Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

“Bɛmaa Bɛ Kɛnlaneɛ Ɛda” Amaa Bɛawula Gyihova Anyunlunyia

“Bɛmaa Bɛ Kɛnlaneɛ Ɛda” Amaa Bɛawula Gyihova Anyunlunyia

“Bɛmaa bɛ kɛnlaneɛ ɛda wɔ menli nyunlu, amaa . . . bɛawula bɛ Ze . . . anyunlunyia.”​—MAT. 5:16.

EDWƐNE: 77, 59

1. Duzu titili ati a ɔwɔ kɛ yɛmaa yɛ nye die a?

ƆYƐ yɛ anyelielɛ kɛ Nyamenle azonvolɛ ɛlɛmaa bɛ kɛnlaneɛ ada wɔ ewiade amuala la! Ɛkenle ɛvolɛ ne, Gyihova menli yɛle Baebolo ɛzukoalɛ mɔɔ bo 10,000,000. Ɛhye kile kɛ, Nyamenle azonvolɛ ɛlɛmaa bɛ kɛnlaneɛ ada! Eza dwenle anyelielɛma mgbe dɔɔnwo mɔɔ rale Ngakyelɛlilɛ ne abo la anwo. Bɛholale bɛzukoale ɛlɔlɛ mɔɔ Nyamenle lale ye ali ɔlua ɛkpɔnedeɛ ne mɔɔ ɔvale ɔmaanle la azo.​—1 Dwɔn 4:9.

2, 3. (a) Duzu a ɛnzi yɛ adenle kɛ ‘yɛbamaa yɛ kɛnlaneɛ ada ɛ’? (b) Duzu a yɛbazuzu nwo wɔ edwɛkɛ ɛhye anu a?

2 Wɔ ewiade amuala, Gyihova menli ka aneɛ ngakyile. Noko, ɛhye ɛnzi yɛ adenle kɛ yɛbava koyɛlɛ yɛaye yɛ anwuma Selɛ, Gyihova ayɛlɛ. (Yek. 7:9) Ɔnva nwo aneɛ mɔɔ yɛka anzɛɛ ɛleka mɔɔ yɛde la, yɛbahola yɛada “kɛ ahɛnlaneɛ wɔ ewiade.”​—Fel. 2:15.

3 Yɛ ɛzonlenlɛ gyima ne, yɛ Kilisienema koyɛlɛ ne yɛɛ mɔdenlebɔlɛ mɔɔ yɛlɛfa yɛaha edwɛkɛ ne ndɛndɛ la wula Gyihova anyunlunyia. Kɛ ɔkɛyɛ na yɛamaa yɛ kɛnlaneɛ ada wɔ  ndenle nsa ɛhye mɔ azo ɛ?​—Kenga Mateyu 5:14-16.

BOA AWIE MƆ MAA BƐZONLE GYIHOVA

4, 5. (a) Saa ɛye daselɛlilɛ ɛhɔlɛ ɛsie ahane a, kɛzi yɛbahola yɛamaa yɛ kɛnlaneɛ ada ɛ? (b) Saa yɛda subane kpalɛ ali a, duzu a bavi nu ara a? (Nea mɔlebɛbo nvoninli ne.)

4 Edwɛkɛ “Light in the Darkness,” mɔɔ rale June 1, 1925 The Watch Tower ne anu la hanle kɛ: “Wɔ awieleɛ mekɛ ɛhye anu, awie biala ɛnrɛhola ɛnrɛli nɔhalɛ ɛnrɛmaa Awulae . . . kyesɛ ɔfa nwolɛ adenle ne ɔdi gyima ɔmaa ye kɛnlaneɛ ne ta.” Akee ɔhilehilele nu kɛ: “Ɔwɔ kɛ ɔyɛ ɛhye ɔlua edwɛkpa ne mɔɔ ɔbabɔ ye nolo yeahile awie mɔ na yeamaa ye ɛbɛlabɔlɛ nee wienyi adenle ayɛ ko la azo.” Ɔda ali kɛ, adenle ko mɔɔ bamaa yɛ kɛnlaneɛ ada la a le kɛ, yɛbabɔ edwɛkpa ne nolo na yɛayɛ menli ɛdoavolɛma. (Mat. 28:19, 20) Bieko, Kilisiene subane kpalɛ mɔɔ yɛbala ye ali la maa yɛwula Gyihova anyunlunyia. Suamenlema nee menli mɔɔ ɛlɛpɛ nu la nwu yɛ subane kpalɛ ne. Yɛ ɛzelekɛ nee ahyebizalɛ mɔɔ vi ahonle nu la maa bɛnwu yɛ menli holɛ nee Nyamenle holɛ ko mɔɔ yɛsonle ye la.

5 Gyisɛse zele ye ɛdoavolɛma kɛ, “Saa bɛwolo awuke ne anu a, bɛbiza awuke ne anu amra ahye.” (Mat. 10:12) Wɔ ɛleka mɔɔ Gyisɛse nee ɛzoanvolɛma ne hanle edwɛkɛ ne la, ɛnee menli to ɛsalɛ fɛlɛ nyɛvolɛ wɔ bɛ sua nu. Ɛnɛ, ɔnle zɔ wɔ ɛleka dɔɔnwo. Noko, adwenle kpalɛ nee agɔnwolɛvalɛ subane mɔɔ ɛbala ye ali wɔ mekɛ mɔɔ ɛlɛkile deɛmɔti wɔhɔ ye ɛkɛ anu la, ɛnrɛmaa suamenle ahonle ɛnrɛdu anzɛɛ ɔnrɛva ɛya. Ɛbahola wɔava ɛzelekɛ wɔabɔ ɔ bo. Ɛhye ɛyɛ nɔhalɛ wɔ mekɛ mɔɔ mediema ɛlɛfa ɛhwili ayɛ bagua nu daselɛlilɛ la. Saa ɛfa ɛ nwo ɛwula ɛzonlenlɛ gyima foa ɛhye anu a, bie a ɛbanwu kɛ saa ɛsele ɛkile bɛ na ɛbiza bɛ ahye a, ɔmaa bɛtie yɛ, na bɔbɔ bɛdie yɛ mbuluku ne bie. Wɔ subane kpalɛ ne noko bahola amaa bɛabɔ adawubɔlɛ bo.

6. Kɛzi agyalɛma bie mɔɔ bɛyɛ mgbanyinli la dɛlɛle bɛ ɛzonlenlɛ gyima ne anu ɛ?

6 Ɔluakɛ agyalɛma bie mɔɔ bɛyɛ mgbanyinli mɔɔ bɛwɔ England la ɛnde kpɔkɛ kpalɛ la ati, ɔmmaa bɛngola bɛnyɛ azua nu daselɛlilɛ ne kpalɛ. Bɛzile kpɔkɛ kɛ bɛmaa bɛ kɛnlaneɛ ne ada wɔ bɛ sua ne anzi. Bɛfa yɛ mbuluku ne bie bɛgua ɛkponle zo wɔ mekɛ mɔɔ awovolɛ ɛlɛba arava bɛ mra wɔ sukulu bie mɔɔ bikye bɛ ɛkɛ la. Awovolɛ bie mɔ ɛva mbuluku ɛhye mɔ bie mɔɔ Questions Young People Ask​—Answers That Work, Volumes 1 nee 2 boka nwo la. Adiema raalɛ adekpakyelɛnli bie mɔɔ wɔ bɛ asafo ne anu la hɔbokale bɛ nwo. Ye subane kpalɛ yɛɛ ɛhulolɛ mɔɔ agyalɛma ne lɛ kɛ bɛboa awie mɔ la maanle awovolɛ ko liele Baebolo ɛzukoalɛ dole nu.

7. Kɛzi ɛbahola wɔaboa nyɛvolɛ mɔɔ wɔ wɔ kpalɛ ne azo la ɛ?

7 Kenlensa ye, tutanema dɔɔnwo ɛdu ɛhɔ maanle dɔɔnwo anu. Duzu a ɛbahola wɔayɛ wɔaboa menli ɛhye mɔ amaa bɛanwu Gyihova nee ye bodane ɛ? Kɛmɔti a ɛnzukoa kɛzi nyɛvolɛ ɛhye mɔ biza ahye wɔ bɛ aneɛ nu la ɛmbɔ ɔ bo ɛ? JW Language app ne baboa wɔ amaa wɔayɛ zɔ. Bieko, duzu ati a ɛnzukoa edwɛkɛ agbɔkɛ bie mɔ mɔɔ bɛ nye balie nwolɛ la ɛ? Ɛbahola wɔahile bɛ vidio nee mbuluku ngakyile mɔɔ wɔ bɛ aneɛ nu mɔɔ wɔ jw.org azo la.​—Mɛla 10:19.

8, 9. (a) Ngilehilelɛ kpalɛ boni a yɛnyia ye wɔ yɛ dapɛne avinli ayia ne mɔ abo a? (b) Kɛzi awovolɛ bahola aboa bɛ mra amaa bɛamaa mualɛ wɔ debiezukoalɛ bo ɛ?

8 Gyihova ɛvi atiakunlukɛnlɛma nu ɛyɛ Yɛ Ɛbɛlabɔlɛ Nee Yɛ Ɛzonlenlɛ Nyianu ngyehyɛleɛ ne amaa yɛahola  yɛayɛ daselɛlilɛ gyima ne kpalɛ. Ngilehilelɛ kpalɛ mɔɔ yɛnyia wɔ ayia ɛhye abo la maa yɛ nuhua dɔɔnwo fa akɛnrasesebɛ yɛ sia kɔkpɔla nee Baebolo ɛzukoalɛ.

9 Mualɛ mɔɔ yɛ ngakula ne mɔ maa wɔ yɛ ayia ne mɔ abo la maa anyelielɛma dɔɔnwo anye die. Awovolɛ, bɛboa bɛ mra bɛmaa bɛ kɛnlaneɛ ɛda, ɔlua bɛ edwɛkɛ mɔɔ bɛbava bɛamaa mualɛ la azo. Bɛ mualɛ sikalɛ mɔɔ vi ahonle nu la ɛmaa anyelielɛma bie mɔ ɛra nɔhalɛ ne anu.​—1 Kɔl. 14:25.

BƐMIA BƐ KOYƐLƐ NE ANU

10. Kɛzi abusua ɛzonlenlɛ kola maa koyɛlɛ tɛnla abusua ne anu ɛ?

10 Adenle bieko mɔɔ ɛbamaa wɔ kɛnlaneɛ ada la a le kɛ ɛbamaa koyɛlɛ adɛnla wɔ abusua nee asafo ne anu. Adenle ko mɔɔ awovolɛ bahola ayɛ ɛhye la a le kɛ bɛbayɛ Abusua Ɛzonlenlɛ dahuu. Bie mɔ fa JW Broadcasting ɛnleanlɛ boka nwo wɔ siane ne anu. Saa bɛnea gyimalilɛ ne bɛwie a, duzu ati a bɛnzuzu kɛzi bɛbava edwɛkɛ titili mɔɔ wɔ nu bɛayɛ gyima la anwo ɛ? Saa awovolɛ ɛlɛyɛ abusua ɛzonlenlɛ a, ɔwɔ kɛ bɛkakye kɛ asolo adehilelɛ mɔɔ ɔwɔ kɛ bɛfa bɛmaa kakula nee kakula mɔɔ ɛlɛnyi la. Bɔ mɔdenle kɛ ɛbamaa awie biala mɔɔ wɔ abusua ne anu la anyia debiezukoalɛ ne azo nvasoɛ.​—Edw. 148:12, 13.

Yɛfa mgbanyinli agɔnwolɛ a, ɔboa kpalɛ (Nea ɛdendɛkpunli 11)

11-13. Kɛ ɔkɛyɛ na yɛaboa yɛamaa koyɛlɛ ara yɛ asafo ne anu ɛ?

11 Kɛzi ngakula bahola amaa koyɛlɛ adɛnla asafo ne anu amaa yeamaa awie mɔ anwosesebɛ bɛamaa bɛ kɛnlaneɛ ada ɛ? Saa ɛle Kilisienenli kakula mɔɔ ɛlɛnyi a, duzu ati a ɛnva ɛnyɛ wɔ bodane kɛ ɛbava mgbanyima agɔnwolɛ ɛ? Biza bɛ maa bɛha mɔɔ ɛboa bɛ ɛmaa bɛzonle Gyihova mekɛ tendenle la bɛhile wɔ. Ɔbamaa wɔanyia ɛzukoalɛdeɛ ngɛnlɛma dɔɔnwo, na ɔbamaa bɛ muala anwosesebɛ. Yɛ muala yɛbahola yɛava yɛayɛ yɛ subane kɛ yɛbalie menli mɔɔ ba debiezukoalɛ la kɛnlɛma. Ɛhye bamaa koyɛlɛ adɛnla asafo ne anu na yeamaa nyɛvolɛ anyia ɛhulolɛ kɛ bɛmaa bɛ kɛnlaneɛ ada. Ɛbahola wɔava ɛzelekɛ wɔabiza nyɛvolɛ ahye na wɔaboa bɛ wɔamaa bɛanyia ɛleka bɛadɛnla. Bɔ mɔdenle kɛ ɛbava bɛ wɔahile awie mɔ, amaa bɛ ahonle adɔ bɛ azule nu.

 12 Saa bɛka kɛ ɛnlea daselɛlilɛ ayia zo a, ɛbahola wɔaboa mgbanyima amaa bɛava bɛ nwo bɛawula daselɛlilɛ ne anu. Bɛlɛ azɛlɛsinli mɔɔ fɛta ɔ? Ɔyɛ a, ɛbahola wɔamaa bɛ nee mgbavolɛ nee mbɛlɛra ahɔ, amaa bɛaboa bɛ. Eza bɔ mɔdenle kɛ ɛbade bɛdabɛ mɔɔ bɛ tɛnlabelɛ nee kpɔkɛdelɛ ɛmmaa bɛngola dɔɔnwo yɛ la edwɛkɛ bo. Nɔhalɛ nu, nwunu nee atiakunlukɛnlɛma mɔɔ ɛbala ye ali la baboa ngakula nee mgbanyinli, mɔɔ lɛ anwubielɛ nee mɔɔ ɛnlɛ bie dɔɔnwo la, amaa bɛava mɔdenlebɔlɛ bɛabɔ edwɛkpa ne nolo.​—Sɛl. 19:32.

13 Edwɛndolɛnli ne hanle kɛ: “Bɛnlea kɛ ɔsi ɔle kɛnlɛma nee kpalɛ, kɛ mediema kɛbɔ nu kɛdɛnla koyɛlɛ nu!” (Kenga Edwɛndolɛ 133:1, 2.) Koyɛlɛ mɔɔ ɛnee wɔ Yizilayɛma avinli la nee nyɛleɛ kpalɛ mɔɔ bɛdabɛ mɔɔ bɛzonlenle Gyihova lale ye ali la boale menli gyɛne noko. Ɛnee ɔle kɛ ɛkpokpalɛ nwole mɔɔ ɔbɔ evuanlɛ na eza ɔboa sonlabaka ne la. Duzu ati a ɛmbɔ kpɔkɛ kɛ ɛbala subane kpalɛ ali, amaa koyɛlɛ adɛnla ɛ nee mediema avinli a? Saa ɛlɛyɛ zɔ dɛba a, yɛkanvo wɔ. Ɛbahola ‘wɔadɛlɛ wɔ ɛlɔlɛ nu’ wɔamaa yeaha awie biala ɔ?​—2 Kɔl. 6:11-13, ɔbdw.

14. Duzu a ɛbahola wɔayɛ, amaa wɔ kɛnlaneɛ ada wɔ kpalɛ ne azo ɛ?

14 Na mɔdenle mɔɔ ɛbabɔ kɛ ɛmaa Baebolo nu nɔhalɛ ne mɔɔ le kɛ kɛnlaneɛ ada wɔ wɔ kpalɛ ne azo la noko ɛ? Wɔ edwɛkɛ nee wɔ nyɛleɛ kpalɛ bamaa wɔ kpalɛzoamra anye alie nɔhalɛ ne anwo. Biza ɛ nwo kɛ: ‘Kɛzi me kpalɛzoamra bu me ɛ? Asoo me sua nu nee me ninyɛne nwo te mɔɔ maa bɛka me nwo edwɛkɛ kpalɛ wɔ kpalɛ ne azo ɔ? Menyia ɛhulolɛ kɛ mebaboa awie mɔ ɔ?’ Biza Alasevolɛ gyɛne maa bɛha kɛzi atiakunlukɛnlɛma nee neazo kpalɛ mɔɔ bɛyɛle la ɛboa bɛ mbusuafoɔ, kpalɛzoamra, bɛ gɔnwo mɔ gyimayɛvoma anzɛɛ sukuluma la bɛhile wɔ.​—Ɛfɛ. 5:9.

BƐHƆ ZO BƐZINZA

15. Kɛmɔti a ɔhyia kɛ yɛbahɔ zo yɛazinza ɛ?

15 Subane kpalɛ nwo hyia wɔ mekɛ mɔɔ yɛlɛbɔ mɔdenle kɛ yɛmaa yɛ kɛnlaneɛ ada la. Gyisɛse zele ye ɛdoavolɛma fane dɔɔnwo kɛ: “Bɛhɔ zo bɛzinza.” (Mat. 24:42; 25:13; 26:41) Saa yɛte nganeɛ kɛ “anwongyelelɛ kpole” ne ɛtɛnyianle ɛtɛbale, anzɛɛ ɛnrɛra yɛ mekɛ zo a, yɛ nye ɛnrɛbolo yɛnrɛhilehile awie mɔ Gyihova anwo debie. (Mat. 24:21) Kɛ anrɛɛ yɛ kɛnlaneɛ ne bada wɔ yɛ kpalɛ ne azo la, ɔnrɛda kpalɛ, bie bɔbɔ a ɔbanlu.

16, 17. Duzu a ɛbahola wɔayɛ wɔahile kɛ ɛlɛsinza a?

16 Mekɛ mɔɔ ninyɛne nu ɛlɛyɛ se la, ɔwɔ kɛ yɛ muala yɛkɔ zo yɛsinza. Noko, yɛze kɛ awieleɛ ne bara wɔ Gyihova ye mekɛ kpalɛ nu. (Mat. 24:42-44) Noko, kɛkala, nyia abotane na kɔ zo sinza. Kenga Nyamenle Edwɛkɛ ne na yɛ asɔne dahuu. (1 Pita 4:7) Sukoa mediema mɔɔ bɛva ɛvolɛ dɔɔnwo bɛzonle Gyihova la. Kɛ neazo la, ɛbahola wɔagenga anwubielɛ kɛnlɛma mɔɔ wɔ edwɛkɛ “Seventy years of holding on to the skirt of a Jew,” mɔɔ wɔ April 15, 2012 The Watchtower ne mukelɛ 18-21 anu la.

17 Maa ɛ nye ɛbolo Gyihova ɛzonlenlɛ nwo. Yɛ ninyɛne boa awie mɔ na ɛ nee ɛ mediema edu. Yemɔ bamaa ɛ nye alie, na yeamaa mekɛ ne ahɔ ndɛndɛ wɔ ɛ nye zo. (Ɛfɛ. 5:16) Gyihova azonvolɛ ɛyɛ gyima dɔɔnwo wɔ ɛvolɛ ɛya mɔɔ ɛze ɛhɔ la. Noko, yɛlɛyɛ gyima dɔɔnwo ɛnɛ wɔ Gyihova adehilelɛ bo. Yɛlɛmaa yɛ kɛnlaneɛ ne ada kpole ahɔdwu ɛleka mɔɔ yɛandwenle nwolɛ ɛlɛ la.

Mboaneneavolɛ ɛkpɔlalɛ maa yɛkola yɛnyia Nyamenle nrɛlɛbɛ ne azo nvasoɛ (Nea ɛdendɛkpunli 18, 19)

18, 19. Kɛzi asafo nu mgbanyima kola boa yɛ maa yɛfa mɔdenlebɔlɛ yɛsonle Gyihova ɛ? Maa neazo.

 18 Ɔyɛ anyelielɛ kɛ yɛnwu kɛ yɛ sinlidɔlɛ ɛnzi yɛ adenle kɛ yɛbazonle Gyihova wɔ adenle mɔɔ ɔdie ɔto nu la azo. Ɛhye ati, maa ɛ nye ɛzɔ nziezielɛ mɔɔ Gyihova ɛyɛ ɛva ‘menli ɛmaa kɛ ahyɛlɛdeɛ,’ mɔɔ bɛmɛ a le asafo nu mgbanyima la. (Kenga Ɛfɛsɛsema 4:8, 11, 12.) Mekɛ fofolɛ mɔɔ kpanyinli bie kɛkpɔla wɔ la, bɔ mɔdenle kɛ ɛbazukoa debie wɔavi ye nrɛlɛbɛ nee ye folɛdulɛ ne anu.

19 Agyalɛma bie mɔɔ ɛlɛyia ngyegyelɛ la dole ɛsalɛ vɛlɛle asafo nu mgbanyima nwiɔ bie mɔɔ bɛwɔ England la, na bɛhɔle. Yelɛ ne dele nganeɛ kɛ ɔ hu ɛnli bɛ nyunlu wɔ Gyihova ɛzonlenlɛ nu. Kunli ne dele nganeɛ kɛ ɔnle kilehilevolɛ kpalɛ, ɔti ɔmmaa bɛnyɛ abusua ɛzonlenlɛ dahuu. Mgbanyima ne mɔ hwenle bɛ adwenle hɔle Gyisɛse neazo ne azo. Ɔnleanle ye ɛdoavolɛma yɛɛ ɔzuzule bɛ ngyianlɛ nwo. Mgbanyima ne mɔ dule kunli ne folɛ kɛ ɔzukoa Gyisɛse. Bɛmaanle yelɛ ne anwosesebɛ kɛ ɔnyia abotane. Mgbanyima ne mɔ eza vale nzuzulɛ mɔɔ baboa agyalɛma ne amaa bɛayɛ abusua ɛzonlenlɛ kpalɛ mɔɔ baboa bɛ mra nwiɔ ne la maanle. (Ɛfɛ. 5:21-29) Nzinlii, mgbanyima ne mɔ hanvole kunli ne wɔ ye mɔdenlebɔlɛ nwo. Bɛmaanle ye anwosesebɛ kɛ ɔbɔ mɔdenle ɔva ɔ nwo ɔdo sunsum nwuanzanwuanza ne azo amaa yeayɛ abusua tile kpalɛ. Abusua ne mɔɔ bɛhilele bɛ nwo anyelielɛ na bɛboale bɛ la maanle bɛ kɛnlaneɛ ne dale.

20. Saa ɛmaa wɔ kɛnlaneɛ ne ta a, duzu a bavi nu ara a?

20 Edwɛndolɛnli ne hanle kɛ: “Nyilalɛ ɛha awie biala mɔɔ sulo [Gyihova], na ɔdua ye ndenle ne mɔ anu la!” (Edw. 128:1) Saa ɛboa awie mɔ ɛmaa bɛsonle Nyamenle, ɛmaa koyɛlɛ tɛnla ɛkɛ na ɛkɔ zo ɛsinza a, ɛnee ɛlɛmaa wɔ kɛnlaneɛ ne ada, na ɛ nye balie kpole. Awie mɔ banwu wɔ gyima kpalɛ ne na ɔbamaa menli dɔɔnwo awula yɛ Ze ne anyunlunyia.​—Mat. 5:16.