Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Asoo Ɛze?

Asoo Ɛze?

Duzu gyima a ɛnee azonvolɛ yɛ ye wɔ tete ne a?

WƆ tete ne, ɛnee sonvolɛ nea awie sua anzɛɛ ye agyapadeɛ zo maa ye. Ɔdwu mekɛ ne bie a, Hibulu nee Giliki edwɛkɛkpɔkɛ mɔɔ bɛhile ɔ bo “sonvolɛ” la kola kile neavolɛ anzɛɛ awie mɔɔ nea awuke zo la.

Mɔɔ tete selɛ Gyekɔbo ara nrenyia Dwosefi le akɛlɛ wɔ Yigyibiti la, ɔrayɛle sonvolɛ wɔ ɔ menle ne sua nu ɛkɛ. Nɔhalɛ nu, ɔ menle Yigyibitinli ne ‘vale debie biala wulale Dwosefi asa anu.’ (Gyn. 39:2-6) Nzinlii mɔɔ Dwosefi mumua ne rayɛle awie mɔɔ lɛ tumi wɔ Yigyibiti la, ɔkpale sonvolɛ wɔ ye sua nu.​—Gyn. 44:4.

Wɔ Gyisɛse mekɛ zo, ɛnee menli mɔɔ lɛ bɛ azɛlɛ la ɛnde ɛmbikye ɛleka mɔɔ bɛ ɛya ne mɔ wɔ la. Yemɔti, azɛlɛ menle ne mɔ kpale sonvolɛma mɔɔ bɛbanlea gyima mɔɔ gyimayɛvoma bayɛ ye alehyenlɛ biala wɔ ɛya ne mɔ anu la azo.

Nwane a ɛnee ɔfɛta kɛ bɛkpa ye kɛ sonvolɛ a? Ɛvoya mɔɔ limoa Wulomu kɛlɛvo Columella dule folɛ kɛ, ɔwɔ kɛ akɛlɛ mɔɔ bɛbakpa ye kɛ neavolɛ anzɛɛ sonvolɛ la yɛ “awie mɔɔ yezukoa kɛzi ɔbayɛ gyima ne kpalɛ la.” Ɔwɔ kɛ ɔyɛ awie mɔɔ ɔnle mgbovonle yɛɛ ɔ ti ɛnyɛ se. Ɔdoale zo kɛ: “Mɔɔ hyia kpalɛ mɔɔ bɛkpondɛ bɛavi ye ɛkɛ la a le kɛ, ɔnle kɛ ɔte nganeɛ kɛ ɔdaye a le ɔdaye, emomu ɔwɔ kɛ ɔnyia ɛhulolɛ kɛ ɔbahɔ zo yeazukoa.”

Nyamenle Edwɛkɛ ne fa gyima mɔɔ sonvolɛ di la yɛ neazo maa yɛnwu gyima mɔɔ kɔ zo wɔ Kilisiene asafo ne anu la bie mɔ. Kɛ neazo la, ɛzoanvolɛ Pita maa Kilisienema anwosesebɛ kɛ bɛyɛ “Nyamenle ɛlolɛ kpole ne mɔɔ bɛla ye ali wɔ ndenle ngakyile zo la anwo azonvolɛ kpalɛ.”​—1 Pita 4:10.

Gyisɛse mumua ne vale sonvolɛ nwo neazo lile gyima wɔ ndonwo mɔɔ wɔ Luku 16:1-8 la anu. Yeanga ye zɔ, mɔɔ Gyisɛse ka ye ɛralɛ mɔɔ ɔbara kɛ Belemgbunli anwo ngapezo la, ɔbɔle ye ɛdoavolɛma ɛwɔkɛ kɛ ɔbakpa “akɛlɛ nɔhavo nee badwema” anzɛɛ “sonvolɛ nɔhavo” wɔ awieleɛ mekɛ ne anu. Sonvolɛ zɔhane gyima titili a le kɛ ɔbamaa Kelaese ɛdoavolɛma sunsum nu aleɛ dahuu wɔ awieleɛ mekɛ ne anu. (Mat. 24:45-47; Luku 12:42) Ɔyɛ yɛ anyelielɛ kɛ yɛboka bɛdabɛ mɔɔ sonvolɛ nɔhavo ne maa bɛ sunsum nu aleɛ wɔ ewiade amuala la anwo a. Yɛnyia sunsum nu aleɛ ɛhye mɔ mɔɔ maa yɛ diedi nu mia la dɔɔnwo.