Yekile 3:1-22

  • Nrɛlaleɛ kɔmaa Saadese (1-6), Feladɛlefea (7-13), Lawɔdesia (14-22)

3  “Kɛlɛ kɔmaa Saadese asafo ne anwumabɔvolɛ ne kɛ: Ɛhye a mɔɔ lɛ Nyamenle sunsum nsuu ne nee nwɔlɔra nsuu ne la se a: ‘Meze wɔ gyima kɛ ɛlɛ duma* kɛ ɛde aze noko wɔwu.  Sinza, na miemia ninyɛne mɔɔ ɛha mɔɔ ɛlɛwu la anu, ɔluakɛ meannwu kɛ wɔwie wɔ gyima wɔ me Nyamenle ne anyunlu.  Yemɔti, kɔ zo kakye mɔɔ wɔnyia ye nee mɔɔ wɔde la na di zo, na nu ɛ nwo. Nɔhalɛ nu, saa wɔanzinza a mebara kɛ awule, na ɛnrɛnwu mekɛ holɛ ko ne mɔɔ mebara ɛ nwo zo la ɛlɛ.  “‘Noko, ɛlɛ menli* ekyi wɔ Saadese mɔɔ bɛanyɛ bɛ adɛladeɛ evinli a, na bɛ nee me balua wɔ adɛladeɛ fufule nu, ɔluakɛ bɛfɛta.  Ɔti mɔɔ kɛli konim la, bɛbawula ye tɛladeɛ fufule na menrɛye* ye duma menrɛvi ngoane buluku ne anu ɛlɛ, emomu mebabɔ ye duma wɔ me Ze nee ye anwumabɔvolɛma ne anyunlu.  Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la.’  “Kɛlɛ kɔmaa Feladɛlefea asafo ne anwumabɔvolɛ ne kɛ: Ɛhye a mɔɔ le nwuanzanwuanza, ɔle nɔhavo, mɔɔ lɛ Devidi sanvɛ ne, mɔɔ buke a awie ɛndo nu na ɔto nu a awie ɛmbuke la se a:  ‘Meze wɔ gyima—nea! meva anlenkɛ mɔɔ bɛbuke la mezie ɛ nyunlu, mɔɔ awie ɛngola ɛndo nu. Meze kɛ ɛlɛ tumi ekyi noko ɛlile me edwɛkɛ zo na wɔamkpo me duma.  Nea! Mebamaa bɛdabɛ mɔɔ bɛvi Seetan nyianu sua nu mɔɔ bɛka kɛ bɛle Dwuuma noko bɛnle zɔ na bɛlɛbɔ adalɛ la—nea! mebamaa bɛarahoto ɛ gyakɛ abo na bɛanwu kɛ mekulo wɔ. 10  Kɛmɔ ɛlile me abotane nwo edwɛkɛ ne azo* la ati, mebaye wɔ meavi sɔnea mekɛ mɔɔ bara ewiade amuala arazɔ menli mɔɔ de azɛlɛ ye azo anlea la anu. 11  Melɛba ndɛndɛ. Kɔ zo sɔ mɔɔ ɛlɛ la anu kpalɛ amaa awie anlie wɔ abotile ne. 12  “‘Mɔɔ kɛli konim la—mebayɛ ye pila wɔ me Nyamenle ɛzonlenlɛ sua nu, na ɔnrɛvi ɛkɛ ne ɔnrɛhɔ bieko, na mebahɛlɛ me Nyamenle ne duma yɛɛ me Nyamenle sua ne duma, Gyɛlusalɛm Fofolɛ ne mɔɔ vi Nyamenle ɛkɛ ne wɔ anwuma ɔbadwu aze la, yɛɛ me duma fofolɛ ne wɔ ɔ nwo. 13  Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la.’ 14  “Kɛlɛ kɔmaa Lawɔdesia asafo ne anwumabɔvolɛ ne kɛ: Ɛhye a Amen ne, dasevolɛ nɔhavo nee nɔhalɛnli, Nyamenle abɔdeɛ mɔlebɛbo ne se a: 15  ‘Meze wɔ gyima kɛ ɛnle weɛlɛkɔkɔ yɛɛ ɛnle wuluwulu. Me kunlu a anrɛɛ ɛle weɛlɛkɔkɔ anzɛɛ wuluwulu. 16  Ɔti kɛmɔ ɛle adodɔlera na ɛnle wuluwulu anzɛɛ weɛlɛkɔkɔ la ati, mebave wɔ meavi me nloa anu. 17  Ɛka kɛ, “Mele sukoavolɛ yɛɛ menyia me nwo na mengyia ɛhwee,” noko ɛnze kɛ ɛyɛ anwunvɔne na ɛ nwo yɛ alɔbɔlɛ na ɛle ehyianli, ɛ nye ɛzi yɛɛ ɛlɛ ɛ nwo zɔ, 18  metu wɔ folɛ kɛ tɔ nvutuke mɔɔ bɛva senle bɛdu nuhua la fi me ɛkɛ amaa wɔanyia ɛ nwo, nee adɛladeɛ fufule amaa wɔahola wɔaziezie ɛ nwo amaa ɛ nwo mɔɔ la zo la anla ali na wɔambɔ anyiemgba, na tɔ bɛ nye ayile fa kpokpa ɛ nye amaa wɔanwu debie. 19  “‘Bɛdabɛ mɔɔ mekulo bɛ edwɛkɛ la amuala, metwi bɛ nyunlu na metea bɛ. Ɔti bɔ mɔdenle na nu ɛ nwo. 20  Nea! Megyi anlenkɛ ne anloa melɛbɔ nu. Saa awie te me ne na ɔbuke anlenkɛ ne a, mebara ye sua nu me nee ye arali nɔsolɛ aleɛ na ɔdaye noko ɔ nee me ali debie. 21  Mɔɔ kɛli konim la, mebamaa ɔ nee me adɛnla me belemgbunli ebia ne azo, kɛ mɔɔ menlile konim na me nee me Ze dɛnlanle ye belemgbunli ebia ne azo la. 22  Bɛmaa mɔɔ lɛ ɛnzolɛ la ɛdie mɔɔ sunsum ne ka kile asafo ne mɔ la.’”

Ɔ Bo Edwɛkɛ

Anzɛɛ “wɔlie duma.”
Giliki aneɛ nu, “aluma.”
Anzɛɛ “menrɛkyikyi.”
Anzɛɛ ɔkola ɔkile, “ɛlile me abotane nwo neazo ne anzi.”