Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 ƐBƐLABƆLƐ NU EDWƐKƐ

Gyihova Yilale Me Maanle Ɔbole Zo

Gyihova Yilale Me Maanle Ɔbole Zo

MENYIANLE adwenle kɛ: ‘Ɔwɔ kɛ meyɛ adekpakyelɛ. Noko asoo adekpakyelɛ gyima ne yɛ anyelielɛ?’ Ɛnee me nye die gyima mɔɔ meyɛ wɔ Germany la anwo, ɛnee memaa bɛfa aleɛ bɛkɔ maanle ngakyile zo wɔ Africa, le kɛ Dar es Salaam, Elisabethville yɛɛ Asmara. Ɛnee menze kɛ kenle bie mebazonle Gyihova wɔ dahuu ɛzonlenlɛ gyima ne anu wɔ maanle zɔhane mɔ nee gyɛne dɔɔnwo azo wɔ Africa!

Mɔɔ akee membɔle adekpakyelɛ gyima ne abo la, nwolɛ adenle bie bukele mɔɔ hakyile me ɛbɛlabɔlɛ bɔkɔɔ a. (Ɛfɛ. 3:20) Bie a ɛbabiza ɛ nwo kɛzi ɔrale ye zɔ la. Maa menga kɛzi ɔbɔle ɔ bo la mengile wɔ.

Mɔɔ Ewiade Konle II bɔle ɔ bo wɔ 1939 la, ye siane ekyi anzi yɛɛ bɛwole me wɔ Berlin, Germany a. Mɔɔ Konle ne ɛlɛba ye awieleɛ wɔ 1945 la, ɛnee sogyama ta fa alopile duolua Berlin na bɛfuandi bɔmbo dɔɔnwo bɛgua ɛkɛ. Kenle ko bie mɔɔ bɛrayɛle ɛhye bie la, ɔhanle azua mɔɔ wɔ awɔdenle ne azo la, na me abusua ne hɔveale sua bie anu. Amaa yɛanyia banebɔlɛ la, nzinlii yɛnriandile yɛhɔle Erfurt, ɛleka mɔɔ bɛwole me mame la.

Me nee me awovolɛ yɛɛ me diema raalɛ ne wɔ Germany, kɛyɛ 1950

Me mame kpondɛle nɔhalɛ ne ɛsesebɛ. Ɔgengale mbuluku mɔɔ ewiade nrɛlɛbɛvoma ɛhɛlɛ la yɛɛ ɔnleɛnleanle ɛzonlenlɛ ngakyile ne mɔ anu noko yeannyia mɔɔ ɔkpondɛ la. Kɛyɛ 1948, Gyihova Alasevolɛ mraalɛ nwiɔ bie rale yɛ sua nu. Me mame liele bɛ na ɔbizale bɛ kpuya dɔɔnwo. Yeandwu dɔnehwele ko, me mame zele me nee me diema raalɛ ekyii ne kɛ, “Menwu nɔhalɛ ne!” Yeangyɛ, me nee me mame yɛɛ me diema raalɛ ne bɔle ɔ bo kɛ yɛkɔ debiezukoalɛ wɔ Erfurt.

Wɔ 1950, yɛziale yɛhɔle Berlin, na ɛnee yɛkɔ debiezukoalɛ wɔ Berlin-Kreuzberg asafo ne anu. Yɛdule yɛhɔle ɛleka fofolɛ wɔ Berlin ɛkɛ, na yɛhɔle debiezukoalɛ wɔ Berlin-Tempelhof asafo ne anu. Nzinlii bɛzɔnenle me mame, noko ɛnee melɛtwenlehwenle me bo aze. Kɛmɔti ɛ?

MENLILE NYIANEZELƐ ZO KONIM

Meannyia anyuhɔlɛ kpalɛ ɔluakɛ ɛnee mese nyiane kpole. Me nee awie mɔ hɔle daselɛlilɛ too ɛvolɛ nwiɔ, noko meangola meanli awie daselɛ. Noko ninyɛne hakyile wɔ mekɛ mɔɔ me nee mediema mrenyia nee mraalɛ bie mɔ mɔɔ bɛlale akɛnrasesebɛ nee nɔhalɛlilɛ ali wɔ Gyihova ɛzonlenlɛ nu dule la. Bie mɔ gyinlanle kpundii wɔ Nazi anzɛɛ East German efiade. Bie mɔ vale bɛ fanwodi dole esiane nu, bɛveale bɛ  nwo bɛvale yɛ mbuluku ne bɛhɔle East Germany. Bɛ neazo ne hanle me kpalɛ. Mendwenlenle nwolɛ kɛ, saa bɛva bɛ ngoane nee bɛ fanwodi bɛdo esiane nu bɛmaa Gyihova nee bɛ mediema a, ɛnee ɔwɔ kɛ mebɔ mɔdenle kɛ mebali nyianezelɛ ne anwo gyima.

Membɔle ɔ bo kɛ medi me nyianezelɛ ne azo konim mekɛ mɔɔ menvale me nwo menwulale nolobɔlɛ titili bie anu wɔ 1955 la. Wɔ kɛlata mɔɔ Adiema Nathan Knorr hɛlɛle ye wɔ Informant * ne la anu, ɔhanle kɛ nolobɔlɛ ne le gyimalilɛ kpole mɔɔ ahyehyɛdeɛ ne ɛyɛ la ko. Ɔhanle kɛ saa nolobɔlɛma kɔsɔɔti fa bɛ nwo wula nu a, “ɔbayɛ siane titili wɔ edwɛkɛhanlɛ gyima ne anu.” Ɛnee ɔle nɔhalɛ bɔkɔɔ! Yemɔ anzi, yeangyɛ menyilale me nwo zo memaanle Gyihova, na wɔ 1956, bɛzɔnenle me nee me papa yɛɛ me diema raalɛ ne. Yeangyɛ, ɛnee ɔwɔ kɛ mesi kpɔkɛ bieko mɔɔ anwo hyia la.

Wɔ ɛvolɛ dɔɔnwo anu, ɛnee meze kɛ ɔwɔ kɛ meyɛ adekpakyelɛ gyima ne, noko ɛnee metu mesie. Alimoa ne, menyɛle me adwenle kɛ mesukoa kɛzi bɛtɔ ninyɛne na bɛtɔne bɛmaa gyima bie mɔ wɔ maanle gyɛne zo la wɔ Berlin. Yemɔ anzi, ɛnee mekulo kɛ meyɛ gyima ne na menyia anyuhɔlɛ kolaa na meabɔ adekpakyelɛ gyima ne abo. Ɛhye ati, wɔ 1961, menliele gyima bie mendole nu wɔ Hamburg, mɔɔ le Germany suakpole mɔɔ meli agyinlaleɛ wɔ ɛkɛ la. Mekɛ mɔɔ me nye ɛlɛdie me gyima ne anwo la, ɛnee melɛtu dahuu ɛzonlenlɛ gyima ne meazie. Duzu a mebayɛ a?

Ɔyɛ me fɛ kɛ Gyihova luale mediema mrenyia mɔɔ lɛ ɛlɔlɛ la anwo zo boale me ɔmaanle menvale sunsum nu ninyɛne menlimoale la. Ɛnee me gɔnwo mɔ dɔɔnwo le adekpakyelɛma na bɛyɛle neazo kpalɛ bɛmaanle me. Bieko, Adiema Erich Mundt mɔɔ gyinlanle kpundii wɔ efiade la maanle me anwosesebɛ kɛ, menyia Gyihova anu anwodozo. Ɔhanle kɛ wɔ efiade ɛkɛ ne, mediema mɔɔ bɛvale bɛ nwo bɛdole bɛ nwo zo la, nzinlii yɛle bɛtɛɛ wɔ sunsum nu. Noko bɛdabɛ mɔɔ bɛnyianle Gyihova anu anwodozo bɔkɔɔ la lile nɔhalɛ, na bɛrayɛle pila wɔ asafo ne anu.

Mekɛ mɔɔ membɔle adekpakyelɛ bo wɔ 1963 la

Eza Adiema Martin Poetzinger mɔɔ nzinlii zonlenle wɔ Neazo Eku ne anu la maanle mediema ne mɔ anwosesebɛ kɛ, “Akɛnrasesebɛ a le agyadeɛ mɔɔ sonle bolɛ mɔɔ bɛbahola bɛanyia a!” Mɔɔ mendwenledwenle zɔhane edwɛkɛ ne anwo la, mengyakyile me gyima ne na membɔle adekpakyelɛ gyima ne abo wɔ June 1963. Ɔle kpɔkɛ kpalɛ mɔɔ tɛla biala mɔɔ menzile a! Wɔ siane nwiɔ anzi, kolaa na meabɔ ɔ bo kɛ mekpondɛ gyima fofolɛ bɔbɔ la yɛɛ bɛdole ɛsalɛ bɛvɛlɛle me kɛ mezonle kɛ adekpakyelɛ titili a. Ɛvolɛ ekyi bie anzi, Gyihova yɛle debie mɔɔ me nye ɛnla la. Bɛdole ɛsalɛ bɛvɛlɛle me kɛ mengɔ Geleade Sukulu mɔɔ tɔ zo 44 la bie.

MENYIANLE ƐZUKOALƐDEƐ MƆƆ HYIA LA WƆ GELEADE

Ɛzukoalɛdeɛ ko mɔɔ hyia mɔɔ menyianle menvile Adiema Nathan Knorr yɛɛ Lyman Swingle ɛkɛ la a le ɛhye, “Mmamaa ɛ sa nu to ndɛndɛ wɔ wɔ gyimalilɛ ne anu.” Bɛzele yɛ kɛ yɛyɛ yɛ gyima ne saa bɔbɔ ɔyɛ se a. Adiema Knorr hanle kɛ: “Duzu a bɛbava bɛ adwenle bɛazie zo a? Evinli ne, anwodolɛ anzɛɛ ehyia? Anzɛɛ bɛbava bɛ adwenle bɛazie mbaka mbaka ne, felawɔse ne mɔ yɛɛ menli nyunlu mɔɔ bayɛ ɛzelekɛzelekɛ la azo? Bɛzukoa kɛ bɛbahulo menli!” Kenle ko bie mɔɔ ɛnee Adiema Swingle ɛlɛkilehile deɛmɔti mediema bie mɔ asa nu to ndɛndɛ anu la, yeangola ɔ nwo sɔ, nyane ngome maanle monle guale ye. Ɛnee ɔwɔ kɛ ɔgyakyi ɛdendɛlɛ ne ɔmaa nyane ne kɔ na yeadoa zo. Ɔhanle me ahonle kpalɛ, na membɔle kpɔkɛ kɛ menrɛye Kelaese nee ɔ mediema ne mɔ mɔɔ bɛdi nɔhalɛ la arɛIe menrɛdo bɛ sa nu ɛlɛ.​—Mat. 25:40.

Me nee Claude yɛɛ Heinrich wɔ yɛ edwɛkpatɛlɛvolɛ gyima ne anu wɔ Lubumbashi, Congo, 1967

Mɔɔ yɛnyianle yɛ gyimalilɛ ne la, ɛnee Bɛtɛlema bie mɔ kulo kɛ bɛnwu ɛleka mɔɔ yɛkɔ la. Bɛhanle me gɔnwo mɔ ɛdeɛ ne anwo edwɛkɛ kpalɛ. Mɔɔ ɔdwule me nwo zo la, menganle kɛ: “Mekɔ Congo (Kinshasa).” Bɛgyinlanle ekyi na bɛhanle kɛ: “Ei Congo! Gyihova ɛboa wɔ!” Wɔ mekɛ zɔhane, ɛnee yɛte amaneɛbɔlɛ kɛ konle nee menli ɛhunlɛ ɛbu zo wɔ Congo (Kinshasa.) Noko, mengakyele  ɛzukoalɛdeɛ mɔɔ yɛnyianle ye wɔ sukulu ne anu la. Mɔɔ yɛwiele sukulu ne la anzi mekɛ ekyi wɔ September 1967, me nee Heinrich Dehnbostel yɛɛ Claude Lindsay hɔle Congo suakpole Kinshasa azo.

YƐNYIANLE NDETELƐ KPOLE KƐ EDWƐKPATƐLƐVOLƐMA

Mɔɔ yɛdwule Kinshasa la, yɛvale siane nsa yɛzukoale French. Akee yɛhɔle Lubumbashi, mɔɔ ɛnee bɛfɛlɛ ye Elisabethville, mɔɔ bikye Zambia ɛweɛne zo wɔ Congo nyiakɛ la. Yɛhɔdɛnlanle edwɛkpatɛlɛvolɛma sua bie mɔɔ wɔ suakpole ne avinli la anu.

Kɛmɔ ɛnee bɛtɛyɛle azɛlɛsinli mɔɔ wɔ Lubumbashi la dɔɔnwo anu gyima la ati, yɛ nye liele kɛ yɛdayɛ a yɛlimoa mɔɔ yɛbamaa ɛkɛ ne amra ade nɔhalɛ ne a. Yeangyɛ, yɛnyianle Baebolo ɛzukoalɛ dɔɔnwo mɔɔ ɛnee yɛnnyia mekɛ yɛnyɛ ɔ muala a. Eza yɛlile arane mgbanyima anzɛɛ kpolisima daselɛ. Bɛ nuhua dɔɔnwo hilele ɛbulɛ kpole maanle Nyamenle Edwɛkɛ ne yɛɛ yɛ edwɛkɛhanlɛ gyima ne. Swahili a menli ne ta ka a, yemɔti me nee Claude Lindsay zukoale zɔhane aneɛ ne. Yeangyɛ, bɛmaanle yɛhɔle asafo mɔɔ bɛka Swahili la anu.

Yɛnyianle anwubielɛ ngɛnlɛma dɔɔnwo, noko eza yɛyiale ngyegyelɛ. Ɛnee ɔwɔ kɛ yɛta yɛgyinla sogyama mɔɔ bɛbo nza, bɛlɛ adu anzɛɛ kpolisima mɔɔ yɛ basabasa na bɛto yɛ ɛzonle la anloa. Kenle ko bie, kpolisima bie mɔɔ bɛdedɛ adu la ravindele yɛ nwo zo wɔ mekɛ mɔɔ yɛlɛyɛ debiezukoalɛ wɔ Edwɛkpatɛlɛvolɛma sua nu ɛkɛ la, na bɛ nee yɛdayɛ mɔɔ yɛle mrenyia la hɔle  kpolisitehyɛne ɛkɛ, na bɛmaanle yɛdɛnlanle azɛlɛ ne anwo too kɛyɛ nɔsolɛ dɔne bulu kolaa na bɛaye yɛ.

Wɔ 1969, bɛmaanle mengɔnyɛle neavolɛ adenduvo gyima. Wɔ zɔhane maangyebakyi ne anu, ɛnee ɔyɛ a metia adenle tendenle wɔ kpɔkɛ nee ndɛtɛlɛ nu, kɛ mɔɔ ɔde wɔ Africa la. Wɔ namule ko bie azo, saa aleɛ dwo a, akɔlɛ bie nee ɔ mra bada me ɛkpa ne abo. Me rɛle ɛnrɛvi kɛzi ɛnee ɔyɛ dede ɔtunwue me wɔ mekɛ mɔɔ maanle nu ɛtɛtetele la ɛlɛ. Saa mekakye mekɛ mɔɔ me nee mediema ne mɔ fa bɔ Baebolo nu nɔhalɛ ne anwo adawu nɔsolɛ nu wɔ mekɛ mɔɔ bɛzɔ senle la a, me nye die kpole.

Ngyegyelɛ mgbole mɔɔ yɛyiale la ko a le menli mɔɔ bɛyɛle bɛ nwo kɛ bɛle Gyihova Alasevolɛ noko bɛboka Kitawala eku ne anwo la. * Bie mɔ liele ɛzɔnenlɛ na bɔbɔ bɛrayɛle asafo nu mgbanyima. Mediema mgbalɛ ne mɔ maanle bɛdabɛ mɔɔ bɛle kɛ “awolɛ mɔɔ vea” la anwo lale ali. (Dwu. 12) Awieleɛ bɔkɔɔ ne, Gyihova dele asafo ne mɔ anwo, na ɛhye maanle bɛnyianle anyuhɔlɛ kpalɛ.

Wɔ 1971, bɛ nee me hɔle Kinshasa Bɛtɛle, na menyɛle gyima ngakyile wɔ ɛkɛ, le kɛ ngɛlata nwo gyima, mbuluku mɔɔ bɛkɛla yɛɛ edwɛkɛ mɔɔ fale ɛzonlenlɛ gyima ne anwo la. Menzukoale kɛzi mebayɛ yɛ gyima ne anwo ngyehyɛleɛ wɔ maanle kpole mɔɔ bɛnlɛ ninyɛne bie mɔ la wɔ Bɛtɛle. Ɔyɛ a siane dɔɔnwo pɛ nu kolaa na yɛ ngɛlata ne mɔ adwu asafo ne mɔ anu. Bɛye ngɛlata ne bɛfi alopile nu bɛmaa ɛlɛne kɛ ɔva ɔhɔ, noko ndile mɔɔ wɔ azule ne anu la maa ɛlɛne ne di dapɛne dɔɔnwo wɔ nzule ne azo. Noko, ɔnva nwo ngyegyelɛ ɛhye mɔ mɔɔ yɛyiale la, yɛyɛle gyima ne.

Kɛzi mediema ne mɔ yɛ nyianu mgbole ɔnva nwo kɛ bɛnlɛ ezukoa dɔɔnwo la zinle me nwo. Bɛfa nvɔlekɛ sua mɔɔ le kɛ boka la bɛyɛ bama, yɛɛ ndile ndendenle bie bɛyɛ bane yɛɛ mbia. Bɛfa kɛnlampɔne bɛsi sua, bɛfa ɛya bɛtu zo eza bɛfa bie bɛyɛ ɛkponle. Yɛɛ eza bɛfa mbaka ne bie bɛyɛ pɛlɛko. Me nye hale mediema ɛhye mɔ mɔɔ bɔ mɔdenle la anwo wɔ mekɛ mɔɔ bɛlɛyɛ ninyɛne ɛhye mɔ la. Ɛnee bɛla me ahonle nwo kpole. Me nwo lɔle bɛ kpalɛ wɔ mekɛ mɔɔ bɛhakyile me gyimalilɛ ne la!

YƐZONLENLE WƆ KENYA

Wɔ 1974, bɛmaanle mengɔnyɛle gyima wɔ Nairobi Bɛtɛle mɔɔ wɔ Kenya la. Ɛnee yɛlɛ gyima dɔɔnwo yɛyɛ ɔluakɛ ɛnee Kenya Bɛtɛle ne boa maanle ngakyile bulu mɔɔ bikye ye la, na ɛnee bɛva bɛ sa bɛdo yɛ gyima ne azo wɔ bie mɔ anu. Bɛmaanle mengɔkpɔlale maanle ɛhye mɔ fane dɔɔnwo, titili Ethiopia mɔɔ ɛnee yɛ mediema ne mɔ ɛlɛyia ɛkpɔlɛ mɔɔ anu yɛ se wɔ ɛkɛ la. Bɛyɛle bɛ nuhua dɔɔnwo asa anzɛɛ bɛdole bɛ efiade; bɛhunle bie mɔ bɔbɔ. Noko bɛlile nɔhalɛ bɛhɔle awieleɛ, ɔluakɛ ɛnee bɛ nee Gyihova nee bɛ gɔnwo mɔ lɛ agɔnwolɛvalɛ kpalɛ.

Wɔ 1980, me nye liele kpalɛ wɔ mekɛ mɔɔ mengyale Gail Matheson mɔɔ ɔvi Canada la. Me nee Gail a hɔle Geleade sukulu a. Ɛnee yɛkɛlɛ yɛ nwo. Ɛnee Gail le edwɛkpatɛlɛvolɛ wɔ Bolivia. Yɛyiale bieko wɔ New York wɔ ɛvolɛ 12 anzi. Yemɔ anzi, yeangyɛ yɛgyale wɔ Kenya. Me nye die Gail anwo kpalɛ, ɔluakɛ ɔlɛ Gyihova adwenle wɔ ninyɛne nwo yɛɛ ɔ kunlu dwo mɔɔ ɔlɛ la anwo. Ɔtɛde me boavolɛ mɔɔ sonle bolɛ yɛɛ me kulovolɛ.

Wɔ 1986, bɛmaanle me nee Gail hɔyɛle neavolɛ adendulɛ gyima, noko mekɛ ko ne ala ɛnee meboka Ɔfese Kɔmatii ne anwo. Ɛnee maanle dɔɔnwo mɔɔ bɛwɔ Kenya Bɛtɛle ne abo mɔɔ yɛbazonle bɛ la boka yɛ maangyebakyi gyima ne anwo.

Melɛmaa ɛdendɛlɛ wɔ nyianu bo wɔ Asmara, 1992

Mekakye mekɛ mɔɔ ɛnee melɛyɛ nyianu bie mɔɔ yɛbayɛ ye wɔ Asmara (wɔ Eritrea) wɔ 1992 anwo ngyehyɛleɛ la, ɛnee bɛtɛfale bɛ sa bɛtɛtole yɛ gyima ne azo wɔ ɛkɛ. Ɔyɛ alɔbɔlɛ kɛ, sua bie mɔɔ ɔ kunlu le ɛtane tɛla nwolɛ ne la a yɛnyianle a. Mɔɔ nyianu kenle ne dwule la, kɛzi mediema ne mɔ zieziele ɔ kunlu ne mɔɔ yɛkola yɛsonle Gyihova wɔ ɛkɛ la zinle me nwo. Mbusua dɔɔnwo  vale ndanlɛ mɔɔ le ngɛnlɛma la rale, na bɛvale bɛzieziele nuhua. Yɛyɛle nyianu mɔɔ yɛ anyelielɛ na ɔka ahonle la, na menli 1,279 a rale a.

Ɛnee neavolɛ adenduvo gyima ne le nzenzaleɛ kpole maa yɛ ɔluakɛ ɛnee asolo ɛleka biala nee ye dabelɛ. Mekɛ bie yɛdɛnlanle sua kɛnlɛma bie anu wɔ ɛleka mɔɔ bikye nyevile nloa la; mekɛ fofolɛ noko, yɛdɛnlanle gyimayɛvoma sua bie mɔɔ bɛva mbulalɛ bɛyɛ la anu, na ɛleka mɔɔ abialeɛ ne wɔ la bo fuutu 300 (100 m). Ɔnva nwo ɛleka biala mɔɔ yɛzonlenle la, mɔɔ yɛkakye ye kpalɛ la a le daselɛlilɛ gyima ne mɔɔ yɛ nee adekpakyelɛma nee nolobɔlɛma mɔɔ bɔ mɔdenle yɛle la. Mɔɔ bɛhakyile yɛ gyimalilɛ ne la, ɛnee ɔwɔ kɛ yɛkɔ yɛgyakyi agɔnwolɛma dɔɔnwo mɔɔ yɛ nwo balɔ bɛ kpalɛ la.

YƐNYIANLE NYILALƐ DƆƆNWO WƆ ETHIOPIA

Wɔ 1980 ne mɔ awieleɛ yɛɛ 1990 ne mɔ mɔlebɛbo, bɛliele yɛ gyima ne bɛdole nu wɔ mɛla nu wɔ maanle dɔɔnwo mɔɔ ɛnee wɔ Kenya Bɛtɛle abo la. Ɛhye ati, bɛdele Bɛtɛle nee ɔfese ngakyile. Wɔ 1993, bɛmaanle yɛhɔzonlenle wɔ ɔfese ne mɔɔ wɔ Addis Ababa, Ethiopia la, ɛnee bɛva ɛvolɛ dɔɔnwo bɛyɛ gyima wɔ azule bo, noko kɛkala bɛlie gyima ne bɛdo nu wɔ mɛla nu.

Mewɔ neavolɛ adenduvo gyima ne anu wɔ Ethiopia ɛleka bie, 1996

Gyihova ɛyila gyima ne azo wɔ Ethiopia. Mediema dɔɔnwo bɔle ɔ bo kɛ bɛyɛ adekpakyelɛ gyima ne. Ɔvi 2012 mɔɔ ba la, nolobɔlɛma mɔɔ bo ɛya ngyɛnu 20 la fa bɛ nwo wula dahuu adekpakyelɛ gyima ne anu ɛvolɛ biala. Bieko, teokelase sukulu ngakyile ɛva ndetelɛ mɔɔ hyia la ɛmaa, yɛɛ bɛsisi Belemgbunlililɛ Asalo mɔɔ bo 120. Wɔ 2004, Bɛtɛle abusua ne dule hɔle sua fofolɛ nu, yɛɛ eza bɛzi Nyianu Asalo wɔ azɛlɛ ko ne ala azo.

Wɔ ɛvolɛ mɔɔ ɛpɛ nu la anu, me nee Gail nee Ethiopia mediema ne mɔ ɛnyia agɔnwolɛvalɛ mɔɔ yɛ anyelielɛ. Anyelielɛ nee atiakunlukɛnlɛma mɔɔ bɛlale ye ali la ka ahonle kpalɛ. Yɛ kpɔkɛdelɛ ɛlɛgyegye yɛ kenle nsa ye, yemɔti yemaa bɛva yɛ bɛra Central Europe Bɛtɛle. Bɛlɛnea yɛ kɛnlɛma wɔ ɛke, noko yɛ nwo dɔ yɛ gɔnwo mɔ mɔɔ bɛwɔ Ethiopia la kpalɛ.

GYIHOVA MAANLE ƆNYINLE

Yɛnwu kɛzi Gyihova maanle ye gyima ne nyinle la. (1 Kɔl. 3:6, 9) Kɛ neazo la, mekɛ mɔɔ menlimoale menlile menli mɔɔ tu ninyɛne wɔ azɛlɛ bo daselɛ wɔ Rwanda wɔ Congo Copperbelt la, ɛnee nolobɔlɛnli biala ɛnle Rwanda. Kɛkala mediema mɔɔ bo 30,000 la a wɔ maanle zɔhane anu a. Wɔ 1967, ɛnee nolobɔlɛma kɛyɛ 6,000 a wɔ Congo (Kinshasa) a. Kɛkala, bɛlɛ nolobɔlɛma mɔɔ bo 230,000, menli mɔɔ bo mgbe ko hɔle Ngakyelɛlilɛ ne wɔ 2018. Nolobɔlɛma mɔɔ wɔ maanle mɔɔ ɛnee wɔ Kenya Bɛtɛle abo la bo 100,000.

Kɛyɛ ɛvolɛ 50 mɔɔ ɛze ɛhɔ la, Gyihova luale mediema ngakyile anwo zo boale me, amaa meava me nwo meawula dahuu ɛzonlenlɛ gyima ne anu. Ɔnva nwo kɛ metɛse nyiane la, mezukoa kɛ mebava me nwo meado Gyihova anwo zo bɔkɔɔ. Mɔɔ meva nu wɔ Africa la ɛmaa menyia abotane yɛɛ me kunlu dwo me nwo. Me nee Gail anye sɔ ɛyɛvolɛyɛlɛ subane mɔɔ mediema ne mɔ lale ye ali yɛɛ kɛzi bɛgyinlanle ngyegyelɛ nloa na bɛnyianle Gyihova anu anwodozo la. Me nye sɔ ye ɛlolɛ ne kpole. Nɔhalɛ nu, Gyihova yilale me maanle ɔbole zo.​—Edw. 37:4.

^ ɛden. 11 Nzinlii bɛravɛlɛle ye Yɛ Belemgbunlililɛ Gyima, na kɛkala bɛva Yɛ Kilisiene Ɛbɛlabɔlɛ Nee Yɛ Ɛzonlenlɛ​—Nyianu Buluku ne bɛzie ɔ gyakɛ anu.

^ ɛden. 23 Bɛnyianle “Kitawala” bɛvile Swahili edwɛkɛkpɔkɛ mɔɔ abo kile “komo zo, kile adenle anzɛɛ sie” la anu. Maanyɛlɛ eku ɛhye bodane a le kɛ​—bɛkpondɛ fanwodi bɛavi Belgium abo. Kitawala ekpunli ne mɔ asa hanle Gyihova Alasevolɛ mbuluku ne mɔ, bɛzukoale na bɛhyehyɛle, eza bɛhakyile Baebolo ne anu ngilehilelɛ ne bɛmaanle ɔ nee bɛ adwenle, bɛ amaamuo nee ɛbɛlatane mɔɔ bɛbɔ la yiale.