Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Ngakyelɛlilɛ Ne Ka Nyamenle Menli Bɔ Nu

Ngakyelɛlilɛ Ne Ka Nyamenle Menli Bɔ Nu

“Bɛnlea kɛ ɔsi ɔle kɛnlɛma nee kpalɛ, kɛ mediema kɛbɔ nu kɛdɛnla koyɛlɛ nu!”​—EDW. 133:1.

EDWƐNE: 18, 14

1, 2. Ɛvoyia boni a baha yɛ abɔ nu wɔ 2018 a, na duzu ati ɔ? (Nea mɔlebɛbo nvoninli ne.)

WƆ March 31 2018, menli mgbe dɔɔnwo mɔɔ wɔ ewiade la bahɔ ɛvoyia bie mɔɔ bɛdi ye ko wɔ ɛvolɛ ne anu la abo. Saa ewia ne kɔtɔ a, Gyihova Alasevolɛ nee menli dɔɔnwo bayia nu ahakye afɔle mɔɔ Gyisɛse bɔle maanle yɛ la. Ɛvolɛ biala, Kelaese ewule Ngakyelɛlilɛ ne ka menli bɔ nu maa ɔyɛ nwanwane, ɔluakɛ ɔtɛla ɛvoyia biala mɔɔ wɔ azɛlɛ ye azo la.

2 Nea kɛzi Gyihova nee Gyisɛse anye die kɛ bɛbanwu menli mgbe dɔɔnwo kɛ bɛlɛkɔ ɛvoyia titili ɛhye wɔ ewiade amuala kɔkpula kɛ kenle zɔhane bahɔ awieleɛ a. Baebolo ne hanle kɛ, “menli ekpunli kpole bie mɔɔ awie ɛngola bɛ tia, mɔɔ bɛvi maanle maanle nee mbusua nee menli nee aneɛ ngakyile nu la” badea nu kɛ: “Ngoanelielɛ vi yɛ Nyamenle ne mɔɔ de belemgbunli ebia ne azo nee Boaneralɛ ne ɛkɛ.” (Yek. 7:9, 10) Ɔyɛ anyelielɛ kɛ Ngakyelɛlilɛ ɛvoyia ɛhye di Gyihova nee Gyisɛse eni la!

3. Kpuya boni mɔ a bɛbabua wɔ edwɛkɛ ɛhye anu a?

 3 Edwɛkɛ ɛhye babua kpuya ɛhye mɔ. (1) Kɛzi yɛ nuhua ko biala bahola aziezie ɔ nwo ahɔ Ngakyelɛlilɛ ne na yeanyia zolɛ nvasoɛ ɛ? (2) Ndenle boni mɔ azo a Ngakyelɛlilɛ ne ka Nyamenle menli kɔsɔɔti bɔ nu a? (3) Duzu a mebahola meayɛ amaa koyɛlɛ mɔɔ wɔ Nyamenle menli avinli la adɛnla ɛkɛ a? (4) Asoo yɛbahɔ Ngakyelɛlilɛ mɔɔ li awieleɛ la kenle bie? Saa ɔle zɔ a, ɛnee kenlenzu?

KƐZI YƐBAZIEZIE YƐ NWO YƐAHƆ NGAKYELƐLILƐ NE NA YƐANYIA ZOLƐ NVASOƐ LA

4. Duzu ati a ɔhyia kɛ yɛbɔ mɔdenle biala kɛ yɛbahɔ Ngakyelɛlilɛ ne ɛ?

4 Duzu ati a nwolɛ hyia kɛ yɛbahɔ Ngakyelɛlilɛ ne ɛ? Kakye kɛ debiezukoalɛ ɛhɔlɛ boka yɛ ɛzonlenlɛ nwo. Ɔda ali kɛ Gyihova nee Gyisɛse nwu menli mɔɔ bɔ mɔdenle kɔ ɛvoyia titili ɛhye wɔ ɛvolɛ ne anu la. Yɛkpondɛ kɛ Gyihova nee Gyisɛse nwu kɛ yɛbahɔ Ngakyelɛlilɛ ne, kyesɛ tɛnlabelɛ mɔɔ yɛyɛ nwolɛ ɛhwee a ɔnyɛ boɛ la na azi yɛ adenle. Saa yɛfa yɛ nyɛleɛ yɛkile kɛ ayia ne mɔ hyia yɛ a yɛmaa Gyihova nwu deɛmɔti ɔnle kɛ ɔye yɛ duma ɔfi ye “ngakyelɛ buluku” ne anu la. Bɛfɛlɛ buluku ɛhye “ngoane buluku.” Menli mɔɔ Gyihova kulo kɛ ɔmaa bɛ dahuu ngoane la aluma wɔ nu.​—Mal. 3:16; Yek. 20:15.

5. Ɔka ekyi Ngakyelɛlilɛ ne dwu zo a, kɛzi yɛbahola ‘yɛazɔ yɛ nwo yɛanlea kɛ yɛwɔ diedi ne anu’ ɛ?

5 Ɔka ekyi Ngakyelɛlilɛ ne dwu zo a, yɛbahola yɛakpa mekɛ na yɛalua asɔneyɛlɛ zo yɛazuzu agɔnwolɛvalɛ mɔɔ yɛ nee Gyihova lɛ la anwo kpalɛ. (Kenga 2 Kɔlentema 13:5.) Kɛzi yɛbayɛ ɛhye ɛ? Ɔlua ɛzɔlɛ mɔɔ ‘yɛbazɔ yɛ nwo yɛanlea kɛ yɛwɔ diedi ne anu’ la azo. Amaa yɛayɛ zɔ la, ɔwɔ kɛ yɛbiza yɛ nwo kɛ: ‘Asoo amgba medie medi kɛ meboka ahyehyɛdeɛ kokye ne mɔɔ Gyihova die to nu na bɛlɛyɛ ye ɛhulolɛdeɛ la anwo ɔ? Melɛbɔ mɔdenle biala kɛ mebaha Belemgbunlililɛ edwɛkpa ne na meahilehile awie mɔ ɔ? Asoo me nyɛleɛ maa ɔda ali kɛ medie medi kɛ awieleɛ mekɛ ne ɛ, na Seetan tumililɛ awieleɛ ɛbikye ɔ? Asoo anwodozo mɔɔ melɛ ye wɔ Gyihova nee Gyisɛse anu la le kɛ mekɛ mɔɔ menyilale me nwo zo memaanle Gyihova Nyamenle la ɔ?’ (Mat. 24:14; 2 Tim. 3:1; Hib. 3:14) Saa yɛdwenledwenle kpuya ɛhye mɔ mualɛ ne anwo a, ɔbamaa yɛanwu sonla holɛ ko mɔɔ yɛde la.

6. (a) Adenle ko boni a yɛdua zo a yɛbanyia dahuu ngoane a? (b) Kɛzi asafo nu kpanyinli ko siezie ɔ nwo maa Ngakyelɛlilɛ ne ɛvolɛ biala ɛ, na kɛzi ɛbahola wɔayɛ bie ɛ?

6 Kenga na dwenledwenle Ngɛlɛlera ne anu edwɛkɛ mɔɔ maa yɛnwu kɛzi Ngakyelɛlilɛ ne anwo hyia la anwo. (Kenga Dwɔn 3:16; 17:3.) Amaa yɛanyia dahuu ngoane la, kyesɛ ‘yɛnwu’ Gyihova na ‘yɛnyia diedi’ wɔ Gyisɛse, Ɔ Ra kokye ne anu. Amaa yɛaziezie yɛ nwo yɛamaa Ngakyelɛlilɛ ne la, ɔwɔ kɛ yɛsukoa edwɛkɛ bie mɔ mɔɔ baboa yɛ yeamaa yɛabikye Gyihova nee Gyisɛse kpalɛ la. Suzu mɔɔ asafo nu kpanyinli ko mɔɔ yezonle yehyɛ yɛ la anwo nea. Yeboɔboa Ɛzinzalɛ Arane mɔɔ ɛra dɛba mɔɔ ka Ngakyelɛlilɛ ne anwo edwɛkɛ nee ɛlɔlɛ mɔɔ Gyihova nee Gyisɛse ɛla ye ali ɛhile yɛ la dɔɔnwo anloa. Ɔka ekyii Ngakyelɛlilɛ ne dwu zo a, ɔsia ɔkenga edwɛkɛ ɛhye mɔ na ɔdwenledwenle kɛzi ɛvoyia ɛhye anwo hyia la anwo. Ɔyɛ a ɔfa edwɛkɛ fofolɛ ko anzɛɛ nwiɔ ɔboka mɔɔ ɔlɛ la anwo. Asafo nu kpanyinli ɛhye ɛnwu kɛ edwɛkɛ ɛhye mɔ mɔɔ ɔsia ɔkenga yɛɛ Ngakyelɛlilɛ Baebolo ɛgengalɛ mɔɔ ɔyɛ na ɔdwenledwenle nwo la maa ɔsukoa ninyɛne fofolɛ ɛvolɛ biala. Mɔɔ hyia kpalɛ la, ɔte nganeɛ kɛ ɛlɔlɛ mɔɔ ɔlɛ ɔmaa Gyihova nee Gyisɛse la anu mia ɛvolɛ biala. Debiezukoalɛ zɛhae mɔɔ ɛbayɛ la bamaa ɛlɔlɛ nee anyezɔlɛ mɔɔ ɛlɛ ɛmaa Gyihova nee Gyisɛse la ayɛ kpole amaa yeaboa wɔ na wɔanyia Ngakyelɛlilɛ ne azo nvasoɛ bɔkɔɔ.

 NGAGYELƐLILƐ NE KA YƐ BƆ NU

7. (a) Duzu nzɛlɛlɛ a Gyisɛse yɛle wɔ nɔsolɛ mɔɔ limoa mɔɔ bɛlile Awulae Nɔsolɛ Aleɛ ne la ɛ? (b) Duzu a kile kɛ Gyihova buale Gyisɛse asɔneyɛlɛ ne a?

7 Nɔsolɛ mɔɔ limoa mɔɔ bɛlile Awulae Nɔsolɛ Aleɛ ne la, Gyisɛse zɛlɛle kɛ ye ɛdoavolɛma kɔsɔɔti bayɛ ko kɛ mɔɔ ɔ nee ɔ Ze le ko la. (Kenga Dwɔn 17:20, 21.) Amgba Gyihova ɛbua asɔneyɛlɛ zɔhane mɔɔ ye kulovolɛ Ralɛ ne yɛle la, na kɛkala menli mgbe dɔɔnwo die di kɛ Gyihova a zoanle ɔ Ra ne a. Nyamenle menli yia nu, noko Ngakyelɛlilɛ ne le ayia ngakyile mɔɔ di daselɛ kpalɛ kɛ koyɛlɛ wɔ Gyihova Alasevolɛ avinli a. Menli mɔɔ asolo bɛ nwonane nee maanle mɔɔ bɛvi nu la yia nu sonle wɔ ewiade amuala. Wɔ ɛleka bie mɔ, menli mɔɔ ka aneɛ ngakyile la ɛnda ɛnnyia nu ɛnzonle, anzɛɛ saa bɛyia bɔbɔ a awie mɔ te nganeɛ kɛ ɛhye ɛnle debie kpalɛ. Noko, Gyihova nee Gyisɛse anye die koyɛlɛ ɛhye anwo!

8. Koyɛlɛ nwo edwɛkɛ boni a Gyihova hanle hilele Yizikeɛle a?

8 Kɛ Gyihova menli la, koyɛlɛ mɔɔ wɔ yɛ avinli la ɛnzi yɛ nwo. Gyihova hanle dole ɛkɛ. Fa edwɛkɛ mɔɔ ɔhanle ɔhilele ngapezonli Yizikeɛle mɔɔ fale mbaka nwiɔ ne mɔɔ ɔfa yeabɔ nwo la kɛ neazo, mbaka ne mɔɔ “Dwuda ɛdeɛ” ko yɛɛ “Dwosefi ɛdeɛ” ko la. (Kenga Yizikeɛle 37:15-17.) Bɛhilehile nu wɔ “Kpuyia Mɔɔ Vi Kengavolɛma Ɛkɛ” mɔɔ wɔ July 2016 Ɛzinzalɛ Arane ne anu kɛ: “Gyihova vale nrɛlaleɛ mɔɔ maanle Yizilayɛma nyianle anyelazo kɛ saa bɛsia bɛkɔ Ɛwɔkɛ Azɛlɛ ne azo a bɛbaha bɛ bɛabɔ nu la maanle Yizikeɛle. Zɔhane ngapezo edwɛkɛ ne eza hanle kɛ bɛbaha menli mɔɔ bɛbazonle Nyamenle wɔ awieleɛ mekɛ ne anu la bɛabɔ nu.”

9. Kɛzi Yizikeɛle ngapezo ne mɔɔ ɛra nu la da ali wienyi ɛvolɛ biala wɔ Ngakyelɛlilɛ ne abo ɛ?

9 Ɔvi ɛvolɛ 1919 mɔɔ ba la, Gyihova bɔle ɔ bo kɛ ɔboɔboa bɛdabɛ mɔɔ bɛkpokpa bɛ mɔɔ sɛkɛlɛneɛ adenle zo bɛle kɛ “Dwuda” baka ne la anloa yeamaa bɛadɛnla koyɛlɛ nu ngyikyi ngyikyi. Akee menli dɔɔnwo mɔɔ bɛlɛ azɛlɛ ye azo anyelazo, mɔɔ sɛkɛlɛneɛ adenle zo bɛle kɛ “Dwosefi” baka ɛdeɛ ne la rabokale bɛdabɛ mɔɔ bɛkpokpa bɛ la anwo​—ekpunli nwiɔ ne yɛle “mboane ekpunli ko.” (Dwɔn 10:16; Zɛk. 8:23) Gyihova bɔle ɛwɔkɛ kɛ ɔbava mbaka nwiɔ ɛhye mɔ yeabɔ nu yeamaa bɛayɛ ko wɔ ɔ sa nu. (Yiz. 37:19) Ɛnɛ, ekpunli nwiɔ ne sonle wɔ Belemgbunli ko​—Gyisɛse Kelaese mɔɔ bɛwula ye anyunlunyia mɔɔ bɛhanle ɔ nwo edwɛkɛ kɛ Nyamenle “sonvolɛ Devidi” la tumililɛ bo. (Yiz. 37:24, 25) Koyɛlɛ titili ɛhye mɔɔ Yizikeɛle buluku ne ka nwolɛ edwɛkɛ la da ali wienyi ɛvolɛ biala, wɔ mekɛ mɔɔ menli mɔɔ bɛkpokpa bɛ mɔhama ne nee “mboane gyɛne” ne yia nu kɛ bɛkakye Kelaese ewule ne la! Noko, duzu a yɛ nuhua ko biala bahola ayɛ amaa koyɛlɛ adɛnla yɛ avinli a?

KƐZI YƐ NUHUA KO BIALA KOLA BOA MAA KOYƐLƐ TƐNLA ƐKƐ LA

10. Kɛ ɔkɛyɛ na yɛamaa koyɛlɛ adɛnla Nyamenle menli avinli ɛ?

10 Debie ko mɔɔ baha Nyamenle menli abɔ nu la a le kɛ yɛbabɛlɛ yɛ nwo aze. Mɔɔ Gyisɛse wɔ azɛlɛ ye azo la, ɔzele ye ɛdoavolɛma kɛ bɛbɛlɛ bɛ nwo aze. (Mat. 23:12) Saa yɛle bɛlɛvo a, yɛnrɛzukoa ewiade ne anwomemaazo subane ne. Emomu, yɛ mɛlɛbɛnwoaze ne baboa yɛ amaa yɛadie menli mɔɔ li yɛ nyunlu la, na tieyɛ ɛhye anwo hyia amaa koyɛlɛ adɛnla asafo ne anu. Mɔɔ tɛla biala la, saa yɛbɛlɛ yɛ nwo aze a, yɛbazɔ Nyamenle anye, ɔluakɛ ɔkyi “menli mɔɔ memaa bɛ nwo zo la na ɔdo menli mɔɔ bɛlɛ bɛ nwo aze la.”​—1 Pita 5:5.

11. Saa yɛdwenle mɔɔ paano ne nee nwanye ne mɔɔ bɛfa bɛyɛ Ngakyelɛlilɛ ne gyi ɛkɛ maa la anwo a, kɛzi ɔmaa koyɛlɛ tɛnla yɛ avinli ɛ?

11 Adenle mɔɔ tɔ zo nwiɔ mɔɔ bamaa koyɛlɛ adɛnla yɛ avinli la a le kɛ yɛbadwenle mɔɔ  paano ne nee nwanye ne mɔɔ bɛfa bɛyɛ Ngakyelɛlilɛ ne gyi ɛkɛ maa la anwo. Kolaa na nɔsolɛ titili zɔhane adwu​—yɛɛ wɔ nɔsolɛ titili zɔhane, dwenledwenle mɔɔ paano ne nee nwanye ne kile la anwo kpalɛ. (1 Kɔl. 11:23-25) Paano ne gyi ɛkɛ maa Gyisɛse sonlabaka ne mɔɔ ɛtane ɛnle nu yɛɛ nwanye ne gyi ɛkɛ maa ye mogya ne mɔɔ ɔvale ɔbɔle afɔle la. Saa yɛte mɔɔ paano ne nee nwanye ne gyi ɛkɛ maa la abo a, ɛnee yɛtɛwiele. Kakye kɛ Kelaese ɛkpɔnelɛ afɔlebɔlɛ ne da ɛlɔlɛ kpole mɔɔ menli nwiɔ ne ɛla ye ali​—ɛlɔlɛ mɔɔ Gyihova lale ye ali ɔlua ɔ Ra ne mɔɔ ɔvale ɔmaanle yɛ nee ɛlɔlɛ mɔɔ Gyisɛse lale ye ali ɔlua ye ngoane mɔɔ ɔvale ɔbɔle afɔle ɔmaanle yɛ la azo. Saa yɛdwenledwenle kɛzi bɛhulole yɛ la anwo a, ɔwɔ kɛ ɔka yɛ ɔmaa yɛdayɛ noko yɛkulo bɛ. Gyihova anwo ɛlɔlɛ mɔɔ yɛ nee yɛ mediema azonvolɛ lɛ la le kɛ nyɛma mɔɔ ka yɛ bɔ nu, na ɔmaa yɛ koyɛlɛ ne anu mia.

Saa yɛfa ɛtane yɛkyɛ a, yɛmaa koyɛlɛ ne tɛnla ɛkɛ (Nea ɛdendɛkpunli 12, 13)

12. Wɔ belemgbunli ne nee ye sonvolɛma ndonwo ne anu, kɛzi Gyisɛse maanle ɔlale ali wienyi kɛ Gyihova kulo kɛ yɛfa awie mɔ ɛtane yɛkyɛ bɛ ɛ?

12 Adenle mɔɔ tɔ zo nsa mɔɔ bamaa koyɛlɛ adɛnla yɛ avinli la a le kɛ yɛbava awie mɔ ɛtane yɛahyɛ bɛ. Saa yɛfa menli mɔɔ fo yɛ la ɛtane yɛkyɛ bɛ a, yɛmaa ɔda ali kɛ yɛ nye sɔ Kelaese ɛkpɔnelɛ afɔlebɔlɛ ne mɔɔ maa bɛkola bɛfa yɛdayɛ mumua ne ɛtane bɛkyɛ yɛ la. Fa Gyisɛse ndonwo ko mɔɔ wɔ Mateyu 18:23-34 la kɛ neazo. Biza ɛ nwo kɛ: ‘Asoo melɛ ɛhulolɛ kɛ mebava Gyisɛse ngilehilelɛ ne meali gyima? Asoo meda abotane nee ndelebɛbo ali mekile me mediema azonvolɛ? Meziezie me nwo kɛ mebava bɛdabɛ mɔɔ bɛfo me la ɛtane meahyɛ bɛ ɔ?’ Nɔhalɛ nu, anyebolo wɔ ɛtane bie mɔ anu tɛla bie mɔ yɛɛ ɔyɛ se kpalɛ kɛ alesama mɔɔ ɛnli munli la bava ɛtane bie mɔ ahyɛ. Noko, ndonwo ɛhye maa yɛnwu mɔɔ Gyihova kulo kɛ yɛyɛ la. (Kenga Mateyu 18:35.) Gyisɛse hanle ye wienyi kɛ saa yɛanva yɛ mediema ɛtane yɛangyɛ bɛ wɔ mekɛ mɔɔ ɔwɔ kɛ yɛyɛ zɔ a, Gyihova noko ɛnrɛva yɛ ɛdeɛ ɛnrɛhyɛ yɛ. Ɔwɔ kɛ yɛdwenle ɛhye anwo kpalɛ. Kɛ mɔɔ Gyisɛse hilele yɛ la, saa yɛfa awie mɔ ɛtane yɛkyɛ bɛ a, ɛnee yɛlɛbɔ yɛ koyɛlɛ ne mɔɔ sonle bolɛ la anwo bane.

13. Yɛkpondɛ anzodwolɛ a, kɛzi ɔmaa koyɛlɛ tɛnla yɛ avinli ɛ?

 13 Saa yɛfa awie mɔ ɛtane yɛkyɛ bɛ a, ɔkile kɛ yɛkulo anzodwolɛ. Kakye ɛzoanvolɛ Pɔɔlo folɛdulɛ ne mɔɔ se “bɛbɔ mɔdenle ɛsesebɛ bɛva anzodwolɛ mɔɔ ka bɛ bɔ nu la bɛdɛnla sunsum nu koyɛlɛ nu” la. (Ɛfɛ. 4:3) Saa ɔka ekyi Ngakyelɛlilɛ ne dwu zo yɛɛ nɔsolɛ ne mɔɔ bɛlɛdi Ngakyelɛlilɛ ne la titili, dwenle kɛzi ɛ nee awie mɔ di la anwo kpalɛ. Biza ɛ nwo kɛ: ‘Asoo me nyɛleɛ kile kɛ menva edwɛkɛ menzie me nu ɔ? Bɛze me kɛ memkpondɛ anzodwolɛ nee koyɛlɛ bo zo ɔ?’ Kpuya ɛhye mɔ anwo hyia, na ɔwɔ kɛ yɛdwenle nwo kpalɛ wɔ mekɛ ɛhye anu.

14. Kɛ ɔkɛyɛ na yɛahile kɛ ‘yɛ nee yɛ gɔnwo mɔ de wɔ ɛlɔlɛ nu’ ɛ?

14 Adenle mɔɔ tɔ zo nna la boni a yɛdua zo yɛmaa koyɛlɛ tɛnla yɛ avinli a? Ɔlua ɛlɔlɛ mɔɔ yɛda ye ali yɛfa yɛsukoa Gyihova la azo. (1 Dwɔn 4:8) Ɔnle kɛ yɛka ye wɔ yɛ mediema azonvolɛ anwo kɛ, “Ɔwɔ kɛ mekulo bɛ, noko me nye ɛnrɛlie bɛ nwo”! Yɛnyia adwenle zɛhae a, ɔbahile kɛ yɛnli Pɔɔlo folɛdulɛ ne mɔɔ se “bɛ nee bɛ gɔnwo mɔ ɛdɛnla wɔ ɛlɔlɛ nu” la azo. (Ɛfɛ. 4:2) Yɛ ye nzonlɛ kɛ yeanga kɛ ɔwɔ kɛ ‘bɛ nee bɛ gɔnwo mɔ tɛnla’ ala. Ɔdoale zo kɛ, ɔwɔ kɛ bɛyɛ ye wɔ “ɛlɔlɛ nu.” Ngakyile wɔ nu. Menli ngakyile dɔɔnwo a wɔ yɛ asafo ne mɔ anu a, na Gyihova a ɛhwe bɛ muala a. (Dwɔn 6:44) Kɛmɔ Gyihova ɛhwe bɛ ɛra ɔ nwo la ati, ɔkulo bɛ muala. Saa Nyamenle kulo yɛ mediema a, fane nyɛ a ɔnle kɛ yɛkulo bɛ a? Ɔwɔ kɛ yɛkulo yɛ mediema kɛ mɔɔ Gyihova se yɛyɛ ye la!​—1 Dwɔn 4:20, 21.

NGAKYELƐLILƐ MƆƆ LI AWIELEƐ​—KENLENZU?

15. Kɛzi yɛkola yɛnwu ye kɛ yɛbayɛ Ngakyelɛlilɛ mɔɔ li awieleɛ la ɛ?

15 Kenle ko dedee yɛnrɛli Ngakyelɛlilɛ ne bieko. Kɛzi yɛnwu ye ɛ? Pɔɔlo hɛlɛle hɔmaanle Kilisienema mɔɔ bɛkpokpa bɛ la ye wɔ Kɔlentema kɛlata mɔɔ limoa la anu kɛ, saa bɛkakye Gyisɛse ewule ne ɛvolɛ biala a, ɛnee ɔkile kɛ bɛlɛbɔ “Awulae ewule ne nolo kɔkpula kɛ ɔkɛra.” (1 Kɔl. 11:26) Gyisɛse eza hanle ye ɛralɛ ne anwo edwɛkɛ wɔ ye ngapezo ne mɔɔ fale awieleɛ mekɛ ne anwo la anu. Ɔhanle ye wɔ anwongyelelɛ kpole ne mɔɔ ɛlɛba la anwo kɛ: “Sonla Ra ne anwo sɛkɛlɛneɛ bavinde anwuma, na azɛlɛ ye azo mbusua kɔsɔɔti bali nyane, na bɛbanwu kɛ sonla Ra ne lua anwuma amungu nu ɔlɛ tumi nee anyunlunyia kpole ɔlɛba. Na [Gyisɛse bazoa] ye anwumabɔvolɛma yeamaa bɛava aweɛne mɔɔ ane dielie kpole la bɛara, na bɛbaboɔboa bɛdabɛ mɔɔ yekpa bɛ la anloa bɛavi anwoma nna ne anu, ɔvi anwuma ne ati yeahɔdwu ɔ bo.” (Mat. 24:29-31) Gyisɛse baboɔboa “bɛdabɛ mɔɔ yekpa bɛ” la anloa wɔ mekɛ mɔɔ ɔlɛfa Kilisienema mɔɔ bɛkpokpa bɛ la kɔsɔɔti yeahɔ anwuma la. Ɛhye bazi wɔ mekɛ mɔɔ anwongyelelɛ kpole ne ɛbɔ ɔ bo yɛɛ kolaa na Amagɛdɔn konle ne ara la. Wɔ zɔhane konle ne anu, Gyisɛse nee menli 144,000 ne bazɛkye arelemgbunli mɔɔ wɔ azɛlɛ ye azo la amuala. (Yek. 17:12-14) Ngakyelɛlilɛ mɔɔ li amozi mɔɔ yɛbahɔ kolaa na Gyisɛse aboɔboa menli mɔɔ bɛkpokpa bɛ anloa la a bayɛ mɔɔ li awieleɛ a.

16. Duzu ati a wɔbɔ kpɔkɛ kɛ ɛbahɔ ɛvolɛ ɛhye Ngakyelɛlilɛ ne a?

16 Bɔ kpɔkɛ kɛ ɛbahɔ Ngakyelɛlilɛ ne wɔ March 31, 2018. Na bɛmaa yɛzɛlɛ Gyihova kɛ ɔboa yɛ ɔmaa koyɛlɛ ɛhɔ zo ɛdɛnla ye menli avinli. (Kenga Edwɛndolɛ 133:1.) Kakye kɛ, kenle ko dedee yɛnrɛli Ngakyelɛlilɛ ne bieko. Kɔkpula kɛ mekɛ zɔhane badwu la, bɛmaa yɛhile kɛ Ngakyelɛlilɛ ne mɔɔ ka yɛ ɔbɔ nu ɛvolɛ biala la sonle bolɛ maa yɛ.