Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Nyia Diedi Kpole Wɔ Ninyɛne Mɔɔ Ɛ Nye La Zo La Anu

Nyia Diedi Kpole Wɔ Ninyɛne Mɔɔ Ɛ Nye La Zo La Anu

“Diedi a le kɛ yɛkɛzi pi wɔ ninyɛne mɔɔ yɛ nye la zolɛ la anwo.”​—HIB. 11:1.

EDWƐNE: 81, 134

1, 2. (a) Kɛzi nɔhalɛ Kilisienema anyelazo ne le ngakyile fi menli gyɛne ɛdeɛ nwo ɛ? (b) Kpuya boni mɔ a yɛbazuzu nwo a?

NEA anyelazo kɛnlɛma mɔɔ nɔhalɛ Kilisienema lɛ a! Yɛ muala, saa bɛkpokpa yɛ o anzɛɛ yɛboka ‘mboane gyɛne’ ne anwo o, yɛ nye la kɛ yɛbanwu kɛ Nyamenle mɔlebɛbo bodane ne ɛra nu na bɛde Gyihova duma ne anwo. (Dwɔn 10:16; Mat. 6:9, 10) Anyelazo ɛhye mɔ tɛla anyelazo biala mɔɔ dasanli biala lɛ la. Eza yɛ nye la dahuu ngoane mɔɔ bie a yɛbanyia ye wɔ Nyamenle “anwuma fofolɛ” ne anu anzɛɛ yɛbanyia ye wɔ ‘ewiade anzɛɛ azɛlɛ fofolɛ’ ne azo la ade. (2 Pita 3:13) Noko kɛkala ɛdeɛ, yɛ nye la Nyamenle menli mɔɔ bɛbanyia anyuhɔlɛ wɔ sunsum nu la ade.

2 Menli mɔɔ bɛnzonle Gyihova la lɛ anyelazo, noko bie a bɛngola bɛnnwu ye saa bɛ anyelazo ne bara nu a. Kɛ neazo la, bie a menli mɔɔ to kyakya la anu mgbe dɔɔnwo anye la kɛ bɛbali loto, noko bɛngola bɛnnwu ye saa ɔbayɛ boɛ a. Noko nɔhalɛ diedi a le Kilisienema anyelazo ne mɔɔ ‘bɛsi pi’ wɔ nu la. (Hib. 11:1) Bie a ɛbabiza kɛ, kɛ ɔkɛyɛ na wɔ anyelazo ne ara nu ɛ? Na nvasoɛ boni a wɔ zo kɛ ɛbanyia wɔ anyelazo ne anu diedi kpole a?

3. Nɔhalɛ edwɛkɛ boni a nɔhalɛ Kilisienema diedi ne gyi zo a?

3 Bɛanva diedi bɛanwo alesama mɔɔ bɛtɔ sinli la; yɛɛ bɛnnyia ye mgbane. Nyamenle sunsum ne mɔɔ ɔyɛ gyima wɔ ahonle mɔɔ  le bɛlɛvo anu la a maa yɛnyia diedi a. (Gal. 5:22, NW) Baebolo ne ɛnga kɛ Gyihova lɛ diedi anzɛɛ ɔhyia diedi. Kɛmɔ Gyihova le tumivolɛ bedevinli na ɔze nrɛlɛbɛ ɔtɛla awie biala la ati, debie biala ɛngola ɛnzi ye adenle kɛ ɔbamaa ye bodane ara nu. Yɛ anwuma Selɛ ne ze ye wienyi kɛ ye ɛwɔkɛ ne mɔ bara nu bɔkɔɔ, yemɔti ɔka nwolɛ edwɛkɛ kɛ asɛɛ bɛra nu dɛbadɛba la. Ɔse: “Bɛwie debie biala yɛ!” (Kenga Yekile 21:3-6.) Kɛ mɔɔ Gyihova a le “nɔhalɛ Nyamenle ne” na dahuu ɔyɛ mɔɔ ɔka la ati, ɔmaa Kilisienema noko nyia diedi.​—Mɛla 7:9.

SUKOA TETE AMRA MƆƆ BƐLALE DIEDI ALI LA

4. Anyelazo boni a ɛnee nɔhavoma mɔɔ de aze kolaa na bɛawo Gyisɛse la lɛ a?

4 Hibuluma buluku ne tile 11 bobɔ mrenyia nee mraalɛ 16 mɔɔ lale diedi ali la aluma. Kɛlɛvolɛ ne hanle menli ɛhye mɔ nee awie mɔ gyɛne mɔɔ ‘luale diedi zo nyianle duma’ kpalɛ la anwo edwɛkɛ. (Hib. 11:39) Ɛnee bɛ muala ‘bɛsi pi’ kɛ Nyamenle bamaa bɛawo ‘ralɛ’ ne mɔɔ ɔbazɛkye Seetan gyima mɔɔ yeli la na yeamaa Gyihova mɔlebɛbo bodane ne ara nu. (Mɔl. 3:15) Nɔhavoma ɛhye mɔ wule kolaa na Gyisɛse Kelaese, ‘ralɛ’ ne mɔɔ bɛbɔle ɔ nwo ɛwɔkɛ la, abuke adenle amaa menli kɛ bɛbadɛnla anwuma. (Gal. 3:16) Noko, kɛ mɔɔ Gyihova ɛbɔ ɛwɔkɛ la, bɛbadwazo bɛ bɛara ngoane nu wɔ paladaese azɛlɛ ne azo na ngyikyingyikyi bɛayɛ menli mɔɔ bɛdi munli.​—Edw. 37:11; Aye. 26:19; Hozia 13:14.

5, 6. Kɛ ɔyɛle mɔɔ Ebileham nee ye abusua ne nyianle diedi kpole ɛ, na kɛzi bɛzɔle bɛ diedi ne anu kpundii ɛ? (Nea mɔlebɛbo nvoninli ne.)

5 Hibuluma 11:13 ka menli mɔɔ dɛnlanle aze kolaa na bɛawo Kelaese la anwo edwɛkɛ kɛ: “Diedi nu yɛɛ menli ɛhye mɔ amuala wule a. Bɛ sa anga ɛwɔkɛ ne mɔ mɔɔ Nyamenle bɔle bɛ la, noko bɛnwunle ye bɛ adwenle nu wɔ moa moa na bɛliele bɛdole nu.” Bɛ nuhua ko a le Ebileham. Asoo ɛnee ɔ nye la kɛ ɔbadɛnla ‘ralɛ’ ne mɔɔ bɛbɔle ɔ nwo ɛwɔkɛ la tumililɛ bo ɔ? Gyisɛse buale zɔhane kpuya ne wɔ mekɛ mɔɔ ɔhanle ɔhilele ye dwazotiama ne kɛ: “Bɛ ze Ebileham lile fɛlɛko kɛ ɔkɛnwu me ɛralɛ kenle ne, yɛɛ ɔnwunle ye na ɔlile nwolɛ fɛlɛko.” (Dwɔn 8:56) Zɔhane ala a Sɛla, Ayezeke, Gyekɔbo nee menli dɔɔnwo vale bɛ adwenle ziele kenle bie Belemgbunlililɛ ne mɔɔ ‘Nyamenle ɔdaye yehyehyɛ, yewula ye aze na yekyekye la’ azo a.​—Hib. 11:8-11.

6 Kɛ ɔyɛle mɔɔ Ebileham nee ye abusua ne nyianle diedi kpole ɛ? Ɔbayɛ kɛ bɛzukoale Nyamenle anwo debie bɛvile nɔhavoma mɔɔ bɛyɛ mgbanyinli nee yekile mɔɔ bɛnyianle la anu, anzɛɛ bɛgengale tete kɛlɛtokɛ bie mɔɔ le nɔhalɛ la. Mɔɔ hyia kpalɛ la, bɛammaa bɛ rɛle anvi mɔɔ bɛzukoale la, emomu bɛbule Nyamenle ɛwɔkɛ nee ye ngyinlazo ne mɔ kɛ bɛsonle bolɛ na bɛdwenledwenlenle nwolɛ. Kɛmɔ ɛnee bɛlɛ diedi wɔ bɛ anyelazo ne anu la ati, ɛnee bɛziezie bɛ nwo kɛ bɛbagyinla ngyegyelɛ biala anloa amaa bɛali nɔhalɛ bɛamaa Nyamenle.

7. Ninyɛne boni a Gyihova ɛva ɛmaa yɛ mɔɔ boa yɛ ɔmaa yɛ diedi nu mia a, na duzu a ɔwɔ kɛ yɛyɛ wɔ ninyɛne ɛhye mɔ anwo a?

7 Gyihova ɛva ye Edwɛkɛ, Baebolo ne ɛmaa yɛ amaa yɛ diedi ne anu ayɛ se. Amaa yɛanyia “nyilalɛ” anzɛɛ yɛ nye alie na ‘yɛakpazi’ la, saa ɔbayɛ boɛ a, ɔwɔ kɛ yɛkenga Baebolo ne dahuu. (Edw. 1:1-3; kenga Gyima ne 17:11.) Akee ɔwɔ kɛ yɛkɔ zo yɛdwenledwenle Nyamenle ɛwɔkɛ ne mɔ anwo na yɛdi ye ngyinlazo ne mɔ azo kɛ mɔɔ Gyihova tete azonvolɛ yɛle la. Eza Gyihova ɛlua ‘akɛlɛ nɔhavo nee nrɛlɛbɛvolɛ’ ne anwo zo ɛmaa yɛ sa ɛha sunsum nu aleɛ dɔɔnwo. (Mat. 24:45) Ɛhye ati, saa yɛmaa sunsum nu ninyɛne mɔɔ yɛsukoa la kyia yɛ a, yɛbayɛ kɛ tete amra mɔɔ bɛlale diedi ali na ‘bɛzile pi’ wɔ Belemgbunlililɛ anyelazo ne mɔɔ bɛlɛ la anu la.

8. Kɛ ɔkɛyɛ na asɔneyɛlɛ amaa yɛ diedi nu ayɛ se ɛ?

 8 Asɔneyɛlɛ noko boale tete amra ɔmaanle bɛ diedi yɛle kpole. Bɛ diedi nu yɛle se wɔ mekɛ mɔɔ bɛnwunle kɛ Nyamenle ɛbua bɛ asɔneyɛlɛ la. (Nih. 1:4, 11; Edw. 34:4, 15, 17; Dan. 9:19-21) Yɛdayɛ noko yɛbahola yɛaha yɛ ngyegyelɛ yɛahile Gyihova, ɔluakɛ ɔbadie yɛ na yeamaa yɛ anwosesebɛ yeamaa yɛava anyelielɛ yɛagyinla kpundii. Saa Nyamenle bua yɛ asɔneyɛlɛ a, ɔmaa yɛ diedi yɛ kpole. (Kenga 1 Dwɔn 5:14, 15.) Kɛmɔ diedi le sunsum nu ma ne foa la ati, ɔwɔ kɛ yɛkɔ zo yɛsɛlɛ Nyamenle sunsum ne kɛ mɔɔ Gyisɛse hanle la.​—Luku 11:9, 13.

9. Saa ɛye asɔne mɔɔ yɛyɛ yɛmaa yɛ nwo la ɛsie ahane a, nwane mɔ bieko a ɔwɔ kɛ yɛyɛ asɔne yɛmaa bɛ a?

9 Noko ɔnle kɛ yɛyɛ asɔne biala la ɛnee yɛlɛsɛlɛ Nyamenle kɛ ɔboa yɛ. Yɛbahola yɛayɛ ye mo na yɛaye ye ayɛlɛ dahuu wɔ ye “nwanwane nyɛleɛ” ne mɔ mɔɔ “bɛzonle somaa mɔɔ bɛngola bɛ tia” la anwo! (Edw. 40:5) Eza ɔwɔ kɛ yɛ asɔneyɛlɛ kile kɛ ‘yɛkakye bɛdabɛ mɔɔ bɛgua bɛ efiade la, na yɛdwenle bɛ nwo kɛ asɛɛ yɛ nee bɛ a gua efiade ne a.’ Ɔwɔ kɛ yɛyɛ asɔne yɛmaa yɛ mediema mɔɔ bɛwɔ ewiade amuala la, titili yɛ “mgbanyima ne mɔ.” Saa Gyihova bua asɔne mɔɔ yɛfa koyɛlɛ yɛyɛ la a, yɛ nye die kpole!​—Hib. 13:3, 7.

BƐAMKPO BƐ DIEDI NE

10. Nyamenle azonvolɛ mɔɔ bɛgyinlanle kpundii la bie mɔ a le nwane mɔ, na duzu a maanle bɛholale bɛyɛle zɔ a?

10 Ɛzoanvolɛ Pɔɔlo hanle sɔnea mɔɔ Nyamenle azonvolɛ dɔɔnwo mɔɔ bɛambɔ bɛ aluma la gyinlanle ɔ nloa la anwo edwɛkɛ wɔ Hibuluma tile 11 ne anu. Kɛ neazo la, Pɔɔlo hanle mraalɛ bie mɔɔ bɛlɛ diedi na bɛ mra wule mɔɔ bɛdwazole bɛ la anwo edwɛkɛ. Eza ɔhanle awie mɔ gyɛne mɔɔ bɛkpole “ewiade ye anu fanwodi biala . . . amaa Nyamenle adwazo bɛ ahɔ ngoane kpalɛ nu” la anwo edwɛkɛ. (Hib. 11:35) Yɛnze menli titili mɔɔ ɛnee wɔ Pɔɔlo adwenle nu a, noko bɛzile menli le kɛ Neebɔto nee Zɛkalaya awolɛ bɛhunle bɛ ɔlua Nyamenle mɔɔ bɛdiele ye na bɛyɛle ye ɛhulolɛdeɛ la ati. (1 Arl. 21:3, 15; 2 Ek. 24:20, 21) Daneɛle nee ɔ gɔnwo mɔ nyianle nwolɛ adenle bɔkɔɔ kɛ bɛbakpo bɛ diedi ne na bɛanyia “ewiade ye anu fanwodi biala.” Noko diedi mɔɔ ɛnee bɛlɛ ye wɔ Nyamenle tumi ne anu la maanle, saa yɛbaha a, “bɛhanle awenade nloa bɛdole nu” na “bɛnluanle sendɔlɔra.”​—Hib. 11:33, 34; Dan. 3:16-18, 20, 28; 6:13, 16, 21-23.

11. Sɔnea boni mɔ a ngapezoma bie mɔ yiale wɔ bɛ diedi ne ati a?

11 Ɔlua diedi mɔɔ ɛnee ngapezoma le kɛ Maekaya nee Gyɛlɛmaya lɛ la ati, ‘bɛzile bɛ amgbu na bɛguale bɛ efiade.’ Yilaegya noko ‘luoluale nuhua wɔ ɛsɛlɛ nee awoka zo na ɔdɛnlanle awolɛ mbɔne nee adokule nu wɔ azɛlɛ bo.’ Bɛ muala bɛgyinlanle nuhua ɔluakɛ ‘bɛzile pi wɔ ninyɛne mɔɔ bɛ nye la zolɛ la’ anu.​—Hib. 11:1, 36-38; 1 Arl. 18:13; 22:24-27; Gyɛ. 20:1, 2; 28:10, 11; 32:2.

12. Nwane a yɛle kpundiigyinlanlɛ nwo neazo mɔɔ tɛla biala la a, na duzu a boale ye a?

12 Mɔɔ Pɔɔlo hanle mrenyia nee mraalɛ mɔɔ bɛlɛ diedi la anwo edwɛkɛ wiele la, akee ɔhanle awie mɔɔ yɛle neazo mɔɔ tɛla biala la​—yɛ Awulae Gyisɛse Kelaese anwo edwɛkɛ. Hibuluma 12:2 hanle kɛ: “Ɔlua anyelielɛ mɔɔ ɛnee la ɔ nyunlu la ati, yeandwenle anyiemgba ewule ne mɔɔ ɔbawu [baka] ne azo la anwo, na kɛkala ɔde Nyamenle belemgbunli ebia ne fema zo.” Nɔhalɛ nu, ɔwɔ kɛ ‘yɛdwenle’ diedi nwo neazo mɔɔ Gyisɛse yɛle wɔ mekɛ mɔɔ ɔgyinlanle sɔnea mɔɔ anu yɛ se kpalɛ la anloa la anwo. (Kenga Hibuluma 12:3.) Kɛ mɔɔ Gyisɛse yɛle la, alimoa Kilisienema mɔɔ bie a le Antɛpase mɔɔ bɛhunle bɛ nyane  nyane nu la amkpo bɛ diedi ne. (Yek. 2:13) Bɛbadwazo bɛ bɛahɔ anwuma na bɛanyia “ngoane kpalɛ” mɔɔ tɛla mɔɔ ɛnee tete amra ne anye la zo la. (Hib. 11:35) Mɔɔ bɛwole Belemgbunlililɛ ne wɔ 1914 la anzi, bɛdwazole nɔhavoma ɛhye mɔ bɛhɔle anwuma kɛ bɛ nee Gyisɛse ɛhɔli tumi.​—Yek. 20:4.

YƐ MEKƐ YE AZO AMRA MƆƆ BƐYƐLE DIEDI NWO NEAZO

13, 14. Sɔnea boni mɔ a Rudolf Graichen yiale a, na duzu a boale ye ɔmaanle ɔgyinlanle a?

13 Nyamenle azonvolɛ mɔɔ bɛwɔ ɛkɛ ɛnɛ la anu mgbe dɔɔnwo ɛlɛdi Gyisɛse neazo ne anzi ɔlua bɛ anyelazo ne mɔɔ bɛzɔ nu boɛ na bɛmmaa debie biala ɛmmaa bɛ diedi ne ɛnga aze la azo. Suzu Rudolf Graichen mɔɔ bɛwole ye wɔ Germany wɔ 1925 ne anu la neazo ne anwo nea. Ɔhakyele Baebolo ne anu nvoninli ngakyile mɔɔ ɛnee beta beta bɛ sua ne anu bane ne anwo la. Ɔhɛlɛle kɛ: “Wɔ nvoninli ko anu, ɛnee bɛdi nee boane ralɛ, abɔnkye ralɛ nee boboduma, ɛnlankɛ ralɛ nee awenade wɔ nu na bɛ kɔsɔɔti bɛde anzodwolɛ nu, na kakula ekyi bie ɛlɛnea bɛ la hale me adwenle nu kpalɛ.” (Aye. 11:6-9) Bɛhilele ye nyane ɛvolɛ dɔɔnwo, mɔɔ limoa la a le Nazi sogyama, yɛɛ nzinlii East Germany Communist  Arane kokye ne noko hilele ye nyane kpole, noko Rudolf zɔle diedi mɔɔ ɔlɛ wɔ paladaese ne anu la anu kpundii.

14 Sɔnea gyɛne mɔɔ anu yɛ se mɔɔ Rudolf yiale la bie a le kɛ bɛdole ye mame efiade wɔ Ravensbrück, na ewule bie mɔɔ le kɛ ebunlu mɔɔ ɔmaa debie gua bɛ nwo na bɛ ti kpakye bɛ la hunle ye. Eza ye papa diedi hanle aze maanle ɔvale ɔ sa ɔwulale kɛlata bie abo kɛ ɔnle Gyihova Dasevolɛ bieko. Mɔɔ bɛyele Rudolf bɛvile efiade la, ɔyɛle maangyebakyi zo neavolɛ na nzinlii ɔhɔle Geleade Sukulu ne bie. Mɔɔ ɔwiele sukulu ne la, bɛmaanle ɔhɔyɛle edwɛkpatɛlɛvolɛ wɔ Chile na eza ɔrayɛle maangyebakyi zo neavolɛ wɔ ɛkɛ. Noko ɛnee Rudolf sɔnea ne abo ɛtɛpɛle. Mɔɔ ɔgyale edwɛkpatɛlɛvolɛ bie mɔɔ bɛfɛlɛ ye Patsy la, ye ɛvolɛ ko anzi, bɛ ra raalɛ mɔɔ bɛwole ye la wule. Nzinlii, ɔ ye mɔɔ ɛnee yeli ɛvolɛ 43 pɛ la noko wule. Rudolf gyinlanle sɔnea ɛhye mɔ amuala anu, na ɔnva nwo kɛ yeyɛ ɛrelera na ɔ nwo ta toto ye la, ɛnee ɔle dahuu adekpakyelɛnli yɛɛ asafo nu kpanyinli wɔ mekɛ mɔɔ bɛkɛlɛ ye ɛbɛlabɔlɛ nu edwɛkɛ ne wɔ August 1, 1997, The Watchtower ne mukelɛ 20-25 anu la. [1]

15. Gyihova Alasevolɛ mɔɔ bɛlɛfa anyelielɛ bɛagyinla ɛkpɔlɛ nloa ɛnɛ la bie mɔ a le nwane mɔ?

15 Gyihova Alasevolɛ maa bɛ nye die wɔ bɛ anyelazo ne anu dahuu ɔnva nwo kɛ bɛtɛkpɔ bɛ la. Kɛ neazo la, bɛgua yɛ mediema dɔɔnwo efiade wɔ Eritrea, Singapore, nee South Korea, na fane dɔɔnwo ne ala ɔlua Gyisɛse edwɛkɛ ne mɔɔ se bɛmmatwe dadeɛ mɔɔ bɛdi zo la ati ɔ. (Mat. 26:52) Isaac, Negede, nee Paulos mɔɔ bɛla efiade wɔ Eritrea ɛvolɛ mɔɔ bo 20 la boka mediema ɛhye mɔ anwo! Bɛammaa mediema ɛhye mɔ annyia nwolɛ adenle annea bɛ awovolɛ mɔɔ bɛyɛ mgbanyinli la yɛɛ bɛammaa bɛangya, noko bɛtɛdi nɔhalɛ ɔnva nwo nyane mɔɔ bɛkile bɛ la. Kɛ mɔɔ yɛnwu bɛ wɔ yɛ jw.org wɛbsaete ne azo la, bɛ nyunlu ɛzelekɛ ɛzelekɛ ne maa yɛnwu kɛzi bɛ diedi ne anu ɛyɛ se la. Efiade sinzavolɛma ne bɔbɔ bu bɛ wɔ bɛ diedi ne anwo.

Ɛlɛnyia yɛ mekɛ ye azo amra bie mɔ mɔɔ bɛwɔ wɔ asafo ne anu la diedi nwo neazo ne azo nvasoɛ ɔ? (Nea ɛdendɛkpunli 15, 16)

16. Kɛzi diedi kpole bahola abɔ ɛ nwo bane ɛ?

16 Noko tɛ ɛkpɔlɛ mɔɔ anu yɛ se la a ɔwɔ kɛ Gyihova menli dɔɔnwo gyinla ɔ nloa a. Asolo diedi nwo sɔnea mɔɔ bɛlɛyia la. Ɛnee ɔwɔ kɛ bɛ nuhua dɔɔnwo gyinla ehyia nloa anzɛɛ bɛnwu amaneɛ wɔ konle anzɛɛ esiane mekɛ nu. Bie mɔ noko le kɛ Mosisi nee tete selɛ ne mɔ la, bɛkpo ewiade ne anu ɛbɛlabɔlɛ mɔɔ bamaa bɛ nwo adɔ bɛ anzɛɛ ɔbamaa bɛalie duma la. Bɛko ɛsesebɛ bɛtia anwonyia ɛhulolɛ nee bɛ ngomekye bɛ nwo mɔɔ bɛdwenle la. Duzu a boa bɛ ɔmaa bɛyɛ ɛhye a? Gyihova anwo ɛlɔlɛ nee diedi kpole mɔɔ bɛlɛ wɔ ye ɛwɔkɛ ne anu kɛ ɔbali nzisi nwo gyima na yeamaa ye azonvolɛ anyia dahuu ngoane wɔ ewiade fofolɛ ne mɔɔ tenleneyɛlɛ wɔ nu la ɔ.​—Kenga Edwɛndolɛ 37:5, 7, 9, 29.

17. Duzu a wɔzi kpɔkɛ kɛ ɛbayɛ a, na duzu a yɛbazuzu nwolɛ wɔ edwɛkɛ bieko anu a?

17 Yɛnwu kɛzi yɛdwenledwenle Nyamenle ɛwɔkɛ ne mɔ anwo na yɛyɛ asɔne dahuu a ɔbamaa yɛ diedi ne anu ayɛ se la wɔ edwɛkɛ ɛhye anu. Ɛhye bamaa yɛagyinla diedi nwo sɔnea ngakyile nloa wɔ mekɛ mɔɔ ‘yɛlɛsi pi’ na yɛava yɛ nye yɛazie yɛ anyelazo ne azo la. Saa Baebolo ne ka diedi nwo edwɛkɛ a, ninyɛne dɔɔnwo boka nwo, na yemɔ a yɛbanwu ye wɔ edwɛkɛ bieko anu la.

^ [1] (ɛdendɛkpunli 14) Eza nea edwɛkɛ “Despite Trials, My Hope Has Remained Bright” mɔɔ wɔ April 22, 2002 Awake! ne anu mɔɔ ka Andrej Hanák mɔɔ vi Slovakia la ɛbɛlabɔlɛ nu edwɛkɛ la.