Wulu kɔ nuhua edwɛkɛ ne azo

Wulu kɔ nuninyɛne ne azo

Gyihova Alasevolɛ

Kpa aneɛ Nzema

 YƐ KILISIENE ƐBƐLABƆLƐ

“Pɔɔlo Yɛle Nyamenle Mo Na Ɔnyianle Akɛnrasesebɛ”

“Pɔɔlo Yɛle Nyamenle Mo Na Ɔnyianle Akɛnrasesebɛ”

Mekɛ mɔɔ Wulomu asafo ne anu amra dele kɛ Pɔɔlo ɛlɛba la, mediema ekpunli bie pɛle adenle mayɛlɛ 40 (km 64) hɔyiale ye. Kɛzi bɛ tunwomaa ɛlɔlɛ ne hanle Pɔɔlo ɛ? “Mɔɔ Pɔɔlo nwunle bɛ la, ɔyɛle Nyamenle mo na ɔnyianle akɛnrasesebɛ.” (Gyi 28:15) Ɛnee bɛze Pɔɔlo kɛ ɔmaa asafo ne mɔ mɔɔ ɔkɔkpɔla bɛ la anwosesebɛ, noko mekɛ ɛhye mɔɔ yevi efiade yera la ɛdeɛ, ɔdaye a bɛmaanle ye anwosesebɛ a.​—2Kɔ 13:10.

Ɛnɛ, maangyebakyi zo neavolɛma kpɔlɔkpɔla asafo ngakyile na bɛmaa mediema ne mɔ anwosesebɛ. Noko kɛ mɔɔ ɔde wɔ Nyamenle menli kɔsɔɔti afoa nu la, ɔdwu mekɛ ne bie a bɛte ɛvɛlɛ nganeɛ, adwenleadwenle tɔ bɛ nwo na bɛ sa nu to. Kenle fofolɛ mɔɔ maangyebakyi zo neavolɛ ne nee ɔ ye barakpɔla bɛ asafo ne la, duzu a ɛbahola wɔayɛ wɔaboa bɛ na bɛanyia akɛnrasesebɛ, amaa ɔlua zo ‘bɛamaa bɛ nwo anwosesebɛ’ a?​—Wlo 1:11, 12.

  • Kɔ daselɛlilɛ ayia ne mɔ. Saa nolobɔlɛma fa bɛ nwo wula dapɛne titili ne anu gyimalilɛ nu a, ɔmaa maangyebakyi zo neavolɛ ne anwosesebɛ. (1Tɛ 1:2, 3; 2:20) Ɛbahola wɔayɛ adekpakyelɛ boavolɛ wɔ siane ne mɔɔ ɔbara la anu. Eza ɛbahola ɛ nee ye nee ɔ ye alua wɔ daselɛlilɛ nu anzɛɛ ɛ nee bɛ nuhua ko ahɔ wɔ Baebolo sukoavo bie ɛkɛ. Bɛ nye die nwo kɛ bɛ nee nolobɔlɛma ngakyile balua wɔ daselɛlilɛ nu, mɔɔ menli mɔɔ bɛnlɛ anwubielɛ dɔɔnwo la boka nwo la.

  • Da ɛyɛvolɛyɛlɛ subane ali. Ɛbahola wɔamaa bɛ ɛleka mɔɔ bɛbala anzɛɛ aleɛ ɔ? Ɛhye bamaa maangyebakyi zo neavolɛ ne nee ɔ ye anwu ye kɛ ɛkulo bɛ. Bɛ nye ɛnla debie hyeleenyi biala ade.​—Lu 10:38-42.

  • Tie na fa ye folɛdulɛ nee ye adehilelɛ yɛ gyima. Maangyebakyi zo neavolɛ ne fi ɛlɔlɛ nu boa yɛ maa yɛnwu kɛzi yɛbanyia anyuhɔlɛ wɔ Gyihova ɛzonlenlɛ nu la. Ɔdwu mekɛ ne bie a ɔwɔ kɛ ɔfa folɛdulɛ mɔɔ anloa yɛ se la ɔmaa. (1Kɔ 5:1-5) Saa yɛbɛlɛ yɛ nwo aze na yɛtie ye a, ɔmaa ɔ nye die.​—Hi 13:17.

  • Kile anyezɔlɛ. Ka kɛzi maangyebakyi zo neavolɛ ne nee ɔ ye mɔdenlebɔlɛ ne ɛboa wɔ la kile bɛ. Ɛbahola wɔaha ye ɛ nloa anu anzɛɛ ɛbahɛlɛ ye kɛlata zo.​—Kɔl 3:15.