Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

“Azɛlɛ Ye Amuala Ndɛnebuavolɛ” Ne Dahuu Yɛ Mɔɔ Tenrɛ La

“Azɛlɛ Ye Amuala Ndɛnebuavolɛ” Ne Dahuu Yɛ Mɔɔ Tenrɛ La

“Bodane ne, ye gyima di munli, ɔluakɛ ɔdi pɛlepɛle.”—MƐLA 32:4.

EDWƐNE: 112, 89

1. Kɛzi Ebileham hilele kɛ ɛnee ɔlɛ anwodozo kɛ Gyihova babua ndɛne fɔɔnwo ɛ? (Nea mɔlebɛbo nvoninli ne.)

“ASOO azɛlɛ ye amuala ndɛnebuavolɛ ɛnrɛli pɛlepɛle?” (Mɔl. 18:25) Kpuya zɔhane maa ɔda ali kɛ ɛnee Ebileham lɛ anwodozo kɛ Gyihova babua ndɛne fɔɔnwo wɔ Sodɔm nee Gomɔla edwɛkɛ ne anu. Ɛnee Ebileham lɛ anwodozo kɛ Gyihova ɛnrɛvo ɛlɛ, kɛ ‘ɔkɛhu tenlenema ɔkɛboka amumuyɛma’ anwo. Wɔ Ebileham afoa nu “ɛhye” ɛnrɛzi ɛlɛ. Ɛvolɛ kɛyɛ 400 anzi, Gyihova hanle ɔdaye mumua ne ɔ nwo edwɛkɛ kɛ: “Bodane ne, ye gyima di munli, ɔluakɛ ɔdi pɛlepɛle. Ɔle Nyamenle mɔɔ di nɔhalɛ, ɔnle amumuyɛ, . . . ye edwɛkɛ le fɔɔnwo.”Mɛla 31:19; 32:4.

2. Duzu ati a yɛbahola yɛaha kɛ Gyihova di pɛlepɛle dahuu a?

2 Duzu ati a Ebileham nyianle anwodozo kɛ Gyihova babua ndɛne fɔɔnwo dahuu a? Ɔluakɛ Gyihova ɛyɛ pɛlepɛlelilɛ nee tenleneyɛlɛ nwo neazo mɔɔ tɛla biala. Bɛta bɛfa Hibulu  edwɛkɛ agbɔkɛ mɔɔ bɛhile ɔ bo “tenleneyɛlɛ” nee “pɛlepɛlelilɛ” la bɛbɔ nu bɛka edwɛkɛ wɔ Hibulu Ngɛlɛlera ne anu. Nɔhalɛ nu, ngakyile biala ɛnle tenleneyɛlɛ nee pɛlepɛlelilɛ avinli. Ɔti kɛmɔ Gyihova ngyinlazo biala tenrɛ la ati, ɔbabua ndɛne fɔɔnwo dahuu. Bieko, kɛ mɔɔ Baebolo ne kile la, ɔkulo “tenleneyɛlɛ nee pɛlepɛlelilɛ.”Edw. 33:5.

3. Maa nzisi mɔɔ ɛlɛkɔ zo ɛnɛ la anwo neazo.

3 Saa ahonlekpalɛma nwu kɛ Gyihova bua ndɛne fɔɔnwo a, ɔkyekye bɛ rɛle ɔluakɛ nzisi ɛbu ewiade. Ɔyɛ a bɛyɛ menli bie mɔ amumuyɛ kpalɛ. Kɛ neazo la, menli bie mɔ gua efiade mɔɔ bɛanli bɛ edwɛkɛ kpalɛ a. Bɛguale menli bie mɔ efiade mekɛ tendenle wɔ ɛtane mɔɔ bɛanyɛ la anwo mɔɔ DNA nu mɔɔ bɛneɛnlea amaa bɛanwu nɔhalɛ mɔɔ wɔ edwɛkɛ bie anu la a maanle bɛyele bɛ a. Adenle ɛtane ɛhye mɔɔ bɛdua zo bɛto menli efiade la kola maa bɛ rɛle bɔ anzɛɛ bɛfa ɛya ɛdeɛ, noko nzisi gyɛne mɔɔ ɔbahola yeayɛ se kpalɛ kɛ Kilisienema bagyinla ɔ nloa la wɔ ɛkɛ.

WƆ ASAFO NE ANU

4. Kɛzi bɛbahola bɛazɔ Kilisienenli bie diedi bɛanlea ɛ?

4 Kilisienema ze kɛ awie mɔɔ ɔnle Kilisiene asafo ne anu la bahola asisi bɛ. Noko, saa yɛnwu debie mɔɔ zɔho nzisi la wɔ asafo ne anu anzɛɛ yɛte nganeɛ kɛ bɛlɛsisi yɛ a, ɔbahola yeazɔ yɛ diedi yeanlea. Saa ɛte nganeɛ kɛ asafo ne anzɛɛ ɛ diema Kilisienenli bie nee wɔ anli ye boɛ a, duzu a ɛbayɛ a? Asoo ɛbamaa ɛhye ado wɔ aze?

5. Saa Kilisienenli nwu nzisi nyɛleɛ anzɛɛ bɛsisi ye wɔ asafo ne anu a, duzu ati a ɔnle kɛ ɔmaa ɔsi ɔ nwo a?

5 Kɛmɔ yɛ muala yɛnli munli na yɛyɛ ɛtane la ati, yɛze kɛ awie bahola asisi yɛ anzɛɛ yɛbahola yɛasisi awie wɔ asafo ne anu. (1 Dwɔn 1:8) Nzisi zɛhae ɛnda ɛnzi ɛdeɛ, noko saa bie si a ɔnzi nɔhalɛ Kilisienema anwo anzɛɛ ɔndo bɛ aze. Ndelebɛbo kpalɛ bie ati, Gyihova ɛlua ye Edwɛkɛ ne azo ɛdu yɛ folɛ amaa yɛagyinla yɛ munlililɛ nu, saa bɔbɔ yɛ mediema diedima nee yɛ anli ye boɛ a.Edw. 55:12-14.

6, 7. Kɛzi bɛsisile adiema ko wɔ asafo ne anu ɛ, na subane boni mɔ a maanle ɔlile nwolɛ gyima wɔ adenle kpalɛ zo a?

6 Fa mɔɔ dole Willi Diehl la kɛ neazo. Ɔvi 1931, Adiema Diehl vale nɔhalɛlilɛ zonlenle wɔ Bɛtɛle wɔ Bern, Switzerland. Wɔ 1946, ɔhɔle Geleade Sukulu ne mɔɔ tɔ zo mɔtwɛ mɔɔ bɛyɛle ye wɔ New York, U.S.A. la bie. Mɔɔ ɔwiele la, bɛmaanle ɔhɔyɛle maangyebakyi zo neavolɛ wɔ Switzerland. Wɔ ye ɛbɛlabɔlɛ nu edwɛkɛ ne anu, Adiema Diehl hanle kɛ: “Wɔ May 1949, membɔle Bern Bɛtɛle ne amaneɛ kɛ mekpondɛ kɛ megya.” Duzu a Bern Bɛtɛle ne hanle a? “Ɛnrɛnyia nwolɛ adenle biala kɛ dahuu adekpakyelɛ gyima ne ala.” Adiema Diehl doale zo kɛ: “Bɛammaa me adenle kɛ memaa ɛdendɛlɛ . . . Bɛ nuhua dɔɔnwo ambiza yɛ ahye bieko, bɛbule yɛ kɛ asɛɛ bɛdu yɛ la.”

7 Duzu a Adiema Diehl yɛle a? Ɔhanle kɛ: “Ɛnee yɛze kɛ Baebolo ne ɛndua agyalɛ, yemɔti yɛyɛle asɔne dahuu na yɛvale yɛ nwo yɛdole Gyihova anwo zo.” Nzinlii, bɛlile agyalɛ nwo adwenle mɔɔ ɛndenrɛ mɔɔ ɔlua zo bɛ nee Adiema Diehl anli ye boɛ la  anwo gyima, na ɔ sa hanle nwolɛ adenle mɔɔ ɛnee ɔlɛ la bieko. Ɔnyianle nɔhalɛ mɔɔ ɔlile ɔmaanle Gyihova la anwo ahatualɛ. * Ɔwɔ kɛ yɛbiza yɛ nwo kɛ: ‘Saa tɛnlabelɛ ɛhye bie to me a, mebala subane zɛhae bie ali ɔ? Asoo mebanyia abotane meahendɛ Gyihova, anzɛɛ mebayɛ mɔɔ medame mekulo la wɔ edwɛkɛ ne anwo?Mrɛ. 11:2; kenga Maeka 7:7.

8. Kɛmɔti a ɛbahola wɔanyia adwenle kɛ bɛ nee wɔ anzɛɛ awie bie anli ye boɛ wɔ mekɛ mɔɔ ɔnle zɔ la ɛ?

8 Noko ɛbahola wɔanyia adwenle kɛ bɛ nee wɔ anzɛɛ awie bie mɔɔ wɔ asafo ne anu la anli ye boɛ wɔ mekɛ mɔɔ ɔnle zɔ la. Yɛbahola yɛanyia adwenle zɔhane ɔluakɛ yɛnli munli anzɛɛ bie a yɛnze edwɛkɛ ne amuala la ati. Ye biala anu, saa adwenle mɔɔ yɛlɛ la tenrɛ anzɛɛ ɔndenrɛ bɔbɔ a, yɛsɛlɛ Gyihova, yɛfa yɛ nwo yɛto ɔ nwo zo, na yɛdi nɔhalɛ dahuu a, ‘yɛnrɛva Gyihova anwo ɛya.’Kenga Mrɛlɛbulɛ 19:3.

9. Neazo boni mɔ a yɛbazuzu nwo wɔ edwɛkɛ ɛhye nee mɔɔ doa zo la anu a?

9 Bɛmaa yɛzuzu kɛzi bɛsisile Gyihova menli wɔ Baebolo mekɛ nu la anwo neazo nsa anwo. Wɔ edwɛkɛ ɛhye anu, yɛbazuzu kɛzi Ebileham angabɛnzo Dwosefi amediema ne mɔ sisile ye la anwo. Wɔ edwɛkɛ mɔɔ doa zo la anu, yɛbazuzu kɛzi Gyihova nee Yizilayɛ Belemgbunli Ehabe lile nee edwɛkɛ mɔɔ dole ɛzoanvolɛ Pita wɔ Selea Anteɔko la anwo. Saa yɛlɛsuzu neazo ɛhye mɔ anwo a, kpondɛ ɛzukoalɛdeɛ mɔɔ bamaa ɛ nee Nyamenle bɛ agɔnwolɛvalɛ ne anu amia la, titili saa ɛte nganeɛ kɛ bɛ nee wɔ anli ye boɛ a.

BƐSISILE DWOSEFI

10, 11. (a) Kɛzi bɛsisile Dwosefi ɛ? (b) Nwolɛ adenle boni a bukele maanle Dwosefi wɔ efiade ne a?

10 Awie mɔ sisile Gyihova nɔhalɛ sonvolɛ Dwosefi na mɔɔ yɛ nyane kpalɛ la vi ɔ mediema ne mɔ. Mɔɔ ɔka ekyii Dwosefi nyia ɛvolɛ 20 la, ɔ mediema ne mɔ vale ye ziele na bɛdɔnenle ye kɛ akɛlɛ la. Bɛhyele ye mialera nu bɛ nee ye hɔle Yigyibiti. (Mɔl. 37:23-28; 42:21) Mekɛ mɔɔ ɔwɔ maanle zɔhane anu la, nzinlii bɛdole ye ɛzonle kɛ anrɛɛ ɔto awie bɔna yemɔti bɛdole ye efiade mɔɔ bɛanli ye edwɛkɛ. (Mɔl. 39:17-20) Ye akɛlɛzonlenlɛ nee ye efiadelalɛ ne lile ɛvolɛ kɛyɛ 13. Saa yɛ diema diedinli bie nee yɛ anli ye boɛ a, duzu a yɛbahola yɛazukoa yɛavi Dwosefi edwɛkɛ ne anu a?

11 Dwosefi nyianle adenle hanle ye edwɛkɛ hilele ɔ gɔnwo pilizanli bie. Ɛnee zɔhane pilizanli ne le belemgbunli ne nzasuvolɛ kpanyinli. Mekɛ mɔɔ Dwosefi nee nzasuvolɛ ne la efiade ne la, nzasuvolɛ ne hanle ɛlalɛ na Dwosefi hilele ɔ bo. Dwosefi hanle kɛ bɛbava nzasuvolɛ ne bazie ye gyinlabelɛ dɛba ne wɔ Falo belemgbunli sua nu ɛkɛ. Mɔɔ Dwosefi hilele ɛlalɛ ne abo wiele la, ɔvale nwolɛ adenle ne ɔhanle ye tɛnlabelɛ ne anwo edwɛkɛ. Yɛbahola yɛazukoa debie mɔɔ anwo hyia la yɛavi mɔɔ Dwosefi hanle nee mɔɔ yeanga la anu.Mɔl. 40:5-13.

12, 13. (a) Kɛzi Dwosefi edwɛkɛ ne mɔɔ ɔhanle ɔhilele nzasuvolɛ ne la ɛngile kɛ tɛnlabelɛ mɔɔ ɔhɔle nu la angyegye ye anzɛɛ yeanyɛ nwolɛ ɛhwee ɛ? (b) Edwɛkɛ boni a ɔda ali kɛ Dwosefi anga angile nzasuvolɛ ne a?

12 Kenga Mɔlebɛbo 40:14, 15. Yɛ ye nzonlɛ kɛ Dwosefi hanle kɛ “bɛwuale” ye. Ɔda ali kɛ bɛsisile ye. Eza Dwosefi  hanle kɛ yeanyɛ ɛtane mɔɔ ɔdaye ti ɔwɔ kɛ bɛto ye efiade a. Zɔhane ati, ɔzele nzasuvolɛ ne kɛ ɔha ɔ nwo edwɛkɛ ɔhile Falo. Duzu ati ɔ? Ɔhanle kɛ: “Maa ɔye me ɔvi efiade ɛke.”

13 Asoo Dwosefi edwɛkɛ ne kile kɛ tɛnlabelɛ mɔɔ ɔhɔle nu la angyegye ye anzɛɛ yeanyɛ nwolɛ ɛhwee ɔ? Kyɛkyɛ. Ɛnee ɔze ye wienyi kɛ bɛsisi ye fane dɔɔnwo. Ɔhilehilele edwɛkɛ ne anu ɔhilele nzasuvolɛ ne mɔɔ ɛnee ɔbahola yeaboa ye la. Noko yɛ ye nzonlɛ kɛ, debie biala ɛnle Ngɛlɛlera ne anu mɔɔ kile kɛ Dwosefi hanle hilele awie, Falo bɔbɔ kɛ ɔ mediema ne mɔ a wuale ye a. Nɔhalɛ nu, mɔɔ ɔ mediema ne mɔ rale Yigyibiti na bɛ nee Dwosefi ɛlɛdi ngamɔnu la, Falo liele bɛ na ɔhanle kɛ “debie kpalɛ biala mɔɔ wɔ Yigyibiti la le bɛ ɛdeɛ.”Mɔl. 45:16-20.

Edwɛkɛ ɛtane kola maa ngyegyelɛ bie yɛ kpole (Nea ɛdendɛkpunli 14)

14. Duzu a ɛnrɛmaa yɛnrɛdendɛ ɛtane a, saa bɔbɔ bɛsisi yɛ wɔ asafo ne anu a?

14 Saa Kilisienenli bie te nganeɛ kɛ bɛsisi ye a, ɔwɔ kɛ ɔnea boɛ na yeanzɛkye awie duma. Nɔhalɛ nu, ɔwɔ kɛ yɛmaa mgbanyima ne mɔ boa yɛ na saa asafo ne anu sonla bie yɛ ɛtane kpole a yɛbɔ bɛ amaneɛ. (Sɛl. 5:1) Noko, wɔ ɛtane mɔɔ anyebolo ɛnle nu la dɔɔnwo anu, yɛbahola yɛaziezie yɛ avinli mɔɔ ɔngyia kɛ yɛfa awie yɛboka yɛ nwo anzɛɛ yɛmaa mgbanyima ne mɔ ba nu a. (Kenga Mateyu 5:23, 24; 18:15.) Bɛmaa yɛva Baebolo ngyinlazo yɛli edwɛkɛ zɛhae mɔ anwo gyima. Wɔ edwɛkɛ bie mɔ anu, yɛbanwu kɛ amuanrɛɛ bɛtɛsisile yɛ. Nea kɛzi yɛ nye balie kɛ yɛanzɛkye yɛ diema Kilisienenli bie duma yeammaa edwɛkɛ ne anyɛ kpole a! Kakye kɛ, saa yɛ edwɛkɛ yɛ fɛ anzɛɛ ɔnyɛ fɛ a, edwɛkɛ mɔɔ yɛ nyane la ɛngola ɛnziezie tɛnlabelɛ biala. Saa yɛdi nɔhalɛ yɛmaa Gyihova nee yɛ mediema a, yɛnrɛyɛ nvonleɛ zɛhae. Mɔɔ edwɛndolɛnli ne ka “sonla ne mɔɔ  anwo ɛnlɛ ngehanleɛ” anwo edwɛkɛ la, ɔhanle kɛ ‘ɔmbɔ awie mɔ anwo nzekue, ɔnyɛ ɔ gɔnwo mɔ ɛtane, yɛɛ ɔnzɛkye ɔ gɔnwo duma.’Edw. 15:2, 3; Gye. 3:5.

KAKYE AGƆNWOLƐVALƐ MƆƆ TƐLA BIALA MƆƆ ƐLƐ LA

15. Kɛzi agɔnwolɛvalɛ mɔɔ Dwosefi nee Gyihova lɛ la maanle ɔnyianle nyilalɛ ɛ?

15 Yɛnwu ɛzukoalɛdeɛ mɔɔ anwo hyia la wɔ agɔnwolɛvalɛ mɔɔ ɛnee Dwosefi nee Gyihova lɛ la anu. Wɔ ye ɛvolɛ 13 amaneɛnwunlɛ ne kɔsɔɔti anu, Dwosefi hilele kɛ ɔze adwenle mɔɔ Gyihova lɛ ye wɔ ninyɛne nwo la. (Mɔl. 45:5-8) Yeanva ye ngyegyelɛ ne anwo ɛzonle yeando Gyihova anwo zo. Ɔ rɛle anvi amaneɛnwunlɛ ne ɛdeɛ, noko yeanva ɛya. Mɔɔ hyia kpalɛ la, yeammaa awie mɔ sinlidɔlɛ anzɛɛ bɛ nyɛleɛ ɛtane andwe ye anvi Gyihova anwo. Dwosefi nɔhalɛlilɛ ne maanle ɔnwunle kɛzi Gyihova lile nzisi ne anwo gyima na ɔyilale ye nee ye abusua ne la.

16. Saa bɛsisi yɛ wɔ asafo ne anu a, duzu ati a ɔwɔ kɛ yɛbikye Gyihova kpalɛ a?

16 Yɛdayɛ noko, ɔwɔ kɛ yɛmaa yɛ nye sɔ agɔnwolɛvalɛ mɔɔ yɛ nee Gyihova lɛ la na yɛbɔ nwolɛ bane. Ɔnle kɛ yɛmaa yɛ mediema sinlidɔlɛ maa yɛtwe yɛ nwo yɛfi Nyamenle ne mɔɔ yɛkulo ye na yɛsonle ye la anwo. (Wlo. 8:38, 39) Emomu, saa yɛ mediema azonvolɛ sisi yɛ a, bɛmaa yɛzukoa Dwosefi yɛbikye Gyihova kpalɛ na yɛbɔ mɔdenle kɛ yɛbanwu adwenle mɔɔ Gyihova lɛ ye wɔ ninyɛne nwo la. Saa yɛgyinla Ngɛlɛlera ne azo yɛyɛ mɔɔ yɛbahola la amuala kɛ yɛfa yɛaziezie tɛnlabelɛ ne a, ɔwɔ kɛ yɛgyakyi edwɛkɛ ne yɛmaa Gyihova na yɛnyia anwodozo kɛ ɔbali nwolɛ gyima wɔ ye mekɛ nu nee ye adenle zo.

DIE “AZƐLƐ YE AMUALA NDƐNEBUAVOLƐ” NE DI

17. Kɛ ɔkɛyɛ na yɛahile kɛ yɛlɛ “azɛlɛ ye amuala ndɛnebuavolɛ” ne anu anwodozo ɛ?

17 Mekɛ tendenle ala mɔɔ yɛde ewiade ɛhye anu la, yɛze kɛ bɛbasisi yɛ. Ɔdwu mekɛ ne bie a, bɛbasisi wɔ anzɛɛ awie mɔɔ ɛze ye la, yɛɛ wɔ adwenle noko bahola ayɛ wɔ kɛ bɛsisi awie bie wɔ asafo ne anu. Mmamaa ɛhye maa ɛtu koti anzɛɛ to wɔ aze. (Edw. 119:165) Emomu, kɛmɔ yɛle Nyamenle nɔhalɛ azonvolɛ la ati, yɛdua nɔhalɛlilɛ nee asɔneyɛlɛ zo yɛfa yɛ nwo yɛto ɔ nwo zo. Eza yɛbɛlɛ yɛ nwo aze yɛdie yɛto nu kɛ bie a yɛnze edwɛkɛ ne amuala. Yɛze ye wienyi kɛ kɛmɔ yɛnli munli la ati, bie a yɛbanyia adwenle kɛ bɛsisi awie. Kɛ mɔɔ yɛnwunle ye wɔ Dwosefi neazo ne anu la, yɛngulo kɛ yɛka edwɛkɛ ɛtane, ɔluakɛ edwɛkɛ ɛtane sɛkye tɛnlabelɛ bie bɔkɔɔ. Mɔɔ li awieleɛ la, kɛ anrɛɛ yɛbayɛ ninyɛne bie mɔ la, bɛmaa yɛbɔ kpɔkɛ kɛ yɛbali nɔhalɛ na yɛhendɛ Gyihova yɛmaa ɔli ninyɛne nwo gyima. Nyɛleɛ zɛhae bamaa Gyihova alie yɛ ado nu na yeayila yɛ kɛ mɔɔ ɔyɛle ɔmaanle Dwosefi la. Nɔhalɛ nu, yɛbahola yɛanyia anwodozo kɛ, “azɛlɛ ye amuala ndɛnebuavolɛ” ne yɛ mɔɔ tenrɛ la dahuu “ɔluakɛ ɔdi pɛlepɛle.”Mɔl. 18:25; Mɛla 32:4.

18. Duzu a yɛbazuzu nwo wɔ edwɛkɛ mɔɔ doa zo la anu a?

18 Wɔ edwɛkɛ mɔɔ doa zo la anu, yɛbazuzu neazo nwiɔ bieko mɔɔ bamaa yɛanwu kɛzi bɛsisile Gyihova menli wɔ Baebolo mekɛ nu la anwo. Edwɛkɛ ɛhye mɔ mɔɔ yɛbazuzu nwo la bamaa yɛanwu kɛzi mɛlɛbɛnwoaze nee ɛhulolɛ mɔɔ yɛlɛ kɛ yɛbava ɛtane yɛahyɛ la fale kɛzi Gyihova bu pɛlepɛlelilɛ nwo la.

^ ɛden. 7 Nea Willi Diehl ɛbɛlabɔlɛ nu edwɛkɛ, “Jehovah Is My God, in Whom I Will Trust,” mɔɔ wɔ November 1, 1991, Ɛzinzalɛ Arane ne anu la.