Yekile 7:1-17

  • Anwumabɔvolɛma nna dedɛ ɛzɛkyelɛ anwoma nu (1-3)

  • Bɛzɔ 144,000 ne anloa (4-8)

  • Menli ekpunli kpole mɔɔ wulowula adɛladeɛ fufule (9-17)

7  Ɛhye anzi menwunle anwumabɔvolɛma nna kɛ bɛgyigyi azɛlɛ ye muleɛ nna ne mɔ azo, na bɛdedɛ azɛlɛ ye azo anwoma nna ne anu ɛsesebɛ, amaa anwoma biala ambɔ azɛlɛ ye azo anzɛɛ nyevile zo anzɛɛ baka biala anwo.  Na menwunle anwumabɔvolɛ ko kɛ ɔlɛ tease Nyamenle nzonlɛyɛlɛdeɛ ne ɔvi aduduleɛ ɔlɛfo yeahɔ anwuma; na ɔvale ɛnelɛ kpole ɔdeanle nu ɔvɛlɛle anwumabɔvolɛma nna ne mɔɔ bɛmaa bɛ adenle kɛ bɛzɛkye azɛlɛ nee nyevile la,  na ɔhanle kɛ: “Bɛmmasɛkye azɛlɛ ye anzɛɛ nyevile anzɛɛ mbaka kɔkpula kɛ yɛkɛyɛ yɛ Nyamenle ne ngɛkɛlɛ ne mɔ nzonlɛ wɔ bɛ nwoma azo yɛkɛwie la.”  Na mendele bɛdabɛ mɔɔ bɛzɔ bɛ nloa la dodo, 144,000, mɔɔ bɛzɔ bɛ nloa bɛvi Yizilayɛ abusua ekpunli biala anu la:  Dwuda abusua ekpunli ne anu, bɛzɔle 12,000 anloa;Wulubɛn abusua ekpunli ne anu 12,000;Gaade abusua ekpunli ne anu 12,000;  Ahya abusua ekpunli ne anu 12,000;Nafetalae abusua ekpunli ne anu 12,000;Manasɛ abusua ekpunli ne anu 12,000;  Semɛyɔn abusua ekpunli ne anu 12,000;Livae abusua ekpunli ne anu 12,000;Yesakaa abusua ekpunli ne anu 12,000;  Zɛbulɛn abusua ekpunli ne anu 12,000;Dwosefi abusua ekpunli ne anu 12,000;Bɛngyaman abusua ekpunli ne anu bɛzɔle 12,000 anloa.  Ɛhye anzi menwunle ye, na nea! menli ekpunli kpole bie mɔɔ awie ɛngola bɛ tia, mɔɔ bɛvi maanle maanle nee mbusua nee menli nee aneɛ ngakyile nu la kɛ bɛgyigyi belemgbunli ebia ne nee Boaneralɛ ne anyunlu, bɛwula adɛladeɛ fufule ndendenle; na bɛdedɛ mrɛlakɛ bɛ sa nu. 10  Na bɛvale ɛnelɛ kpole bɛdeanle nu kɛ: “Ngoanelielɛ vi yɛ Nyamenle ne mɔɔ de belemgbunli ebia ne azo nee Boaneralɛ ne ɛkɛ.” 11  Ɛnee anwumabɔvolɛ ne mɔ amuala gyigyi ɛkɛ ɛbɔ ɛyia belemgbunli ebia ne nee mgbanyima ne mɔ nee tease abɔdeɛ nna ne, na bɛbutulebutule bɛ nyunlu aze wɔ belemgbunli ebia ne anyunlu na bɛzonlenle Nyamenle, 12  bɛhanle kɛ: “Amen! Ayɛlɛyelɛ nee anyunlunyia nee nrɛlɛbɛ nee moyɛlɛ nee enililɛ nee tumi nee anwosesebɛ le yɛ Nyamenle ne ɛdeɛ dahuu. Amen.” 13  Na mgbanyima ne mɔ ko bizale me kɛ: “Menli ɛhye mɔ mɔɔ wula adɛladeɛ fufule ndendenle ne la, nwane mɔ ɔ, na bɛvi ni?” 14  Ɔti ɛkɛ ne ala membuale ye kɛ: “Me menle, ɛdawɔ a ɛze a.” Na ɔzele me kɛ: “Menli ɛhye mɔ a vi anwongyelelɛ kpole ne anu a, na bɛkpo bɛ adɛladeɛ ne mɔ nwohyee wɔ Boaneralɛ ne mogya ne anu. 15  Ɛhye ati a bɛwɔ Nyamenle belemgbunli ebia ne anyunlu na bɛlɛsonle ye alehyenlɛ nee aledwolɛ wɔ ye ɛzonlenlɛ sua ne anu a; na Mɔɔ de belemgbunli ebia ne azo la badɛlɛ ye ɛdanlɛsua ne anu wɔ bɛ nwo zo. 16  Ɛhɔne nee nzuhɔne ɛnrɛhu bɛ bieko, ewia ɛnrɛbɔ bɛ anzɛɛ wuluwulu kpole biala ɛnrɛhu bɛ, 17  ɔluakɛ Boaneralɛ ne mɔɔ wɔ belemgbunli ebia ne avinli la banlea bɛ, na ɔbahile bɛ adenle yeahɔ ngoane nzubula nwo. Na Nyamenle bakyikyi bɛ nye anwo monle biala.”

Ɔ Bo Edwɛkɛ