Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Kilehile Nɔhalɛ Ne

Kilehile Nɔhalɛ Ne

‘O Gyihova, . . . wɔ edwɛkɛ ne kɔsɔɔti le nɔhalɛ.’​—Edw. 119:159, 160.

EDWƐNE: 29, 53

1, 2. (a) Duzu gyima a Gyisɛse vale limoale ye ɛbɛlabɔlɛ nu a? Duzu ati ɔ? (b) Duzu a ɔwɔ kɛ yɛyɛ amaa yɛayɛ yɛ gyima kɛ “Nyamenle agɔnwo mɔ gyimayɛvoma” ɛ?

ƐNEE Gyisɛse Kelaese le kapentanli nee kilehilevolɛ. (Maake 6:3; Dwɔn 13:13) Ɔnwunle gyima nwiɔ ne anye zo kpole kpalɛ. Kɛ kapentanli la, ɔzukoale kɛzi bɛfa adwinli mbulalɛ ne mɔ bɛyɛ ndaboa nwo gyima la. Kɛ edwɛkpa ne kilehilevolɛ la, ɔvale Ngɛlɛlera ne anu ndelebɛbo kpole mɔɔ ɔlɛ la ɔboale awie mɔ amaa bɛade nɔhalɛ mɔɔ wɔ Nyamenle Edwɛkɛ ne anu la abo. (Mat. 7:28; Luku 24:32, 45) Mɔɔ Gyisɛse nyianle ɛvolɛ 30 la, ɔgyakyile kapenta gyima ne na ɔyɛle ngilehilelɛ gyima ne, ɔluakɛ yemɔ a ɛnee nwolɛ hyia kpalɛ a. Ɔhanle kɛ Nyamenle Belemgbunlililɛ ne anwo edwɛkpa ne nolobɔlɛ boka bodane mɔɔ ɔti Nyamenle zoanle ye wɔ azɛlɛ ye azo la anwo. (Mat. 20:28; Luku 3:23; 4:43) Gyisɛse vale ɛzonlenlɛ gyima ne limoale ye ɛbɛlabɔlɛ nu, na ɛnee ɔkulo kɛ awie mɔ noko yɛ bie.​—Mat. 9:35-38.

2 Bie a yɛnle kapentama, noko yɛle edwɛkpa ne anwo azonvolɛ. Gyima zɔhane anwo hyia kpalɛ ɔluakɛ Nyamenle boka nwo; ɔti bɛfɛlɛ yɛ “Nyamenle agɔnwo mɔ gyimayɛvoma.” (1 Kɔl. 3:9; 2 Kɔl. 6:4) Yɛze ye wienyi kɛ “[Gyihova] edwɛkɛ ne mɔ kɔsɔɔti le . . . nɔhalɛ.” (Edw. 119:159, 160) Ɛhye ati a, wɔ daselɛlilɛ nu, yɛkulo kɛ “[yɛkilehile] nɔhalɛ edwɛkɛ ne kpalɛ la.” (Kenga 2 Timote 2:15.) Ɛhye ati, yɛkɔ zo yɛsukoa kɛzi yɛbava Baebolo ne mɔɔ le adwinli bulalɛ titili mɔɔ yɛfa yɛkilehile menli Gyihova, Gyisɛse  nee Belemgbunlililɛ ne anwo nɔhalɛ ne la yɛali gyima kpalɛ. Amaa yɛahola yɛayɛ yɛ ɛzonlenlɛ gyima ne la, Gyihova ahyehyɛdeɛ ne ɛyɛ adwinli ninyɛne bie mɔ ɛmaa yɛ mɔɔ ɔwɔ kɛ yɛnwu kɛzi yɛbava yɛali gyima kpalɛ la. Yɛka kɛ bɛle Ninyɛne Titili Mɔɔ Yɛfa Yɛkilehile.

3. Duzu a ɔwɔ kɛ yɛfa yɛ adwenle yɛsie zo wɔ daselɛlilɛ nu a, na kɛzi Gyima ne 13:48 boa yɛ maa yɛyɛ zɔ ɛ?

3 Bie a ɛnnwu deɛmɔti yɛse bɛle Ninyɛne Titili Mɔɔ Yɛfa Yɛkilehile na tɛ Ninyɛne Titili Mɔɔ Yɛfa Yɛbɔ Edwɛkpa Ne Nolo la. “Nolobɔlɛ” kile kɛ ɛbaha nrɛlaleɛ; noko “ngilehilelɛ” kile kɛ ɛbamaa edwɛkɛ bie aha awie adwenle nee ye ahonle nu, amaa yeava mɔɔ ɔlɛsukoa la yeayɛ gyima. Wɔ mekɛ ekyi mɔɔ ɛha mɔɔ ɔwɔ kɛ yɛfa yɛdi daselɛ la anu, ɔwɔ kɛ yɛfa yɛ adwenle yɛsie Baebolo ɛzukoalɛ nee menli mɔɔ yɛbahilehile bɛ nɔhalɛ ne la azo. Ɛhye kile kɛ ɔwɔ kɛ yɛbɔ mɔdenle yɛkpondɛ “bɛdabɛ mɔɔ bɛ subane kile kɛ bɛfɛta dahuu ngoane la” na yɛboa bɛ yɛmaa bɛbayɛ diedima.​—Kenga Gyima ne 13:44-48.

4. Nwane mɔ a ‘bɛ subane kile kɛ bɛfɛta dahuu ngoane’ a? Kɛ ɔkɛyɛ na yɛanwu bɛ ɛ?

4 Kɛ ɔkɛyɛ na yɛanwu awie mɔɔ ‘ye subane kile kɛ ɔfɛta dahuu ngoane la’ ɛ? Amaa yɛanwu menli ɛhye mɔ la, kyesɛ yɛdi bɛ daselɛ, kɛ mɔɔ ɛnee ɔde wɔ ɛvoya mɔɔ limoa anu la. Ɔti, ɔwɔ kɛ yɛyɛ mɔɔ Gyisɛse hilele yɛ la: “Sua anzɛɛ namule biala mɔɔ bɛkɛhɔ zo la, bɛkpondɛ awie mɔɔ fɛta wɔ ɛkɛ la.” (Mat. 10:11) Yɛ nye ɛnla kɛ menli mɔɔ memaa bɛ nwo zo anzɛɛ bɛndwenle sunsum nu ninyɛne nwo la badie edwɛkpa ne. Yɛlɛkpondɛ menli mɔɔ di nɔhalɛ, bɛle bɛlɛvo na nɔhalɛ ne anwo ɛhɔne ɛlɛku bɛ la. Yɛbahola yɛava menli ɛkpondɛlɛ gyima ɛhye yɛatoto Gyisɛse mɔɔ ɔlɛkpondɛ taboa mɔɔ ɔbava yeayɛ debie le kɛ ebia, anlenkɛ, gyɛnvayile anzɛɛ ninyɛne gyɛne kɛ kapentanli la anwo. Saa ɔnyia taboa mɔɔ ɔkpondɛ la a, ɔbava ye adwinli ninyɛne ne yeayɛ taboa ne anwo gyima amaa ɔ sa aha mɔɔ ɔkpondɛ la. Zɔhane ala a ɔwɔ kɛ yɛyɛ wɔ mekɛ mɔɔ yɛlɛbɔ mɔdenle kɛ yɛbayɛ ahonlekpalɛma ɛdoavolɛ la a.​—Mat. 28:19, 20.

5. Duzu a ɔwɔ kɛ yɛnwu ye wɔ Ninyɛne Titili Mɔɔ Yɛfa Yɛkilehile la anwo a? Maa neazo. (Nea mɔlebɛbo nvoninli ne.)

5 Adwinli bulalɛ biala lɛ gyima titili mɔɔ bɛfa bɛyɛ a. Fa adwinli mbulalɛ mɔɔ Gyisɛse vale yɛle gyima kɛ kapentanli la kɛ neazo. * Ɛnee ɔbahyia adwinli bulalɛ mɔɔ ɔbava yeazuzu na yeamake taboa ne, yeakpakye, yeafiti nuhua tokule, yeahwɛlɛhwɛlɛ nwo nee mɔɔ bokɛboka nwo la. Zɔhane ala a Ninyɛne Titili Mɔɔ Yɛfa Yɛkilehile la biala lɛ bodane mɔɔ ɔdi nwolɛ gyima a. Ɔti, bɛmaa yɛnlea adwinli ninyɛne mɔɔ yɛlɛ la anu, na yɛzukoa kɛzi yɛbava adwinli ninyɛne ɛhye mɔ biala yɛayɛ gyima kpalɛ la.

MBULUKU MƆƆ MAA BƐNWU YƐ

6, 7. (a) Kɛzi wɔva ɛsalɛdolɛ ngɛlata ne mɔ wɔli gyima ɛ? (b) Bodane nwiɔ boni mɔ a asafo debiezukoalɛ ɛsalɛdolɛ kɛlata ne di nwolɛ gyima a?

6 Ngitanwolilɛ Kaade. Ɛhye mɔ le ninyɛne ngyikyi mɔɔ boa maa yɛka yɛ nwo edwɛkɛ yɛkile menli na yɛkile bɛ yɛ wɛbsaete ne, mɔɔ bɛbanwu yɛ nwo edwɛkɛ dɔɔnwo na bɔbɔ bɛahola bɛabiza Baebolo ɛzukoalɛ nwo adenle wɔ ɛkɛ la. Menli mɔɔ bo 400,000 la biza Baebolo ɛzukoalɛ nwo adenle wɔ jw.org azo yɛɛ ɛya dɔɔnwo yɛ zɔ alehyenlɛ biala! Ɛbahola wɔava ngitanwolilɛ kaade ne bie wɔazia ɛ nwo, na saa nwolɛ adenle bie buke a wɔava wɔali daselɛ wɔ alehyenlɛ ne anu.

7 Ɛsalɛdolɛ Ngɛlata. Yɛta yɛfɛlɛ ɛhye asafo ayia ɛsalɛdolɛ kɛlata na ɔdi bodane nwiɔ anwo gyima. Ɔwɔ zo kɛ: “Ɛ nee Gyihova Alasevolɛ ɛzukoa Baebolo ne.” Akee ɔka kɛ, ɛbahola wɔayɛ zɔ wɔ “yɛ debiezukoalɛ ne  mɔ” abo anzɛɛ “awie baboa wɔ.” Yemɔti kɛlata ɛhye maa bɛnwu yɛ, eza ɔto ɛsalɛ ɔfɛlɛ “bɛdabɛ mɔɔ bɛze bɛ sunsum nu ngyianlɛ” la kɛ bɛzukoa Baebolo ne. (Mat. 5:3) Nɔhalɛ nu, awie biala kola ba yɛ debiezukoalɛ ne bie wɔ mekɛ mɔɔ bɛ nee ye ɛtɛyɛle Baebolo ɛzukoalɛ nwo ngyehyɛleɛ bɔbɔ la. Saa bɛba a, bɛbanwu ninyɛne dɔɔnwo mɔɔ bɛbahola bɛazukoa bɛavi Baebolo ne anu la.

8. Nvasoɛ boni a wɔ zo kɛ, yeanyɛ boɛ fee la, menli bara yɛ ayia ne mɔ ko a? Maa neazo.

8 Ɔhyia kɛ, yeanyɛ boɛ fee la yɛto ɛsalɛ yɛfɛlɛ menli yɛmaa bɛba yɛ nyianu ne mɔ ko. Duzu ati ɔ? Ɔluakɛ bɛbava sunsum nu ninyɛne ngɛnlɛma mɔɔ yɛ sa ka ye wɔ yɛ ayia ne mɔ abo la batoto Babelɔn Kpole ne anu amra ɛdeɛ ne mɔɔ ɛnle kpalɛ la anwo. (Aye. 65:13) Ray nee Linda, agyalɛma bie mɔɔ wɔ United States la nwunle ɛhye wɔ ɛvolɛ bie mɔɔ ɛze ɛhɔ la. Bɛnwunle kɛ ɔwɔ kɛ bɛkɔ asɔne. Ɛnee bɛdie Nyamenle bɛdi yɛɛ sunsum nu ninyɛne hyia bɛ, ɔti bɛbɔle ɔ bo kɛ bɛkɔ asɔne mɔɔ wɔ bɛ ɛkɛ ne la biala bie. Asɔne ngakyile dɔɔnwo a wɔ ɛkɛ a. Ɔti alimoa ne, agyalɛma ne yɛle bɛ adwenle kɛ, asɔne biala mɔɔ bɛbahɔ la, ɔwɔ kɛ bɛnwu ninyɛne nwiɔ bie wɔ bɛ nwo. Mɔɔ limoa, ɔwɔ kɛ bɛsukoa debie titili bie wɔ kenle mɔɔ bɛbahɔ la. Mɔɔ tɔ zo nwiɔ, ɔwɔ kɛ nuhua menli fa bɛ subane kile kɛ bɛle Nyamenle azonvolɛ. Bɛvale ɛvolɛ dɔɔnwo bɛhɔle asɔne ngakyile mɔɔ wɔ ɛkɛ ne la bie, noko bɛannyia mɔɔ bɛkpondɛ la. Bɛanzukoa ɛhwee yɛɛ menli mɔɔ wɔ nu la subane noko ɛngile kɛ bɛsonle Nyamenle. Kenle ko mɔɔ bɛvi asɔne mɔɔ li awieleɛ anu bɛvindele la, Linda hɔle gyima yɛɛ Ray noko hɔle sua nu. Mɔɔ Ray ɛlɛkɔ sua nu la, ɔvale Belemgbunlililɛ Asalo bie anwo. Ɔbizale ɔ nwo kɛ: ‘Duzu ati a mengɔnea mɔɔ bɛlɛyɛ la ɛ?’ Nɔhalɛ nu, mɔɔ ɔnwunle ye la zinle ɔ nwo kpole! Awie biala mɔɔ wɔ Belemgbunlililɛ Asalo ɛkɛ la te ɔ nyunlu yɛɛ bɛ anwoziezielɛ fɛta. Ray dɛnlanle ɔ nyunlu ebia ne azo na ɔ nye liele mɔɔ ɔdele la anwo! Ɛhye maa yɛkakye mɔɔ ɛzoanvolɛ Pɔɔlo hanle vanenle menli mɔɔ ba yɛ Kilisiene ayia ne bie wɔ mekɛ mɔɔ limoa anwo la. Bɛka kɛ: “Amgba Nyamenle nee bɛ de.” (1 Kɔl. 14:23-25) Yemɔ anzi, Ray hɔle debiezukoalɛ Molɛ biala; akee ɔhɔle dapɛne avinli nyianu ne mɔ. Linda noko bɔle ɔ bo kɛ ɔkɔ debiezukoalɛ. Mɔɔ ɛnee bɛwɔ bɛ ɛvolɛ 70 anu la, bɛmaanle bɛ nee bɛ zukoale Baebolo ne na bɛzɔnenle.

MBULUKU MƆƆ YƐFA YƐBƆ ADAWUBƆLƐ BO

9, 10. (a) Kɛmɔti a ɔnyɛ se kɛ yɛbava trate ne mɔ yɛayɛ gyima ɛ? (b) Kilehile kɛzi bɛfa Nyamenle Belemgbunlililɛ Ne A Le Duzu? trate ne bɛyɛ gyima la anu.

9 Trate. Yɛlɛ trate ngakyile mɔtwɛ mɔɔ ɔnyɛ se kɛ yɛbava yɛabɔ adawubɔlɛ bo wɔ daselɛlilɛ nu a. Ɔvi mekɛ mɔɔ bɛbɔle ɔ bo kɛ bɛye trate ɛhye mɔ wɔ 2013 la, bɛpelente kɛyɛ mgbe mgbe nnu. Mɔɔ yɛ anyelielɛ la a le kɛ, saa ɛnwu kɛzi ɛbava trate ɛhye mɔ ko wɔamaa a, ɛbahola wɔava biala wɔamaa, ɔluakɛ bɛyɛ ye ko. Kɛzi ɛbava trate ɛhye wɔabɔ adawubɔlɛ bo ɛ?

10 Ɛbahola wɔakpa kɛ ɛfa Nyamenle Belemgbunlililɛ Ne A Le Duzu? trate ne wɔayɛ gyima. Fa kpuya ne mɔɔ wɔ ɔ nyunlu la kile ahenle na biza ye kɛ: “Asoo wɔdwenle kɛzi Nyamenle Belemgbunlililɛ ne de la anwo ɛlɛ? Asoo ɛbaha kɛ ɔle . . . ?” Akee biza ye kɛ mualɛ nsa ne anu boni a ɔbakpa a. Buke “Mɔɔ Baebolo Ne Ka La” mɔɔ wɔ ɔ kunlu ɛkɛ ne la na ɛ nee ye bɛgenga Daneɛle 2:44 yɛɛ Ayezaya 9:6 mɔɔ ɛnga ye mualɛ ne anwo ɛhwee a. Saa ɔbayɛ boɛ a, toa adawubɔlɛ ne azo. Akee, biza kpuya “Kɛzi ɛbɛlabɔlɛ bayɛ wɔ Nyamenle Belemgbunlililɛ ne tumi bo ɛ?” mɔɔ wɔ edwɛkɛtile “Dwenle Ɛhye Anwo” abo la fa yɛ sia kɔkpɔla nwo ngyehyɛleɛ. Ɛhye a ɛbagyinla zo wɔayɛ sia kɔkpɔla kenle fofolɛ a. Saa ɛkɔ bieko a, ɛbahola wɔahwe adwenle wɔahɔ ɛzukoalɛdeɛ 7 mɔɔ wɔ  Edwɛkpa Mɔɔ Vi Nyamenle Ɛkɛ! brohyua ne mɔɔ boka mbuluku mɔɔ yɛfa yɛbɔ Baebolo ɛzukoalɛ bo anwo la azo.

MBULUKU MƆƆ MAA BƐ NYE DIE EDWƐKƐ NE ANWO

11. Duzu gyima a yɛ magazine ne mɔ di a, noko duzu a ɔwɔ kɛ yɛnwu ye wɔ ko biala anwo a?

11 Magazine. Ɛzinzalɛ Arane nee Awake! magazine ne mɔ a le mbuluku mɔɔ bɛyɛ ye dɔɔnwo na bɛkile ɔ bo wɔ ewiade amuala a! Kɛ mɔɔ bɛyɛ bɛmaa awie biala la ati, bɛyɛ ye mɔɔ awie biala anye die ɔ nyunlu edwɛkɛ ne anwo. Ɔwɔ kɛ yɛfa yɛdi gyima yɛboa awie mɔ yɛmaa bɛnyia anyelielɛ kpole wɔ ninyɛne mɔɔ anwo hyia wɔ ɛbɛlabɔlɛ nu ɛnɛ la anwo. Noko, amaa yɛahola yɛava magazine ɛhye mɔ yɛamaa menli mɔɔ fɛta la, ɔwɔ kɛ yɛnwu menli mɔɔ bɛhɛlɛ magazine ko biala bɛmaa bɛ la.

12. (a) Nwane mɔ a bɛyɛ Awake! ne bɛmaa bɛ a, na ye bodane a le boni? (b) Anwubielɛ boni a wɔnyia ye wɔ magazine ɛhye anwo a?

12 Bɛyɛ Awake! bɛmaa kengavolɛma mɔɔ bɛlɛ Baebolo ne anwo ndelebɛbo ekyi anzɛɛ bɛnlɛ bie fee la. Bie a bɛnze Kilisiene ngilehilelɛ nwo ɛhwee, bɛ nye ɛnlie ɛzonlenlɛ nwo anzɛɛ bɛnze kɛ ngyinlazo mɔɔ boa la wɔ Baebolo ne anu. Awake! ne bodane titili a le kɛ, ɔmaa kengavolɛma alie ali kɛ Nyamenle wɔ ɛkɛ. (Wlo. 1:20; Hib. 11:6) Eza ɔboa kengavolɛma ɔmaa bɛdie bɛdi kɛ Baebolo ne le “Nyamenle edwɛkɛ kɛ mɔɔ ɔde ye nɔhalɛ nu ala la.” (1 Tɛs. 2:13) Awake! nsa mɔɔ ɛra wɔ 2018 la anyunlu edwɛkɛ ne se: “The Way of Happiness,” “12 Secrets of Successful Families” yɛɛ “Help for Those Who Grieve.”

13. (a) Nwane mɔ a bɛyɛ maanlema Ɛzinzalɛ Arane ne bɛmaa bɛ a? (b) Anwubielɛ boni a wɔnyia ye wɔ ɛhye anwo kenle nsa ye a?

13 Bɛyɛ maanlema Ɛzinzalɛ Arane ne bɛmaa menli mɔɔ anye die Nyamenle ɛzonlenlɛ nwo na bɛbu Nyamenle nee ye Edwɛkɛ ne la. Bie a bɛze Baebolo ne anu edwɛkɛ bie mɔ noko bɛnlɛ mɔɔ ɔkilehile la anwo nɔhalɛ ndelebɛbo. (Wlo. 10:2; 1 Tim. 2:3, 4) Maanlema ɛdeɛ nsa mɔɔ ɛra wɔ 2018 la anyunlu edwɛkɛ ne bua kpuya ɛhye mɔ: “Asoo Nvasoɛ Wɔ Baebolo Ne Azo Ɛnɛ Ɔ?,” “Duzu A Bazi Kenle Bie A?” yɛɛ “Asoo Nyamenle Dwenle Ɛ Nwo?

NINYƐNE MƆƆ MAA ANWOSESEBƐ

14. (a) Bodane boni a vidio nna mɔɔ boka Ninyɛne Titili Mɔɔ Yɛfa Yɛkilehile anwo la di nwolɛ gyima a? (b) Anwubielɛ boni a wɔnyia ye wɔ vidio ɛhye mɔ ɛyelɛ nu a?

14 Vidio. Wɔ Gyisɛse mekɛ zo, ɛnee adwinli mbulalɛ mɔɔ kapentanli fa yɛ gyima la maa ɔfɛ kpalɛ. Noko kenle nsa ye, menli mɔɔ yɛ ndaboa nwo gyima la eza ɛnyia milahyinli ngakyile mɔɔ bɛfa bɛkpakye ndaboa, bɛfiti nuhua tokule nee mɔɔ bokɛboka nwo la. Saa ɛye mbuluku mɔɔ bɛpelente la ɛsie ahane a, yɛlɛ vidio ngɛnlɛma mɔɔ yɛye yɛkile menli. Nuhua nna boka ninyɛne titili mɔɔ yɛfa yɛkilehile la anwo: Duzu Ati A Ɔwɔ Kɛ Ɛsukoa Baebolo Ne A?, Kɛzi Bɛyɛ Baebolo Ɛzukoalɛ Ɛ?, Duzu A Bɛyɛ Ye Wɔ Belemgbunlililɛ Asalo Ɛkɛ A? yɛɛ Nwane Mɔ A Le Gyihova Alasevolɛ? Mɔɔ bɛ tendenle ɛndwu mitini nwiɔ la boa kpalɛ wɔ mekɛ mɔɔ yɛlɛyɛ ɛkpɔlalɛ mɔɔ limoa la. Yɛbahola yɛaye mɔɔ wale la yɛahile menli mɔɔ lɛ mekɛ yɛɛ mekɛ mɔɔ yɛlɛyɛ sia kɔkpɔla la. Vidio ɛhye mɔ maa menli anwosesebɛ kɛ bɛzukoa Baebolo ne na bɛrɛla yɛ ayia ne mɔ bie.

15. Ka kɛzi menli nea yɛ vidio ne mɔ bie wɔ bɛ sua zo aneɛ nu a ɔka bɛ la anwo edwɛkɛ.

15 Kɛ neazo la, mɔɔ adiema raalɛ bie yiale raalɛ bie mɔɔ ɛdu ɛvi Micronesia na ye sua zo aneɛ a le Yapese la, yɛ diema raalɛ ne yele Duzu Ati A Ɔwɔ Kɛ Ɛsukoa Baebolo Ne A? ɔhilele ye wɔ ye sua zo aneɛ nu. Mɔɔ vidio ne bɔle ɔ bo kɛ ɔbɔ la, raalɛ ne hanle kɛ: “Me sua zo aneɛ ɔ. Ɔyɛ azibɛnwo o! Ye ɛdendɛlɛ kile kɛ ɔvi bɔra ne mɔɔ mevi zo la azo. Ɔka me aneɛ ne bie!” Yemɔ anzi, raalɛ ne hanle  kɛ ɔkɔ yeagenga na yeanlea debie biala mɔɔ bɛyɛ wɔ ye aneɛ nu mɔɔ wɔ jw.org azo la. (Fa toto Gyima ne 2:8, 11 anwo.) Neazo bieko ɛne. Adiema raalɛ bie mɔɔ wɔ United States la vale vidio ko ne ala link nwanle ɔ diema ara wɔ ye aneɛ nu. Ɔnleanle ɔwiele la, ɔhɛlɛle ye kɛ: “Foa ne mɔɔ ka sunsum ɛtane bie mɔɔ nea ewiade ne azo la hanle me ahonle kpalɛ. Membizale Baebolo ɛzukoalɛ nwo adenle.” Ɔde maanle mɔɔ bɛva bɛ sa bɛdo yɛ gyima ne azo la anu!

MBULUKU MƆƆ YƐFA YƐKILEHILE NƆHALƐ NE

16. Kilehile gyima titili mɔɔ brohyua ɛhye mɔ anu ko biala di la anu: (a) Tie Nyamenle Na Nyia Dahuu Ngoane. (b) Edwɛkpa Mɔɔ Vi Nyamenle Ɛkɛ! (d) Nwane Mɔ A Ɛlɛyɛ Gyihova Ɛhulolɛdeɛ Ɛnɛ A?

16 Brohyua. Kɛ ɔkɛyɛ na wɔahola wɔahilehile awie mɔɔ ɔngola kenga kpalɛ anzɛɛ ɔnlɛ buluku biala wɔ ye aneɛ nu la nɔhalɛ ne ɛ? Yɛlɛ tɛnlabelɛ ɛhye anwo buluku​—Tie Nyamenle Na Nyia Dahuu Ngoane * brohyua ne. Buluku kpalɛ ko mɔɔ yɛbahola yɛava yɛabɔ debiezukoalɛ bo la a le Edwɛkpa Mɔɔ Vi Nyamenle Ɛkɛ! brohyua ne. Ɛbahola wɔava edwɛkɛ adile 14 mɔɔ wɔ ɔ nzi la wɔahile ahenle wɔamaa yeakpa mɔɔ ɔ nye die nwo la. Akee bɛva zɔhane ɛzukoalɛdeɛ ne bɛbɔ ɔ bo. Wɔzɔ ɛhye wɔnlea wɔ sia kɔkpɔla nu ɛlɛ ɔ? Brohyua mɔɔ tɔ zo nsa mɔɔ yɛfa yɛkilehile la a le Nwane Mɔ A Ɛlɛyɛ Gyihova Ɛhulolɛdeɛ Ɛnɛ A? Bɛyɛ ye kɛ ɔboa sukoavoma ɔmaa bɛnwu ahyehyɛdeɛ ne. Amaa wɔanwu kɛzi ɛbava wɔali gyima wɔ mekɛ biala mɔɔ ɛbayɛ Baebolo ɛzukoalɛ la, nea March 2017 Yɛ Kilisiene Ɛbɛlabɔlɛ Nee Yɛ Ɛzonlenlɛ​—Nyianu Buluku ne anu.

17. (a) Mbuluku nwiɔ ne mɔɔ bɛbazukoa la ko biala bodane a le boni? (b) Duzu a ɔwɔ kɛ menli mɔɔ bɛbazɔne bɛ la amuala yɛ a, na duzu ati ɔ?

17 Mbuluku. Saa ɛ nee awie bɔ Baebolo ɛzukoalɛ bo wɔ brohyua bie anu a, ɛbahola wɔahakyi wɔahɔ Duzu A Baebolo Ne Kola Kilehile Yɛ A? anu mekɛ biala. Buluku ɛhye bamaa ahenle ade mɔlebɛbo Baebolo ngilehilelɛ ne dɔɔnwo abo. Saa bɛwie buluku zɔhane na ahenle ɛlɛnyia anyuhɔlɛ wɔ sunsum nu a, bɛdoa zo bɛzukoa Bɛzie Bɛ Nwo Wɔ Nyamenle Ɛhulolɛ Ne Anu * buluku ne. Buluku ɛhye bamaa sukoavo ne anwu kɛzi ɔbava Baebolo ngyinlazo yeabɔ ye ɛbɛla dahuu la. Kakye kɛ, saa bɛsɔne bɛ bɛwie bɔbɔ a, ɔwɔ kɛ bɛkɔ zo bɛsukoa mbuluku nwiɔ ɛhye mɔ bɛwie. Ɛhye bamaa bɛagyinla kpundii wɔ diedi ne anu.​—Kenga Kɔlɔsaema 2:6, 7.

18. (a) Duzu a 1 Timote 4:16 maa yɛ anwosesebɛ kɛ yɛyɛ kɛ nɔhalɛ ne anwo kilehilevolɛma a, na duzu a vi nu bara a? (b) Saa yɛlɛfa Ninyɛne Titili Mɔɔ Yɛfa Yɛkilehile yɛali gyima a, duzu a ɔwɔ kɛ ɔyɛ yɛ bodane a?

18 Kɛ Gyihova Alasevolɛ la, bɛva “edwɛkpa ne anwo nɔhalɛ edwɛkɛ ne” mɔɔ bahola amaa menli anyia dahuu ngoane la bɛwula yɛ sa. (Kɔl. 1:5; kenga 1 Timote 4:16.) Ɔti, amaa yɛahola yɛayɛ ɛhye la, bɛmaa yɛ Ninyɛne Titili Mɔɔ Yɛfa Yɛkilehile la. (Nea ɛlɛka “ Ninyɛne Titili Mɔɔ Yɛfa Yɛkilehile.”) Bɛmaa yɛva ninyɛne ɛhye mɔ yɛli gyima kpalɛ kɛ mɔɔ yɛbahola la. Nolobɔlɛnli biala bahola akpa ninyɛne ɛhye mɔ mɔɔ yɛfa yɛkilehile la bie ɔ nee awie mɔɔ bahile anyelielɛ la azukoa debie wɔ mekɛ mɔɔ ɔkulo la. Noko, tɛ yɛ bodane a le kɛ yɛfa mbuluku ne mɔ yɛamaa ala; anzɛɛ yɛfa yɛamaa menli mɔɔ bɛ nye ɛnlie yɛ edwɛkɛ ne anwo la. Yɛ bodane a le kɛ yɛyɛ menli mɔɔ di nɔhalɛ, bɛle bɛlɛvo na sunsum nu ɛhɔne ɛlɛku bɛ​—menli mɔɔ “bɛ subane kile kɛ bɛfɛta dahuu ngoane la” ɛdoavolɛ.​—Gyi. 13:48; Mat. 28:19, 20.

^ ɛden. 5 Nea edwɛkɛ “The Carpenter” yɛɛ ɛlɛka “The Carpenter’s Toolbox” mɔɔ wɔ August 1, 2010, The Watchtower ne anu la.

^ ɛden. 16 Saa awie ɛngola kenga a, fa Tie Nyamenle brohyua ne mɔɔ nuhua nvoninli ne zonle la maa ye maa ɔli ɛ nzi.

^ ɛden. 17 Saa bɛnyia Kɛzi Ɛbazie Ɛ Nwo Wɔ Nyamenle Ɛlɔlɛ Ne Anu buluku ne a, bɛva yemɔ bɛli gyima.