɛbulɛ

    “Me gyima nu kpanyinli ne zile me adua kɛ membɔ adalɛ wɔ ninyɛne bie mɔ mɔɔ minlinle wɔ gyima nu la anwo, noko meanyɛ. Mekɛ mɔɔ bɛhyele nwulema ne la, me gyimamenle ne yɛle me mo kɛ menlile nɔhalɛ la. Ɔhyia akɛnrasesebɛ na yɛali nɔhalɛ wɔ ewiade mɔɔ nɔhalɛlilɛ ɛnle nu la anu. Noko awieleɛ ne, awie mɔ bahola anyia yɛ nu anwodozo na bɛabu yɛ.”​—Kaori, Japan.

Adwenle mɔɔ anu te, anzodwolɛ nee ɛbulɛ​—ahatualɛ ɛhye mɔ kile kɛ nvasoɛ wɔ zo kɛ yɛbali nɔhalɛ. Ɛnlie ɛndo nu ɔ?

^ ɛden. 18 Baebolo ne maa yɛnwu kɛ Nyamenle duma a le Gyihova.