Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Asoo Ɛze?

Asoo Ɛze?

Ɛvoya Mɔɔ Limoa Nyianu Sua: Nvoninli ɛhye maa yɛnwu kɛzi ɛnee ɛvoya mɔɔ limoa nyianu sua mɔɔ wɔ Gamla wɔ Galeli Nyevile ne sɔlɔ aduduleɛ kɛyɛ mayɛlɛ nsia (km 10) de la. Ɔmaa yɛnwu kɛzi ɛnee nyianu sua de wɔ tete ne la.

Nienwu a nyianu sua ne abo vi a?

GILIKI edwɛkɛkpɔkɛ mɔɔ bɛhile ɔ bo “nyianu sua” la kile “ayia” anzɛɛ “ɛleka mɔɔ menli yia nu.” Duma ne fɛta ɔluakɛ ɛnee ɔle ɛleka mɔɔ Dwuuma yia nu sukoa na bɛsonle wɔ tete ne la. Wɔ aneɛ mɔɔ bɛvale bɛhɛlɛle Baebolo ne la anu, Hibulu Ngɛlɛlera ne andwe adwenle angɔ nyianu azua zo, noko ɔda ali wɔ Giliki Ngɛlɛlera ne anu kɛ ɔkadwu ɛvoya mɔɔ limoa Y.M. anu la, ɛnee bɛfa ɛleka ɛhye mɔ bɛdi gyima.

Mbɔlɔba dɔɔnwo die di kɛ nyianu sua ne bɔle ɔ bo wɔ mekɛ mɔɔ bɛ nee Dwuuma hɔle akɛlɛzonlenlɛ nu wɔ Babelɔn la. Encyclopaedia Judaica ne kilehile nu kɛ: “Kɛmɔ ɛnee Dwuuma mɔɔ bɛ nee bɛ hɔle akɛlɛzonlenlɛ nu la ɛnlɛ Ɛzonlenlɛ Sua na ɛnee bɛhyia anwosesebɛmaanlɛ wɔ bɛ amaneɛnwunlɛ mekɛ nu la ati, ɛnee ɔyɛ a ɔvi mekɛ mɔɔ kɔ mekɛ la bɛyia wɔ Ɛnwomenlelielɛ kenle na bɛkenga Ngɛlɛlera ne.” Mɔɔ bɛvile akɛlɛzonlenlɛ nu la, ɔda ali kɛ Dwuuma ne hɔle zo yiale nu yɛle asɔne na bɛgengale Ngɛlɛlera ne, na bɛzile nyianu azua wɔ ɛleka mɔɔ bɛzokoɛle la.

Ɔkadwu ɛvoya mɔɔ limoa Y.M. la, ɛnee nyianu azua nu a Dwuuma yia sonle na bɛyɛ ninyɛne gyɛne wɔ maanle mɔɔ ɛde ɛkponde Mɛdetɛlenia nehane mɔɔ kɔ Middle East yɛɛ Yizilayɛ a. Abɔlɔba Lee Levine mɔɔ wɔ The Hebrew University of Jerusalem la hanle kɛ: “Ɛnee bɛyia nyianu sua ne anu bɛsukoa debie, bɛdi aleɛ nwuanzanwuanza, bɛdi edwɛkɛ, bɛdielie ezukoa yɛɛ maanyɛlɛma nee menli gyɛne yia wɔ ɛkɛ.” Ɔtoa zo kɛ: “Ɛnee Nyamenle ɛzonlenlɛ a le debie titili mɔɔ bɛyɛ ye wɔ ɛkɛ a.” Ɔnyɛ azibɛnwo kɛ ɛnee Gyisɛse ta kɔ ayia mɔɔ bɛyɛ ye wɔ nyianu sua ne anu la bie la. (Maake 1:21; 6:2; Luku 4:16) Ɔhilehilele menli mɔɔ hɔle ɛkɛ la na ɔmaanle bɛ anwosesebɛ. Mɔɔ bɛdele Kilisiene asafo ne la anzi, ɛzoanvolɛ Pɔɔlo noko hilehilele menli fane dɔɔnwo wɔ nyianu azua nu. Menli mɔɔ anye die sunsum nu ninyɛne nwo la hɔle nyianu sua ne anu, yemɔti saa Pɔɔlo kɔ suakpole bie azo a, ɔdimoa ɔkɔ nyianu sua nu ɔkɔkilehile wɔ ɛkɛ.​​—Gyi. 17:1, 2; 18:4.