Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐBƐLABƆLƐ NU EDWƐKƐ

Kilisiene Abusua Kpalɛ Mɔɔ Mevi Nu La Maanle Memkpazile

Kilisiene Abusua Kpalɛ Mɔɔ Mevi Nu La Maanle Memkpazile

WƆ NƆE ne, ɛnee yɛlua Azule Niger ne mɔɔ ye tɛtɛlɛ bayɛ mayɛlɛ ko (km 1.6) la azo. Ɛnee Nigeria Konle ne gyi nu, yemɔti ɛnee ɔle esiane kpole kɛ ɛbapɛ azule ne. Noko ɛnee ɔwɔ kɛ yɛfa yɛ ngoane yɛto esiane nu fane dɔɔnwo. Kɛ ɔyɛle mɔɔ mengɔle tɛnlabelɛ zɔhane anu ɛ? Bɛmaa yɛbɔ ɔ bo wɔ mekɛ mɔɔ bɛwole me la.

Bɛzɔnenle me papa John Mills wɔ 1913 wɔ New York City, ɛnee yenyia ɛvolɛ 25. Adiema Russell a maanle ɛzɔnenlɛ ɛdendɛlɛ ne a. Ɛhye anzi mekɛ ekyi, me Papa hɔle Trinidad, na ɛkɛ ne a ɔgyale ɔ ye Constance Farmer mɔɔ ɛnee le Baebolo Sukoavo mɔɔ bɔ mɔdenle la. Me Papa boale ɔ gɔnwo William R. Brown ɔmaanle ɔyele “Photo-Drama of Creation” vidio ne. Bɛyɛle ɛhye kɔkpula kɛ bɛmaanle Adiema Brown nee ɔ ye hɔzonlenle wɔ West Africa wɔ ɛvolɛ 1923. Me Papa nee me Mame mɔɔ ɛnee bɛlɛ anyelazo kɛ bɛbahɔ anwuma la doale zolɛ wɔ Trinidad.

YƐ AWOVOLƐ HULOLE YƐ

Me awovolɛ wole ngakula ngɔnla na bɛvale mɔɔ limoa la bɛdonle adiema Rutherford mɔɔ ɛnee li Watch Tower Bible and Tract Society ne anyunlu la. Mɔɔ bɛwole me wɔ December 30, 1922 la, bɛvale me bɛdonle Clayton J. Woodworth mɔɔ ɛnee yɛ The Golden Age (mɔ kɛkala bɛfɛlɛ ye Awake!) anwo gyima la. Yɛ awovolɛ maanle yɛhɔle sukulu yɛhɔdwule ɛleka bie, noko bɛvale sunsum nu bodane bɛziele yɛ nye zo. Ɛnee me mame kola nee yɛ suzu Ngɛlɛlera ne anwo maa yɛte ɔ bo kpalɛ na yɛfa yɛyɛ gyima. Ɛnee me Papa anye die nwo kɛ ɔbaha Baebolo nu edwɛkɛ wɔ adenle mɔɔ yɛ anyelielɛ la azo amaa yɛade edwɛkɛ ne abo kpalɛ.

Bɛ mɔdenlebɔlɛ ne zole ma. Yɛle mrenyia nnu, na yɛ nuhua nsa hɔle Geleade Sukulu ne bie. Yɛ mediema mraalɛ ne mɔ anu nsa yɛle adekpakyelɛ gyima ne ɛvolɛ dɔɔnwo wɔ Trinidad nee Tobago. Yɛ awovolɛ luale bɛ ngilehilelɛ nee bɛ neazo kɛnlɛma zo luale yɛ wɔ “[Gyihova] awuke nu.” Bɛ anwosesebɛmaanlɛ ne boale yɛ ɔmaanle yɛhɔle zo yɛdɛnlanle ɛkɛ na yɛkpazile “wɔ Nyamenle alienwo ɛkɛ.”​​—Edw. 92:13.

Ɛnee bɛyɛ daselɛlilɛ ɛhɔlɛ nwo ngyehyɛleɛ wɔ yɛ sua nu ɛkɛ. Adekpakyelɛma mɔɔ bayia ɛkɛ la hanle Adiema George Young, mɔɔ ɛnee le edwɛkpatɛlɛvolɛ wɔ Canada mɔɔ rakpɔlale bɛ wɔ Trinidad la anwo edwɛkɛ. Me awovolɛ vale anyelielɛ hanle  Brown abusua ne mɔɔ bɛ nee bɛ bɔle nu yɛle gyima na bɛwɔ West Africa la anwo edwɛkɛ. Ɛhye mɔ amuala hanle me maanle membɔle daselɛlilɛ bo wɔ mekɛ mɔɔ ɛnee menyia ɛvolɛ bulu la.

ALIMOA GYIMA NGAKYILE

Mekɛ zɔhane ɛnee yɛ magazine ne mɔ anu edwɛkɛ ne anloa yɛ se, ɛnee bɛka adalɛ ɛzonlenlɛ, gualilɛma mɔɔ le anyebolo yɛɛ maanyɛlɛma mɔɔ ɛnga nɔhalɛ la anwo edwɛkɛ wienyi. Ɛhye ati, wɔ 1936, ɛzonlenlɛ nu mgbanyima maanle Trinidad arane ne vale ɔ sa dole Watch Tower mbuluku biala azo. Yɛvale mbuluku ne mɔ yɛveale na yɛvale yɛlile gyima too bɛwiele. Yɛvale ngɛlata mɔɔ bɛhɛlɛ zo la yɛdole ɛlɔnwɔne yɛɛ yɛvale basekɛ yɛhyehyɛle ɛsalɛdolɛ ngɛlata. Yɛvale sound-car noko yɛhanle edwɛkɛ ne yɛvile sua Tunapuna azo yɛhɔle Trinidad azua mɔɔ wɔ moa la azo. Ɛnee ɔyɛ anyelielɛ kpalɛ! Sunsum nu ninyɛne zɛhae mɔɔ yɛyɛle la maanle menliele ɛzɔnenlɛ wɔ mekɛ mɔɔ menyianle ɛvolɛ 16 la.

A Tunapuna sound-car ekpunli ne

Yɛ Kilisiene abusua kpalɛ ne yɛɛ sunsum nu ninyɛne mɔɔ yɛyɛle la maanle me nye liele edwɛkpatɛlɛvolɛ gyima ne anwo. Ɛnee zɔhane ɛhulolɛ ne tɛbɔ ɛkɛ wɔ mekɛ mɔɔ mengɔmbokale Adiema Edmund W. Cummings anwo wɔ Aruba wɔ 1944 la. Ɔyɛle yɛ anyelielɛ kɛ yɛboale menli bulu yɛmaanle bɛrale Ngakyelɛlilɛ ne wɔ 1945 la. Ye ɛvolɛ bieko, bɛdele asafo mɔɔ limoa la wɔ bɔra ne azo.

Oris maanle me nye liele wɔ ndenle ngakyile zo

Yemɔ anzi mekɛ ekyi, menlile me gɔnwo gyimayɛvo Oris William daselɛ wɔ mekɛ mɔɔ ɛnee menle daselɛlilɛ nu la. Oris nee me zule kpolera na ɔbɔle mɔdenle kɛ ɔkilehile diedi mɔɔ ɔlɛ la anu. Noko ɔlua Baebolo ɛzukoalɛ zo, ɔnwunle mɔɔ Nyamenle Edwɛkɛ ne kilehile amgba la na ɔliele ɛzɔnenlɛ wɔ January 5, 1947. Nzinlii, yɛhulole yɛ nwo na yɛgyale. Ɔbɔle adekpakyelɛ gyima ne abo wɔ November 1950. Oris maanle me nye liele wɔ ndenle ngakyile zo.

ƐZONLENLƐ GYIMA MƆƆ YƐ ANYELIELƐ WƆ NIGERIA

Bɛmaanle yɛhɔle Geleade Sukulu wɔ 1955. Yɛgyakyile yɛ gyima na yɛdɔnenle yɛ sua yɛɛ ninyɛne gyɛne na yɛvile Aruba. Yɛwiele Geleade Sukulu mɔɔ tɔ zo 27 la wɔ July 29, 1956, na bɛmaanle yɛhɔle Nigeria.

Yɛ nee Bɛtɛle abusua ne wɔ Lagos, Nigeria, 1957

Oris ka kɛ, saa meto me nye me nzi a, menwu kɛ “Gyihova sunsum ne kola boa awie maa ɔdi ngyegyelɛ mɔɔ wɔ edwɛkpatɛlɛvolɛ gyima ne anu la azo. Ɛnee me nye ɛnlie edwɛkpatɛlɛvolɛ gyima ne anwo kɛ me hu la. Ɛnee mekulo kɛ metɛnla sua nu mewo ngakula. Mengakyile me adwenle wɔ mekɛ mɔɔ menwunle kɛ ɔhyia kɛ yɛka edwɛkɛ ne ndɛndɛ la. Yɛkawie Geleade la, ɛnee meziezie me nwo bɔkɔɔ kɛ mebaha edwɛkɛ ne kɛ edwɛkpatɛlɛvolɛ. Mɔɔ yɛvole Queen Mary meli ne la, yɛdele kɛ Worth Thornton mɔɔ yɛ gyima wɔ Adiema Knorr ɔfese la ɛlɛka ahile yɛ kɛ ‘Bon voyage!’ Ɔhanle ɔhilele yɛ kɛ yɛbazonle wɔ Bɛtɛle. Menganle kɛ ‘O, kyɛkyɛ!’ Noko menyɛle nzenzaleɛ ndɛndɛ na me nye raliele Bɛtɛle nee gyima ngakyile mɔɔ menyɛle la anwo kpalɛ. Mɔɔ ɛnee me nye die nwo kpalɛ la a le ɛleka mɔɔ bɛdie nyɛvolɛ la. Me nye die menli nwo, na gyima ɛhye maanle menyiale mediema mɔɔ bɛle Nigeriama la. Bɛ nuhua dɔɔnwo baradwu ɛkɛ ne la ɛnee bɛ nwo le munlutu, bɛvɛ na ɛhɔne nee nzuhɔne ɛlɛku bɛ. Ɛnee me nye die kɛ mebali bɛ ngyianlɛ nwo gyima. Ɛnee ɔ muala le ɛzonlenlɛ nwuanzanwuanza maa Gyihova, na yemɔ maanle menyianle ahunlundwolɛ nee anyelielɛ.” Ɛhɛe, gyimalilɛ biala maanle yɛkpazile.

Wɔ abusua ayia bie mɔɔ yɛyɛle ye wɔ Trinidad wɔ 1961 la abo, Adiema Brown hanle anwubielɛ ngɛnlɛma mɔɔ yenyia ye wɔ Africa la anwo edwɛkɛ. Akee menganle anyuhɔlɛ mɔɔ yɛnyia wɔ Nigeria la. Adiema Brown vale ɔ sa dole me kɔme na ɔhanle ɔhilele me Papa kɛ: “Johnny, wɔangɔ Africa ɛlɛ, noko Woodworth ɛhɔ ɛkɛ!” Me Papa buale kɛ: “Worth, Toa zo! Mmagyakyi!” Mediema ɛhye mɔ mɔɔ bɛnyi sunsum nu la anwosesebɛmaanlɛ maanle ɛhulolɛ mɔɔ melɛ kɛ meyɛ ɛzonlenlɛ gyima ne kpalɛ la anu mianle.

William “Bible” Brown nee ɔ ye Antonia maanle yɛ anwosesebɛ kpalɛ

Wɔ 1962, menyianle nwolɛ adenle bieko mengɔle Geleade sukulu mɔɔ tɔ zo 37 mɔɔ bɛvale siane bulu bɛyɛle la bie. Adiema Wilfred Gooch, mɔɔ ɛnee le Bɛtɛle neavolɛ wɔ Nigeria la hɔle sukulu ne mɔɔ tɔ zo 38 la bie, na bɛmaanle ɔhɔzonlenle wɔ England. Medame a memaanyɛle  Nigeria Bɛtɛle ne azo neavolɛ a. Kɛ mɔɔ Adiema Brown yɛle la, mendule adenle dɔɔnwo, na ɛhye maanle menwunle mediema mɔɔ le Nigeriama la na mengulole bɛ. Ɛnee bɛnlɛ nwonane afoa nu ninyɛne dɔɔnwo kɛ mɔɔ menli mɔɔ wɔ maanle mɔɔ bɛdi boɛ azo lɛ la, noko kɛzi bɛ kunlu dwo bɛ nwo na bɛ nye die la maa ɔda ali wienyi kɛ ɛbɛlabɔlɛ mɔɔ gyi bodane zo la ɛngyi ezukoa anzɛɛ anwonyia zo. Ɔnva nwo tɛnlabelɛ mɔɔ bɛwɔ nu la, ɔyɛ azibɛnwo kɛ bɛ nwo te, na ɛleka mɔɔ bɛyia bɛsonle la le mɔɔ fɛta. Saa bɛlɛba nyianu a, bɛ nuhua dɔɔnwo fo ndaboa kale bie mɔɔ bɛfɛlɛ ye bolekajas * la. Fane dɔɔnwo ne ala, bɛkɛlɛ edwɛkɛ bie mɔ mɔɔ yɛ anyelielɛ la bɛgua ahale ɛhye mɔ anwo. Nuhua ko a le: “Nzule kpɔnwo kpɔnwo a yi buakɛ a.”

Nea kɛzi zɔhane edwɛkɛ ne le nɔhalɛ a! Awie ko biala mɔdenlebɔlɛ nwo hyia; yɛ ɛdeɛ boka nwo. Ɔkadwu 1974 la, Nigeria rayɛle maanle mɔɔ limoa mɔɔ saa ɛye United States efi ɛkɛ a, ɔnyianle nolobɔlɛma 100,000 a. Gyima ne nyianle anyuhɔlɛ!

Mekɛ mɔɔ yɛnyianle anyuhɔlɛ ɛhye la, ɛnee Nigeria Konle ne gyi nu ɔvi 1967 kɔdwu 1970. Wɔ siane dɔɔnwo anu, ɛnee yɛ mediema mɔɔ wɔ Azule Niger ne ɛleka mɔɔ bɛfɛlɛ ye Biafran la nee Bɛtɛle ɛngola ɛnli ngitanwo. Ɛnee ɔle yɛ ɛzonlelilɛ kɛ yɛbamaa bɛ sunsum nu aleɛ nee adehilelɛ. Kɛ mɔɔ meha ye wɔ mɔlebɛbo ne la, ɔlua asɔneyɛlɛ nee Gyihova anu diedi mɔɔ yɛnyianle la ati, yɛpɛle azule ne fane dɔɔnwo.

Mekakye esiane mɔɔ yɛyiale mekɛ mɔɔ yɛpɛ Azule Niger ne la, anrɛɛ sogyama, anwodolɛ nee ninyɛne gyɛne maa yɛ ngoane avi yɛ sa. Ɛnee ɔyɛ se kɛ ɛbabɔ arane sogyama wɔadɛla, noko ɛnee ɔle esiane kpole kɛ ɛbava ɛleka mɔɔ atuadelɛma ne wɔ la. Mekɛ bie, menvale ɛlɛne mempɛle Azule Niger ne nɔɔzo menvile Asaba mengɔle Onitsha yɛɛ Enugu mengɔmaanle mgbanyima mɔɔ wɔ ɛkɛ la anwosesebɛ. Mendule adenle bieko mengɔmaanle mgbanyima mɔɔ wɔ Aba la anwosesebɛ. Ɛnee bɛli mɛla kɛ awie biala mmasɔ kɛnlaneɛ wɔ ɛkɛ amaa agbɔvolɛ annwu bɛ. Wɔ Port Harcourt, yɛyɛle asɔne yɛkpɔnenle yɛ ayia ne ndɛndɛ wɔ mekɛ mɔɔ arane sogyama hɔle ɛleka mɔɔ dwazotiama ne wɔ wɔ sua ne kandiba la.

Ayia zɔhane mɔ boale mediema ne mɔ ɔmaanle bɛnwunle kɛ Gyihova dwenle bɛ nwo na ɔmaanle bɛnyianle folɛdulɛ amaa bɛangyinla afoa biala na bɛayɛ ko. Mediema mɔɔ wɔ Nigeria la lile nɔhalɛ wɔ konle ne anu. Ɛlɔlɛ mɔɔ bɛnyianle bɛmaanle bɛ nwo la yɛle kpole dɛlale menli ekpunli gyɛne mɔɔ bɛkpɔ bɛ la, bɛyɛle ko kɛ Kilisienema. Ɔle nwolɛ adenle kpole kɛ yɛgyinlanle bɛ nzi wɔ sɔnea mekɛ zɔhane anu la.

Wɔ 1969, Adiema Milton G. Henschel yɛle “Peace on Earth” Maanle Maanle Avinli Nyianu ne mɔɔ bɛyɛle ye wɔ Yankee Stadium, New York la ebianutɛnlavolɛ, na kɛ mɔɔ ɛnee mele ye boavolɛ la ati, menzukoale ninyɛne dɔɔnwo menvile ye ɛkɛ. Ɛhye boale kpalɛ, ɔluakɛ wɔ 1970 yɛyɛle “Men of Goodwill” Maanle Maanle Avinli Nyianu wɔ Lagos, Nigeria. Wɔ konle ne anzi mekɛ ekyi, ɔlua Gyihova moalɛ zo yɛholale yɛyɛle gyimalilɛ ɛhye. Aneɛ ngakyile 17 a bɔle nu a, na menli mɔɔ hɔle la dodo le 121,128. Ɛnee bie ɛtɛsile ɛlɛ. Adiema Knorr nee Henschel nee nyɛvolɛ gyɛne vale alopile vile United States nee England rale na bɛzɔnenle menli mɔɔ bɛ nwo zonle tɛla Pɛntekɔso kenle ne ɛdeɛ ne la​​—ɛdoavolɛma fofolɛ 3,775! Memboale memaanle bɛyɛle nyianu zɔhane anwo ngyehyɛleɛ yemɔti ɛnee menlɛ alagye fee wɔ mekɛ zɔhane. Nolobɔlɛma dodo ne maa yɛnwu kɛzi yɛnyianle anyuhɔlɛ ndɛndɛ la!

Menli kɛyɛ 121,128 rale “Men of Goodwill” Maanle Maanle Avinli Nyianu ne, aneɛ 17 a yiale a, na Ibo boka nwo

Wɔ ɛvolɛ mɔɔ bo 30 mɔɔ menlile ye wɔ Nigeria la, me nye liele kɛ ɔyɛ a bɛmaa mesonle kɛ neavolɛ adenduvo yɛɛ mekɔkpɔla Bɛtɛle ngakyile mɔɔ wɔ West Africa la. Edwɛkpatɛlɛvolɛma ne hilele mekɛ mɔɔ yɛnyianle yɛmaanle bɛ yɛɛ anwosesebɛmaanlɛ ne anwo anyezɔlɛ. Nea kɛzi ɛnee ɔyɛ anyelielɛ wɔ mekɛ mɔɔ yɛmaanle bɛnwunle kɛ yɛdwenle bɛ nwo la! Gyima ɛhye ɛmaa menwu kɛ awie mɔ anwo anyelielɛ mɔɔ yɛbahile la a le debie mɔɔ boa bɛ ɔmaa bɛnyia anyuhɔlɛ na koyɛlɛ tɛnla Gyihova ahyehyɛdeɛ ne anu a.

Gyihova ala a boale yɛ maanle yɛgyinlanle ngyegyelɛ mɔɔ konle nee anwodolɛ maanle yɛyiale la anloa a. Oris hanle kɛ: “Yɛnwunle Gyihova nyilalɛ ne dahuu.

 “Ebunlu hyele yɛ mu nwiɔ fane dɔɔnwo. Wɔ mekɛ ko anu, Worth anye zo bulule ye na bɛ nee ye hɔle asopiti wɔ Lagos. Bɛhanle bɛhilele me kɛ bie a ɔnrɛde kpɔkɛ, noko ɔdele kpɔkɛ. Mɔɔ ɔ nye rale zo la, ɔhanle Nyamenle Belemgbunlililɛ ne anwo edwɛkɛ ɔhilele nɛɛse ne mɔɔ ɛnee ɔlɛnea ye la. Nzinlii, me nee Worth hɔkpɔlale nɛɛse ne mɔɔ bɛfɛlɛ ye Egya Nwambiwe la, amaa anyelielɛ mɔɔ ɔlɛ wɔ Baebolo ne anwo la ayɛ kpole. Ɔliele nɔhalɛ ne, na nzinlii ɔrayɛle asafo nu kpanyinli wɔ Aba. Medame noko mengolale memboale menli dɔɔnwo mɔɔ Ngɛnlamoma tɛnyetɛnye boka nwo la maanle bɛrazonlenle Gyihova. Mɔɔ maanle yɛ nye liele kpole la a le Nigeriama mɔɔ yɛnwunle bɛ na yɛhulole bɛ yɛɛ bɛ amaamuo, bɛ subane nee bɛ aneɛ.”

Ɛzukoalɛdeɛ bieko ɛne: Amaa yɛakpazi wɔ maanle fofolɛ zo gyimalilɛ nu la, ɛnee ɔwɔ kɛ yɛsukoa kɛ yɛbahulo mediema ne mɔ ɔnva nwo kɛ asolo bɛ amaamuo la.

GYIMALILƐ FOFOLƐ

Mɔɔ yɛzonlenle wɔ Nigeria Bɛtɛle la anzi, bɛmaanle yɛzonlenle kɛ edwɛkpatɛlɛvolɛma wɔ 1987 wɔ St. Lucia bɔra ne azo. Yɛ nye liele, noko ɛnee ɔ nee ye ngyegyelɛ lua. Ɛnee ɔnle kɛ Africa mɔɔ nrenyia ko gya mraalɛ dɔɔnwo la, wɔ St. Lucia ɛke, nrenyia nee raalɛ bɔ nu tɛnla wɔ mekɛ mɔɔ bɛtɛgyale wɔ mɛla adenle zo la. Nyamenle Edwɛkɛ ne mɔɔ tumi wɔ nu la maanle yɛ Baebolo sukoavoma dɔɔnwo yɛle nzenzaleɛ mɔɔ fɛta la.

Ɛnee mekulo Oris kpalɛ wɔ ɛvolɛ 68 mɔɔ yɛvale yɛgyale la anu

Mekɛ mɔɔ kpanyinliyɛlɛ ɛlɛmaa yɛ anwosesebɛ aha aze la, Neazo Eku ne vile atiakunlukɛnlɛma nu maanle yɛhɔle ewiade amuala gyima ne ati wɔ Brooklyn, New York, U.S.A. wɔ 2005. Meda Gyihova ase dahuu kɛ ɔmaanle menyianle Oris la. Yɛ kpɔvolɛ ewule lile ɔ nwo zo tumi wɔ 2015, na ɔhanle me kpalɛ. Ɛnee ɔle yelɛ kpalɛ mɔɔ lɛ ɛlɔlɛ. Ɛnee mekulo ye kpalɛ wɔ ɛvolɛ 68 mɔɔ yɛvale yɛgyale la anu. Yɛnwunle kɛ amaa yɛ nye alie wɔ agyalɛ nee asafo ne anu la, ɔwɔ kɛ yɛbu tileyɛlɛ, yɛfa ɛtane yɛkyɛ bɔkɔɔ, yɛyɛ bɛlɛvo na yɛda sunsum ne ma ali.

Saa yɛ sa nu kpondɛ ado anzɛɛ yɛ rɛle kpondɛ abɔ a, yɛsɛlɛ Gyihova kɛ ɔboa yɛ amaa afɔle mɔɔ yɛlɛbɔ la anwo amba edwɛkɛ. Mekɛ mɔɔ yɛlɛkɔ zo yɛayɛ nzenzaleɛ la, yɛnwunle kɛ ninyɛne hɔle zo yɛle boɛ dahuu​​—kpalɛ ne la yɛ nyunlu!​—Aye. 60:17; 2 Kɔl. 13:11.

Gyihova yilale gyima mɔɔ me awovolɛ nee awie mɔ yɛle ye wɔ Trinidad nee Tobago la azo, na mgbondabulɛ kile kɛ kɛkala, menli 9,892 ɛraboka nɔhalɛ ɛzonlenlɛ nwo. Wɔ Aruba, menli dɔɔnwo ɛyɛ gyima ɛmaa asafo ne mɔɔ ɛnee mewɔ nu la ɛnyia anyuhɔlɛ. Kɛkala asafo 14 mɔɔ ɛlɛnyia anyuhɔlɛ la a wɔ bɔra ne azo a. Na nolobɔlɛma mɔɔ wɔ Nigeria la ɛdwu 381,398. Yɛɛ nolobɔlɛma 783 a ɛlɛboa Gyihova Belemgbunlililɛ ne wɔ St. Lucia bɔra ne azo a.

Kɛkala mewɔ me ɛvolɛ 90 anu. Edwɛndolɛ 92:14 ka menli mɔɔ bɛlua bɛ wɔ Gyihova sua nu la anwo edwɛkɛ kɛ: “Bɛyɛ mrelera bɔbɔ a, bɛso ma, dahuu bɛle duhuduhu yɛɛ nzule wɔ bɛ nu.” Me nye die mekɛ mɔɔ meva mezonle Gyihova la anwo. Kilisiene abusua kpalɛ mɔɔ mevi nu la ɛmaa mehola mezonle Gyihova kpalɛ. Gyihova ɛlua ye ɛlɔlɛ kpundii ne azo yemaa medɛnla ‘me Nyamenle ne alienwo ɛkɛ.’​​—Edw. 92:13.

^ ɛden. 18 Nea March 8, 1972, Awake! ne m. 24-26.