Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Ɛlɔlɛ Boni A Maa Bɛnyia Nɔhalɛ Anyelielɛ A?

Ɛlɔlɛ Boni A Maa Bɛnyia Nɔhalɛ Anyelielɛ A?

“Nyilalɛ ɛha menli mɔɔ [Gyihova] le bɛ Nyamenle la!”​—EDW. 144:15.

EDWƐNE: 111, 109

1. Duzu ati a yɛde mekɛ mɔɔ bie ɛtɛbale ɛlɛ la anu ɛ?

YƐDE mekɛ mɔɔ bie ɛtɛbale ɛlɛ wɔ alesama tetedwɛkɛ nu la anu. Kɛ mɔɔ Baebolo ne hanle dole ɛkɛ la, Gyihova ɛlɛboɔboa “ekpunli kpole bie . . . mɔɔ bɛvi maanle maanle nee mbusua nee menli nee aneɛ ngakyile nu la” anloa. Menli mɔɔ bɛboɔboa bɛ nloa la le “maanle mumua” na bɛ dodo bo mgbe mɔtwɛ, bɛlɛfa anyelielɛ ‘bɛazonle Nyamenle alehyenlɛ nee aledwolɛ.’ (Yek. 7:9, 15; Aye. 60:22) Menli dɔɔnwo mɔɔ bɛkulo Nyamenle nee bɛ gɔnwo mɔ zɛhae la bie ɛtɛbale ɛlɛ.

2. Duzu ɛlɔlɛ a menli mɔɔ bɛhwe bɛ nwo bɛvi Nyamenle anwo la da ye ali a? (Nea mɔlebɛbo nvoninli ne.)

2 Noko, Ngɛlɛlera nwuanzanwuanza ne eza hanle kɛ menli mɔɔ bɛhwe bɛ nwo bɛvi Nyamenle anwo la bala ɛlɔlɛ ɛtane ali wɔ yɛ mekɛ ye anu​—bɛbayɛ angomedi. Ɛzoanvolɛ Pɔɔlo hɛlɛle kɛ: “Wɔ mekɛ mɔɔ li awieleɛ la anu, . . . , menli bayɛ angomedi, ezukoa nwo anyebolo, . . . menli mɔɔ kulo anyelielɛ tɛla Nyamenle.” (2 Tim. 3:1-4) Angomedi le Nyamenle anwo ɛlɔlɛ mɔɔ ɔwɔ kɛ yɛnyia la angɔbɛnzi. Angomedi subane ɛmmaa menli nye ɛnlie kɛ mɔɔ bɛkpondɛ la. Nɔhalɛ nu, ɛlɔlɛ zɛhae maa menli yɛ angomedi  wɔ ewiade, na ɔmaa ɛbɛlabɔlɛ ‘ne yɛ se’ maa awie biala.

3. Duzu a yɛbazuzu nwo wɔ edwɛkɛ ɛhye anu a? Na duzu ati ɔ?

3 Pɔɔlo nwunle kɛ angomedi subane mɔɔ babu zo la bayɛ ngyegyelɛ amaa Kilisienema. Ɔti, ɔbɔle kɔkɔ kɛ “twe ɛ nwo fi” menli mɔɔ ɛnlɛ ɛlɔlɛ kpalɛ la anwo. (2 Tim. 3:5) Noko, yɛnrɛhola yɛnrɛhwe yɛ nwo yɛnrɛvi menli ɛhye mɔ anwo bɔkɔɔ. Ɔti, kɛ ɔkɛyɛ na yɛahwe yɛ nwo yɛavi menli mɔɔ da subane ɛtane ɛhye mɔ mɔɔ ɛbu zo ali la anwo amaa yɛayɛ mɔɔ sɔ Gyihova, ɛlɔlɛ Nyamenle ne la anye ɛ? Bɛmaa yɛzuzu ngakyile mɔɔ wɔ ɛlɔlɛ mɔɔ Nyamenle kulo kɛ yɛnyia ye nee mɔɔ bɛha nwolɛ edwɛkɛ wɔ 2 Timote 3:2-4 avinli la anwo. Ɛhye baboa yɛ amaa yɛanleɛnlea yɛ nwo nu na yɛanwu ɛlɔlɛ mɔɔ ɔwɔ kɛ yɛda ye ali la amaa yɛ kunlu adwo yɛ nwo na yɛ nye alie.

ƐKULO NYAMENLE ANZƐƐ Ɛ NWO?

4. Duzu ati a ɔnle ɛtane kɛ yɛbanyia ɛlɔlɛ mɔɔ fɛta la yɛamaa yɛ nwo ɛ?

4 Pɔɔlo hɛlɛle kɛ: “Menli bayɛ angomedi.” Ɔle ɛtane kɛ yɛbahulo yɛ nwo ɔ? Kyɛkyɛ, ɔfɛta yɛɛ ɔhyia kɛ yɛkulo yɛ nwo. Gyihova bɔle yɛ zɔ. Gyisɛse hanle kɛ: “Kulo ɛ gɔnwo kɛ ɛ nwo.” (Maake 12:31) Saa yɛngulo yɛ nwo a, yɛnrɛhulo yɛ gɔnwo. Eza yɛkenga ye wɔ Ngɛlɛlera ne anu kɛ: “Ɔwɔ kɛ kunlima kulo bɛ ye mɔ kɛ bɛ nwo. Nrenyia mɔɔ kulo ɔ ye la kulo ɔdaye ɔ nwo, ɔluakɛ awie biala ɛmkpɔ ye sonlabaka ne, emomu ɔdi ye adane na ɔnea ye boɛ.” (Ɛfɛ. 5:28, 29) Ɔti, ɔle kpalɛ kɛ yɛbanyia ɛlɔlɛ mɔɔ fɛta la yɛamaa yɛ nwo.

5. Boni a ɛbaha ye wɔ menli mɔɔ bɛle angomedi la anwo a?

5 Menli mɔɔ bɛle angomedi mɔɔ 2 Timote 3:2 ka bɛ nwo edwɛkɛ la ɛnlɛ ɛlɔlɛ kpalɛ. Ɔle angomedi ɛlɔlɛ. Menli mɔɔ bɛle angomedi la dwenle bɛ nwo somaa tɛla kɛ mɔɔ anrɛɛ ɔwɔ kɛ bɛdwenle la. (Kenga Wulomuma 12:3.) Bɛdabɛ mumua ne bɛ nwo ala a bɛdwenle wɔ bɛ ɛbɛlabɔlɛ nu a. Bɛndwenle awie mɔ anwo. Saa ninyɛne angɔ boɛ a, bɛbɔ awie mɔ somolɛ tɛla kɛ bɛbalie bɛ nvonleɛ bɛado nu. Edwɛkɛ bie mɔɔ bɛhanle bɛvanenle Baebolo ne anwo la vale menli mɔɔ bɛle angomedi la totole ‘kpɔnzɛlɛ mɔɔ ɔnyenya ɔ nwo kɛ bɔlo a, ye enrinli fondonloo ne wɔ ɔ kunlu na ɔfa ɔ nwo mbowule ne mɔɔ wɔ ɔ nzi la ɔkile awie mɔ la anwo.’ Menli mɔɔ le angomedi la ɛnlɛ nɔhalɛ anyelielɛ.

6. Saa yɛkulo Nyamenle a nvasoɛ boni a wɔ zo a?

6 Baebolo nwo mbɔlɔba bie mɔ die di kɛ Pɔɔlo limoa hanle angomedi subane nwo edwɛkɛ, ɔluakɛ ɔmaa bɛda subane ɛtane mɔɔ nzinlii ɔhanle nwolɛ edwɛkɛ la ali. Noko, ɛlɔlɛ mɔɔ Nyamenle kulo kɛ yɛnyia ye la maa yɛda subane kpalɛ ali. Bie a le anyelielɛ, anzodwolɛ, abotane, atiakunlukɛnlɛma, kpalɛyɛlɛ, diedi, mɛlɛbɛnwoaze nee bɛnwozohomolɛ. (Gal. 5:22, 23) Edwɛndolɛnli ne hɛlɛle kɛ, “Nyilalɛ ɛha menli mɔɔ [Gyihova] le bɛ Nyamenle la!” (Edw. 144:15) Gyihova le anyelielɛ Nyamenle, na ye menli da subane zɔhane ali. Bieko, Gyihova azonvolɛ anye die ɔluakɛ bɛlɛ ɛhulolɛ kɛ bɛbadu bɛ nwo bɛamaa bɛaboa awie mɔ, bɛnle kɛ menli mɔɔ bɛle angomedi mɔɔ bɛ nye la kɛ dahuu awie mɔ bamaa bɛ debie la.​—Gyi. 20:35.

Kɛ ɔkɛyɛ na yɛangulo yɛ ngome yɛ nwo ɛ? (Nea ɛdendɛkpunli 7)

7. Kpuya boni mɔ a baboa yɛ amaa yɛanwu kɛ yɛkulo Nyamenle a?

7 Kɛ ɔkɛyɛ na yɛanwu kɛ yɛkulo yɛ nwo yɛtɛla Nyamenle ɛ? Suzu folɛdulɛ mɔɔ wɔ Felepaema 2:3, 4 la anwo: “Bɛmmafa manzonlehwenlɛ anzɛɛ anwomemaazo bɛyɛ debie biala, emomu bɛbɛlɛ bɛ nwo aze na bɛbu bɛ gɔnwo mɔ bɛdɛla bɛ nwo, bɛmmadwenle bɛ ngomekye bɛ boɛyɛlɛ nwo, emomu bɛdwenle awie mɔ noko ɛdeɛ nwo.” Yɛbahola yɛabiza yɛ nwo kɛ: ‘Mefa folɛdulɛ  zɔhane medi gyima wɔ me ɛbɛlabɔlɛ nu ɔ? Amgba melɛbɔ mɔdenle kɛ mebayɛ Nyamenle ɛhulolɛdeɛ ɔ? Melɛbɔ mɔdenle kɛ mebaboa awie mɔ wɔ asafo ne nee daselɛlilɛ nu ɔ?’ Ɔnla aze kɛ yɛbadu yɛ nwo yɛamaa dahuu. Ɔhyia mɔdenlebɔlɛ nee afɔlebɔlɛ. Noko debie biala ɛnrɛhola ɛnrɛmaa yɛ nye ɛnrɛlie ɛnrɛdɛla kɛ Anwuma Anwumanli ne die yɛ to nu.

8. Duzu a Nyamenle anwo ɛlɔlɛ ɛmaa bie mɔ ɛyɛ a?

8 Nyamenle anwo ɛlɔlɛ ɛmaa bie mɔ ɛgyakyi gyima kpalɛ mɔɔ bamaa bɛanyia ezukoa dɔɔnwo la, amaa bɛahola bɛayɛ dɔɔnwo wɔ Gyihova ɛzonlenlɛ nu. Ericka mɔɔ le dɔketa la kpale kɛ ɔbayɛ adekpakyelɛ gyima, tɛla kɛ ɔbava ye adwenle yeazie ye dɔketa gyima ne azo. Ɔ nee ɔ hu ɛhola ɛzonle wɔ maanle dɔɔnwo azo. Ɔka kɛ: “Saa mekakye mɔɔ yɛyɛ, anwubielɛ ngakyile mɔɔ yɛnyia wɔ azɛlɛsinli mɔɔ bɛka aneɛ ngakyile wɔ nu la anu nee agɔnwolɛma dɔɔnwo mɔɔ yɛnyia la a, ɔmaa yɛ nye die kpalɛ.” Ericka tɛde dɔketa, noko ɔfa ye mekɛ dɔɔnwo nee anwosesebɛ ɔkilehile menli Gyihova anwo debie na ɔboa ɔ mediema wɔ asafo ne anu. Ɔka kɛ: “Ɛhye maa medi fɛlɛko na me kunlu dwo me nwo.”

WƆ ANWONYIA WƆ ANWUMA ANZƐƐ AZƐLƐ YE AZO?

9. Duzu ati a ezukoa nwo anyebolo ɛmmaa bɛnyia anyelielɛ ɛ?

9 Pɔɔlo hɛlɛle kɛ, menli bayɛ “ezukoa nwo anyebolo.” Mekɛ bie, adekpakyelɛnli bie mɔɔ wɔ Ireland la hanle Nyamenle anwo edwɛkɛ hilele nrenyia bie. Nrenyia ne yele ye walɛte, yele ezukoa mɔɔ wɔ nu la bie hilele ye na ɔhanle kɛ, “Me nyamenle ne ɛne!” Menli dɔɔnwo ne ala ɛnrɛlie ɛnrɛdo nu ɛdeɛ, noko kɛ bɛ nuhua bie mɔ te nganeɛ la ɛne. Bɛkulo ezukoa nee ninyɛne mɔɔ ɔkola ɔtɔ la. Noko, Baebolo ne bɔ yɛ kɔkɔ kɛ: “Sonla mɔɔ anye bolo ezukoa la akunlu ɛndwo ye ezukoa nwo ɛlɛ; yɛɛ mɔɔ anye bolo anwonyia la akunlu ɛndwo mɔɔ yenyia ye la anwo.” (Nol. 5:10) Dahuu menli ɛhye mɔ kulo kɛ bɛnyia ezukoa dɔɔnwo, na bɛfa “nyanelilɛ dɔɔnwo” bɛba bɛ nwo zo wɔ ye ɛkpondɛlɛ nu.​—1 Tim. 6:9, 10.

10. Duzu a Baebolo ne ka ye wɔ anwonyia nee ehyia nwo a?

10 Nɔhalɛ nu, yɛ muala yɛhyia ezukoa. Ɔboa yɛ wɔ adenle bie azo. (Nol. 7:12) Noko saa awie lɛ mɔɔ ɔbava yeali ye ngyianlɛ nwo gyima ala a, ɔbamaa ɔ nye alie ɔ? Ɛhɛe! (Kenga Nolobɔvo ne 5:12.) Gyeki ara Egɛ hɛlɛle kɛ: “Mmamaa medi ehyia anzɛɛ menyia me nwo. Maa menyia aleɛ mɔɔ menwɔhyia nwolɛ la ala.” Yɛbahola yɛade deɛmɔti ɛnee ɔngulo kɛ ɔdi ehyia kpalɛ la abo. Ɔdoale zo kɛ ɛnee ɔngulo kɛ ɔbawua, ɔluakɛ awuleyɛlɛ ɛnzɔ Nyamenle anye. Noko, duzu ati a ɔzɛlɛle kɛ ɔmmamaa ɔnyia ɔ nwo ɛ? Ɔhɛlɛle kɛ: “Anrɛɛ me ko yi a, menwɔkpo wɔ na menwɔbiza kɛ, ‘[Gyihova] a le nwane?’” (Mrɛ. 30:8, 9) Bie a ɛze menli bie mɔ mɔɔ bɛfa bɛ nwo bɛto bɛ anwonyia zo bɛtɛla Nyamenle la.

11. Ezukoa nwo folɛ boni a Gyisɛse dule a?

11 Menli mɔɔ le ezukoa nwo anyebolo la ɛnrɛhola ɛnrɛzɔ Nyamenle anye. Gyisɛse hanle kɛ: “Awie biala ɛnrɛhola ɛnrɛzonle menlenlɛ nwiɔ; ɔluakɛ ɔbahulo ko na yeakpɔ ko, anzɛɛ ɔbali ko eni yeagyakyi ko. Bɛnrɛhola bɛnrɛzonle Nyamenle nee Anwonyia.” Eza ɔhanle kɛ: “Bɛgyakyi kɛ bɛkɛkpondɛ bɛ anwonyia bɛkɛzie azɛlɛ ye azo, ɛleka mɔɔ ngɛkɛba nee nrɛlana kola sɛkye ye na nwule kola kɔwua la. Emomu, bɛkpondɛ bɛ anwonyia bɛzie anwuma, ɛleka mɔɔ ngɛkɛba nee nrɛlana ɛngola ɛnzɛkye ye, na nwule ɛngola ɛngɔnwua la.”​—Mat. 6:19, 20, 24.

12. Saa yɛtete ninyɛne zo wɔ yɛ ɛbɛlabɔlɛ nu a, kɛzi ɔmaa yɛsonle Nyamenle kpalɛ ɛ? Maa neazo.

12 Menli dɔɔnwo ɛnwu ye kɛ saa bɛtete  ninyɛne zo wɔ bɛ ɛbɛlabɔlɛ nu a, ɔmaa bɛ nye die na eza bɛnyia mekɛ dɔɔnwo bɛsonle Gyihova. Jack mɔɔ de United States la dɔnenle ye sua kpole nee ye gyima ɔluakɛ ɛnee ɔze kɛ yemɔ bamaa ɔ nee ɔ ye ahola ayɛ adekpakyelɛ gyima ne bie. Ɔka kɛ: “Ɛnee ɔnla aze kɛ yɛbadɔne yɛ sua kɛnlɛma ne nee yɛ agyapadeɛ mɔɔ yɛlɛ ye wɔ maanle ne anu la. Noko, wɔ ɛvolɛ dɔɔnwo anu ɔlua ngyegyelɛ mɔɔ meyia ye gyima nu la ati, mekara sua nu la ɛnee meva ɛya. Me ye mɔɔ le dahuu adekpakyelɛnli la anye die dahuu. Ɔka kɛ, ‘Me gyimamenle ne le kpalɛ kpole!’ Kɛkala mɔɔ medame noko melɛyɛ adekpakyelɛ gyima ne bie la, yɛ mu nwiɔ yɛyɛ gyima yɛmaa Menlenlɛ ko ne ala, Gyihova.”

Kɛ ɔkɛyɛ na yɛangulo ezukoa ɛ? (Nea ɛdendɛkpunli 13)

13. Kɛ ɔkɛyɛ na yɛanyia adwenle kpalɛ wɔ ezukoa nwo ɛ?

13 Amaa yɛanyia adwenle kpalɛ wɔ ezukoa nwo la ɔwɔ kɛ yɛfa nɔhalɛlilɛ yɛsuzu kɛzi yɛbabua kpuya ɛhye mɔ la anwo: ‘Asoo amgba medie medi yɛɛ mefa mɔɔ Baebolo ne ka fale ezukoa nwo la meyɛ gyima? Asoo ezukoa ɛkpondɛlɛ a hyia me titili wɔ me ɛbɛlabɔlɛ nu a? Asoo nwonane afoa nu ninyɛne hyia me tɛla agɔnwolɛvalɛ mɔɔ me nee Gyihova nee awie mɔ banyia ye la? Asoo amgba me rɛle wɔ Gyihova anu kɛ ɔbali me ngyianlɛ nwo gyima?’ Yɛbahola yɛanyia anwodozo kɛ ɔnrɛye bɛdabɛ mɔɔ bɛ rɛle wɔ ye nu la arɛle ɔnrɛdo bɛ sa nu ɛlɛ.​—Mat. 6:33.

ASOO YƐKULO GYIHOVA ANZƐƐ ANYELIELƐ?

14. Kɛzi ɔwɔ kɛ yɛbu anyelielɛ ninyɛne ɛ?

14 Kɛ mɔɔ Baebolo ne hanle la, ɛnɛ menli “kulo anyelielɛ.” Kɛ mɔɔ ɔnle ɛtane kɛ yɛbanyia adwenle kpalɛ yɛamaa yɛ nwo nee ezukoa la, zɔhane ala a ɔnle ɛtane kɛ yɛbanyia adwenle kpalɛ wɔ anyelielɛ ninyɛne nwo a. Gyihova ɛngulo kɛ yɛtua yɛ nwo ninyɛne kɔsɔɔti anzɛɛ yɛtwe yɛ nwo yɛfi ninyɛne mgbalɛ mɔɔ bamaa yɛ nye alie la anwo. Baebolo ne maa nɔhavoma anwosesebɛ kɛ: “Kɔ zolɛ, di wɔ aleɛ anyelielɛ nu, na fa anyelielɛ no wɔ nza.”​—Nol. 9:7.

15. Anyelielɛ boni a bɛha nwolɛ edwɛkɛ wɔ 2 Timote 3:4 a?

15 Timote kɛlata ne mɔɔ tɔ zo nwiɔ la ka menli mɔɔ kulo anyelielɛ na bɛndwenle  Nyamenle anwo la anwo edwɛkɛ. Yɛ ye nzonlɛ kɛ ngyɛnu ne se menli bahulo anyelielɛ ‘adɛla Nyamenle,’ noko ɛhye ɛngile kɛ bɛbanyia Nyamenle anwo ɛlɔlɛ ekyii. Abɔlɔba bie hɛlɛle kɛ: “Ngyɛnu ɛhye ɛngile kɛ eza bɛlɛ Nyamenle anwo ɛlɔlɛ ekyii bɔbɔ. Ɔkile kɛ bɛngulo Nyamenle fee.” Kɔkɔbɔlɛ mɔɔ anyebolo wɔ nu mɔɔ bɛlɛfa bɛamaa bɛdabɛ mɔɔ bɛ ti ɛmi anyelielɛ nu la boni ɛ! Baebolo ne ka menli mɔɔ kulo anyelielɛ la anwo edwɛkɛ kɛ bɛle menli mɔɔ anyelielɛ ngakyile “twehwe bɛ adwenle.”​—Luku 8:14.

16, 17. Duzu neazo a Gyisɛse yɛle ye wɔ anyelielɛ ninyɛne nwo a?

16 Gyisɛse maanle ɔlale ali kɛ ɔlɛ anyelielɛ ninyɛne nwo adwenle kpalɛ. Ɔhɔle “atɔfolɛlielɛ” nee ‘ɛkponledolɛ kpole bie’ abo. (Dwɔn 2:1-10; Luku 5:29) Wɔ atɔfolɛlielɛ ne abo, ɔmaanle nzule hakyile nwanye wɔ nwanwane adenle zo, wɔ mekɛ mɔɔ ɛnee bɛ nza ɛwie la. Mekɛ fofolɛ nu, menli dendɛle tiale Gyisɛse kɛ ɔle adidikpoku nee nzanli, noko ɔmaanle ɔlale ali wienyi kɛ menli zɔhane mɔ ɛnlɛ adwenle kpalɛ.​—Luku 7:33-36.

17 Noko, Gyisɛse ammaa ɔ nye anlie anyelielɛ ninyɛne nwo somaa. Ɔvale Gyihova ɔlimoale na ɔdule ɔ nwo ɔmaanle ɔboale awie mɔ. Ɔgyinlanle ye munlililɛ nu na ɔwule wɔ amaneɛnwunlɛ baka ne azo, amaa menli dɔɔnwo anyia ngoane. Gyisɛse zele menli mɔɔ badoa ye la kɛ: “Anyelielɛ ɛha bɛ kɛ medame ti menli bɔ bɛ aholoba na bɛyɛ bɛ kpɔdekpɔde na bɛbɔ adalɛ bɛfa edwɛkɛ bɛto bɛ nwo zo la. Bɛmaa bɛ nye ɛlie na bɛli fɛlɛko, ɔluakɛ bɛ ahatualɛ le kpole wɔ anwuma, zɔhane ala a bɛyɛle ngapezoma mɔɔ limoale bɛ nyunlu la kpɔdekpɔde a.”​—Mat. 5:11, 12.

Kɛ ɔkɛyɛ na yɛangulo anyelielɛ ɛ? (Nea ɛdendɛkpunli 18)

18. Kpuya boni mɔ a baboa yɛ amaa yɛanwu kɛ yɛnli anyelielɛ ninyɛne nzi somaa ɛ?

18 Kɛ ɔkɛyɛ na yɛanwu ye kɛ yɛli anyelielɛ ninyɛne nzi somaa ɛ? Ɔwɔ kɛ yɛbiza yɛ nwo kɛ: ‘Asoo memaa anyelielɛ ninyɛne kyia me tɛla debiezukoalɛ nee daselɛlilɛ ɛhɔlɛ ɔ? Melɛ ɛhulolɛ kɛ mebadua me nwo ninyɛne bie mɔ ɔluakɛ mekulo kɛ mesonle Nyamenle la ati ɔ? Saa melɛkpa anyelielɛ ninyɛne a, asoo mesuzu kɛzi Gyihova babu me kpɔkɛzilɛ ne la anwo ɔ?’ Saa yɛkulo Nyamenle amgba a tɛ ninyɛne mɔɔ yɛze kɛ ɔnzɔ ɔ nye angome a yɛbahwe yɛ nwo yɛavi nwo a, na emomu ninyɛne mɔɔ bie a yɛsuzu kɛ ɔ nye ɛnrɛlie nwo la noko.​—Kenga Mateyu 22:37, 38.

KƐ ƆKƐYƐ NA YƐ NYE ALIE LA

19. Nwane mɔ a ɛnrɛhola ɛnrɛnyia nɔhalɛ anyelielɛ ɛlɛ a?

19 Seetan ewiade ne ɛmaa alesama ɛnwu amaneɛ kɛyɛ ɛvolɛ 6,000, noko ɔlɛba awieleɛ. Bɛdabɛ mɔɔ bɛle angomedi, ezukoa nwo anyebolo na bɛkulo anyelielɛ ninyɛne la ɛbu zo wɔ ewiade ye anu. Mɔɔ bɛbanyia nee bɛ nganeɛdelɛ nwo ala a bɛdwenle wɔ bɛ ɛbɛlabɔlɛ nu a. Menli ɛhye mɔ ɛnrɛhola ɛnrɛnyia nɔhalɛ anyelielɛ ɛlɛ. Emomu, ɔle kɛ mɔɔ edwɛndolɛnli ne hɛlɛle la: “Nyilalɛ ɛha sonla ne mɔɔ ye boavolɛ a le Gyekɔbo Nyamenle ne, na ye anyelazo wɔ [Gyihova] ye Nyamenle ne nu la.”​—Edw. 146:5.

20. Kɛzi Nyamenle anwo ɛlɔlɛ ɛmaa wɔnyia anyelielɛ ɛ?

20 Nyamenle anwo ɛlɔlɛ mɔɔ Gyihova menli lɛ la ɛlɛyɛ kpole, na yɛ nwo ɛlɛso ɛvolɛ biala. Ɛhye di daselɛ kɛ, Nyamenle Belemgbunlililɛ ne ɛlɛdi tumi, na ɔnrɛhyɛ ɔbava nyilalɛ dɔɔnwo yeara azɛlɛ ye azo. Nyamenle ɛhulolɛdeɛyɛlɛ maa yɛnyia anyelielɛ dahuu, ɔluakɛ yɛze kɛ yɛlɛyɛ mɔɔ sɔ Anwuma Anwumanli ne anye la. Na menli mɔɔ kulo Gyihova la anye balie dahuu! Wɔ edwɛkɛ mɔɔ doa zo la anu, yɛbazuzu subane bie mɔ mɔɔ angomedi maa bɛda ye ali nee kɛzi subane ɛhye mɔ le ngakyile fi subane mɔɔ Gyihova azonvolɛ da ye ali la anwo.