Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Fa Ɛ Nye Sie Edwɛkɛ Kpole Ne Azo

Fa Ɛ Nye Sie Edwɛkɛ Kpole Ne Azo

‘Maa bɛnwu kɛ ɛdawɔ ɛ ngomekye, mɔɔ wɔ duma a le Gyihova la a ɛle Anwuma Anwumanli ne mɔɔ sie azɛlɛ ye a.’EDW. 83:18.

EDWƐNE: 46, 136

1, 2. (a) Edwɛkɛ kpole boni a alesama kɔsɔɔti anwo wɔ nu a? (b) Duzu ati a ɔhyia kɛ yɛkile edwɛkɛ ɛhye anwo anyezɔlɛ ɛ?

ƐNƐ, ezukoa nwo hyia menli dɔɔnwo tɛla debie biala. Bɛva bɛ adwenle bɛzie anwonyia ɛkpondɛlɛ zo yɛɛ bɛmkpondɛ kɛ mɔɔ bɛlɛ la fi bɛ sa. Bie mɔ bu bɛ abusua, kpɔkɛdelɛ nee mɔɔ bɛkulo kɛ bɛyɛ la kɛ yemɔ a anwo hyia a.

2 Noko, edwɛkɛ mɔɔ anwo hyia kpalɛ mɔɔ yɛ nwo wɔ nu la a le Gyihova tumililɛ ne mɔɔ yɛte nwo la. Ɔnle kɛ yɛbu yɛ nye yɛgua edwɛkɛ ɛhye mɔɔ anwo hyia la azo. Kɛzi ɔkola ɔba ye zɔ ɛ? Ninyɛne mɔɔ yɛyɛ ye alehyenlɛ biala la bahola ali yɛ adwenle dedee yɛ rɛle avi kɛzi Nyamenle tumililɛ ne mɔɔ yɛte nwo anwo hyia la. Anzɛɛ bie a yɛbava yɛ adwenle yɛazie yɛ sɔnea ne mɔ azo yɛadɛla edwɛkɛ zɔhane mɔɔ anwo hyia la. Noko saa yɛnyia Gyihova tumililɛ ne mɔɔ yɛte nwo la anwo anyezɔlɛ kpole a, ɔbamaa yɛagyinla ngyegyelɛ mɔɔ yɛyia ye dahuu la anloa. Ɛhye bamaa yɛabikye Gyihova.

DUZU ATI A NWOLƐ HYIA KPALƐ Ɛ?

3. Duzu a Seetan ɛha ye wɔ Nyamenle tumililɛ ne anwo a?

3 Mɔɔ Seetan Abɔnsam yɛle la maanle kɛzi Gyihova tumililɛ fɛta la anwo rale edwɛkɛ. Ɔse Nyamenle tumililɛ ne ɛnle  kpalɛ yɛɛ Gyihova fa debie kpalɛ sie ye abɔdeɛ. Abɔnsam hanle kɛ, saa alesama sie bɛ nwo a, bɛ nye balie kpalɛ. (Mɔl. 3:1-5) Eza Seetan hanle kɛ, dasanli biala ɛnle ɛkɛ mɔɔ ɔbali nɔhalɛ yeamaa Nyamenle a—saa yɛyia sɔnea mɔɔ anu se a, yɛ nuhua biala bakpo Gyihova tumililɛ ne. (Dwobu 2:4, 5) Abɔnsam atuadelɛ ne ati, Gyihova ɛmaa adenle kɛ alesama ɛnlea bɛ nwo zo amaa nɔhalɛ ne ala ali kɛ Nyamenle tumililɛ ne ala a bamaa yɛ nwo adɔ yɛ a.

4. Duzu ati a ɔwɔ kɛ bɛsiezie tumililɛ nwo edwɛkɛ ne a?

4 Nɔhalɛ nu, Gyihova ze kɛ Abɔnsam edwɛkɛ ne le adalɛ. Yemɔti, duzu ati a Nyamenle ɛmaa mekɛ ɛgua nu, amaa Seetan ahile kɛ ye edwɛkɛ ne le nɔhalɛ a? Edwɛkɛ ne fale alesama nee anwumabɔvolɛma kɔsɔɔti anwo. (Kenga Edwɛndolɛ 83:18.) Agyalɛma mɔɔ limoa la kpole Gyihova tumililɛ ne, ɔvi mekɛ zɔhane menli dɔɔnwo noko ɛyɛ zɔhane ala. Ɛhye bahola amaa bie mɔ adwenle nu ayɛ bɛ kesee saa Abɔnsam edwɛkɛ ne le nɔhalɛ a. Mekɛ tendenle ala mɔɔ bɛtɛsieziele edwɛkɛ ɛhye la, anzodwolɛ nee koyɛlɛ ɛnrɛra ɛlɛ. Noko saa bɛte Gyihova tumililɛ ne anwo bɛwie a, awie biala bɛabɛlɛ ɔ nwo aze wɔ ye tumililɛ ne abo dahuu. Anzodwolɛ bara ɛleka biala.Ɛfɛ. 1:9, 10.

5. Kɛzi yɛbahola yɛahile kɛ yɛgyi Gyihova tumililɛ ne anzi ɛ?

5 Bɛbade Nyamenle tumililɛ ne anwo na Seetan nee alesama tumililɛ ɛnrɛdɛnla ɛkɛ yɛɛ bɛbaye bɛ bɛavi ɛkɛ bɔkɔɔ. Nyamenle Mɛzaya Belemgbunlililɛ ne a badɛnla ɛkɛ a, na menli mɔɔ di nɔhalɛ la bamaa yeala ali kɛ alesama kola gyinla Nyamenle tumililɛ ne anzi. (Aye. 45:23, 24) Ɛkulo kɛ ɛboka menli mɔɔ bagyinla bɛ munlililɛ nu bɛahile kɛ bɛgyi Gyihova tumililɛ ne anzi la anwo ɔ? Ɔda ali kɛ ɛkulo kɛ ɛyɛ zɔ. Amaa yɛagyinla yɛ munlililɛ nu la, ɔwɔ kɛ edwɛkɛ kpole zɔhane tɛnla yɛ adwenle nu na yɛnwu kɛzi nwolɛ hyia la.

TUMILILƐ NE ANZI ƐGYINLALƐ HYIA TƐLA NGOANELIELƐ

6. Kɛzi Gyihova tumililɛ ne mɔɔ ɔte nwo la anwo hyia ɛ?

6 Gyihova tumililɛ ne mɔɔ bɛte nwo la a le edwɛkɛ mɔɔ anwo hyia kpalɛ mɔɔ alesama anwo wɔ nu a. Nwolɛ hyia kpalɛ tɛla anyelielɛ mɔɔ awie banyia la. Asoo nɔhalɛ edwɛkɛ ɛhye kile kɛ yɛ ngoanelielɛ nwo ɛngyia anzɛɛ Gyihova ɛndwenle yɛ nwo ɔ? Ɔngile zɔ. Kɛmɔti ɛ?

7, 8. Kɛmɔti a Nyamenle ɛwɔkɛ mɔɔ ɔdi zo la boka ye tumililɛ ne mɔɔ ɔte nwo la anwo ɛ?

7 Gyihova kulo alesama yɛɛ yɛsonle bolɛ kpole yɛmaa ye. Ɛnee ɔlɛ ɛhulolɛ kɛ ɔmaa ɔ Ra ne awu amaa yɛanyia dahuu ngoane. (Dwɔn 3:16; 1 Dwɔn 4:9) Saa Gyihova anli ye ɛwɔkɛ zo a, anrɛɛ Abɔnsam baha kɛ Nyamenle le adalɛ, ɔfa ninyɛne mgbalɛ ɔsie ye menli na ɔnli tumi wɔ adenle kpalɛ zo. Eza ɔbabua dwazotiama mɔɔ dua agolobɛnwo adenle zo biza kpuya ɛhye la: “Ye ɛralɛ ne mɔɔ bɛbɔ nwolɛ ɛwɔkɛ la wɔ nienwu? Nea, ɔvi kenle mɔɔ yɛ nlenyia mɔ lale wɔ ewule nu la, kɛ debie biala de, ɔvi abɔdeɛ mɔlebɛbo la a ɔde a.” (2 Pita 3:3, 4) Ɛhye ati, Gyihova banlea kɛ alesama mɔɔ yɛ tieyɛ mɔɔ ɔbalie bɛ ngoane la boka ye tumililɛ ne mɔɔ ɔte nwolɛ la anwo! (Kenga Ayezaya 55:10, 11.) Bieko, Gyihova di tumi wɔ ɛlɔlɛ nu. Yemɔti yɛbahola yɛalie yɛali kɛ ɔkulo ye nɔhalɛ azonvolɛ, bɛsonle bolɛ bɛmaa ye yɛɛ ɔ nye die bɛ nwo dahuu.Ade. 34:6.

8 Gyihova tumililɛ ne mɔɔ yɛdie yɛado nu kɛ nwolɛ hyia kpalɛ la ɛngile kɛ yɛ  ngoanelielɛ nwo ɛngyia ye. Emomu yɛkpondɛ kɛ yɛnyia ye tumililɛ ne nee yɛ ngoanelielɛ ne anwo adwenle kpalɛ. Amaa edwɛkɛ kpole ɛhye adɛnla yɛ adwenle nu na yɛagyinla Gyihova tumililɛ ne anzi la, adwenle kpalɛ zɔhane mɔɔ yɛbanyia la anwo hyia.

KƐZI DWOBU HAKYILE YE ADWENLE LA

9. Duzu a Seetan hanle vanenle Dwobu anwo a? (Nea mɔlebɛbo nvoninli ne.)

9 Dwobu buluku ne mɔɔ boka Baebolo buluku mɔɔ bɛlimoa bɛhɛlɛle anwo la maa yɛnwu adwenle kpalɛ mɔɔ ɔwɔ kɛ yɛnyia la. Yɛnwu ye wɔ ɛkɛ ne kɛ Seetan hanle kɛ saa Dwobu nwu amaneɛ kpole a, ɔbakpo Nyamenle. Seetan hanle kɛ Nyamenle ɛhile Dwobu nyane. Gyihova anyɛ, noko ɔmaanle Seetan adenle kɛ ɔzɔ Dwobu ɔnlea, ɔhanle kɛ: “Debie biala mɔɔ ɔlɛ la wɔ ɛ sa nu.” (Kenga Dwobu 1:7-12.) Wɔ mekɛ ekyii bie anu, Dwobu azonvolɛ, ɔ nwo ninyɛne nee ɔ mra bulu ne amuala vile ɔ sa. Seetan yɛle ɛhye ɔmaanle ɔyɛle kɛ asɛɛ Nyamenle mumua ne a ɛlɛmaa Dwobu anwu amaneɛ a. (Dwobu 1:13-19) Eza Seetan maanle ewule mɔɔ yɛ nyane la guale Dwobu anwo. (Dwobu 2:7) Akee ye amaneɛnwunlɛ ne yɛle kpole wɔ mekɛ mɔɔ ɔ ye nee agɔnwolɛma nsa mɔɔ bɛyɛle bɛ nwo kɛ asɛɛ bɛle agɔnwolɛ kpalɛ la dendɛle tiale ye la.Dwobu 2:9; 3:11; 16:2.

10. (a) Kɛzi Dwobu hilele kɛ ɔdi nɔhalɛ ɔmaa Nyamenle ɛ? (b) Adenle boni azo a ɔvonle a?

10 Duzu a vi nu rale a? Seetan yɛle adalɛ bɔkɔɔ. Dwobu amkpo Nyamenle. (Dwobu 27:5) Noko, Dwobu nyianle adwenle mɔɔ ɛndenrɛ wɔ mekɛ ekyii bie anu. Ɔvale ye adwenle ɔziele ye tenleneyɛlɛ zo somaa, bɔbɔ ɔkulo kɛ ɔnwu deɛmɔti ɔlɛnwu amaneɛ la. (Dwobu 7:20; 13:24) Yɛbahola yɛanyia adwenle kɛ ndelebɛbo wɔ amaneɛ mɔɔ ɔnwunle ye la anu. Noko Nyamenle nwunle kɛ ɔwɔ kɛ ɔtenrɛ Dwobu adwenle. Duzu a Gyihova hanle hilele ye a?

11, 12. Duzu a Gyihova boale Dwobu maanle ɔnwunle ye a, na duzu a Dwobu yɛle a?

11 Yɛbahola yɛagenga edwɛkɛ mɔɔ Nyamenle hanle hilele Dwobu la wɔ Dwobu buluku ne tile 38 kɔdwu 41. Gyihova angilehile nu angile Dwobu deɛmɔti ɔlɛnwu amaneɛ la. Emomu, ɛnee Gyihova kpondɛ kɛ ɔboa Dwobu ɔmaa ɔnwu kɛ saa bɛfa ye bɛtoto kɛzi Nyamenle le kpole la anwo a, ɔndwu ye ɛleka bie. Eza ɔboale Dwobu ɔmaanle ɔnwunle kɛ edwɛkɛ kpole bie wɔ ɛkɛ mɔɔ ɔwɔ kɛ ɔdwenle nwo a. (Kenga Dwobu 38:18-21.) Ɛhye boale Dwobu maanle ɔnyianle adwenle kpalɛ.

 12 Asoo Gyihova yɛle kyengye kɛ ɔdule Dwobu folɛ fɔɔnwo ɛhye wɔ mekɛ mɔɔ ɛnee yegyinla ye sɔnea kpole ɛhye anloa la ɔ? Nyamenle anyɛ kyengye, yɛɛ Dwobu nwunle ye zɔ. Amaneɛ mɔɔ Dwobu nwunle ye bɔbɔ la anzi, ɔlale anyezɔlɛ ali wɔ ye edwɛkɛ mɔɔ li awieleɛ la anu. Ɔhanle kɛ: “Mebɔ anyiemgba na menlu me nwo; mebɔ ndɛtɛlɛ nee nzonle.” Ɛhye a vile Gyihova folɛdulɛ fɔɔnwo mɔɔ ka ahonle la anu rale a. (Dwobu 42:1-6) Ɛnee kpavolɛ Ɛlaehu ɛlimoa ɛdu Dwobu folɛ. (Dwobu 32:5-10) Mɔɔ Dwobu liele Nyamenle ndeanlɛ ne dole nu na ɔhakyile ye adwenle la, Gyihova maanle awie mɔ nwunle kɛ ɔ nye die nɔhalɛ mɔɔ Dwobu lile ye wɔ sɔnea nu la anwo.Dwobu 42:7, 8.

13. Kɛzi Gyihova folɛdulɛ ne boale Dwobu wɔ mekɛ bɔbɔ mɔɔ ye sɔnea ne rale awieleɛ la ɛ?

13 Gyihova folɛdulɛ hɔle zo boale Dwobu bɔbɔ wɔ mekɛ mɔɔ ye sɔnea ne ɛhɔ awieleɛ la. Adenle boni azo? ‘Gyihova yilale Dwobu kpole kpalɛ dɛlale alimoa ne,’ noko ɔliele mekɛ na yeade kpɔkɛ, ɔluakɛ nzinlii “ɔwole mralɛ mrenya nsuu nee mraalɛ nsa.” (Dwobu 42:12-14) Ye biala anu, Dwobu anwo balɔ ɔ mra ne mɔ mɔɔ Seetan hunle bɛ la. Ɔbayɛ kɛ, ɔhakyele amaneɛ mɔɔ ɔnwunle ye la kpalɛ. Saa bɔbɔ ɔnwunle deɛmɔti sɔnea zɔhane rale ɔ nwo zo la kpalɛ a, ɔdwu mekɛ ne bie a ɔbadwenle deɛmɔti ɛnee ɔwɔ kɛ ɔnwu amaneɛ zɔhane la anwo. Ɔnva nwo adwenle biala mɔɔ ɔnyianle ye la, ɔdwenledwenlenle Nyamenle folɛdulɛ ne anwo. Ɛhye bamaa yeanyia adwenle kpalɛ nee arɛlekyekyelɛ.Edw. 94:19.

Yɛbahola yɛava yɛ adwenle yɛazie Gyihova tumililɛ ne azo yɛadɛla yɛ ngyegyelɛ ne mɔ ɔ? (Nea ɛdendɛkpunli 14)

14. Duzu a yɛsukoa yɛfi Dwobu edwɛkɛ ne anu a?

14 Dwobu edwɛkɛ ne bahola aboa yɛdayɛ noko amaa yɛanyia adwenle kpalɛ nee arɛlekyekyelɛ. Ɔ muala anzi, Gyihova maanle bɛhɛlɛle bɛmaanle “yɛ ɛhilehilelɛ, amaa yɛalua abotane nee Ngɛlɛlera ne anu arɛlekyekyelɛ zo yɛanyia anyelazo.” (Wlo. 15:4) Duzu a yɛsukoa yɛfi nu a? Ɔmaa yɛnwu kɛ, ɔnle kɛ yɛdwenle yɛ ngyegyelɛ nwo somaa na yɛ rɛle fi edwɛkɛ kpole ɛhye—Gyihova tumililɛ ne mɔɔ yɛte nwo la. Eza ɔwɔ kɛ yɛkakye kɛ mɔɔ ɔwɔ kɛ yɛyɛ wɔ edwɛkɛ kpole ɛhye anwo la a le kɛ yɛbali nɔhalɛ wɔ ngyegyelɛ mekɛ nu kɛ mɔɔ Dwobu yɛle la.

15. Saa yɛdi nɔhalɛ wɔ sɔnea mekɛ nu a, duzu a vi nu ba a?

15 Saa yɛdwenledwenle kɛzi yɛ nɔhalɛlilɛ nwo hyia la anwo a, kɛzi ɔbaboa yɛ ɛ? Ɔbamaa yɛanwu kɛ yɛ sɔnea ne mɔ di debie bie anwo gyima.  Sɔnea mɔɔ yɛyia la ɛngile kɛ Gyihova anye ɛnlie yɛ nwo, emomu ɔmaa yɛnyia adenle yɛkile kɛ yɛgyi Nyamenle tumililɛ ne anzi. (Mrɛ. 27:11) Yɛ abotane maa “yɛnyia subane kpalɛ” yɛɛ ɔmaa yɛ anyelazo yɛ kpole. (Kenga Wulomuma 5:3-5.) Dwobu edwɛkɛ ne maa yɛnwu kɛ “Gyihova se anwunvɔne yɛɛ ɔ kunlu yelɛyela ye.” (Gye. 5:11) Ɔti, yɛbahola yɛanyia anwodozo kɛ ɔbayila yɛ nee awie biala mɔɔ gyi ye tumililɛ ne anzi la. Ɛhye mɔɔ yɛbanwu ye la baboa yɛ amaa ‘yɛava abotane nee anyelielɛ yɛagyinla debie biala anloa.’Kɔl. 1:11.

MAA ƆDƐNLA WƆ ADWENLE NU DAHUU

16. Kɛmɔti a ɔwɔ kɛ yɛmaa Gyihova tumililɛ ne mɔɔ anwo hyia mɔɔ yɛte nwo la tɛnla yɛ adwenle nu a?

16 Nɔhalɛ nu, saa yɛlɛyia ngyegyelɛ a, ɔbahola yeayɛ se kɛ yɛbamaa Gyihova tumililɛ ne mɔɔ yɛte nwo la adɛnla yɛ adwenle nu. Saa yɛfa yɛ adwenle yɛsie yɛ ngyegyelɛ ngyikyi zo a, ɔbahola yeayɛ kpole wɔ yɛ nye zo. Ɛhye ati, ɔwɔ kɛ yɛkakye yɛ nwo dahuu kɛ Nyamenle tumililɛ ne mɔɔ yɛgyinla ɔ nzi la hyia wɔ mekɛ mɔɔ yɛlɛyia ngyegyelɛ la.

17. Kɛzi Gyihova gyima ne mɔɔ yɛbayɛ ye dahuu la bamaa edwɛkɛ kpole ne adɛnla yɛ adwenle nu ɛ?

17 Saa yɛkɔ zo yɛyɛ Gyihova gyima ne dahuu a, ɔbamaa edwɛkɛ kpole ne adɛnla yɛ adwenle nu. Kɛ neazo la, Dasevolɛ bie mɔɔ bɛfɛlɛ ye Renee la nyianle stroke, ɔyɛ a ɔ nwo fofo ye, eza anahɛlɛ yɛle ye. Mekɛ mɔɔ ɛnee ɔla asopiti ɛkɛ la, ɔlile dɔketama, wuliravolɛma nee menli mɔɔ ba ɛkɛ la daselɛ. Wɔ asopiti ko anu ɔvale dɔnehwele 80 ɔlile daselɛ wɔ dapɛne nwiɔ nee foa anu. Ye anwodolɛ ne anu yɛle se kpalɛ bɔbɔ la, Renee arɛle anvi Gyihova tumililɛ ne mɔɔ ɔte nwo la. Yemɔ maanle ye amaneɛnwunlɛ ne azo dele.

18. Kɛzi adiema raalɛ ko anwubielɛ maa yɛnwu nvasoɛ mɔɔ wɔ zo kɛ yɛbagyinla Gyihova tumililɛ ne anzi ɛ?

18 Nɔhalɛ nu, yɛkpondɛ kɛ yɛkakye Gyihova tumililɛ ne, bɔbɔ wɔ ngyegyelɛ mɔɔ yɛyia ye dahuu la anu. Jennifer hendɛle wɔ anwumalɛne mɔɔ ɔfa yeahɔ sua nu la agyinlaleɛ ɛkɛ ne too kenle nsa. Bɛpɛle alopile mɔɔ ɔwɔ kɛ ɔfo la ngyehyɛleɛ biala anu. Kɛ mɔɔ ɔ nwo yɛle ye koonwu yɛɛ ɛnee yevɛ la ati, anrɛɛ ɔbahola yeali nyane. Emomu, ɔyɛle asɔne amaa yeanwu kɛzi ɔbahola yeava sunsum nu moalɛ yeamaa bɛdabɛ noko mɔɔ bɛ rɛle ɛbɔ la. Duzu a vi nu rale a? Ɔlile menli dɔɔnwo daselɛ yɛɛ ɔmaanle mbuluku dɔɔnwo. Ɔka kɛ: “Mendele nganeɛ kɛ Gyihova yilale me ɔnva nwo ngyegyelɛ mɔɔ menyiale ye la na ɔmaanle me anwosesebɛ ɔmaanle mendele ye duma ne anwo.” Nɔhalɛ nu, ɔvale ye adwenle ɔziele Gyihova bodane ne azo.

19. Afoa boni a Gyihova menli gyi wɔ ye tumililɛ ne anwo a?

19 Gyihova tumililɛ ne anwo anyezɔlɛ maa bɛnwu ngakyile mɔɔ wɔ nɔhalɛ nee adalɛ ɛzonlenlɛ nu la. Ɔvi mekɛ tendenle, Nyamenle menli ɛgyinla ye tumililɛ ne anzi. Kɛmɔ yɛgyi nɔhalɛ ɛzonlenlɛ nzi la ati, ɔwɔ kɛ yɛ nuhua ko biala bɔ mɔdenle kakye zɔhane edwɛkɛ ne.

20. Ɛbɔ mɔdenle ɛgyinla Gyihova tumililɛ ne anzi a, kɛzi ɔbade nganeɛ ɛ?

20 Nyia anwodozo kɛ Gyihova anye die mɔdenle mɔɔ ɛlɛbɔ wɔagyinla ye tumililɛ ne anzi ɔlua nɔhalɛlilɛ mɔɔ ɛfa ɛsonle ye nee sɔnea mɔɔ ɛgyinla ɔ nloa la azo. (Edw. 18:25) Edwɛkɛ mɔɔ doa zo la bahilehile deɛmɔti ɔwɔ kɛ yɛfi yɛ ahonle nu yɛgyinla Gyihova tumililɛ ne anzi la.