Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

Johannes Rauthe ɛlɛyɛ daselɛlilɛ gyima ne wɔ 1920 ne anu

 YƐ TETEDWƐKƐ

“Melɛboa Awie Mɔ Meava Meaye Gyihova Ayɛlɛ”

“Melɛboa Awie Mɔ Meava Meaye Gyihova Ayɛlɛ”

“KONLE mɔɔ bɛho ye kenlensa ye wɔ Europe la ɛmaa konle mɔɔ bɛhonle wɔ ewiade amuala . . . la azo ɛheda.” September 1, 1915, The Watch Tower ne hanle ewiade konle mɔɔ limoa mɔɔ bɛhonle ye wɔ maanle kɛyɛ 30 azo la anwo edwɛkɛ. Ɔlua konle ɛhye mɔ ati, The Watch Tower ne bɔle amaneɛ kɛ: “Belemgbunlililɛ gyima ne ɛha aze bɔkɔɔ, titili wɔ Germany nee France.”

Ɔlua konle konle mɔɔ ɛnee ɔlɛkɔ zo wɔ ewiade amuala la ati, ɛnee Baebolo Sukoavoma ne ɛnde ngyinlazo mɔɔ kile kɛ Kilisienema ɛnle afoa biala la abo kpalɛ. Noko ɛnee bɛzi pi kɛ bɛbɔ edwɛkpa ne nolo. Kɛmɔ ɛnee Wilhelm Hildebrandt kpondɛ kɛ ɔyɛ Belemgbunlililɛ gyima ne bie la ati, ɔliele The Bible Students Monthly ne bie wɔ French nu. Mekɛ mɔɔ ɔwɔ France la ɛnee ɔnle adekpakyelɛnli, emomu ɛnee ɔle German sogyanli. Nrenyia ɛhye mɔɔ ɛnee Francema bu ye kɛ ɔle bɛ kpɔvolɛ la ta wula sogya tɛladeɛ, ɔkɔgyinla adehane na ɔka anzodwolɛ edwɛkɛ ɔkile menli mɔɔ ɛlɛpɛ nu la.

Edwɛkɛ mɔɔ wɔ The Watch Tower ne anu la di daselɛ kɛ German Baebolo Sukoavoma dele nganeɛ kɛ bɛbahola bɛayɛ bɛ sogya gyima na eza bɛaha Belemgbunlililɛ edwɛkpa ne. Adiema Lemke mɔɔ ɛnee boka sogyama mɔɔ bɛyɛ gyima wɔ nyevile zo anwo la hanle kɛ, ɔ gɔnwo mɔ mɔɔ ɔ nee bɛ yɛ gyima la anu nnu hilele edwɛkɛ ne anwo anyelielɛ. Ɔhanle kɛ: “Wɔ meli ne anu bɔbɔ, ɛnee melɛboa awie mɔ meava meaye Gyihova ayɛlɛ.”

Georg Kayser kɔ konle la ɛnee ɔle sogyanli, noko ɔkara sua nu la ɛnee yeyɛ nɔhalɛ Kilisienenli. Kɛzi ɔrale ye ɛ? Ɔliele Baebolo Sukoavoma ne buluku ne bie, akee ɔvile ahonle nu ɔliele Belemgbunlililɛ ne anwo nɔhalɛ edwɛkɛ ne ɔdole nu, na ɔguale ye konle ninyɛne ne mɔ aze. Akee ɔyɛle gyima mɔɔ konle konle ɛnle nuhua la. Wɔ konle ne anzi, ɔyɛle adekpakyelɛ gyima ne ɛvolɛ dɔɔnwo.

Ɛnee Baebolo Sukoavoma ne ɛtɛwiele afoa biala mɔɔ bɛngyi la abo te kpalɛ, noko ɛnee bɛ subane nee bɛ nyɛleɛ le ngakyile kolaa fi menli mɔɔ bɛ nzuzulɛ nee bɛ nyɛleɛ kile kɛ bɛdie konle ne bɛto nu la anwo. Ɛnee maanyɛlɛma nee asɔne mgbanyima kanvo maanle sɛkɛlɛneɛ ngakyile, noko Baebolo Sukoavoma ne hanvole “Anzonudwolɛ Belemgbunli” ne. (Aye. 9:6) Ɛnee ɔyɛ se ɔmaa bie mɔ kɛ bɛnrɛgyinla afoa biala ɛdeɛ, noko ɛnee  bɛ muala bɛdie mɔɔ Baebolo Sukoavo Konrad Mörtter hanle la bɛto nu bɔkɔɔ. Ɔhanle kɛ: “Menwu ye wienyi wɔ Nyamenle Edwɛkɛ ne anu kɛ ɔnle kɛ Kilisienenli ku sonla.”​—Ade. 20:13. *

Hans Hölterhoff ɛlɛfa ehwili abɔ The Golden Age ne nolo

Kɛmɔ ɛnee Germany mɛla ne ɛnlie awie mɔɔ ye adwenle ne ati ɔnrɛhɔ sogya la ɛndo nu la ati, bɛhyele Baebolo Sukoavoma mɔɔ bo 20 mɔɔ hanle kɛ bɛnrɛhɔ sogya la bɛguale efiade. Bɛbule Gustav Kujath nee menli gyɛne kɛ bɛbɔ ɛlane, akee bɛvale Gustav Kujath bɛhɔle asopiti mɔɔ bɛnea adwenle nu ewule la anu na bɛnloanle ye ayile. Ɔluakɛ Hans Hölterhoff kpole gyima biala mɔɔ konle konle wɔ nu la ati, bɛhyele ye bɛdole efiade. Menli mɔɔ ɛnee bɛlɛsinza ye la vale tɛladeɛ bie mɔɔ kye bɛ kpalɛ la wulale ye na bɛkyekyele ye too bɛmaanle ɔ sa nee ɔ gyakɛ nyianle. Kɛmɔ yeangakyi ye adwenle la ati, sinzavolɛma ne yɛle ninyɛne maanle ɔdele nganeɛ kɛ bɛbahu ye. Noko Hans gyinlanle kpundii hɔle awieleɛ.

Mediema gyɛne mɔɔ bɛhyele bɛ la kpole kɛ bɛbava adu bɛali gyima yemɔti bɛmaanle bɛmaanle bɛ gyima fofolɛ mɔɔ konle konle ɛnle nu la. * Johannes Rauthe zile kpɔkɛ ɛhye bie, na bɛmaanle ɔhɔyɛle gyima wɔ keteke adenle zo. Bɛmaanle Konrad Mörtter noko yɛle gyima wɔ kpɔkɛdelɛ ɛleka bie yɛɛ Reinhold Weber yɛle nɛɛse. August Krafzig anye liele ɔluakɛ bɛammaa yeanyɛ gyima mɔɔ ɔmaa ɔkɔ konle a, ɛnee ɔsoɔzoa baage. Kɛmɔ Baebolo Sukoavoma ɛhye mɔ nwunle kɛ ɔwɔ kɛ bɛkulo menli na bɛdi nɔhalɛ la ati, bɛgyinlanle kpundii bɛzonlenle Gyihova.

Ɔluakɛ Baebolo Sukoavoma ne anva bɛ nwo anwula konle nu la ati, arane ne hilele bɛ nyane. Wɔ ɛvolɛ mɔɔ doɔdoa zo la anu, bɛvale Baebolo Sukoavoma mɔɔ wɔ Germany la bɛhɔle kɔɔto fane dɔɔnwo ɔlua bɛ edwɛkɛhanlɛ gyima ne ati. Amaa ɔfese ne mɔɔ wɔ Germany la aboa bɛ la, bɛdele legal department wɔ Magdeburg Bɛtɛle.

Ngyikyi ngyikyi Gyihova Alasevolɛ akee dele afoa biala mɔɔ bɛngyi la abo kpalɛ. Yemɔti mɔɔ ewiade konle mɔɔ tɔ zo nwiɔ bɔle ɔ bo la, bɛgyinlanle kpundii na bɛkpole kɛ bɛbahɔ sogya. Ɛhye ati Germany arane ne nwunle Baebolo Sukoavoma ne kɛ bɛle agbɔvolɛ na ɔhilele bɛ nyane. Noko “Yɛ Tetedwɛkɛ” mɔɔ bara amozii la baha nwolɛ edwɛkɛ.​—Yɛ tetedwɛkɛ mɔɔ vi Central Europe.

^ ɛden. 7 Nea Britain Baebolo Sukoavoma mɔɔ gyinlanle kpundii wɔ Ewiade Konle 1 anu la anwo edwɛkɛ wɔ “Yɛ Tetedwɛkɛ​—Bɛgyinlanle Kpundii Wɔ “Ngyegyelɛ” Mekɛ Nu” mɔɔ wɔ May 15, 2013 Ɛzinzalɛ Arane ne anu la.

^ ɛden. 9 Bɛhanle konle mɔɔ ɔnle kɛ Kilisienema kɔ la anwo edwɛkɛ wɔ Millennial Dawn (1904) Volume VI yɛɛ August 1906 Zion’s Watch Tower German ɛdeɛ ne noko anu. September 1915 The Watch Tower ne maanle yɛnleɛnleanle adwenle mɔɔ yɛlɛ wɔ konle nwo la anu, akee ɔhanle kɛ Baebolo Sukoavoma mmakɔ sogya. Noko edwɛkɛ ɛhye anvinde German ɛdeɛ ne anu.