Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 EDWƐKƐ 29

“Bɛhɔ, Bɛyɛ . . . Menli Me Ɛdoavolɛma”

“Bɛhɔ, Bɛyɛ . . . Menli Me Ɛdoavolɛma”

“Yemɔti, bɛhɔ, bɛyɛ maanle maanle kɔsɔɔti anu menli me ɛdoavolɛma.”​—MAT. 28:19.

EDWƐNE 60 Ɔle Bɛ Ngoane Nwo Edwɛkɛ

MƆƆ YƐBAZUKOA *

1-2. (a) Kɛ mɔɔ Gyisɛse hanle ye wɔ Mateyu 28:18-20 la, gyima mɔɔ anwo hyia la boni a bɛva bɛmaa Kilisiene asafo ne a? (b) Kpuya boni mɔ a yɛbazuzu nwo wɔ edwɛkɛ ɛhye anu a?

ƆBAYƐ kɛ ɛzoanvolɛ ne mɔ anye liele kpole wɔ mekɛ mɔɔ bɛhɔyiale wɔ boka ne anwo la. Wɔ Gyisɛse ewudwazo ne anzi, ɔyɛle ngyehyɛleɛ kɛ ɔbayia bɛ wɔ ɛkɛ. (Mat. 28:16) Ɔbayɛ kɛ mekɛ zɔhane a “ɔyele ɔ nwo ɔhilele mediema mɔɔ bo 500 wɔ mekɛ ko anu” la. (1 Kɔl. 15:6) Duzu ati a Gyisɛse nee ye ɛdoavolɛ ne mɔ yɛle ayia ɛhye a? Amaa yeava gyima ɛhye mɔɔ yɛ anyelielɛ la yeamaa bɛ: “Yemɔti, bɛhɔ, bɛyɛ maanle maanle kɔsɔɔti anu menli me ɛdoavolɛma.”​—Kenga Mateyu 28:18-20.

2 Ɛdoavolɛ ne mɔ mɔɔ dele Gyisɛse edwɛkɛ ne la rabokale alimoa Kilisiene asafo ne anwo. Ɛnee asafo zɔhane gyima titili a le kɛ bɛbayɛ menli dɔɔnwo Kelaese ɛdoavolɛma. * Ɛnɛ, yɛlɛ asafo dɔɔnwo mɔɔ nɔhalɛ Kilisienema wɔ nu la wɔ ewiade amuala, na gyima ko ne ala a bɛlɛyɛ a. Wɔ edwɛkɛ ɛhye anu, yɛbazuzu kpuya nna anwo: Duzu ati a ɛdoavolɛyɛlɛ gyima ne anwo hyia ɛ? Kɛzi yɛyɛ gyima ɛhye ɛ? Asoo Kilisienema kɔsɔɔti lɛ kyɛfoa wɔ ɛdoavolɛyɛlɛ gyima ne anu ɔ? Na duzu ati a ɔwɔ kɛ yɛnyia abotane wɔ gyima ɛhye anu a?

 DUZU ATI A ƐDOAVOLƐYƐLƐ GYIMA NE ANWO HYIA Ɛ?

3. Kɛ mɔɔ Dwɔn 14:6 yɛɛ 17:3 ka la, duzu ati a ɛdoavolɛyɛlɛ gyima ne anwo hyia ɛ?

3 Duzu ati a ɛdoavolɛyɛlɛ gyima ne anwo hyia ɛ? Ɔluakɛ Kelaese ɛdoavolɛma ala a bahola ayɛ Nyamenle agɔnwo mɔ a. Bieko, Kelaese ɛdoavolɛma anye die wɔ ɛbɛlabɔlɛ nu ɛnɛ yɛɛ bɛlɛ anyelazo kɛ kenle bie, bɛbadɛnla aze dahuu. (Kenga Dwɔn 14:6; 17:3.) Nɔhalɛ nu, Gyisɛse ɛva ɛzonlelilɛ mɔɔ anwo hyia kpalɛ la ɛwula yɛ sa, noko tɛ yɛ tumi zo a yɛdua yɛyɛ gyima ɛhye a. Ɛzoanvolɛ Pɔɔlo hɛlɛle ɔ nee ɔ gɔnwo mɔ anwo edwɛkɛ kɛ: “Yɛle Nyamenle agɔnwo mɔ gyimayɛvoma.” (1 Kɔl. 3:9) Nea nwolɛ adenle kɛnlɛma mɔɔ Gyihova nee Kelaese ɛva ɛmaa alesama mɔɔ ɛnli munli a!

4. Duzu a yɛsukoa yɛfi Ivan nee Matilde anwubielɛ ne anu a?

4 Ɛdoavolɛyɛlɛ gyima ne maa yɛ nye die kpole. Suzu Ivan nee ɔ ye Matilde mɔɔ bɛwɔ Colombia la anwo nea. Bɛlile kpavolɛ bie mɔɔ bɛfɛlɛ ye Davier la daselɛ, ɔhanle ɔhilele bɛ kɛ: “Mekulo kɛ meyɛ nzenzaleɛ wɔ me ɛbɛlabɔlɛ nu, noko mengola.” Ɛnee Davier le boxer, ɔno nyiletane nee nza yɛɛ ɔ nee ye nwewe Erika a de a. Ivan kilehile nu kɛ: “Yɛ nee ye bɔle Baebolo ɛzukoalɛ bo. Ɛnee namule mɔɔ ɔde zo la wale kpalɛ, na ɛnee ɔwɔ kɛ yɛka yɛ basekɛ ne dɔnehwele dɔɔnwo yɛfa adenle mɔɔ ɛnle kpalɛ la azo. Mɔɔ Erika nwunle nzenzaleɛ mɔɔ Davier ɛlɛyɛ wɔ ye ɛbɛlabɔlɛ nu la, ɔvale ɔ nwo ɔwulale debiezukoalɛ ne anu.” Mekɛ guale nu la, Davier gyakyile nyiletane nee nza ɛnlonlɛ yɛɛ konle. Eza ɔgyale Erika. Matilde ka kɛ: “Mɔɔ bɛzɔnenle Davier nee Erika wɔ 2016 la, yɛhakyele Davier edwɛkɛ mɔɔ ɛnee ɔta ɔka la kɛ, ‘Mekulo kɛ mekakyi, noko mengola.’ Yɛ nye liele kpalɛ na anyelielɛ ne hakyile ɛzunlɛ.” Nɔhalɛ nu, saa yɛboa menli yɛmaa bɛbayɛ Kelaese ɛdoavolɛma a, yɛ nye die kpole kpalɛ.

KƐZI YƐYƐ MENLI ƐDOAVOLƐMA Ɛ?

5. Duzu a yɛdimoa yɛyɛ wɔ ɛdoavolɛyɛlɛ gyima ne anu a?

5 Debie mɔɔ yɛdimoa yɛyɛ wɔ ɛdoavolɛyɛlɛ gyima ne anu la a le kɛ ‘yɛkpondɛ’ ahonlekpalɛma. (Mat. 10:11) Saa yɛka edwɛkɛ ne yɛkile awie biala mɔɔ yɛkɛyia ye la a, ɔkile kɛ yɛle Gyihova Alasevolɛ. Saa yɛdi Kelaese mɛla ne azo na yɛka edwɛkɛ ne a, ɔkile kɛ yɛle nɔhalɛ Kilisienema.

6. Duzu a baboa yɛ amaa yɛanyia anyuhɔlɛ wɔ daselɛlilɛ nu a?

6 Menli bie mɔ wɔ ɛkɛ mɔɔ bɛkulo kɛ bɛsukoa Baebolo ne a, noko saa yɛyia bɛ wɔ mekɛ mɔɔ limoa a, bɛyɛ anyetele. Ɔwɔ kɛ yɛmaa bɛ anwosesebɛ amaa bɛ nye alie nwo na bɛazukoa dɔɔnwo. Amaa yɛanyia anyuhɔlɛ wɔ daselɛlilɛ nu la, ɔwɔ kɛ yɛsiezie yɛ nwo kpalɛ. Kpa edwɛkɛtile mɔɔ menli mɔɔ ɛbayia bɛ anye balie nwo la. Akee siezie kɛzi ɛbaha ko biala anwo edwɛkɛ la.

7. Kɛzi ɛ nee awie babɔ adawubɔlɛ bo ɛ, na duzu ati a ɔhyia kɛ yɛtie na yɛkile mɔɔ bɛkɛha la anwo anyezɔlɛ ɛ?

7 Kɛ neazo la, bie a ɛbabiza suamenle ne kɛ: “Saa ɔnrɛgyegye wɔ a, anrɛɛ mebiza wɔ kpuya ko. Ngyegyelɛ dɔɔnwo mɔɔ yɛyia bɛ ɛnɛ la ka menli kɔsɔɔti mɔɔ wɔ ewiade la. Asoo ɛsuzu kɛ arane mɔɔ wɔ ewiade la bahola ali yɛ ngyegyelɛ nwo gyima ɔ?” Akee bɛbahola bɛazuzu Daneɛle 2:44 anwo. Anzɛɛ ɛbahola wɔaha wɔahile awie kɛ: “Ɛnea a, adenle kpalɛ boni a yɛbahola yɛalua zo yɛatete ngakula yɛamaa  bɛala subane kpalɛ ali a? Me nye balie nwo kɛ ɛbahile wɔ adwenle.” Akee ɛ nee ye bɛzuzu Mɛla ne 6:6, 7 anwo. Saa ɛlɛkpa edwɛkɛtile bie a, dwenle menli mɔɔ bɛbadie wɔ la anwo. Pɛ kɛzi bɛ ɛbɛlabɔlɛ bayɛ wɔ mekɛ mɔɔ bɛbanwu nɔhalɛ ne mɔɔ Baebolo ne kilehile amgba la anwo nvoninli. Saa ɛ nee bɛ ɛlɛtendɛ a, tie bɛ na kile mɔɔ bɛkɛha la anwo anyezɔlɛ. Saa ɛyɛ zɔ a, ɛbade bɛ edwɛkɛ bo kpalɛ na bɛ nye balie nwo kɛ bɛbadie wɔ.

8. Duzu ati a ɔwɔ kɛ yɛbɔ mɔdenle yɛyɛ sia kɔkpɔla dahuu a?

8 Kolaa na awie alie ado nu kɛ ɔbazukoa Baebolo ne la, ɔwɔ kɛ ɛbɔ mɔdenle ɛkɔ ye ɛkɛ ne fane dɔɔnwo. Duzu ati ɔ? Ɔluakɛ bie a saa ɛsia ɛkɔ ye ɛkɛ ne bieko a, ɛnrɛdo ye. Eza ɔbahyia kɛ ɛsia ɛkɔ ye ɛkɛ ne fane dɔɔnwo kolaa na yealie Baebolo ɛzukoalɛ yeado nu. Kakye kɛ, saa ɛgugua nzule wɔ baka bie mɔɔ ɛkɛlua la azo dahuu a yɛɛ ɔnyi a. Zɔhane ala a saa yɛ nee awie suzu Nyamenle Edwɛkɛ ne anwo dahuu a, anyelielɛ nee ɛlɔlɛ mɔɔ ɔlɛ ɔmaa Gyihova nee Kelaese la bayɛ kpole a.

ASOO KILISIENEMA KƆSƆƆTI LƐ KYƐFOA WƆ ƐDOAVOLƐYƐLƐ GYIMA NE ANU?

Alasevolɛ mɔɔ bɛwɔ ewiade amuala la anye ɛbolo ɛlɛkpondɛ ahonlekpalɛma (Nea ɛdendɛkpunli 9-10) *

9-10. Duzu ati a Kilisienema kɔsɔɔti lɛ kyɛfoa wɔ ɛdoavolɛyɛlɛ gyima ne anu a?

9 Ɔle Kilisienenli biala gyima kɛ ɔbaboa yeamaa yɛakpondɛ ahonlekpalɛma. Yɛbahola yɛava gyima ɛhye yɛado menli mɔɔ ɛlɛkpondɛ kakula mɔɔ ɛminli la anwo. Adenle boni azo? Suzu mɔɔ dole kakula nrenyia ekyii mɔɔ ɛnyia ɛvolɛ nsa mɔɔ minlinle la anwo nea. Menli kɛyɛ 500 yɛɛ ɛnee bɛlɛkpondɛ ye a. Awieleɛ bɔkɔɔ ne, kɛyɛ dɔnehwele 20 anzi, menli mɔɔ ɛlɛkpondɛ kakula ne la anu ko nwunle ye wɔ abɛlɛ ɛya bie anu. Nrenyia zɔhane angulo kɛ menli bahanvo  ye ɔluakɛ yenwu kakula ne la ati. Ɔhanle kɛ: “Yɛnwunle kakula ne ɔluakɛ yɛ nwo zonle a ɛnee yɛlɛkpondɛ ye a.”

10 Menli dɔɔnwo le kɛ kakula zɔhane mɔɔ minlinle la. Bɛnlɛ anyelazo biala, noko bɛhyia moalɛ. (Ɛfɛ. 2:12) Menli mɔɔ bɛbo mgbe mɔtwɛ la ɛlɛbɔ mɔdenle akpondɛ menli ɛhye mɔ. Bie a ɛnrɛnyia awie mɔɔ ɔkulo kɛ ɔ nee wɔ sukoa Baebolo ne la. Noko, nolobɔlɛma mɔɔ bɛlɛka edwɛkɛ ne wɔ azɛlɛsinli ko ne ala anu la bɛanyia awie mɔɔ ɔ nye die nwo kɛ ɔbazukoa nɔhalɛ ne mɔɔ wɔ Nyamenle Edwɛkɛ ne anu la. Saa adiema bie yia awie na ahenle bayɛ Kelaese ɛdoavolɛ a, awie biala mɔɔ yɛle zɔhane ɛkpondɛlɛ gyima ne bie la anye die kpalɛ.

11. Saa ɛnyɛ Baebolo ɛzukoalɛ kɛkala bɔbɔ a, ndenle boni mɔ azo a ɛbahola wɔaboa wɔ ɛdoavolɛyɛlɛ gyima ne anu a?

11 Saa ɛnyɛ Baebolo ɛzukoalɛ kɛkala bɔbɔ a, ɛbahola wɔaboa wɔ ɛdoavolɛyɛlɛ gyima ne anu. Kɛ neazo la, ɛbahola wɔayɛ awie mɔɔ le fofolɛ mɔɔ kɛra Belemgbunlililɛ Asalo la akoaba na wɔava ye agɔnwolɛ. Saa ɛda ɛlɔlɛ ali ɛkile bɛ a, ɛbaboa bɛ wɔamaa bɛanwu kɛ yɛle nɔhalɛ Kilisienema. (Dwɔn 13:34, 35) Mualɛ mɔɔ ɛbamaa wɔ debiezukoalɛ bo, ɔnva nwo kɛ ɔle nzinrenzinra la, bamaa fofolɛma ɛhye mɔ avi ahonle nu aha bɛ diedi ne anwo edwɛkɛ wɔ ɛbulɛ adenle zo. Eza ɛbahola ɛ nee nolobɔlɛnli mɔɔ le fofolɛ la ahɔ daselɛlilɛ na wɔaboa ye wɔamaa yeava Ngɛlɛlera ne yeahilehile awie mɔ. Saa ɛyɛ ɛhye a, ɛnee ɛlɛkilehile ye wɔamaa yeazukoa Kelaese.​—Luku 10:25-28.

12. Asoo yɛhyia anwubielɛ titili bie kolaa na yɛahola yɛayɛ ɛdoavolɛyɛlɛ gyima ne ɔ? Kilehile nu.

12 Ɔnle kɛ yɛ nuhua biala te nganeɛ kɛ yɛhyia anwubielɛ titili bie kolaa na yɛahola yɛahilehile awie yɛamaa yeayɛ Gyisɛse ɛdoavolɛ. Duzu ati ɔ? Fa Faustina mɔɔ de Bolivia la kɛ neazo. Kolaa na yeayia Gyihova Alasevolɛ la, ɛnee ɔnze kenga. Noko kɛkala, ɔkola ɔkenga ngyikyi ngyikyi. Bɛzɔne ye, na ɔ nye die nwo kɛ ɔbahilehile awie mɔ. Ɔ nee menli nnu sukoa Baebolo ne dapɛne biala. Ɔwɔ nuhua kɛ Faustina ɛngola ɛngenga kpalɛ kɛ mɔɔ ye sukoavoma ne mɔ dɔɔnwo yɛ la, noko yehola yeboa menli nsia yemaa bɛzɔne.​—Luku 10:21.

13. Saa yɛnlɛ alagye fee bɔbɔ na yɛyɛ ɛdoavolɛyɛlɛ gyima ne a, nyilalɛ boni mɔ a yɛnyia a?

13 Kilisienema dɔɔnwo ɛnlɛ alagye fee, ɔluakɛ bɛlɛ ninyɛne mɔɔ anwo hyia kpalɛ mɔɔ bɛlɛyɛ a. Noko, bɛnyia mekɛ bɛyɛ Baebolo ɛzukoalɛ na bɛ nye die kpalɛ. Yɛ Melanie neazo ne nzonlɛ. Ɛnee ɔle wovolɛ ko mɔɔ ɛlɛtete kakula raalɛ mɔɔ ɛnyia ɛvolɛ mɔtwɛ la wɔ Alaska. Eza ɛnee ɔfa mekɛ dɔɔnwo ɔyɛ gyima yɛɛ ɔnea ye awovolɛ mɔɔ  ɛnyia kansa la. Ɛnee Melanie angomekye a le Dasevolɛ wɔ sua mɔɔ ɔde zo la azo a. Ɔluakɛ ɛyɛlɛ wɔ ɛleka mɔɔ ɔde la ati, ɛnee ɔta ɔyɛ asɔne kɛ Gyihova ɛmaa ye anwosesebɛ ɔmaa ɔhola ɔhɔ daselɛlilɛ ɔluakɛ ɛnee ɔkulo kɛ ɔnyia awie mɔɔ ɔ nee ye bazukoa Baebolo ne a. Awieleɛ bɔkɔɔ ne, ɔyiale Sara, mekɛ mɔɔ ɔnwunle kɛ Nyamenle lɛ duma la, ɔzinle ɔ nwo. Yemɔ anzi, Sara liele Baebolo ɛzukoalɛ dole nu. Melanie ka kɛ: “Ɔdwu Yalɛ nɔsolɛ nu a, ɛnee mevɛ, noko me nee me ra raalɛ ne hɔle zo hɔyɛle Baebolo ɛzukoalɛ ne na yɛnyianle nvasoɛ dɔɔnwo. Yɛ nye liele kɛ yɛyɛle Sara kpuya ne mɔ anwo neɛnleanu na yɛbuale bɛ kɛnlɛma la, eza yɛ nye liele kɛ yɛnwunle kɛ yerayɛ Gyihova agɔnwo la.” Sara vale akɛnrasesebɛ gyinlanle dwazotia nloa, ɔgyakyile asɔne mɔɔ ɔkɔ la na ɔmaanle bɛzɔnenle ye.

DEƐMƆTI ƆHYIA ABOTANE AMAA YƐAYƐ MENLI ƐDOAVOLƐMA LA

14. (a) Duzu ati a ɛdoavolɛyɛlɛ gyima ne le kɛ fɛlɛhyelɛ a? (b) Kɛzi Pɔɔlo edwɛkɛ mɔɔ wɔ 2 Timote 4:1, 2 la ka wɔ ɛ?

14 Saa wɔ ɛzonlenlɛ gyima ne ɛnzo ma bɔbɔ a, mmamaa ɛ sa nu to, nyia anyelazo na kɔ zo kpondɛ. Gyisɛse vale ɛdoavolɛyɛlɛ gyima ne totole fɛlɛhyelɛ nwo. Menli mɔɔ kye fɛlɛ la yɛ gyima ɛsesebɛ dɔnehwele dɔɔnwo kolaa na bɛahye bie. Ɔdwu mekɛ ne bie a, bɛyɛ gyima nɔɔzo anzɛɛ aleɛbahye ne ala yɛɛ bɛtu adenle bɛkɔ moa kpalɛ. (Luku 5:5) Zɔhane ala a, Kilisienema bie mɔ noko fa dɔnehwele dɔɔnwo si abotane kɔ ɛleka ngakyile na bɛkɔkpondɛ menli a. Duzu ati ɔ? Amaa bɛanyia menli dɔɔnwo. Menli mɔɔ ta bɔ mɔdenle kpondɛ la yia bɛdabɛ mɔɔ bɛ nye die yɛ edwɛkɛ ne anwo la.  Asoo ɛbahola wɔabɔ mɔdenle wɔaha edwɛkɛ ne wɔ mekɛ anzɛɛ ɛleka mɔɔ ɛbahola wɔayia menli dɔɔnwo ɛ nee bɛ abɔ adawu la ɔ?​—Kenga 2 Timote 4:1, 2.

Si abotane boa wɔ sukoavoma maa bɛnyia anyuhɔlɛ wɔ sunsum nu (Nea ɛdendɛkpunli 15-16) *

15. Duzu ati a saa yɛlɛyɛ Baebolo ɛzukoalɛ a, yɛhyia abotane a?

15 Abotane hyia wɔ mekɛ mɔɔ yɛlɛyɛ Baebolo ɛzukoalɛ la, duzu ati ɔ? Debie ko a le kɛ, tɛ kɛ yɛboa sukoavo ne yɛamaa yeanwu Baebolo nu nɔhalɛ ne na yeahulo ala. Eza ɔwɔ kɛ yɛboa ye yɛmaa ɔnwu Gyihova mɔɔ le Baebolo ne Kɛlɛvolɛ la na ɔkulo ye. Bieko, ɔwɔ kɛ yɛkile yɛ sukoavo ne mɔɔ Gyisɛse kpondɛ avi ye ɛdoavolɛma ɛkɛ la, na eza yɛmaa ɔnwu kɛzi ɔbabɔ ye ɛbɛla kɛ nɔhalɛ Kilisienenli la. Ɔwɔ kɛ yɛnyia abotane yɛboa ye wɔ mekɛ mɔɔ ɔlɛbɔ mɔdenle kɛ ɔbava Baebolo ngyinlazo yeayɛ gyima la. Bie mɔ kola yɛ nzenzaleɛ wɔ siane ekyii anu. Wɔ bie mɔ afoa nu, ɔdie mekɛ.

16. Duzu a ɛsukoa ɛfi Raúl edwɛkɛ ne anu a?

16 Anwubielɛ bie mɔɔ edwɛkpatɛlɛvolɛ bie mɔɔ wɔ Peru nyianle la maa yɛnwu kɛzi abotane nwo hyia la. Ɔka kɛ: “Me nee Baebolo sukoavo bie mɔɔ bɛfɛlɛ ye Raúl la zukoale mbuluku nwiɔ. Noko ɛnee ɔngola ɔnyɛ nzenzaleɛ kpalɛ wɔ ɛbɛlabɔlɛ nu. Ngyegyelɛ wɔ ye agyalɛ ne anu, ɔ nloa ɛdendɛlɛ ɛnyɛ fɛ yɛɛ ɔ mra ne mɔ ɛmbu ye. Ɛnee ɔba debiezukoalɛ dahuu, yemɔti meangyakyi ɔ nee ye abusua ne ɛboalɛ. Menyiale ye la, ɛvolɛ nsa pɛle nu kolaa na yeafɛta ɛzɔnenlɛ.”

17. Boni a yɛbazuzu nwo wɔ edwɛkɛ bieko anu a?

17 Gyisɛse zele yɛ kɛ, ‘yɛhɔyɛ menli ye ɛdoavolɛma.’ Fane dɔɔnwo ne ala, yɛ nee menli mɔɔ bɛ diedi le ngakyile kolaa fi yɛ ɛdeɛ ne anwo la a tendɛ a. Bie mɔ noko ɛngɔ asɔne biala anzɛɛ bɛnlie bɛnli kɛ Nyamenle wɔ ɛkɛ. Edwɛkɛ bieko bamaa yɛanwu kɛzi yɛbaha edwɛkɛ ne yɛahile menli ɛhye mɔ la.

EDWƐNE 68 Dua Belemgbunlililɛ Ma Ne

^ ɛden. 5 Kilisiene asafo ne gyima titili a le kɛ, bɛboa awie mɔ bɛamaa bɛayɛ Kelaese ɛdoavolɛma. Edwɛkɛ ɛhye bava nzuzulɛ bie mɔ mɔɔ baboa yɛ amaa yɛayɛ gyima ɛhye la yeamaa.

^ ɛden. 2 EDWƐKƐ MƆƆ BƐHILEHILE NU: Kelaese ɛdoavolɛma ɛnzukoa Gyisɛse ngilehilelɛ ne ala. Bɛfa mɔɔ bɛsukoa la bɛbɔ bɛ ɛbɛla. Bɛbɔ mɔdenle kɛ bɛbava Gyisɛse agyakɛ anzɛɛ bɛbali ye neazo ne anzi kpalɛ.​—1 Pita 2:21.

^ ɛden. 52 NVONINLI NWO EDWƐKƐ: Nrenyia bie mɔɔ ɛlɛtu adenle la ɛlie yɛ mbuluku ne mɔ ko wɔ Alasevolɛ ne mɔ ɛkɛ wɔ anwumalɛne agyinlaleɛ ne. Nzinlii, wɔ ye ɛnwomenlelielɛ ne anu, yenwu Alasevolɛ gyɛne mɔɔ bɛlɛyɛ bagua nu daselɛlilɛ la. Mɔɔ ɔziale ɔhɔle sua nu la, nolobɔlɛma hɔbɔle ye anlenkɛ nu.

^ ɛden. 54 NVONINLI NWO EDWƐKƐ: Nrenyia ko ne ala ɛlie Baebolo ɛzukoalɛ ɛdo nu. Awieleɛ bɔkɔɔ ne, yefɛta ɛzɔnenlɛ.